Акафист преподобноисповеднику Кукше Одесскому чудотворцу.
Кондак 1
Избранный чудотворче и преславный угодниче Христов, скорую помощь верным неоскудно подаваяй, восхваляем тя любовию, отче преподобне, ты же яко имеяй велие дерзновение ко Господу от враг, бед и напастей скоро нас избави, да зовем ти:
Радуйся, Кукшо, чудотворче преславный.

Икос 1
Ангельский нрав и собор добродетелей явися издетска в тебе, преподобне. Господь же в тебе пастыря добраго верным показа, научи нас звати тебе тако:
Радуйся, Пресвятыя Троицы обитель светозарная;
радуйся, Пресвятыя Богородицы чадо возлюбленное;
Радуйся, Ангела-Хранителя своего радование;
радуйся, святых покровителей своих похвало;
Радуйся, верных отрадо и утешение;
радуйся, демонов плач и рыдание;
Радуйся, богоугодного жития рачителю;
радуйся, страстей искоренителю;
Радуйся, Кукшо, чудотворче преславный.

Кондак 2
Видяще велию благодать Божию, на тя яко миро излиянную, умиляемся сердцем: чудесы бо люди в вере укрепляеши, научая Богу благодарне пети: Аллилуиа

Икос 2
Разумев мати твоя, преподобне, благую волю о тебе, возрадовашася зело, на житие иноческое благословение матернее ти подавше. Мы же ныне ти воспеваем сия похвалы:
Радуйся, Богу Отцу славу возсылаяй;
радуйся, Пречистой похвалы воспеваяй;
Радуйся, Архангельской ревности по Бозе подражание;
радуйся, житию святых ревнование;
Радуйся, родителей своих плод богодарованный;
радуйся, искусителей нечистых победителю преславный;
Радуйся, кротости и смирения зерцало;
радуйся, гордости конечне отбегий;
Радуйся, Кукшо, чудотворче преславный.

Кондак 3
Сила любви Христовой уязви сердце твое, преподобне. Оставльше бо мир и вся яже в нем, последовал еси Христу, поя ему: Аллилуиа

Икос 3
Имуще яко звезду путеводную, старца Мелхиседека предивнаго, сетей лукаваго искусно избегл еси, от деяния к богомыслию воспаряюще. Сие воспоминающе, тако тебе зовем:
Радуйся, Сладчайшего Иисуса всем сердцем возлюбивый;
радуйся, Игуменью горы Афонския о спасении души моливый;
Радуйся, серафимскою любовию ко Творцу пламенеяй;
радуйся, житию преподобных отцев афонских подражаяй;
Радуйся, иноков афонских сподвижниче;
радуйся, копие, бесы поражаяй;
Радуйся, послушанием препоясанный;
радуйся, восстанием страстей не побежденный;
Радуйся, Кукшо, чудотворче преславный.

Кондак 4
Буря брани бесовкия молитвами твоими в прах претворися, преподобне. Огнем бо любви ко Христу пылающе, попалил еси козни лукавых, вопия благодарне Богу: Аллилуиа

Икос 4
Слышаще о твоем житии богоугоднем, иноцы горы Афонския умиляхуся сердцем и тако ти воспеваху:
Радуйся, Духа Святаго сосуде;
радуйся, милосердия Пренепорочной к людем вещателю;
Радуйся, херувимскою чистотою светяй;
радуйся, добродетельми святых благоухаяй;
Радуйся,жаждущих спасения наставниче;
радуйся, татей духовных прогонителю;
Радуйся, молитвы непрестанныя пламенение;
радуйся, лености и нерадения истребление;
Радуйся,Кукшо, чудотворче преславный.

Кондак 5
Богопросвещен ум свой от Господа имуще, смирением и кротостию, яко ризою одеян явился еси, преподобне. Сего ради возвыси тя Господь, благодатныя дары тебе подавше. Сему дивящеся, вопием Творцу: Аллилуиа

Икос 5
Видев страдания и мученическую кончину братий своих о Христе, за Имя Божие пострадавших, не убоялся еретическим учениям противоборствовати, сего ради из обители изгнан был еси. За сие соплетаем ти словесныя венцы сии:
Радуйся, Имя Божие на сердце начертавый;
радуйся, попечение о себе Владычицы узревый;
Радуйся, ангельского жития зерцало;
радуйся, исповедническаго лика похвало;
Радуйся, купно со изгнанной братией последовавый;
радуйся, еретическия козни презревый;
Радуйся, адаманте веры неустрашимый;
радуйся, еретических учений отвергийся;
Радуйся, Кукшо, чудотворче преславный.

