[показать]

Старославянский вариант молитвы.Молитва сильная,снимает практически любую порчу,ежели читаете с истинной верою.

"Молитва Святаго Священномученика Кипріана.

Боже сильный, Святый Сынъ, Царь царствующимъ и Господъ господствующимъ, неприкосновенный небеснымъ силамъ, егоже ужасаются всяческая, егоже нигдѣже и никтоже видѣти можетъ, емуже тысяща тысящами и тмы1) тмами святыхъ ангелъ и архангелъ предстоятъ. Ты вѣси тайная сердца раба твоего, яко, не познавшу тебѣ первѣе, потворныхъ сія непріязненная дѣла держахъ: облакъ еже не одождитъ, древа садовная, еже плода имъ не творити, еже не родити, а иныя не зачинати рости; на огражденіе винограда токмо отверзохъ рости, творяхъ, еже не цвѣсти имъ, такоже и класомъ хлѣбнымъ, еже не прозябати и плода не творити, и рыбамъ морскимъ, еже имъ не плавати, и птицамъ, не летати; и прости всяко чародѣйство дѣяхъ: вси лукавы бѣси работаху мнѣ. Сія вся дѣлъ ради своихъ и грѣховъ многихъ, и нынѣ убо, Господи, Боже, сильный и великій, благоволивый отъ недостойна достойну ми быти и сопричаститися святому твоему стаду, и преестественнымъ величествомъ милосердовавъ о мнѣ, и не восхотѣ погубити со беззаконными моими, знаема мя сотвори быти, связавый мя любовію своею твоей вѣрѣ, не омерзи мене, грѣшнаго и недостойнаго раба твоего; припадаю бо, прошу пресвятое имя твое о всякомъ дому и о всѣхъ православныхъ христіанехъ, иже страждутъ отъ чародѣйствъ лукавыхъ человѣкъ льстивыхъ или отъ бѣсовъ, идѣже прославится имя твое святое и призовутъ имя мое именемъ твоимъ, или прочтется молитва сія надъ которою главою, или въ дому его, яко да разрѣшится отъ всякія пакости и одержанія, и отъ зависти, злаго устрѣнія и дѣйственнаго отравленія, и язычнаго яденія. И кто убо держать будетъ сію молитву во своемъ дому, да будетъ соблюденъ отъ всякаго ухищренія и потвора, и отравы лукавыхъ и ближнихъ сосѣдъ, да бѣжатъ отъ него бѣсове, зліи дуси, и да отступитъ отъ него всяко мечтаніе бѣсовское. Грсподи, Боже, ты область имаши небеснымъ и земнымъ; ради имени твоего великаго и ради несказанныя твоея благодати, ради единороднаго Іисуса Хруста, услыши мя недостойнаго раба твоего въ часъ сей: идѣже аще прочтется житіе мое или молитва сія, да разрѣшится, яко воскъ тающе отъ огня, тако лукаваго ухищренія и всякаго вреда человѣческаго или животнаго, или винограднаго имѣнія1) ихъ малыхъ и великихъ во имя живоначальныя Тройцы да будутъ просвѣщеніи суть и разрѣшени и развѣ Тебе иного Бога не знаемъ. Якоже отъ камени Моисею воду источилъ еси жезломъ израилевымъ, тако Ты2), Боже силенъ, положи руку твою державную и сильную, святую, полну благословенія дому, имущему сію молитву. Яко насадилъ еси рай во Едемѣ и отъ того исходятъ твоимъ повелѣніемъ четыре рѣки: Геонъ, Фисонъ, Тигръ и Ефратъ въ тихости и адамскій человѣкъ не можетъ удержать, яко да не могутъ чародѣйственная дѣла или ловленіе бѣсовское апостольская удержати запрещенія, еже има азъ разрѣшихъ и разрѣшаю, прогнахъ и прогоняю противная, злая, отъ злыхъ человѣкъ пущена и лукавыхъ бѣсовъ — отъ раба Божія, имя река, призывающаго мя именемъ твоимъ отъ всего имѣнія его, яко же умножилъ еси лѣто Іезекію царю, тако да умножится вся земная и духовная имущему сію молитву служенію ангелъ, пѣніемъ серафимскимъ Благовѣщеніе пресвятыя Богородицы отъ архангела Гавріила плотьскаго ради зачатія Сына Божія, Бога нашего Іисуса Христа, славнаго ради рождества его въ Виѳліемѣ, засланіемъ младенецъ отъ Ирода, святаго ради крещенія, воспріятіемъ во Іорданстѣй рѣцѣ, постомъ постѣ (?), искушеніемъ отъ діявола, ужасныя его побѣды на враги, ужаснаго суда его, ужасныхъ чудесъ его, иже въ мірѣ бывшихъ, исцѣленіе даруя, прокаженныхъ очищая, мертвыя оживляя, бѣсы изгоняя, иже во Іерусалимъ входъ его, осанна сыну Давыдовъ (такъ!), младенцемъ вопіющимъ ти, страсти ради распятія и погребенія, и изъ мертвыхъ воскресенія1), и еже на небеса вознесеніе, пѣніе тмы тмами ангелъ и архангелъ, славы восходнаго твоего восхожденія, пѣснословія, втораго и страшнаго пришествія твоего, власть ея же далъ еси святымъ твоимъ ученикомъ и апостоломъ, рече: „имже держите — держится, и елико2) аще разрѣшите на земли, будутъ разрѣшеніи на небесѣхъ. Ради бо сихъ именъ и ради силы твоея заклинанаю и прогоняю духи лукавыхъ, аще убо въ небеси или на земли, или на пути, или на распутіи, или во истоцѣ, нли въ рѣцѣ, или въ корени, или въ кровли, или во дворѣхъ3), или во оконцѣ, или въ верхнемъ порозѣ, или въ нижнемъ, или въ корени, или въ вѣтви, и да разрѣшенно будетъ на полѣ, въ нивахъ или въ виноградѣхъ, или въ вертоградѣхъ, или въ ямахъ, или въ травѣ, или4) въ пещи, или въ бани, или въ капищи идольскихъ, или въ кожи рыбной, или въ кожи зміиной, или во власѣхъ брадныхъ, или во главѣ, или во главномъ убрусѣ, или во зголовіи, или въ постели, или во обрѣзаніе ногтей ручныхъ и ножныхъ, или во обувеніихъ, или въ златѣ, или въ сребрѣ, или въ мѣди, или въ свинцѣ, или въ оловѣ5) и желѣзѣ, или въ воску, или въ кости, или во лбу человѣческомъ или звѣриномъ, или въ морскихъ рыбахъ, или въ животныхъ морскихъ, или земныхъ животныхъ, или въ летающихъ по воздуху движимыхъ и недвижимыхъ, или въ хартіи, или въ чернилѣ, или въ нѣкоторой оной вещи и отъ студа затворены, да разрѣшатся. Аще ли есть писано въ седмидесятихъ двухъ языцѣхъ, да разрѣшатся, понеже азъ разрѣшихъ и разрѣшаю тако Лукасуса, Марасалуна, Малуремираха, Ниона погнахъ и еще прогоняю; имена Тихіа, Сихахіа и Елизду, и протчія, иже отъ человѣческаго рода самихъ ся и предавшихъ въ бѣсы — и сіи да разрѣшатся, да изыдутъ отъ раба Божія, имя рекъ, Твоимъ повелѣніемъ, Господи, и отъ дому его, имущему молитву сію святую, и отъ всего имѣнія его малаго и великаго силою чеснаго и животворящаго креста и молитвъ ради пречистыя твоея матери, владычицы нашея, Богородицы, и молитвъ ради святыхъ небесныхъ силъ, херувимъ и серафимъ, престолъ, грозныхъ воинствъ, силъ, началъ и властей, ангелъ и архангелъ, и святыхъ праведныхъ патріархъ Авраама, Исаака, Іякова, Мельхиседека и Іова; молитвою Іисуса Навина, иже солнце ста на многъ часъ; молитвъ ради пророкъ и апостолъ, и мученикъ, и мученицъ, святителей, священія человѣкъ, преподобныхъ отецъ и преподобныхъ женъ, и святыхъ исповѣдникъ, и безсребренникъ; молитвъ ради трехъ сотъ и осьмидесяти перваго собора и поручниковъ нашего покаянія Василія Великаго и Григорія Богослова, Іоана Златоустаго и Николы Чуднаго, и всѣхъ угодившихъ молитвами — да прогонятся, да удавится всяка злоба и лукавство, и зависть, и ревность, и удержанія, и зло глаголаніе, и язычное яденіе, и всѣ, что дѣянная злыхъ человѣкъ всякое совѣщаніе, да отдалится отъ раба Божія, имя река. Молитвъ ради пречистыя твоея Матери помилуй и спаси раба своего или рабу, имя река, да не прикоснется къ нему и къ дому его ни кое зло, ни зависть, ни чародѣйства, ни разбойства, ни бѣда, ни болѣзнь, ни какое зло, ни лукавство, ни во утренній день, ни вечерни, ни въ нощи, ни въ полунощи и во вся дни живота его, яко ты еси Богъ нашъ и милуя, и спасая. И Тебѣ славу возсылаемъ“. Отцу и Сыну, и Святому Духу, и нынѣ, и присно, и во вѣки вѣковъ. Аминь."

