ХАЛКЪЫМА
Уллуну улууу ауур
Таушу кенге кетер,
Улутханлагъа дауур,
Айыб эм налат джетер.
Уллусун улутхан – джагъым,
Башхагъа байракъ тутар!
Уллунгу улутма, халкъым,
Тарих атынгы джутар!
2000. Черкесск.
БЕГИЙ УЛУ АБДУЛЛАХНЫ ТУУГЪАН КЮНЮНЕ
Адамлыкъ бла фахмунг бирге ёрюлген,
Хар ишингде асыллыгъынг кёрюнген,
«Алтын къалам»-деб айтырча, джазгъанынг,
Хар джюрекге джетер кибик, айтханынг.
Адебинг бла юлгю болур, къыйылгъан,
Учхарадан кери тургъан, тыйылгъан,
Фахмунг бла башхалагъа эс берген,
Къыйыкъ затны, юсюн джабмай, терс кёрген.
Малкъар халкъны унутулмаз адамы,
Къарачайны, джан юлюшлю, уланы,
Тюзню айтыр кюч табыучу, бёгексе,
Джарлы халкъгъа сен ёкюлсе, керексе.
Аллах сени узун ёмюр джашатсын!
Сен сюйгенни, барын, джазлай джашнатсын!
Ауруу сенден узакъ болсун, тиймезлей!
Насыб сени тутар болсун, иймезлей!
Кюнде кюнюнг къуанч бла арытсын!
Ёмюрюнгю алам чагъы джарытсын!
Алгъышлайма сени Туугъан Кюнюнгю!
Кёб джылны джай дуниягъа нюрюнгю!
19.10.2015.
ДУНИЯ МАЛГЪА ДЖАН АТХАН ТЕНГИМЕ
Джер кеси да, тенгим, хауада турады,
Тотур урху бла бурулуб барады.
Ёмюрлюк – дер кибик, аламда не барды?
Бюгюнгю деу тауунг, тамбласында – джарды!
Не зат барды ёлмей, тюрленмейин турлукъ?
Ким аталыр Джерге ёмюр ёсер урлукъ?
Ёмюр деген-тар джол, къыйыры - батыуду,
Дуния малгъа талпыу – керксиз чабыуду.
Андан эсе, рахат, кюнню джашасанг а,
Игилик этиу бла бюсюреу алсанг а!
Биргебизге кетер – талай къарыш къумач,
Садакъа бла дуа болур анга байланч.
Кимге азыкъ болур джыйгъан хазналарынг?
Алтынынг, кюмюшюнг, санаусуз малларынг?..
Алам чархын бурад, санаун санайды,
Заманы толгъанны, таймай, джагъалайды.
Биз бирер бюртюкбюз, уллу алам чакъда,
Не магъана барды "джашау" деген затда?..
Дуния малгъа быллай бир нек джан атаса?
Быллай бир, не ючюн, къайгъыгъа батаса?
Нек эзесе джанны, джалгъан дуния ючюн?
Нек сыраф чачаса джанынгы чакъ кючюн?
Кел, хар кюнню сюйюб, анга къуанайыкъ,
Болушлукъ керекге, джетиб, болушайыкъ.
Бюсюреу бла дуа – керти байлыкъ олду,
Башха затынг, бары – магъанасыз джолду.
Умут сынырсызды, Алам ачымсызды,
Бизден Джерде къаллыкъ – бир адамлыкъ ызды!
1994. Нью-Йорк. Ричвуд.
АЙТМА МАНГА!..
Айтма манга малдан, мюлкден,
Мелхумлукъдан, кудретлиден!
Бары бошду, ийнан анга!
Сау чыкъдынгмы бюгюн танга,
Анга къуан, сюйюн, учун...
Ёмюр деген - тар учурум!..
Ёлюм деген – джутар- джутхун!..
Айтма манга джуукълукъдан,
Ол аз такъыл суукълукъдан,
Заман бла ол азалыр,
Эски джибча халыланыр,
Бу дуньяда хар зат учхун:
Ёмюр деген -тар учурум!..
Ёлюм деген – джутар -джутхун!..
Айтма манга сюймекликден,
Таралыудан, кюймекликден!..
Сюймеклик деб бир зат джокъду,
Сезим учуб кетген окъду.
Хар зат бошду, болмаз тутхум!
Ёмюр деген - тар учурум!..
Ёлюм деген – джутар - джутхун!..
Айтма манга шохдан, тенгден,
Насыб кюнден, игиликден!..
Шох, тенг десенг чалдыу салыр,
Насыб, асхай, джолда кхъалыр,
Бир къуанч да болмаз тургъун!..
Ёмюр деген – тар учурум!..
Ёлюм деген – джутар- джутхун!..
Айтма манга тёрден, тархдан,
Джарсыу берген эшик артдан,
Къалайгъа да ёлюм кирир,
Къалайда да джан берилир,
Къалайда да сан уулхун...
Ёмюр деген – тар учурум!..
Ёлюм деген – джутар -джутхун!..
Кюнлерибиз - чабхан, джортхан,
Джашаубуз - къан тер акъгъан,
Магъанасыз хар ишибиз,
Зарлыгъыбыз, эришибиз!
Джашау джолу – учхан учхун!
Ёмюр деген – тар учурум!..
Ёлюм деген – джутар джутхун!..
2010. Анкара. Турция.
НЕК ДЖАРАТЫЛДЫКЪ?..
Ишексиз, барды магъана
Сынырсыз болгъан Аламда,
Бу Джер юсюнде джашауда,
Тюрлениу, ёлюу, тууууда.
Бирлешмез хар зат, бирлешген,
Келишмез хар зат келишген,
Аламны тутхан бу тюзен,
Бизге джан урху юлешген,
Неден къурулду, керилди-
Бизге да, хаухха, берилди?
Кёб тёлю соруу соргъанды,
Алай джуабсыз къалгъанды.
Биз да къалыкъбыз джуабсыз,
Кетерик болуб, амалсыз.
Ишексиз, барды магъана
Бизни бар этген Аламда,
Алай ол сырны ким ачар?
Алам ташасын ким чачар?
Тёлюле келиб, кетиучю…
Джашаугъа ажым этиучю…
2010. Анкара.
