О, святый мучениче Уаре досточудный! Ревностию по Владыце Христу разжигаем, Небеснаго Царя пред мучителем исповедал еси, и о Нем усердно пострадал еси, и ныне Церковь почитает тя, яко прославляемаго от Владыки Христа славою Небесною, Иже дарова тебе благодать великаго к Нему дерзновения, и ныне предстоиши Ему со Ангелы, и в Вышних ликуеши, и зриши ясно Святую Троицу, и светом Безначальнаго Сияния наслаждаешися. Воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными (имя), потщися испросити оным от вечныя тьмы избавление, да вси едиными усты и единем сердцем восхвалим Премилосердаго Творца во веки веков. Аминь.
КАНОН МУЧЕНИКУ УАРУ:
Тропарь. Глас 4.
Мученик Твой Господи Уар, во страдании своем венец прият нетленный от Тебе Бога нашего. Имея бо крепость Твою непобедимую мучащих упраздни, и сокруши бесом немощная шатания. Того молитвами Христе Боже спаси душа наша.
Другии тропарь. Глас 4.
Воинством святых страстотерпец страдавших законне, зря онех, показал еси мужески крепость свою и устремивея на страсть волею. И умрети вожделе за Христа, иже приял еси почесть победы Твоего страдания Уаре моли спастися душам нашим.
Слава и ныне. Богородичен. Иже от века утаенное и ангелом несведомое таинство. Тобою Богородице земным явися Бог, в неразместне снятии воплощаем. И крест волею нас ради восприим. Имже воскресив первозданнаго, и спасе от смерти душа наша.
Глас 8. Песнь 1. Ирмос.
Вооружена фараона погрузи, чюдотворяи древле, Моисейскии жезл крестообразно прорази, и раздели море. Израиля же бежаща пеша ходяща спасе, песнь Богови возсылающа.
Запев. Святыи мучениче Уаре, моли Бога о нас (поклон). Умолен буди Господи святым Уаром, и облецыся в милость и щедроты, они бо свет нам и веселие, и велелепота Твоя Владыко. Сия и до ада да излиются Человеколюбче, и ущедрят иже от нас приносимыя богатным к Нему милосердием.
Запев. Мучениче Христов великии, озлобленных и безпомощных бедами умилися, воспомяни седящих во мраце тмы непросветимыя, и не остави припадая к щедрому Господу. Дондеже утешит я богатным милосердием Си.
Слава. О роде Клеопатры дикими умолити возмогл еси славный страстотерпче, убо и днесь возмоган возможеши свободити от муки иже от нас воспоминаемыя, аще прилежно о них ко Господу помолишися. Тебе ради утешит их Владыка богатным Си милосердием.
И ныне. Богородичен. Безпомощным Благия Помощнице, призри от славы Своея Владычице, во мрачностех адовых, и виждь беда умиленных пред Тобою нами воспоминаемых, и не престай умоляя Своего Сына щедраго Господа и Владыку. Дондеже ущедрит я богатным Си милосердием.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).
Господи помилуй (трижды с поклонами).
Песнь 3. Ирмос.
Утвержеи небеса в начатце разумом, и землю на водах основавыи, на камени мя Христе церковнем утверди. Яко несть свята паче Тебе Человеколюбче.
Запев. Лик святых сил небесных подвигни с собою на молитву мучениче, и сотвори дело велико и пречюдно и честно, паче же радость не имущим утешения, ни уповающим горьким родителем, и яже с ними воспоминаемым, еже даровати им от Господа прощение и велию милость.
Запев. Изрядный страстотерпче и Христу любимыи, увеждь, коль желательна свобода мучимым и отрада. Сице убо наша сродники и иже с ними неверия ради вечныя муки притяжавшия, меры не обрящют своим радостем, аще испросиши сим от Господа прощение и велию милость.
Слава. Уаре добропобедныи страдальче, милостив буди и к нашим молением, зря утружденных несказанную нужду, и сам от жалости понужден неотступно моляся к Человеколюбцу Владыце, да подаст им прощение и велию милость.
И ныне. Богородичен. Всемирная Надежда, богоприятное Селение, наше к Богу примирение, Марие Владычице, приими прошение настоящего предстояния, моляся к Сыну Своему и всяческих Господу, да подаст безнадежным прощение и велию милость.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Седален. Глас 4.
Аще молишися за весь мир мучениче, не преставши прося всем милости, всяким сущим всеобразно преступившим, и люте Владыце досадившим, и выну досаждающим. Иже мертвыми делы себе доконца уморившим. И ничтоже от мертвых уньших. Яко во зло успевающим, такожде страстотерпче предстани и о наших умерших сродниках. Яко возможная не отступи моляся и милующему всех Господу, да простит и помилует иже во тме седящия, люте зело огорченный.
Другии седален. Глас 3.