Сдревле харти свитка отодама лѣта 70411) подписалъ многогрѣшною рукою молитву сію инокъ Глѣбъ Галицскаго уѣзда Богородскаго стану.

Адаптированный вариант.Начитывают на воду и дают порченому.

Начинаем глаголати молитву Священномученика Киприана, во дни или в нощи, или в кой час упражняешися, вся силы сопротивнаго от славы Бога Живаго отпадут.

Сей Священномученик, всей душею моляшеся Богу глаголах: "Господи Боже Сильный и Святый, Царь царствующих, ныне услыши молитву раба Твоего, Киприана".

Тебе предстоят тысяща тысящь и тьма тьмам Ангел и Архангел, Ты веси тайное, сердца раба Твоего (имя), предстани ему Господи, яко во узах Павлу и во огне Фекле. Тако, познати мне, Тебя, аз бо первый творях вся беззакония моя.

Ты, держах облак, и небо неодождих древа садовняго, и то плод нетворих. Непраздным женам переждати, и иным зачатия недах. На ограждение пертограда токмо взирах, и нетворих. Розге не цвести и класу непрозябати; Винограду неродити, и зверям неплождатися. Рыбам морским неплавати и птицам небесным летати возбраних. Тако, Ты показал силу Свою при пророце Илие.

Молю Тя, Господи Боже мой; вся чародейства, и вся лукавыя бесы ко греху человека клонях и на нем грех творях, Ты, силою Своею, запрети! Нынеже, Господи Боже мой, Сильный и Великий, благоволивый от недостойного, достойному мне быти, и сопричастному Святому Твоему стаду, молю Тя, Господи Боже мой, кто имать молитву сию в дому или при себе, сотвори ему просящее ею.

Пресвятым Величеством Своим, милосердовах на мне и не восхоте погубити мя со беззакониями моима; тако непогуби всякого молящего Тя молитвою сиею.

Непрочнаго в вере, утверди! Безсильного духом, укрепи! Отчаянного, вразуми и не отверзи всякаго прибегающего к Твоему Святому имени.

