ДЖАШАУУНДА ДЖЫГЪЫЛМАГЪАН АДАМ БОЛМАЗ
(анамы дерслеринден)
Джашауунда джыгъылмагъан адам болмаз,
Бири-джылар, бири-сынар, бири-турмаз,
Бир башха уа, тирелир да, ёрге къобар,
Юсге-башха джабышханны, къагъыб атар.
Джылаучула, болушлукъну сакълагъанла,
Болмайдыла хорлам джолну башлагъанла,
Ала, тая, хынчыу, джунчуй, абынганлай,
Джашайдыла башхалагъа табынганлай.
Джашау деген, тикге тартхан, ёрлешиудю,
Кюнлерибиз, тер акъдыргъан, кюрешиудю,
Ынгычхаучу тёрде орун алалмайды,
Энчи джолгъа, кеси ызын салалмайды.
Санынг сынса, джюрек кюч бла тирелликсе,
Джюрек сынса, Аллахдан кюч тилериксе,
Зоргъа тюшсенг, сый сындырмай, чегериксе,
Эсеб этиб, къутулур джол излериксе.
Бир заманда джазыкъсыныу излемегиз,
Керекли зат болмаса да, тилемегиз,
Джау бла джауча турушургъа кёлленигиз,
Игилеге, ашхылагъа тенгленигиз.
Алайды да, гитчеликден иленигиз,
Джанны, санны къатдырыргъа юренигиз,
Ёмюр деген, ачымасыз сынаучуду,
Болумсузну юсю бла атлаучуду.
Джан аурутуу-адамны баш танымыды,
Къарыусузгъа ёкюл болуу, сынамыды.
Миллетине бала болгъан, алгъышлыкъды,
Деулетине керти болгъан, айтхылыкъды.
2012.
