АКАФИСТ святому равноапостольному Николаю, архиепископу Японскому

Кондак 1
Избранный от родов Российских на благовестие Христово в стране Японстей, душу свою полагал еси за овцы своя, утверждая их в вере истинней. Подвиги твоя почитающе, хвалим тя сице:
Радуйся, равноапостольный святителю Николае, Церкве Японския предстателю.

Икос 1
Ангел, яко Товии, спутешествовал тебе, егда в младая лета своя направил еси стопы в страну сию, далече отстоящую. Сего ради вопием ти сице:
Радуйся, Смоленския земли славное порождение.
Радуйся, от младенчества церковь возлюбивый.
Радуйся, в сиротстве Богоматерию Смоленскою Одигитриею не оставленный.
Радуйся, духовною наукою умудренный.
Радуйся, сладость мира ни во что же вменивый.
Радуйся, чина ангельскаго и иерейскаго удостоенный.
Радуйся, проповедати Евангелие вожделевый.
Радуйся, к неведящым спасения жалости исполненный.
Радуйся, и дальних, яко ближних возлюбивый.
Радуйся, гонения за веру не страшивыйся.
Радуйся, равноапостольный святителю Николае, Церкве Японския предстателю.

Кондак 2
Видяще подвиги святителя Иннокентиа, богомудраго просветителя Сибирскаго и Алеутскаго, поревнова равноапостольный ему, зовый: Аллилуиа.

Икос 2
Разум в смирении явил еси, святче, Господу моляся о даре языков: како проповедаю народу чуждему, како отверзу уста неискусная; слышаще твоя словеса боголюбная, паству твою на наречии исконном ея поучающая, хвалим тя сице:
Радуйся, любовию Христовою побеждавый.
Радуйся, окормлявый духовныя младенцы.
Радуйся, супротивников в чада преложивый.
Радуйся, крещением их грехи омывый.
Радуйся, познанием веру укреплявый.
Радуйся, наставниче добрый и рачительный.
Радуйся, пресвитеров Японских поставивый.
Радуйся, церковнаго чина устроителю.
Радуйся, и нашего Отечествия защитниче.
Радуйся, согласия братскаго поборниче.
Радуйся, светильниче веры Православныя.
Радуйся, равноапостольный святителю Николае, Церкве Японския предстателю.

Кондак 3
Сила Вышняго осени и укрепи тя, отче, егда пришел еси в страну языческую, смертию сынов своих казнящую за приятие святаго крещения. Ты же, ниву прозревая Божию, вопиял еси: Аллилуиа.

Икос 3
Имый любовь нелицемерную, мнил страну сию быти невестою украшенную, Жениха на брак ожидающею, ибо ведала она обручение, кровию мучеников древле обагренная, просиявшая старцы и женами распятыми, и детьми Христа исповедавшими. Почитающе неложное твое упование, прославляем тя сице.
Радуйся, святителю духовный.
Радуйся, силою Креста укрепленный.
Радуйся, столпе непоколебимый.
Радуйся, пастырю небоязненный.
Радуйся, разуме несмущаемый.
Радуйся, проповедниче немолчный.
Радуйся, никого не осудивый.
Радуйся, и сам не осужденный.
Радуйся, исповедников сопричастниче.
Радуйся, молитвенниче верный.
Радуйся, любимче ангела хранителя.
Радуйся, равноапостольный святителю Николае, Церкве Японския предстателю.

Кондак 4
Бурю возбудиша идолослужителие, не терпяще духа христианскаго, видяще, како Церковь созидается. Ты же радуяся терпению чад своих, заключенных в подземелиих темничных, купно с ними возглашаше: Аллилуиа.

Икос 4
Слышаще, яко учение Христово вся народы объемлет и приемлет их равночестно, и яко обители им многи Господь уготовал, притекаху к тебе мужие и жены, отроцы и старцы, пастырю добрый, тем же и мы хвалим тя сице:
Радуйся, малое стадо Христово собравый.
Радуйся, тесным путем к Богу его приводяй.
Радуйся, церковь Акилы с Прискиллой в подражание приявый.
Радуйся, церкви домашния зде утвердивый.
Радуйся, общыя трапезы благословивый.
Радуйся, верных своих не оставлявый в бедах.
Радуйся, сильным сыном поручавый слабейших.
Радуйся, слабых державый отеческою дланию.
Радуйся, сеявый мудро на ниве Христовой.
Радуйся, строивый Церковь на камени твердом.
Радуйся, рабе усердный, не скрывый таланта.
Радуйся, равноапостольный святителю Николае, Церкве Японския предстателю.

