ПЕРЕД НАЧАЛОМ ВСЯКОГО ДЕЛА

Господи Иисусе Христе, Сыне Единородный Безначальнаго Твоего Отца, Ты рекл еси пречистыми усты Твоими: яко без Мене не можете творити ничесоже. Господи мой, Господи, верою объем в души моей и сердце Тобою реченная, припадаю Твоей бла­гости: помози ми, грешному, сие дело, мною начинае­мое, о Тебе Самом совершити, во имя Отца и Сына и Святаго Духа. Аминь.

ПО ОКОНЧАНИИ ВСЯКОГО ДЕЛА

Исполнение всех благих Ты еси, Христе мой, ис­полни радости и веселия душу мою и спаси мя, яко Един Многомилостив. 

    ПРИ ВОЗЖЕНИИ ЛАМПАДЫ

Господи, возжги угасший светильник души моея и светом добродетели просвети мя, Твое создание, Творче и Благодетелю мой.

МОЛИТВА ПЕРЕД ЧТЕНИЕМ
СВ. ПИСАНИЯ И ВООБЩЕ
ДУХОВНО-НРАВСТВЕННЫХ КНИГ

Господи, Иисусе Христе, отверзи ми очи сердечнии услышати слово Твое, и разумети, и творити волю Твою, яко пришлец есмь на земли: не скрый от мене заповедей Твоих, но открый очи мои, да разумею чудеса от закона Твоего: скажи ми безвестная и тай­ная премудрости Твоея. На Тя уповаю. Боже мой, да ми просветиши ум и смысл светом разума Твоего: не токмо чести1 написанная, но и творити я, да не в грех себе жития и словеса святых прочитаем, но во обновление, и просвещение, и святыню, и в спасе­ние души, и в наследие жизни вечныя. Яко Ты еси просвещаяй лежащих во тьме, и от Тебе есть всякое даяние благо, и всяк дар совершен.

ПО ВХОДЕ ВО СВЯТОЙ ХРАМ

Покланяюся Тебе, Господу Богу моему, присут­ствующему благодатию Твоею во святем храме сем, изряднее же в Пречистых и Животворящих Тайнах;

Тебе, Истинному Христу Спасителю моему, колена сердца моего преклоняю. Покланяюся и Твоей Пренепорочней Матери, Пречистей Госпоже Деве Марии, Богородице, Помощнице, Заступнице, Ходатаице и единой Надежде и Упованию спасения моего. Почи­таю святаго Ангела, слугу Твоего, хранящаго Боже­ственный Олтарь Твой, и вся святыя Твоя, на ико­нах изображенныя и мощми почивающия, любовию лобызаю и молю Тя, Благаго Владыку моего: да бу­дут уши Твои выну внемлюще гласу молитвенному людей, молящихся Тебе во святем Твоем сем храме; почившия же у него помяни в Небесном Твоем Цар­ствии, презирая вся согрешения их, яко Благ и Ми­лостив во веки. Аминь.

ПЕРЕД УЧЕНИЕМ

Преблагий Господи, низпосли нам благодать Духа Твоего Святаго, дарствующаго и укрепляющаго душевныя наша силы, дабы внимая преподаваемому нам учению, возрасли мы Тебе, нашему Создателю, во славу, родителям же нашим на утешение, Церк­ви и Отечеству на пользу.

ПОСЛЕ УЧЕНИЯ

Благодарим Тебе, Создателю, яко сподобил еси нас благодати Твоея, во еже внимати учению. Благо­слови наших начальников, родителей и учителей, ведущих нас к познанию блага, и подаждь нам силу и крепость к продолжению учения сего.

ПЕРЕД ПРИНЯТИЕМ ПИЩИ

Отче наш, иже еси на небесех!..(см. выше)

Или: Очи всех на Тя, Господи, уповают, и Ты даеши им пищу во благовремении, отверзаеши Ты щедрую руку Твою и исполняеши всякое животно благоволения.

ПОСЛЕ ПРИНЯТИЯ ПИЩИ

Благодарим Тя, Христе Боже наш, яко насытил еси нас земных Твоих благ; не лиши нас и НебеснагоТвоего Царствия; но яко посреде учеников Твоих пришел еси, Спасе, мир даяй им, прииди к нам и спаси нас.

Достойно есть яко воистинну блажити Тя, Бого­родицу, Присноблаженную и Пренепорочную и Ма­терь Бога нашего. Честнейшую Херувим и славней­шую без сравнения Серафим, без истления Бога Слова рождшую, сущую Богородицу Тя величаем.