ДЖУРТУМА АЧЫУ

Суу бокъланса, кири башха чыгъыучанды,

Кърал къатышса, аман орун алыучанды,

Булбул кетсе, кёкге къаргъа  чыгъыучуду,

Къакъ-къакъ эте, джырчы болуб джырлаучуду.

Алай болду, ата джуртум,  ахсынырлай,

Болумлугъа джол джабылды, тыкъсынырлай,

«Малинала» джайылдыла деулетиме,

Джарашалмай аны ариу келбетине.

Джукъ айтханлай, асылсызла, аууз ачыб,

Кир иннетни, кир сёзлени кенге чачыб,

Эзеу болуб, тамгъа салыу, тамаллашды,

Гылчы, бетсиз,  ётюрюкчю шогъайлашды.

Бусагъатда тюзню айтхан, тилиниучю,

Терсге къуллукъ этгенинг а, керилиучю,

Терсни ачхан-къаллы джауча, терслениучю,

Джарлы халкъ да, не этерден терсейиучю.

Тёзюм джокъду, тарбашланы кемлигине,

Къымгъычланы,  гыл ишинде, итлигине,

Фахмусузну фахмулугъа чабханына,

Асылсызны асыл орун алгъанына!

Тёзюм джокъду, болмазланы болгъанына,

Джуртуму да  чарт-гуртладан толгъанына,

Тёзюм джокъду, мындан ары, бу туруугъа-

Бизни тартыб, эмиб баргъан батыуулгъа.

2016.