Кондак 5
Боготечною звездою явился еси, отче, Солнцу Правды пламенно служа и ко Господу приводя верных, яко древле звезда Вифлеема. Светоносно тобою обличаеми, вопием Христу: Аллилуиа.

Икос 5
Видев капища идольская и пагоды буддийския, плача, моляшеся праведный: «Где созижду церковь Тебе, Господи»; бысть услышана уст твоих молитва:
Радуйся, яко елень на источницех водных.
Радуйся, храм Воскресения Христова воздвигий.
Радуйся, Крест утвердивый над градом стольным.
Радуйся, звон колокольный вознесый до небесе.
Радуйся, пламень гонения на христиан угасивый.
Радуйся, доброе имя стяжавый в людех Японских.
Радуйся, древним обычаем не поругавыйся.
Радуйся, друга и брата в народе Японстем обретый.
Радуйся, светоносителю, посланный Богом.
Радуйся, домоправителю Господа верный.
Радуйся, ныне увенчанный славою небесною.
Радуйся, равноапостольный святителю Николае, Церкве Японския предстателю.

Кондак 6
Проповедницы Святаго Евангелиа радуются в горних чертозех, приемлюще тя, яко собрата. Мы же, сродницы твои, милость узревше таковую, Богу воспоим: Аллилуиа

Икос 6
Возсиявый от земли Смоленския, со святыми земли Русския сочетаваешися: се святитель Димитрий Ростовский, цевница духовная; се Задонская похвало Тихон, собиратель сокровища умнаго; се Стефан, просветитель Пермский; Сергий, Серафим, Зосима и Савватий, утешение Российское; се святии, тайнии и явленнии, Отечествия нашего божественное сияние. Мы же, великия радости исполнени, прославляем новаго угодника:
Радуйся, сыне сельскаго диакона.
Радуйся, убожество в младости познавый.
Радуйся, обет нестяжания принесый.
Радуйся, иночество до смерти соблюдый.
Радуйся, архипастырю в ризах многошвенных.
Радуйся, в убогих келлиях пребывавый.
Радуйся, в миру мирскаго не искавый.
Радуйся, наставниче новопросвещенных.
Радуйся, крестителю рыбарей Аинских.
Радуйся, дошедый до пределов дальних.
Радуйся, сподвижников в школе возрастивый.
Радуйся, равноапостольный святителю Николае, Церкве Японския предстателю.

Кондак 7
Хотяй от земли в горняя преселитися, блаженный рече: что ми тело сие, немощми томимое, аще не могу работати Господеви — храмину сию оставляю, взывая: Аллилуиа.

Икос 7
Новое бысть торжество в стольнем граде Японстем: празднова Пасху святитель в церкви Токийской соборней, и познаша людие японстии истинную Пасху спасительную. Мы же, поминающе сей день, вопием велегласно:
Радуйся, в веце жестоцем любовь сохранший.
Радуйся, архитриклине церковнаго пира.
Радуйся, старче, очима не даваяй дремания.
Радуйся, отче, сретаяй чада целованием.
Радуйся, чада своя поставлявый пред Богом.
Радуйся, Духа стяжавый в трудех повседневных.
Радуйся, зревый плоды своих рук при исходе.
Радуйся, семя горушное бросивый в землю.
Радуйся, древо прекрасное нам завещавый.
Радуйся, мосте живый христианскаго мира.
Радуйся, ангельски радуяйся в день Воскресения Христова.
Радуйся, равноапостольный святителю Николае, Церкве Японския предстателю.

Кондак 8
Странная видяще, како Японская чада Христовы воином Русским плененным братски служаху, Господу песнь воспоим: Аллилуиа.

Икос 8
Весь был предан еси на служение Богу, людем такожде служа непрестанно обоя заповеди сочетая. Царский путь твой умиленно прославляем сице:
Радуйся, умный Богу служителю.
Радуйся, архиерейски жертву приносяй за народы.
Радуйся, пленных русских попечителю.
Радуйся, в грозе военной чад своих японских не оставивый.
Радуйся, Отечествию исконному верность сохранивый.
Радуйся, наставниче милости и мужества.
Радуйся, уцеломудривый душы соблазненныя.
Радуйся, пристанище отверженных.
Радуйся, сокровище смирения.
Радуйся, чертоже покаяния.
Радуйся, любы непобедимая.
Радуйся, равноапостольный святителю Николае, Церкве Японския предстателю.