Кондак 6
Проповедник веры Христовой явился еси, преподобне отче наш Кукшо. Во дни бо гонения лютаго на Церковь Христову небоязненно люди в вере укреплял еси, научая верно пети Богу: Аллилуиа

Икос 6
Возсиял еси яко светильник пресветлый, венцами исповедническими блистаяся, за веру Христову пострадавше. Ныне же от нас слышиши сия:
Радуйся, распятого Христа духовне созерцавый;
радуйся, страдания Богоматери у креста воспоминавый;
Радуйся, ангелами укрепленный;
радуйся, молитвами святых огражденный;
Радуйся, безсилие гонителей явивый;
радуйся, страдальцев за Христа утешивый;
Радуйся, терпением скорбей убеливыйся;
радуйся, от малодушия и ропота сохранивыйся;
Радуйся, Кукшо, чудотворче преславный.

Кондак 7
Хотяще Господь спасти многая люди, яви тя во граде Киеве, яко некий источник благодати божественныя, от негоже пиющии, благодарне воспеваху Богу: Аллилуиа

Икос 7
Новаго подвижника Христова и чудотворца преславного в тебе, преподобне, вернии познавше, в обитель Киево-Печерскую прихождаху, тако тебе воспевающе:
Радуйся, Иисуса Сладчайшего рабе благий;
радуйся, в обители Богоматерней святостию возсиявый;
Радуйся, ангеле земный;
радуйся, небесный человече;
Радуйся, верным путь спасения указуяй;
радуйся, из бесных демоны изгоняяй;
Радуйся, любви Христовой кладенец неисчерпаемый;
радуйся, жестокосердия обличителю нелицеприятный;
Радуйся, Кукшо, чудотворче преславный.

Кондак 8
Странник быв на земли, гонение терпяще с обители во обитель преходил еси, со смирением и терпением крест свой многоскорбный носяще, поя Христу Богу: Аллилуиа

Икос 8
Весь любовию к Богу и ближним, яко пламенем объят быв, преподобне, хлад сердец человеческих согревал еси, животворною теплотою благодати Духа Святаго верныя оживляюще. Сего ради от них вознесеся ти таковая похвала:
Радуйся, Милосерднаго Бога служителю благоговейный;
радуйся, Благодатной Девы чтителю неустанный;
Радуйся, ангелоподобный подателю благодати;
радуйся, древним святым восхотевый подражати;
Радуйся, плате, слезы горькия у скорбящих изсушаяй;
радуйся, молние, губителей душ человеческих поражаяй;
Радуйся, молосердия источниче, в жизнь вечную текий;
радуйся, сребролюбия отбегати научаяй;
Радуйся, Кукшо, чудотворче преславный.

Кондак 9
Всяк притекаяй в обитель Почаевскую возрадовашася зело о пришествии твоем в ню, преподобне. Зряще же вси предивныя твоя чудеса, благодарне о тебе воспеша Богу: Аллилуиа

Икос 9
Ветия многоглаголивии и тии недоумеют, како изъяснити дивное служение твое со преподобным Иовом, мы же сему дивящеся, токмо сице вопием:
Радуйся, Солнца Правды лучу светозарный;
радуйся, Покровительницы обители Почаевския избранный светильниче;
Радуйся, ангельскому житию иночествующих научаяй;
радуйся, со преподобным Иовом у Престола Божия предстояяй;
Радуйся, жаждущих благодати напоение;
радуйся, пылание страстей бесовских угашение;
Радуйся, мирному житию верныя наставивый;
радуйся, свары и вражды человеческия потребивый;
Радуйся, Кукшо, чудотворче преславный.

Кондак 10
Спасения путь верным указуяй, от лжебратий, покорных рабов власти безбожныя, люто гоним был еси. Ныне же венцами славы небесныя сияеши и вопиеши Подателю благих: Аллилуиа

Икос 10
Стеною молитв своих град Одессу и люди живущия в нем оградил еси, преподобне. Злобою же лжемонаси, соработницы власти безбожныя, яко пламенем противу тебе пылающе, многими скорьбми и гонением лютым яко тернием уязвиша. Мы же недоумеюще како достойно тя прославити, токмо сице вопием:
Радуйся, Господней воле всецело предавыйся;
радуйся, Богоматернею любовию укрепивыйся;
Радуйся, безплотным сликовствуяй;
радуйся, стопами святых шествуяй;
Радуйся, Церкви Катакомбныя покровителю;
радуйся, сергианского нечестия искоренителю;
Радуйся, яко небесныя славы сподобился еси;
радуйся, яко суетныя славы чужд явился еси;
Радуйся, Кукшо, чудотворче преславный.