Радости вечныя насельниче и небесному покою тезоимените Уаре великии, дерзая да дерзнеши воспоминаемый пред Господем, умиленныя наши прародители. Аще бо и не во гробех оных молим тя, усердным же прошением, в жалости еже о сих совокупляем. Тем же припади и помолися, не отринет их Владыка предстояти от безмерныя твоея милости. Послет преогорченным избавление и велию милость.
Слава и ныне. Богородичен. Пресвятая Госпоже от небесных сил воспеваемая, выну возвеличимая, Мати Царя всяческих. Где убо и когда хощет умножитися Твоя слава и величество; не тогда ли, егда грешныя заступавши, и весь мир молитвами Своими покрывавши. Темже умножи Владычице велелепоту Твоего превосхождения: избави теплыми Ти молитвами от лютых мук наши сродники, и яже с ними воспоминаемыя нами. Подаждь оным избавление, и велию милость.
Песнь 4. Ирмос.
Ты ми Христе Господь, Ты же и сила ми, Ты ми Бог, Ты ми радование: не оставль недра Отча, но милостию Си нашу нищету посети. Тем с пророком Аввакумом зову, силе Твоей слава Человеколюбче.
Запев. Вельма убо страстотерпче всех любиши верою к тебе притекающих, тем же и любим быти от молящих тя поспешися, чтоже ино с желанием славити тя сотворит, в прочем ни ли просимыя милости умиленным и всякия отрады лишенным вечным узником впрочем. О доблии, не оскудей, о сих моляся.
Запев. Зима люта и спасения безплодие облежит в нечестии умершия, и плач без отрады, зде убо во чтении суть иже от нас воспоминаемыя. Ты же страстотерпче соединитися к роду Клеопатры дивныя моля не оскудей о сих моляся.
Слава. Адова мрачная темница во веки да не обымет прародители наша, и вся иже воспоминаемыя с ними в нашем разуме, тебе дивному страдальцу, силу неверия и греховную немощь низложивша, и прочее и сих иже Клеопатрины прости, не оскудей доблии мучениче моляся.
И ныне. Богородичен. Тобою Пречистая познахом славити всех Содетеля, и от Тебе Плотоносца непрелесна и Спаса величати навыкохом. И Тя Богородицу хвалим, и Тебе покланяемся (поклон) и молим: помилуй в неверствии умершия наша сродники. Еже избавити сих, не оскудей к Сыну Си моляся.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).
Господи помилуй (трижды с поклонами).
Песнь 5. Ирмос.
Вскую мя отрину от лица Твоего Свете не заходяи, покрыла мя есть чужая тма окаяннаго, но обратив мя и к свету заповедей Ти, пути моя направи молютися.
Запев. Всяко дарование мучениче, и всяка милость от Всемилостиваго Господа изливается. Аще и предивны суть, слагаемы прощению сему в поганстве умерших Величество преизящно сему оставляет. Тем же днесь сотворити потщися Владыку мучениче умолити.
Запев. Не отвратися Господи от нашего умиления, ниже помяни множество грехов наших. Паче же помяни древния Своя милости, и ради щедрот Твоих, и ради Уара добляго страдальца. Не оскудей в богатстве безмернаго Ти милосердия. Но излей милость и прощение от нас воспоминаемым.
Слава. Есть убо мучениче, и достизает человеколюбия Владычне, и сущим в море далече, темже предстани и днесь, и припадая умоли Его, еже помиловати умершия сродники, и всем иже с ними воспомянутым даровати прощение и велию милость.
И ныне. Богородичен. Предстани Владычице нашему изнеможению, буди в нуждах Помошнице нам всюду и присно. Ты бо еси християном надежда и упование. Тем же не отрини наша прошения, но сотвори совершена и исполнена несказанном Ти благодатию милость.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 6. Ирмос.
Очисти мя Спасе, многа бо беззакония моя, и из глубины зол возведи мя, молюся, к Тебе бо возвах и услыша мя, Боже спасения моего.
Запев. Шатание вражие да не возрадуется, в корысть получивше себе, неверия ради прародителей и сродников, Ты же умоляй Господа, еже простити и нами воспоминаемых. И от вечных мук избави.
Запев. Начало нашему подвигу Клеопатрина рода прощение, отсюду убо виновное восприяхом возставити тя на молитву о еже с нами поминаемых. Не презри мучениче, и не отрини грешных предстояния. Потщися испросити у Владыки Христа оным от горьких мук избавление.
Слава. Иже неверия ради срете конец зол и чаяние благих весьма погибе, прогневания Божия. Ты же страстотерпче дерзновение прием, радость отпущения вместо страшнаго томления от Небеснаго Царя испроси и извед от горести соблюди во Владычней милости.
И ныне. Богородичен. Которая Владычице злоба превозмогательна явится Твоим Матерним молитвам; Воистину убо аще предстанеши и днесь моля за просимыя Ти от нас. Припадая убо весьма сотвориши оным радостное прощение и избавление, и велию милость.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).
Господи помилуй (трижды с поклонами). Слава и ныне.
Кондак. Глас 4.