Кондак 9
Всякое древо по плоду познается, плод же трудов твоих многих бысть спасение многих людей. Посему возгласим: Аллилуиа.

Икос 9
Ветии многовещанныя подвигом твоим изумляются, ангели с тобою ликовствуют, мы же ведяще смиренное житие твое и терпение многомощное, хвалим тя сице:
Радуйся, не древле, а ныне подвизавыйся.
Радуйся, образе архипастыря православнаго.
Радуйся, глубокое наше обличение.
Радуйся, Христа базстрашное исповедание.
Радуйся, благоразумия мера истинная.
Радуйся, сокровище, в дусе собираемое.
Радуйся, сокровище, для ближних расточаемое.
Радуйся, приемляй мзду тысящекратную.
Радуйся, безсмертныя радости исполненный.
Радуйся, борения наша утишаяй.
Радуйся, моления отечески приемляй.
Радуйся, равноапостольный святителю Николае, Церкве Японския предстателю.

Кондак 10
Спасти потщился еси люди отчаянныя, Истиннаго Бога не ведящыя. Ныне в сени смертней свет узревшии, чада твоя вопиют: Аллилуиа.

Икос 10
Стена еси Богородице Дево: тепле молился святитель, церковь свою утверждая. Яко на острове обуреваемом, среди иноверных, пребывала она без щита ограждения. Мы же, узревше ея крепость и верность, поем ти сице:
Радуйся, церковь надежным покровом укрывый.
Радуйся, Матери Божией предав обращенных.
Радуйся, отроковиц научивый молитися.
Радуйся, свет целомудрия девам внушавый.
Радуйся, браком честным освящавый японския семьи.
Радуйся, правых суждений святое зерцало.
Радуйся, мир приносивый селением и градом.
Радуйся, в нуждах своих укреплявыйся верою.
Радуйся, старцу отцу помогавый до смерти.
Радуйся, в мире пожив, но от мира свободный.
Радуйся, по кончине всеми оплаканный.
Радуйся, равноапостольный святителю Николае, Церкве Японския предстателю.

Кондак 11
Пение всякое подвигом твоим побеждается, святителю, коим словом обымем апостольское твое служение; речем же с тобою: Аллилуиа.

Икос 11
Светоприемно Церковь Японская прия благовестие на наречии своем от труда твоего, просветителю истинный. Уподобился еси Вселенским учителем, обращая любомудрая словеса твоя на служение горней мудрости. Почитающе доброделание твое, хвалим тя сице:
Радуйся, Священное Писание уразумевый.
Радуйся, чадом человеческим его предавый.
Радуйся, достойная речения находивый.
Радуйся, неверная и лестная отметавый.
Радуйся, соборне труд свой с церковию мысливый.
Радуйся, блаженно от трудов почивый.
Радуйся, к народу приближавый слово.
Радуйся, богослужение на наречии отеческом Японстей Церкви даровавый.
Радуйся, отвергий вся хитросплетения.
Радуйся, питавый и млеком и медом.
Радуйся, смиривый гордость лжеименных.
Радуйся, равноапостольный святителю Николае, Церкве Японския предстателю.

Кондак 12
Благодать почила на тебе, являющи святость твоего служения. Аще и чудес не совершал еси, яко же и Иоанн Креститель, паче же свидетельство твое Церковь новозданная, чудом Божиим в дни последния утвержденная, да единым сердцем с нею воспеваем: Аллилуиа.

Икос 12
Поюще прославление твое и к лику святых причисление сродниче наш и пастырю, хвалим тя сице:
Радуйся, святостию твоею Церковь в последния дни утвердивый.
Радуйся, муки земныя забвение.
Радуйся, благодати тихое веяние.
Радуйся, прибегавших к тебе помощнице.
Радуйся, подвизающихся сподвижниче.
Радуйся, садовниче благий и цветоблюстителю.
Радуйся, нестроения наша исправляяй.
Радуйся, стетаяй чад своих в райских обителех.
Радуйся, поминающих тя поминаяй.
Радуйся, бурнаго моря отишие.
Радуйся, звездо закатная и восточная.
Радуйся, равноапостольный святителю Николае, Церкве Японския предстателю.

