АКАФИСТ О УПОКОЕНИИ УСОПШИХ


Кондак 1.
Непостижимым промыслом к вечному благу мир уготовляй, определивый всем время и образ кончины, прости, Господи, согрешения от века усопших, прими их в обители света и объятия Отца, отверзи им милостивно, услыши нас, память их совершающих и поющих: Господи, Любовь неизреченная, помяни усопших раб Твоих!

Икос 1.
Адама падшего и весь род человеческий от вечной погибели спасаяй, Ты послал, Блаже, в мир Сына Твоего, крестом и воскресением Его воссияла нам жизнь вечная. Уповая на безмерное Твое милосердие, ожидаем нетленного царства славы, просим усопшим нашим даровати его и молимся Тебе:
Господи, возвесели души измученных житейскими бурями, да забудут они скорби и воздыхания земные.
Господи, утеши их на ложе Твоем, якоже матерь утешает чада.
Господи, скажи им: прощаются вам грехи ваши.
Господи, прими их в Твое блаженное тихое пристанище,отверзи чертоги ангелов и святых, да возрадуются они о Божественной Славе Твоей.
Господи, Любовь неизреченная, помяни усопших раб Твоих!

Кондак 2.
Озарением Всевышнего просвященный, преподобный Макарий услышал глас от черепа языческого: когда вы молитесь о страждущих во аде, тогда язычникам бывает отрада. О дивная сила молитв христианских, ими преисподняя озаряется. С верными и неверные утешение приемлют, когда мы всем миром поем:
Аллилуйя.
Икос 2.
Памятуя слово Исаака Сирина, глаголющего: «Сердце милующее и о людях и о животных на всяк час со слезами молится, дабы сохранилися и очистилися», сего ради и мы со дерзновением просим у Господа помощи всем от века усопшим:
Господи, изглади им забвенные грехи;
Господи, помяни всех, без молитвенного напутствия погребенных;
Господи, прими в Твое селение внезапно умерших от горя или радости;
Господи, ниспошли преставившимся мир и покой о Духе Святе;
Господи, Любовь неизреченная, помяни усопших раб Твоих.

Кондак 3.
Мы повинны в бедствиях мира, в страданиях бессловесных тварей, в болезнях и муках непорочных детей, ибо грехопадением людей разрушено блаженство и красота творения. О, величайший из невинных страдальцев, Христе Боже наш, Ты один властен простить всем. Прости и возврати миру древнее благоденствие, да и мертвые и живые покой обрящут, взывающее:
Аллилуйя!

Икос 3.
Орле небесный, осеняй крылами любви Твоея весь мир; Свете Тихий, искупителю вселенныя, слышахом вопль Твой со креста вразех: «Отче, прости им». И во имя Твоего всепрощения дерзаем молитися Отцу о вечном покое Твоих и наших врагов:
Господи, прости проливших неповинную кровь;
Господи, прости осыпавших скорбями путь наш;
Господи, прости иже устрояли благоденствие свое на слезах ближнего;
Господи, не осуди гнавших нас клеветою и злобою;
Господи, воздай милостию всем обиженным и оскорбленным нами;
Господи, да будет сия молитва о них таинством примирения;
Господи, Любовь неизреченная, помяни усопших раб Твоих.

Кондак 4.
Спаси, Господи, скончавшихся в тяжелых мучениях: убиенных, погребенных живыми, удушенных землею, поглощенных водою и огнем, растерзанных зверями, умерших от глада и мраза, от падений с высоты, и за скорби их даруй им вечную радость Твою, да благословят время страданий своих, яко день искупления, воспевающее:
Аллилуйя!

Икос 4.
Всем, от них же отъял еси житие во светлой юности, всем, им же дал еси на земле венец терновый страданий, Ты воздаждь за гробом лучами Твоея бесконечныя любве.
Господи, прими в чертоги райские усопшие отроки и девы;
Господи, сподоби их ликований на вечери Сына Твоего;
Господи, умягчи скорбь родителей об утрате чад;
Господи, упокой вся одинокия, не имеющия ближних, молящихся о них;
Господи, даждь мзду умершим под тяжким бременем трудов;
Господи наш, услади их сладостью Духа Святаго Твоего;
Господи, Любовь неизреченная, помяни усопших раб Твоих.

Кондак 5.
Яко последнее средство к вразумлению и покаянию рода человеческого, Ты, Господи, даровал еси смерть, от ея же страшного зрака обнажается земная суета, утишаются стремления плоти, смиряется непокорный разум, открывается правда вечная, сего ради и утверждении в безбожии на смертном одре исповедуют бытие Твое, Предвечный, и к Твоему милосердию зовут:
Аллилуйя!