Христу последуя мучениче Уаре, Того испив чашу и венцем мучения увязеся со ангелы ликовствуя, моли непрестанно за душа наша.
Икос.
Воспомяни наша глаголы светлыи жителю небесныи, Христов славный мучениче Уаре, вечному покою тезоименитыи и великими ти страдании непроходимое и светлое покоище приобретыи. От непроходимыя темницы и томления непрестаннаго и нужды, потщися богоприятными ти молитвами избавити рабы умиленныя, за них же молим тя предстояще, во усердии взывающе: исполни наша прошения святе, и Христа Бога моли непрестанно за душа наша.
Песнь 7. Ирмос.
Божия схождения огнь устыдеся в Вавилоне древле. Сего ради отроцы в пещи радованною ногою, яко во свете ликоваху поюще, благословен Бог Отец наших.
Запев. Яко солнце Господи всем равно просвещавши, и дождь независтно изливавши, и прогневавшим Тя непрестанно даруеши, и ныне послушай Уара Твоего страдальца, и пролей милость доконца отчюжденным сродником нашим, и яже онех неверных Человеколюбче.
Запев. Ныне яко же и прежде щедр буди Господи, и умолен буди Владыко, якоже о Клеопатре содея, сице и о нас Милостиве сотвори, и посли Своя щедроты и милосердие ко иже нами воспоминаемым. Источник бо еси милости неисчерпаемый.
Слава. Аще пророк возрадуясл поет милости Твоя Господи, вовеки убо неоскудевша в щедротах верует, яко милосердия Ти предстоянием излияти за просящих Тя уповаем. Исполни убо ради мученика Си, о Владыко наш.
И ныне. Гору Тя сказует Премудрый во пророцех. Мы же Тому и еже от Тебе каменю Богорождении, изыти без примешения мужеска, иже наше спасение из глубин адовых возведение получихом Владычице, возведи и днесь от ада воспоминаемыя нами, да Тя Всемилостивую непрестанно величаем.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 8. Ирмос.
Мусикийским органом согласящым, и людем без числа кланяющимся, телу сушу на молебнем, трие отроцы песнославяху, Господа пойте и превозносите Его во веки.
Запев. Дары да будут словеса древняя Твоя Господи, сказующия. И нашу надежду воздвижущия, яко послушал еси святыя Твоя Господи. Еже помиловати неверныя умершия, они же днесь совостают на молитву Ти, да прощени их ради ущедриши инославно умершия, ведением и неведением Тебе Владыко досадившия.
Запев. Агньче Божии Пречистою Ти кровию нас искупивыи, Феклину и блаженнаго Григория молитву услышал еси. Мефодия со многими и Макария прием прошения, и отраду и избавление подав умершим, и Златоустаго о сих молитися написати воздвигнув, приими убо Владыко с ними и славнаго Уара, молитвами их воспоминаемыя от нас прости и помилуй.
Слава. Радость испроси мучениче, возвеселимся аще обрящем твоими молитвами избавление от вечных мук наша сродники. Всегда бо молитву твою услышит и прошение исполнит. Ты же убо не оскудей и ныне о сих моляся, да тя присно прославляем.
И ныне. Богородичен. Пренепорочная Владычице, обилуй множеством милосердия щедрот, дивная и безневестная Мати Царева, нам бо милости изливающю, где сию обрящем, аще не к Тебе поспешим припадающе. Ты бо еси поток сладости преизобилен нам породила еси благословенная.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 9. Ирмос. Удивися убо о сем Небо, и земли ужасошася концы, яко Бог явися человеком плотию, чрево же Твое бысть пространнее небес, тем Тя Богородице, ангел и человек чиноначалия величаем.
Запев (с поклоном). О Бозе возможеши Уаре славный, богоприятными ти молитвами, восприяти и излияти милости, иже доконца оным отчюжденным. Един бо щедр и милости Родитель, вся ему возможна яко Владыце. К Нему же неотступно страдальче молися простити и помиловати иже от нас воспоминаемыя.
Запев. Дело соверши предивно мучениче. И славе твоей прикладно, еже от Господа прощение, и праведнаго Его гнева применения испросити, огорченным темнаго ради зловерия, нашим прародителям. И в горести и во ожидании лютейших сущих, в безстрашное избавление идеже весть Владыка огорченныя введет.
Слава. И кое убо чюдо явится сего древнейши, и кая слава знаменитейше, которое милосердие таковаго есть больши, аще ты мучениче соскорбев си умолити милостиваго Господа, отпустити грех нечестия иже от нас поминаемым, и лютаго томления оных избавити.
И ныне. Богородичен. Владычице милостивая и человеколюбивая и незлопомнивая, приими жалость нашего прошения, и ходатайствуй неотступно к милостивому Ти Сыну и Владыце, еже помиловати и простити всех, во инославии умерших сродников наших, яже с ними поминаемым отпущение, и место сим милости, неотъемлемо подати во веки.
Катавасия. Избави от бед рабы своя святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).