Кондак 13
О пресвятый и пречудный, преславный и предивный просветителю страны Японския, присный молитвенниче наш пред Престолом Святыя Троицы, святый равноапостольный святителю отче Николае! Приими нынешнее приношение наше и умоли Спасителя Бога и Его Пречистую Матерь, да твоим ходатайством просветит Православием обращенныя тобою народы и страну нашу Российскую, и избавит нас от всяких напастей врагов видимых и невидимых, пагубы и крамолы, бед и скорбей, и даст грехов оставление, и вечных мук избавление, и Царствия Небеснаго сподобит, да купно с тобою и всеми святыми Троице Святей во веки веков поем: Аллилуиа.
Этот кондак читается трижды, затем икос 1-й и кондак 1-й

Молитва святому равноапостольному Николаю, архиепископу Японскому
О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святый святителю, равноапостольный Николае Японский! Предстоя у Престола всех Царя и наслаждаяся света Единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко Всемилостивому Владыце, моли спастися обращенным тобою ко Христу, и всея паствы Христовы людем. Упроси Вышняго: страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, процветание Православия в стране нашей Российстей и в земли Японстей да утвердит. Архиереи благолепием святительства да украсит, монашествующыя к подвигом добраго течения да укрепит: царствующыя грады и вся грады страны добре сохранит. О святителю предивный! Мир весь предстательством твоим умири: от глада, жажды, пагубы и крамолы избави ны, от стихий часто находящих на ны, грех ради наших многих, от тлетворных ветр, губительныя язвы и от нападения иноплеменных сохрани. Старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя и в темнице сидящыя свободи и возврати, немощствующыя исцели, плавающым буди добрый кормчий, и всех везде тепле призывающих тя и с верою притекающих к тебе, и усердно припадающих, и молящихся тебе от клеветы и всяких напастей, враг видимых и невидимых, бед и всякаго зла твоим ходатайством свободи. Моли о нас Всещедраго и Человеколюбиваго Христа Бога нашего, да простит нам вся грехи, от юности содеянныя нами, и в день страшнаго пришествия Его от шуияго стояния избавит нас и радости святых причастники сотворит, да купно с ними славим Единаго в Троице Бога, Отца и Сына и Святаго Духа, во веки веков. Аминь.

Молитва иная Пресвятей Богородице
О Всепетая Мати, Богородице Смоленская, Одигитрие. Ты еси привела равноапостольнаго святителя Николая во удаленныя пределы Японския проповедати Евангелие Сына Твоего возлюбленнаго. Се исполнил той волю Твою, Владычице. Простри руку Твою благословляющую на рабы Твоя, чада, им обращенныя, и на нас, во гресех пребывающих, да его святыми молитвами сохраним Православную веру во веки веков. Аминь.

Тропарь святому равноапостольному Николаю, архиепископу Японскому
Тропарь, глас 4:
Апостолов единонравне и сопрестольне, служителю Христов верный и богомудрый, цевнице избранная Божественнаго Духа, сосуде преизливающийся любве Христовы, Японския земли просветителю, святый Николае, иерарше равноапостольне, молися Живоначальней Троице о всем твоем стаде и о всем мире.

Ин тропарь, глас 4:
Яко апостолом сопричастника в трудех и в возмездиих Церковь тя с любовию почитает, святителю отче Николае равноапостольне. Положив бо многими подвиги начало Православия в Японии язычестей, умножил еси в ней чада спасения, и по кончине прият тя Бог во обители апостол Своих по достоянию. Сего ради молим тя, молися Господеви пребыти и в предняя делу твоему незыблему на веки, и ввестися в лоно Церкве Православныя всем погибнути имущим, умиритися мирови и спастися душам нашим.

Кондак глас 4:
Странника и пришельца прият тя страна Японская, равноапостольне святителю Николае, в ней же исперва познал еси себе яко чуждаго, обаче теплоту и свет Христов источая, прелагал еси враги твоя в сыны духовныя, имже раздая благодать Божию, созидал еси Церковь Христову, о ней же ныне молися, и тебе бо сынове ея и дщери взывают: радуйся, пастырю добрый наш.

Ин кондак, глас 2:
Твердаго и боговещаннаго проповедателя Евангелия Твоего, Господи, возмездил еси боголепно, труды бо его и болезни приял еси паче всех жертв законных и всесожжений. Того молитвами соблюди нас от неприязни.

Величание
Величаем тя, равноапостольне Николае, и чтим болезни и труды твоя, имиже трудился еси во благовестии Христове.

