Дни памяти святых

Благоверный царевич Димитрий, Угличский и Московский

дни памяти: (1591) 15 мая ст.ст. (28 мая); 23 мая ст.ст. (5 июня) и 3 июня ст.ст. (16 июня).

   Святому страстотерпцу благоверному царевичу Димитрию молятся о прозрении очей.

*******

Молитвослов

Святому благоверному царевичу Димитрию, Угличскому и Московскому чудотворцу

Молитва

   О святый мучениче, благоверный царевичу и княже Димитрие!

   Яко агнец незлобив от раба заколенный, венцем царским от Господа венчался еси, и сын царев быв, мученик непобедим явился еси, и вместо земных и тленных на Небеси нетленное восприял еси.

   И ныне предстоя в радости Святей Троице, посещай творящия верно твою светоносную память, соблюдай отечествие твое и град твой невредим, тому бо еси утверждение, утверди православных жительство в мире глубоце, междоусобную брань укроти, и вся полезная даруй всегда людем твоим молитвами твоими, да верою и любовию вопием ти: радуйся, святе Димитрие, верных людей теплый заступниче и прибежище и земли Российския украшение. Аминь.

Тропарь, глас 4

   Царскую диадиму обагрил еси кровию твоею, Богомудре мучиниче, за скиптр Крест в руку приим, явился еси победоносец и жертву непорочну Владыце принесл еси себе: яко бо агнец Святей Троице, молися о державе сродников твоих богоугодней быти и сыновом Российским спастися.

Ин тропарь, глас 2

   Яко благочестиваго корене Боголюбивый произыде плод, яко агня незлобиво, неповинно во младенстве заклан бысть от властолюбца вкупе и злаго раба. Тем, яко златыми крылы, душевною чистотою и младенческим незлобием к Небесной высоте возлетел еси, страстотерпче Димитрие. И ныне кровь твоя от земли тайно вопиет к Богу, яко Авеля праведнаго. Сего ради покланяемся верою ти, славяще прославльшаго тя Бога. Егоже моли стране нашей богоугодней быти и сыновом русским спастися.

Ин тропарь, глас 1

   Всеоружеством Духа благодати вооружен был в необорим столп и утверждение отечеству своему показался, яко агнец незлобивый, от врага неправедно закла был и в жертву непорочну Господеви принесеся. И ныне дар благодати от всех Подвигоположника прием, источаешь всем исцеление, достохвальне благоверный царевиче княже Димитрие. Слава Восприимшему тя от земных в Небесная, слава Венчашему тя венцем неувядаемым, слава Действующему тобою всем исцеление.

Кондак, глас 8

   Возсия днесь в славней памяти твоей верным веселие, яко бо доброрасленный грези, прозябл еси и Христу красен плод принесл еси себе; темже и по убиении твоем соблюде тело твое нетленно, страдальчески обагренное кровию Благородне святе Димитрие, соблюдай отечество твое и град твой невредим, тому бо еси утверждение.