Господи Боже наш, Великий и Многомилостивый !

Во умилении сердец наших смиренно молим Тя : призри милостивным оком Твоим на люди Твоя. Ты веси беды наша, зриши озлобления, слышиши рыдания наша, стенания нищих людей Твоих ! Помози нам, Боже, Спасителю наш, умилосердися над Отечеством нашим, Твой мир и Твою любовь и всепрощение даруя нам. Помяни веру и смирение отец наших, услыши теплыя моления Святых угодников Твоих, в земли нашей просиявших, помилуй землю Русскую, утоли раздоры и нестроения, отжени от нас зависти и рвения, убийства, пианства и кровопролития ; умири сердца, страстьми обуреваемыя. Избави, Господи, град сей и всю страну нашу от огня, меча, нашествия иноплеменных и междоусобныя брани. Восстани в помощь нашу, с небесе посли силу Твою.

Силою Креста Твоего укрепи Христолюбивое воинство наше и избави я от всякого навета вражия.

Воздвигни нам мужей силы и разума, укрепи, умудри и благослови я, и возглаголи в них благая о Церкви Твоей Святой и о всех людех Твоих. Огради, Господи, и защити силою Твоею в напасти сущую Святую Твою Церковь, отпадших и заблудших примири, и к познанию Твоея истины и Евангелия приведи.

Всем же нам подаждь Духа премудрости и страха Божия, Духа крепости и благочестия. Господи, к Тебе прибегаем, научи нас творити волю Твою, яко Ты еси Бог наш, яко у Тебе источник жизни. В свете Твоем узрим свет. Пробави милость Твою ведущим Тя. Да якоже древле, тако и ныне в земли нашей и в нас и во всем мире Твоем прославится имя Твое, Отца и Сына и Святаго Духа.

АМИНЬ