Боже, великий и дивный, каяйся о злобах человеческих, возводяй низверженныя и утверждаяй ниспадающия, призри милостивным Твоим Оком на Отечество наше Российское и народ наш, и сокруши благодатию Твоею жертву беззаконную, на земли Российстей бесовом приносимую и избави ны от насильства безбожник и богопротивнаго ига сатанинскаго, от еретик осквернения и нечестивых инородцев и супостатов попрания. Да сокрушатся и разорятся во Отечестве нашем все престолы и вертепы сатанистов и чернокнижников, колдунов и обаятелей, магов и гадателей, содомитов и деторастлителей, осквернителей и совратителей, соблазнителей и растлителей народа нашего. Яко исчезает дым, да исчезнут; яко тает воск от лица огня, тако да погибнут беси и вся нечисть и мерзость сатанинская от лица Святой Руси и народа Божия. Запрети наглой нечисти, пожени их бурею Твоею и гневом Твоим смути их, блесни молния и разжени я, исполни лица их безчестия, да постыдятся и смятутся в век века, да посрамятся, и силою судеб Твоих гордость их да сокрушится, Имя же Твое Святое да прославится в нас, недостойных, и во Отечестве нашем Российстем и во всех людех Твоих. Но Долготерпеливе и Многомилостиве Господи! Уповая на Милосердие Твое крайнее, смиренно молю Тя презренный раб Твой: яко не презрел еси мя блуднаго Щедре и не погубил еси до конца в пучине беззаконий моих, но милостивно избавил от сетей диавольских, обратив мя безумнаго к покаянию, тако аще кого от заблудших овец Твоих Блаже, возможно спасти, их же имена Ты Сам Седцеведче Господи веси, спаси, обрати и избави от работы вражия милости ради Твоея. Аминь.