Dianae sumus in fide
Puellae et pueri integri:
Dianam pueri integri
Puellaeque canamus.

O Latonia, maximi
Magna progenies lovis,
Quam mater prope Deliam
Deposivit olivam,

Montium ut domina fores
Silvarumque virentium
Saltuumque reconditorum
Amniumque sonantum.

Tu Lucina dolentibus
Iubo dicta puerperis,
Tu potens Trivia et notho es
Dicta lumine Luna.

Tu cursu, dea, menstruo
Matiens iter annuum
Rustica agricolae bonis
Tecta frugibus exples.

Sis quocumque tibi placet
Sancta nomine, Romulique,
Antique ut solita es, bona
Sospites ope gentem.