Икос 5.
Отче всякого утешения, Ты озаряеши солнцем, услаждаеши плодами, веселиши красотами мира и други и враги Твоя. Веруем, яко и за гробом в вечности не истощается милосердие Твое, милующее отверженных всеми грешников, сего ради зовем:
Господи, смилуйся над уловленными гибельным неверием;
Господи, да будет спасительная воля Твоя над хулителями святыни;
Господи, не познавшие Тя на земле, да познают на небеси;
Господи, спаси погубивших себя в помрачении ума;
Господи, да угаснет пламень нечестия в море благости Твоея;
Господи, победителю ада, избави от осуждения преставившихся;
Господи, Любовь неизреченная, помяни усопших раб Твоих.

Кондак 6.
Страшен мрак души, удалившейся от Бога, страшны терзания совести, скрежет зубовный, неугасимый огонь и червь неусыпный. Трепещу и себе тогожде воздаяния и о себе молюся и о страдающих во аде, да снидет к ним росою прохлаждения наша песнь:
Аллилуйя!

Икос 6.
Гдк бы воссиял свет Твой, Христе Боже, аще не на сидящих во тьме и сени смертней. Сниди паки в преисподняя земли и изведи во отраду разлученные с Тобою грехами, но не отрекшиеся Тебе. Во имя Сына и Святаго Духа помолимся Богу Отцу за сущие во аде души:
Господи, чада Твоя страдают, помилуй их;
Господи, тяжки суть грехи их, но сильнейше милосердие Твое;
Господи, помяни я, яко послал еси Сына Твоего грешники спасти;
Господи, да будет кровь Сына Твоего источником жизни для ныне поминаемых;
Господи, посети горькую нищету душ, удалившихся от Тебе;
Господи, помилуй гнавших истину по неведению;
Господи, Любовь неизреченная, помяни усопших раб Твоих.

Кондак 7.
Хотя умершим руку помощи подати, разрешил еси им, Господи, в сониих и видениих к живым являтися и на молитву их вдохновляти, да поминают отшедшия и творят в их память добрыя дела и зовут с надеждою:
Аллилуйя!

Икос 7.
Церковь Христова по всей вселенней на всяк день возносит молитвы о почивших, и грехи мира омываются чистительной Кровию Божественного Агнца. От земли к небеси восходят души усопших и молитвы за них всегда пред алтарями святыми.
Господи, да будет умершим ходатайство церкви лествицею к небеси;
Господи, помилуй их предстательством Пресвятыя Девы и всех святых;
Господи, очисти их ради верных, вопиющих день и ночь;
Господи, ради незлобных младенцев, прости родителей;
Господи, слезами матери искупи грехи чад;
Господи, за невинность страдальцев, за кровь мучеников пощади грешников;
Господи, Любовь неизреченная, помяни усопших раб Твоих.

Кондак 8.
Весь мир священный гроб есть, понеже на всяком месте лежит прах братий наших и отец, сотворенных по образу Божию и единокровных наших по Адаму. Едине неизменне нас возлюбивый, прости вся от начала и до ныне умершие, да поют Тебе бессмертной любви:
Аллилуйя!

Икос 8.
Се день грядет великий и страшный последнего суда, в онь же обнажатся тайны человеческие и откроется книга совестная. Примиритеся с Богом прежде онаго суда помози нам,Господи, и слезами живых восполни недостающее умершим:
Господи, да будет им звук трубы ангельской благовестием спасения;
Господи, в час суда сподоби их всерадостного помилования;
Господи, увенчай славою страдавшие Тебе ради и ближних;
Господи, даждь радование Твое очищенным грозою бед земных;
Господи, вéдущий вся по имени, помяни в монашеском и мирском чине спасающихся;
Господи, прими пастырей благоговейных с духовными чадами их;
Господи, Любовь неизреченная, помяни усопших раб Твоих.

Кондак 9.
Благословляйте скоротекущее время. Кийждо час, кийждо мгновение приближают нас к вечности. Новая скорбь, новая седина — вестница суть грядущего мира, свидетелями тленности земного возвещающие яко все, все минует, яко приближается вечное царство, идеже несть ни слез, ни воздыхания, но отрадная песнь:
Аллилуйя!

Икос 9.
Яко древо осенью помалу оскудевает от листвия своего, тако и жизнь наша кийждо лето клонится к оскудению. Праздник юности увядает, угасает светильник радования, близится отчуждение старости. Умирают други, удаляются ближние. Где вы, иже первее юнии, радостнии, счастливии? Безмолвны гробы, души же их в деснице Твоей суть.
Господи, солнце светлое, озари и согрей селения усопших;
Господи, сподоби ны радостного свидания на небесех, да минует навсегда горькое время разлуки;
Господи, сотвори, да вси едино будем с Тобою;
Господи, возврати отшедшим детскую чистоту и юное благодушие;
Господи, да будет им вечная жизнь праздником светлопасхальным;
Господи, умягчи нашу скорбь об усопших надеждою сретения с ними в небесном Сионе;
Господи, Любовь неизреченная, помяни усопших раб Твоих.

