Молитва о жене перед родами
ко Господу Иисусу Христу

Господи Иисусе Христе Боже наш, от превечнаго Отца рожденный Сыне прежде век, и в последния дни, благоволением и содействием Святаго Духа, изволивый рождену быти от Пресвятыя Девы яко младенцу, повиену и положену во ясли, Cам Господи, в начале сотворивый человека и жену спрягий ему, заповедь дав им: раститеся и множитеся и наполните землю, помилуй по велицей милости Твоей рабу Твою (имя) готовящуюся родити по заповеди Твоей. Прости ей вольныя и невольныя грехи, благодатию Твоею даруй ей силу благополучно разрешитися от бремене своего, сохрани сию и младенца во здравии и благомощии, огради я ангелы Твоима и сохрани от неприязненнаго действия лукавых духов, и от всякия вещи злыя. Аминь.

Молитва о жене рождающей,
ко Пресвятой Богородице

Пресвятая Дево, Мати Господа нашего Иисуса Христа, Яже веси рождение и естество матере и чада, помилуй рабу Твою (имя) и помози в час сей, да разрешится бремене своего благополучно. О Всемилостивая Владычице Богородице, яже не потребовала еси помощи в рождении Сына Божия, подаждь помощь сей рабе Твоей, помощи требующей, наипаче же от Тебе. Даруй ей благомощие в час сей, и младенца иже имать родитися и внити в свет мира сего, сподоби в благопотребное время и умнаго света во святем Крещении водою и Духом. Тебе припадаем, Мати Бога Вышняго, молящеся: буди милостива Мати сей, ейже прииде время быти материю, и умоли Воплотившагося из Тебе Христа Бога нашего, да укрепит ю силою Своею свыше. Аминь.

Молитва Божией Матери в честь Ея иконы
«В родах Помощница»

О Пресвятая Богородице, Мати наша милосердная! Яви на нас, в печали сущих и во гресех всегда пребывающих рабех Твоих (имена), милость Свою и не презри нас, многогрешных рабов Своих.

К Тебе прибегаем, Пресвятая Богородице, многое множество сознавая прегрешений наших и молимтися: посети немощствующия наши души и испроси у возлюбленнаго Сына Твоего и Бога нашего дати нам, рабам Твоим (имена), прощение. Едина Пречистая и Благословенная, все упование наше на Тя возлагаем: Премилосердная Мати Божия, сохрани нас под покровом Своим.

Молитва о благополучном разрешении

О, Преславная Матерь Божия, помилуй непраздную рабу Твою (имя), прииди к ней на помощь во время ея болезней и опасностей, с которыми рождают чад все бедные дщери Евы. Вспомни, о Благословенная в женах, с какою радостью и любовию Ты шла поспешно в горнюю страну посетить сродницу Твою Елисавету во время ея беременности, и какое чудесное действие произвело благодатное посещение Твое в матери и в младенце. И по неисчерпаемому благосердию Твоему даруй и рабе Твоей, разрешиться от бремени благополучно; даруй ей сию благодать, дабы дитя, покоящееся теперь под ея сердцем, пришедши в чувство, с радостным взыгранием, подобно святому младенцу Иоанну, поклонялось Божественному Господу Спасителю, Который из любви к нам, грешным, не возгнушался и Сам стать Младенцем. Неизглаголанная радость, которою преисполнилось девственное Твое сердце при воззрении на новорожденного Твоего Сына и Господа, да усладит скорбь, предстоящую рабе Твоей среди болезней рождения. Жизнь мира, наш Спаситель, рожденный Тобою, да спасет рабу Твою от смерти, пресекающей жизнь многих матерей в час разрешения и да причтет плод чрева ея к числу избранных Божиих. Услыши, Пресвятая Царице Небесная, смиренную мольбу нашу и призри на сию рабу Твою оком Твоея благодати; не постыди упования нашего на Твое великое милосердие и осени ю. Помощница христиан, Исцелительница болезней, да сподобится и раба Твоя испытать на себе, что Ты ― Матерь милосердия, и да прославит всегда Твою благодать, не отвергающую никогда молитвы бедных и избавляющую всех, призывающих Тебя во время скорби и болезни. Аминь.