Яже, припадая к Тебе Господи, молю и прошу святое имя Твое: во всяком доме и на всяком месте наипаче на православном христианине яже имеется чародейство кое от лукавых человек или от бесов, да прочтется молитва сия над главою человека или в дому и да разрешится от связания злыми духами в зависти, лести, ревности, ненависти, злопомучении, злоустрашении, действенном отравлении, от языческаго ядения и от всякаго заклинания и клятвы.

Кто убо стяжав молитву сию во своем дому да будет соблюден от всякаго ухищрения диавольского, потвора, отравы злыми и лукавыми человеками, от заклинаний и всякаго колдования и чародеяния, и да бежат от него бесы и да отступят злые духи. Господи Боже мой, имеяй власть на небеси и на земли, ради имени Твоего Святаго и ради несказанныя благости Сына Твоего, Бога нашего Иисуса Христа, услыши в час сей недостойного раба Твоего (имя), яже чтет молитву сию и по ней да разрешится вся диавольская козни.

Яко тает воск от лица огня, тако да погибнут вся чародеяния и заклинания лукавския от лица человека чтущаго молитву сию. Яко имя, Живоначальныя Троицы, нам просвещение суть, и разве Тебе, инаго бога не знаем. Тебе веруем, Тебе поклоняемся и Тебя молим; защити, заступи и сохрани нас, Боже, от всякого лукаваго действа и чародейства злых человек.

Яко же Моисеовым сыновам из камени сладку воду источил еси, такожде, Господи Боже Сил, положи руку Свою на раба Твоего (имя), полную благости Твоея и защити от всякаго кознодейства.

Благослови, Господи, дом в нем же да пребывает молитва сия и всякаго чтущаго память мою, Милость Свою пошли ему, Господи, и защити его от всякаго чародеяния. Помощником и покровителем ему буди, Господи.

Четыре реки: Фисон, Геон, Евфрат и Тигр: эдемский человек не может удержати, тако не может никакой чародей ставления дел или мечтаний бесовских являти пред чтением молитвы сия, заклинаю Богом Живым! Да сокрушится демон и прогонится вся противная и злая сила, пущенная от злых человек на раба Божия (имя).

Яко умножил лета Иезекию царю, тако умножи и лета имущему молитву сию: службою Ангел, пением Серафимским, благовещением Пресвятыя Девы Марии от Архангела Гавриила и безплотнаго ради зачатия Ея, Господа нашего Иисуса Христа, славного Рождества Его в Вифлиеме, закланием от Ирода царя четыре на десяти тысящь младенцев и Святого Крещения его воспринятым во Иордановой реке, постом и искушением еже от диавола, ужасныя Его победы и ужаснейшего суда Его, ужаснейших чудес Его в мире бывших: исцеление и очищение даруяй. Мертвых оживляяй, бесы изгоняяй и во Иерусалим вход Его, яко Царя исполняй: - "Оссаина Сыну Давидову - от младенец вопиющих Ти, слышай" Святыя Страсти, Распятие и Погребение терпя, и иже в третий день Воскресению бысть якоже писано есть, и на небеса восхождение. Пение тамо многочисленных Ангел и Архангел, славя восход Его, иже одесную Отца сидения до второго пришествия Его судити живых и мертвых.

Власть дал еси святым учеником Твоим и Апостолом, рекий им: "Держите и держатся - решите и разрешатся", тако и всякому по молитве сей, разреши всякое диавольское чародейство над рабом Твоим (имя).

Ради бо Святаго Великаго имени Твоего заклинаю и прогоняю вси дуси лукавыя и злыя и очеса злых человек и чародейства их наговоры, колдовство, глазную порчу, чародеяния и всякое ухищрение диавольское. Молю Тя, Многомилостиве Господи, отведи от раба Твоего (имя), и от дому его, и от всякаго стяжания его.

