Молитвослов

Честному и Животворящему Кресту Господню

Акафист

Кондак 7

   Хотя явити роду человеческому благости и милосердия Своего неизследимую пучину, Крест Твой, Господи, дал еси нам тверда блюстителя и прогонителя демонов. Темже вси мы, иже в Тя верующии, прославляем величие страсти Твоея, благодарно поюще Тебе: Аллилуиа.

Икос 7

   Дивны дела явил еси, Господи, Крестом Твоим Честным: распеншуся бо Ти на том плотию, вся тварь изменися: солнце лучи своя сокры, основания земли восколебахуся, ад сокрушися державою власти Твоея и изведе юзники, яже от века содержал есть. Сего ради увязаем той сими песненными цветы: Радуйся, Кресте, яко пострадавшему на Тебе вся тварь сострадаше, яко Творцу своему и Владыце; радуйся, яко силу Того и божество свидетельствоваху солнце помрачением и земля колебанием. Радуйся, яко Умерый на тебе не удержан бысть в мертвых, но, разрушив державу смерти, в третий день воскресе; радуйся, яко воскресшу Тому проповедь евангельская, от лика апостольскаго наченшаяся, во вся концы земли изыде. Радуйся, Кресте, яко тобою кумирослужение и многобожие языческое упразднися; радуйся, яко тебе ради правая вера во Единаго Бога, в Троице славимаго, по всей земли утвердися. Радуйся, Честный Кресте, всерадостное знамение нашего искупления.

"Сошествие во ад" (Андрей Рублев).

*******