ДУНИЯ ХАУХДУ
Ёхдем кёллю, сени кёлюнг тауду
Бараса сен онгсузланы эскермей,
Бу дуния барыбызгъа хаухду
Бир джан къалмаз кёк ёлюмге тюбемей.
Уллу кёллю, тутхан джолунг кенгди,
Умутларынг джети кёкге джетерик,
Алай, джерде барыбызда тенгбиз,
Кёкбет ёлюм саныбызгъа тиерик.
Бёгек кёллю, ёлмезлик болгъанча,
Тюрте, ата, алгъа тюшген, келгенни,
Тоюмсузча муратла салгъанса
Кёрмез кибик кёксюл бетли ёлюмню.
Къыяу кёллю, эки кёзюнг ауду,
Джашайса сен ахыр кюнню эскермей,
Бу дуния барыбызгъа хаухду
Бир джан къалмаз кёк ёлюмге тюбемей.
1990дж. Москва.
КЪАЧХЫ ЧАПРАКЪ БЛА ЧЫГЪАНАКЪ
Къатхан чапракъла бла, къуру чыгъанакъдан,
Созулма ханс бла, къатхан лана сабдан,
Къач деметни этиб, терезеге салдым,
Сора анга къарай, кенге сагъышландым.
Джаз чапракъ джашнай эд, мийик бутагъында,
Лана да чагъа эд, эркин таласында,
Созулма сюе эд, эркин керилирге,
Чыгъанакъ тура эд сюйюмсюз бир джерде.
Алай заман келди, бары тозурады,
Ёлюмню бетине, сюймейин, къарады,
Учхан, джюрюген да къара джерге тюшдю,
Ахыр кюнлеринде тенг болду, бирлешди.
Мийик бутакъдагъы, уллу кёллю болма,
Тюбюндегилеге огъартын къарама,
Аламда хар барлыкъ тенгди бир-бирине,
Бир-бирине байланч, керекли джеринде.
Бир кюн джерге тюшер, учхан, сюркелген да,
Бёджекге тенг болур, кёкде керилген да,
Джер дегенинг-къазан, барын эритиучю,
Джангы кепге салыб, джангы тирилтиучю.
Чапракъ, чыгъанакъ да, бир топракъда да эрир,
Джангы сыфат бла дуниягъа келир…
Аламны шартыды-тугъан, джашау, ёлюм!
Мундан къутулалмаз, не алим, не залим!
1999. Анкара.Турция.
БАХАТДИННГЕ
Ауурлукъ басханды, арыгъанма-дейсе,
Дуниядан тарыгъыб, джандан эзилесе.
Да, къарнашым, бошха, былай сызлагъанса,
Менден себеб излеб, кёзге къарагъанса.
Мен аурлукълагъа, дерсгеча къарайма,
Ала бла чыныгъыб, джолума атлайма,
Аурлукъ аурду, аны ауур кёрсенг,
Андан къоркъуб, бугъуб, джарсыугъа бёленсенг.
Аурлукъ бар эсе-джашаунг да барды,
Аурлукъсуз болгъан, джангыз къабыр тарды.
Джашау ауурлугъу - илеучю санатды,
Бизни кючлендириб, алгъа тюртген затды.
Мырды сууча, тюб-тюз, тургъан джашау неди?
Эрингенден башха бизге не береди?
Зор джашау а, къыйнай, джан чыныкъдырады,
Алай бла да джашар къарыу табдырады.
Келген ауурлукъгъа, джигитча, тюбечи,
Зоргъа тыйыгъы болуб, тамырын эгечи,
Хар джол кесилгенни бирлешдир, джалгъачы,
Ол ышан бла, ёхдем, аллынга къарачы.
Ол заманда санга насыб табыллыкъды,
Хорлам, сени таба, кеси атыллыкъды,
Бютеу адам санга сейир этерикди,
Деменгили, онглу, болумлу дерикди.
Джашау, бюгюлгенни, теблеб кетиученди,
Тирелгенни алгъа, джолгъа тюртюученди.
Ауурлукъ басханды, арыгъанма - деме,
Ачымсыз къадаргъа ийилиб тюбеме.
Бу къысха ёмюрню ахсыныугъа джойма,
Сен алыр орунну, башхалагъа къойма,
Талпыуну, муратны кёлюнгден къурутма,
Джашау-къазауатды, къарнашым, унутма.
Кётюрюлмез джюкню, Аллах, бермеученди,
Джарсыучу, муратха, хазна, джетмеученди,
Санга джюкленгенни сен ташыр кючдесе,
Кеси джазыуунга бош ажым этесе.
2010. Стамбул.Турция.
КЕЧЕГИ САГЪЫШ
Кече къарангысы-алам теренинден,
Кюндюз-Тейри-чакъны, айыкълыкъ кенгинден,
Кече сагъыш – туугъан, ёлген джарсыудады,
Кюндюз сагъыш-джашау, ашау чабыудады.
Джашау –деген, кюнлей, алдай, арытыучу,
Мурат-деген алдан-алгъа тарытыучу,
Сермеш бла эриш, уруш - шартыбызды,
Къысха ёмюр, ачыу, ёлюм - хатыбызды.
Джазыу-деген, кёзбау, алдаб джюрютюучю,
Арытыб, аурутуб, бюгюб, тигилтиучю,
Джер-дегенин, джутар, сингдирир джаныуар,
Бу джорукъ неденди? - билдирмейди къадар.
Туугъан бла ёлюмню арасы – бир атлам,
Неден алай болду? – билги бермейд Алам!
Чирир тёнгегинде, ёлмез джан джюрютген,
Адам-джарлы, сенсе, джюрекни инджитген!
2008.Элванкент.Турция.