Яко же умножил богатство праведному Иову, тако, Господи, умножи домашнее житие имущему молитву сию: созданием Адамовым, жертвою Авелевой, благовещанием Иосифовым, святостию Еноха, правдою Ноя, обращением Мелхисидека, верою Авраама, святостию Иакова, пророчеством Пророков, святынею Патриархов, кровию Священномучеников, закланием Петра и Павла, детством Моисея, девством Иоанна Богослова, священством Аарона, действом Иисуса Навина, святостию Самуила, дванадесятью колен Израилевых, молением Пророка Елисея, постом и ведением Пророка Даниила, проданием Иосифа прекрасного, Премудростию пророка Соломона, силою ста шестидесяти Ангел, молением Честнаго Славнаго Пророка и Крестителя Иоанна и сто на десять Святителей второго собора, святых исповедников и споручников страшнаго несказаннаго имени Твоего Святаго, Всеславного Всевидца Бога, Ему же предстоят тысяща и тьма Ангел и Архангел. Молитв их ради молю и прошу Тя, Господи, прогоняй и одолевай всяку злобу и лукавство от раба Твоего (имя), и да бежит оно в тартар.

Молитву сию возношу Единому и Непобедимому Богу, яко да подобает всем человекам православным спасение в дому том, в нем же имеется молитва сия, еже писана в семидесяти двух языцех и да разрешится по ней всякое лукавство; или в мори, или при пути, или в источнице, или в кладязе; или в верхнем порозе, или в нижнем; или позади, или спереди; или в стене, или в крове, всюду да разрешится!

Да разрешится всякое диавольское наваждение в ходу, или в стану; или в горах, или в вертепах, или в претворах домовых, или в пропастех земных; или в корене древа, или листиях растений; или в нивах, или в садах; или в траве, или в кусте, или в пещи, или в бане, да разрешится!

Да разрешится всякое лукавское деяние; или в коже рыбьей, или в плотской; или в коже змеиной, или в коже человеческой; или в украшениях нарядных, или в уборах головных; или в глазах, или в ушах, или в волосах головных, или в бровях; или в постели, или в одежде; или в обрезании ногтей ножных, или в обрезании ногтей ручных; или в крови горячей, или в воде студеной: да разрешится!

Всякое злодеяние и чародеяние да разрешится; или в мозгу, или под мозгом, или в плече, или между плечами; или в мышцех, или в голенех; или в ноге, или в руке; или во чреве, или под чревом, или в костех, или в жилах; или в желудке, или в естественных пределах, да разрешится!

Да разрешится всякое диавольское действо и наваждение содеянное; или на злате, или на сребре; или на меди, или на железе, или в олове, или в свинце, или в меду, или в воске; или в вине, или в пиве, или в хлебе, или в явствах; во всем да разрешится!

Да разрешится всякое злое диавольское умышление против человека; или в морских гадах, или в летающих насекомых; или в животных, или в птицах; или в звездах, или в луне; или в зверях, или в пресмыкающихся; или в хартиях, или в чернилах; во всем да разрешится!

Аще двух язык лукавых: саламару и ремихару, погоню; елизду и диавола от раба Божьего (имя), силою Честнаго и Животворящего Креста Господня со всеми небесными силами пред Высоким и Страшным Престолом Божиим, твори слуги Своя огнь палящь. Херувимы и Серафимы; Власти и Пристоли; Господства и Силы.

Во един час разбойник вниде в рай молитвою. Молитвою помолися Иисус Навин, солнце ста и луна. Еже помолися пророк Даниил и загради уста львов. Три отроцы: Анания, Азария и Мисаил погаси пламень пещи огненной молитвою. Такожде молю Тя Господи, по молитве сей даждь всякому молящемуся ей.