Кондак 11
Пение ангелов на небесех духовне созерцающе, яко ангел земный духовных чад богоугодному житию наставлял еси, Господа и ближних любити всем сердцем указующе. Любовию же твоею ныне озаряемии, вопием о тебе Богу: Аллилуиа

Икос 11
Светозарное светило в землю Одесскую зашедшее зряще, вернии, горце слезами лица своя орошающе, плакахуся горько. Ныне же мощи твоя нетленныя зряще, лучами божественныя благодати нас озаряющия, радуемся сердцем и тако ти славословим:
Радуйся, радость Воскресения Христова в сердце своем носивый;
радуйся, Обрадованную о Успении Своем славословивый;
Радуйся, со ангелы Престолу Божию предстояяй;
радуйся, со святыми нас помиловати Господа умоляяй;
Радуйся, чтителей своих не оставляющий;
радуйся, видимых и невидимых враг устрашающий;
Радуйся, плод сторичный Господину своему принесый;
радуйся, мытарей немилосердных в плач приведый;
Радуйся, Кукшо, чудотворче преславный.

Кондак 12
Благодати подателя и целителя милосерднаго в тебе ведуще, преподобне, притекаем с верою и упованием, яко милосерд и сострадателен являешися всем чтущим любовию память твою святую и вопиющим верно Богу: Аллилуиа

Икос 12
Поюще твоя чудеса, ими же яко камением драгим сияеши, поминаем величие святости твоея, похваляем подвиги и труды твоя, ради ближних подъятыя, от них же и от нас приими похвальныя словеса сия:
Радуйся, Судию живых и мертвых о нас умоляющий;
радуйся, Царицу неба и земли спасти нас просящий;
Радуйся, со Ангелом-Хранителем нашим наш непрестанный защитниче;
радуйся, со Царственными Великомучениками наш многомощный покровителю;
Радуйся, пастырей истинных во благочестии утверждение;
радуйся, лжепастырей хищных изобличение;
Радуйся, молитвы непрестанныя кадильнице благоуханная;
радуйся, суетных и ложных истребление непрестанное;
Радуйся, Кукшо, чудотворче преславный.

Кондак 13
О, преподобне отче наш Кукшо, не остави без милости своея всех чтущих тя усердно, да во веки купно с тобою будем прославляти Пресвятую Троицу песнию: Аллилуиа

(Сей Кондак читается трижды, после него Икос 1 и Кондак 1)

Молитва преподобному Кукше Одесскому



О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашей, в нейже подвигом добрым подвизался еси. Буди помощник благий всем благочестно живущим и добре труждающимся в ней. О добрый наш пастырю и богомудрый на-ставниче, преподобне отче Кукшо, призри милостивно на предстоящия люди, умиленно молящиеся и просящие от тебе помощи и заступления. Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных. Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление. Умоли Господа Бога и Пресвятую Богородицу даровати нам тихое н безгрешное житие. Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.

Ублажаем тя, преподобне отче Кукшо, и чтим святую память твою, наставниче монахов и собеседниче ангелов.

Тропарь, глас 4
От юности Христа возлюбил еси, преподобне,/ на горе Афонстей предивным житием просиял еси,/ гонение же от беззаконных претерпевше,/ в селениях праведных ныне ликовствуеши,/ преподобне отче наш Кукшо./ Моли Христа Бога/ спастися душам нашим.

Кодак, глас 4
Еретическия шатания имяборцев/ и злобу лютую гонителей безбожных ни во что же вменив,/ столп Православия явился еси,/ верных ко спасению наставляюще./ Со Царственными же Великомучениками молишися о нас усердно, отче Кукшо,/ да помиловани будем в день судный.

Молитва преподобному Кукше Одесскому



О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашей, в нейже подвигом добрым подвизался еси. Буди помощник благий всем благочестно живущим и добре труждающимся в ней. О добрый наш пастырю и богомудрый на-ставниче, преподобне отче Кукшо, призри милостивно на предстоящия люди, умиленно молящиеся и просящие от тебе помощи и заступления. Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных. Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление. Умоли Господа Бога и Пресвятую Богородицу даровати нам тихое н безгрешное житие. Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.