Кондак 10.
Накрапляют слезы, яко тихия капли дождя, на гробы наших сродников и молимся с надеждою, взываем с упованием. Прорцы нам, Господи, аще Ты простил еси им; прорцы, аще приемлеши их в обители света. Даждь таинственное откровение духу нашему, да воспоем:
Аллилуйя!

Икос 10.
Обращаю очи мои вспять на протекший путь жития и вижду множество людей, уже усопших от первого дне моего и до ныне, послуживших ми во благо, о них молюся и долг любви воздав, взываю:
Господи, помилуй вся доброжелатели моя и благодетели;
Господи, воздаждь мзду бдевшим над моей младенческой колыбелью;
Господи, спаси благовествовавшие ми слово Твое;
Господи, прослави перед ангелы научившие мя любити Тя;
Господи, даждь отраду наставлявшим мя святыми образы жития своего;
Господи, услади сокровенною манною послужившие ми в тяжкие дни;
Господи, Любовь неизреченная, помяни усопших раб Твоих.

Кондак 11.
Смерть, где твоя сила? Где твои мрак и страхования? Ты еси от ныне желаема, ты сочетаеши неразлучно с Богом, ты еси великий покой, ты еси таинственное субботство. Тем же взирающее убо на смерть, яко на путеводительницу к жизни вечной, зовем:
Аллилуйя!

Икос 11.
Воскреснуь мертви и восстанут сущие во гробех и вси земнородные возрадуются. Кости сухие, слышите слово Господне: Облекайтесь плотию, восставайте от седых времен минувших вы, искупленные кровию, вы, оживленные смертью Его, над вами воссия воскресение!
Господи, яви усопшим вечную весну нетления;
Господи, Ты сиял еси им светом солнечным и тишиною луны;
Господи, да узрят они славу и веселие ангельских ликов;
Господи, ты услаждал еси их красотою восхода и заката солнечного;
Господи, да лицезреют они сияние вечного Твоего блаженства;
Господи, да просветятся души усопших, яко звезды утренней зари;
Господи, Любовь неизреченная, помяни усопших раб Твоих.

Кондак 12.
Плоть и кровь царствия Божия не наследует; доколе во плоти живем, отлучены есмы от Христа. Аще не умрем, не оживем для вечности. Подобает бо тленному телеси облещиться в нетление и мертвенному просияти бессмертием, и тако во свете невечернего дня воспоем:
Аллилуйя!

Икос 12.
Чаем радостотворного сретения с Господом, чаем зари воскресения, веруем в пробуждение во гробех ближних наших, торжествуем грядущее преображение всея твари и Воссоздателю нашему поем:
Господи, создавый мир к торжеству духовному, восстави ны из глубины греховныя к святости;
Господи, даждь умершим радоватися посреде обновленного бытия;
Господи, да воссияют они, яко светила небесныя в день славы Твоея;
Господи, соедини умершия с живыми в нескончаемой радости;
Господи, даждь и нам с ними праздновать пасху нетления;
Господи, не разлучайся с рабы Твоими;
Господи, Любовь неизреченная, помяни усопших раб Твоих.

Кондак 13.
О, Премилосердый, безначальный Отче, всем хотяй спастися, Сына к погибающим ниспославый и Духа Животворящего изливый, помилуй, прости, спаси наши ближния и вся от века усопшия и предстательством их посети нам, да вкупе с ними воспоем Тебе, Спасителю Богу, победную песнь:
Аллилуйя, Аллилуйя, Аллилуйя.

Молитва.
Боже духов и всякия плоти, смерть поправый, и Диавола упразднивый,и живот миру Твоему даровавый! Сам, Господи, упокой души усопших раб Твоих: святейших патриархов, преосвященных митрополитов, архиепископов и епископов, в священническом церковном и монашеском чине Тебе послуживших, создателей святого храма сего, православных праотец, братий и сестер, зде и повсюду лежащих; вождей и воинов, за веру и отечество жизнь свою положивших, верных, убиенных в междуусобной брани, утонувших, сгоревших, на морозе замерзших, растерзанных зверями, без покаяния внезапно скончавшихся и не успевших примириться с Церковью и со своими врагами, в исступлении ума самоубиенных, тех, о которых заповедали и просили нас молитися, о которых некому молитися, и верующих, лишенных христианского погребения, (поминайте здесь имена всех ваших близких усопших) в месте светлее, в месте злачнее, в месте покойнее, отнюдуже отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благий человеколюбец Бог прости, яко несть человек, иже жив будет и не согрешит. Ты бо един кроме греха, правда Твоя — правда во веки, и слово Твое — истина. Яко Ты еси воскресение, и живот, и покой усопших раб Твоих (имена), Христе Боже наш, и Тебе славу воссылаем со Безначальным Твоим Отцем и Пресвятым и Благим и Животворящим Духом Твоим, ныне и присно и во веки веков.
Аминь.