В среду ваий, на утрени

Днесь Лазарь умерый погребается, и рыдание поют сего сродницы, якоже провидец и Бог, страсть предрекл еси: Лазарь успе, учеником провещая, но ныне иду воскресити егоже создах. Сего ради Тебе вси вопием: слава державе крепости Твоея
(Седален по 3-м стихословии).

Днесь Лазарь умерый, не утаися всевидящаго ока Иисусова. Темже сказует сие учеником, вопия: Лазарь друг наш успе, воскресити его иду.

Лазарь днесь умерый износится, друг Христов, и рыдают сущии с Мариею и Марфою вси: Христос же радостию приходит к нему, показати людем, яко Той есть живот всех.

Надгробныя слезы изливают Лазаревы сестры, зрящия сродника днесь под каменем горьким: Христос же мой издалеча сие сказуя, глаголаше апостолом Своим, радуюся вас ради, не бех бо плотию тамо.
(Из тропарей трипеснца.)