На днях у Віцебскім дзяржаўным універсітэце імя П.М. Машэрава адбылася чарговая літаратурная сустрэча. Сярод сталічных гасцей былі такія пісьменнікі, як Анатоль Казлоў, парадыст Анатоль Зэкаў, паэт Алесь Бадак, а таксама іншыя супрацоўнікі выдавецтва “ЛіМ”.

Цікавасць у студэнтаў выклікала як работа крыткаў і публіцыстаў, так і погляды пісьменнікаў на сучасны літаратурны працэс, іх уласная літаратурная творчасць. Бо звычайнаму студэнту цяжкавата не разгубіцца сярод імёнаў новага пакалення беларускіх аўтараў. Што чытаць, каго чытаць, што папулярна (адразу ўзгадваецца артыкул Ірыны Лобан у “НС” за 26 ліпеня пад назвай “Чытайце сваё!”). Тое самае раілі і сённяшнія “заканадацелі мод”. А таксама зачыталі шэраг уласных вершаў, у прыватнасці Алесь Бадак і Тамара Краснова-Гусачэнка, старшыня Віцебскага абласнога аддзялення Саюза пісьменнікаў Беларусі.

“На дэсерт” пакінулі парадыста і паэта Анатоля Зэкава, які, хоць, па яго словах, і “прывык са сваім прозвішчам сядзець”, даволі вальготна адчуваў сябе за трыбунай. Ён падзяліўся з аўдыторыяй не толькі добрым настроем, пародыямі на таленавітых паэтаў, але і нумарам хатняга тэлефона.

З усёй сустрэчы вынікае асноўная думка: перш чым самім уключацца ў літаратурнае жыццё і пачынаць пісаць, да чаго заклікалі госці з Мінску, трэба ведаць, хто ўключыўся ў гэтае жыццё да цябе.