Молюся и прошу святаго собора пророческаго: Захария, Осию, Иесея, Иоиля, Михея, Исайя, Даниила, Иеремию, Амоса, Самуила, Илию, Елисея, Наума и Пророка Предтечу и Крестителя Господня Иоанна: - молю и прошу четырех Евангелистов, Матфия, Марка, Луку и Иоанна Богослова, и святых Первоверховных Апостолов Петра и Павла, и святых и праведных Богоотец Иоакима и Анну, и Иосифа обручника, и Иакова брата Господня по плоти, Симеона Богоприимца, и Симеона сродника Господня, и Андрея Христа ради юродиваго, и Иоанна Милостиваго, и Игнатия Богоносца, и Священномученика Анания, и Романа певца кондаков, и Марка Греческаго, и Кирилла Патриарха Иерусалимскаго и преподобнаго Ефрема Сирина, и Марка гробокопателя, и триех Святителей Велицых, Василия Великаго, Григория Богослова, и Иоанна Златоустаго, и иже во святых отец наших святителей Николай Архиепископа Мир Ликийских чудотворца, и святых митрополитов: Петра, Алексия, Ионы, Филиппа, Гермогена, Инокентия и Кирилла, Московских чудотворцев: Преподобных Антония, Феодосия и Афанасия, Киево-Печерских чудотворцев: Преподобных Сергия и Никона, Радонежских чудотворцев; Преподобных Зосиму и Саватия, Соловецких чудотворцев; Преподобных Гурия и Варсонофия, Казанских чудотворцев; Иже во святых отец наших: Пахомия, Антония, Феотосия, Пимена Великаго, и иже во святых отца нашего Серафима Саровскаго; Самсона и Данеила столпников; Максима Грека, монаха Милетия Афонский горы; Никона, Патриарха Антиохийскаго, Великомученика Кириака и матери его Иулиты; Алексия, человека Божия, и святых преподобных жен мироносиц: Марии, Магдалины, Евфросинии, Ксении, Евдокии, Анастасии; Святых Великомучениц Параскевы, Екатерины, Февронии, Марины яже проливших кровь свою за Тебя Христа Бога нашего и всех святых отвека Тебе угодивших, Господи, помилуй и спаси раба Твоего (имя), да не прикоснется к нему ни к дому его ни кое зло и лукавство ни в вечерний час, ни в утренний, ни во дни, ни в нощи да не прикоснется.

Сохрани его, Господи, от воздушных, тартарных, водяных, лесовых, дворовых и всякого рода других бесов и духов злобы.

Молю, Тя Господи, яже написася молитва сия святая Священномученика Киприана, утверждена и ознаменована бысть от Святыя Троицы на погубление и прогнание всякого зла, врага и супостата бесовских сетей, ловящих всюду человека колдовством и чародейством Садока и Нафаила нарицаемого Ефил и дщерей Самуиловых, искусных в чародеянии.

Словом Господним утвердися небо и земля и вся еже в поднебесной, силою молитвы сия изгонися всякое вражеское наваждение и потворство. Призываю в помощь вся силы небесные и чиноначалия Твоя; Архангелы: Михаила, Гавриила, Рафаила, Уриила, Салафаила, Иегудила, Варахаила и Ангела хранителя моего: Силу Честнаго и Животворящего Твоего Креста и вся силы и духи небесныя и будет соблюден раб Твой, Господи (имя), и да будет посрамлено лукавство диавольское всею Небесною Силою во славу Тебе, Господи, Создателя моего и во славу Сына Твоего, Господа нашего Иисуса Христа, всегда ныне и присно и во веки веков. Аминь.

Господи! Ты един Всесильный и Всемогущий, сохрани по молитве Священномученика Киприана раба Твоего (имя). Трижды говорить это и трижды кланяться.

Господи Иисусе Христе Слове и Сыне Божий, молитвою Пресвятыя Твоея Матери и Ангела хранителя моего, помилуй мя грешного раба Твоего (имя). Трижды говорить это и трижды кланяться.

Вси святии и праведнии, молите Милостиваго Бога о рабе (имя), да сохранит и помилует мя от всякаго врага и супостата. (Трижды говорить это и трижды кланяться.)