КАНОН СВЯТОМУ РАВНОАПОСТОЛЬНОМУ НИКОЛАЮ, АРХИЕПИСКОПУ ЯПОНСКОМУ.




Глас 1
Песнь 1

Горькия раб́оты изб́авлься Израиль, непроход́имое пр́ойде яко с́ушу. Врага зря потопляема, песнь ́яко Благод́етелю по́ет Б́огу, чудод́еющему м́ышцею выс́окою, яко просл́авися.
Святителю отче Ниќолае, моли Бога о нас.

́Якоже Моисей, не убо́ялся ес́и фараон́итских страхов́аний, но мужественно пр́ойде провести род японский чрез море Крещ́ения в обетов́анную землю Православия, Ѓосподеви по́я: сл́авно бо просл́авися.
Святителю отче Ниќолае, моли Бога о нас.

Покрыв́аше тя ́облак Б́ожия благодати во дни напастей, в нощ́и же твое́я от людей ост́авленности свет Божественный тя осияв́аше, в тв́ердом терпении Ѓосподеви по́юща: сл́авно бо просл́авися.
Святителю отче Ниќолае, моли Бога о нас.

́Оный Моисей дад́е народу своему закон Синайский, с́ей же японскому народу дад́е весь закон правосл́авного благочестия, яко да поучаются и возраст́ают, Ѓосподеви по́юще: славно бо прославися.
Святителю отче Ниќолае, моли Бога о нас.

Жити́ем ангельскаго, нр́авом ап́остольскаго человека Божия, светильника, горящаго св́етом Христ́овым, Российския земл́и порожд́ение, Отца Неб́еснаго сына возлюбленнаго ув́еде тя, Ниќолае святителю, страна Японская.
Святителю отче Ниќолае, моли Бога о нас.

И сл́овом и д́елом научил ес́и японския люди славити вел́ичия Бога твоего, милосердие и любовь л́юдем явл́яющаго, и сотворил еси на земл́и пред Ним вс́яку правду, сеѓо ради усп́ение твое со святыми и предсто́иши Животворящей Тр́оице, Ниќолае равноапостольне.
Святителю отче Ниќолае, моли Бога о нас.

Весь существ́ом твоим был еси р́авен апостолом, в сердце твоем стяж́ал ес́и Святаго Духа Божия, сеѓо р́ади источ́ил еси слово жизни вечныя, в жити́и тво́ем явл́яя в себе образ веры и правды, и кротости, испрос́и и нам си́ю благодать, Ниќолае, ап́остолом р́авне.
Пресвятая Богородице, спаси нас.

Явилася ес́и Преч́истая, служ́ительница спасения в́ечнаго, сочет́ала бо еси вочеловечением естеств́у земнородных Сына Б́ожия, Ед́инаго Ход́атая Бога и человеков, Христа Иисуса; сеѓо р́ади всякое дыхание хв́алит Тя, Тобою бо Творец и Владыка Небесный на землю при́иде.


Песнь 3

Пр́ежде век от Отца рожд́енному нетл́енно С́ыну и в посл́едняя от Д́евы воплощ́енному безс́еменно, Христ́у Б́огу возопи́им: вознес́ый рог наш, свят еси, Ѓосподи.
Святителю отче Ниќолае, моли Бога о нас.

Изо уст твоих не из́ыде велер́ечие, но, смир́ен сый, утверд́ив в Ѓосподе сердце тво́е, вел́икая соверш́ил ес́и, в терп́ении взывая: свят еси, Ѓосподи.
Святителю отче Ниќолае, моли Бога о нас.

Ел́ико противл́яхуся сл́ову твоем́у нев́ернии, тол́ико п́аче утвержд́ал ес́и в Господе дух твой, и не убо́явся, и вспять не возврат́ився, сп́асл еси спас́ения ́ищущих, взыв́ая: св́ят ес́и Ѓосподи.
Святителю отче Ниќолае, моли Бога о нас.

Св́ятость Б́ожию пров́едуя и сам ю стяжав́ая, умил́ил ес́и након́ец коравосерд́ечных и мн́ожество их прив́ел еси ко Господу, взыв́ающих: свят еси Господи.
Святителю отче Ниќолае, моли Бога о нас.

П́аствы Божия хранитель, японских христиан учитель, ап́остольских нр́авов ревн́итель был еси, Ниќолае свят́ителю, с дерзнов́ением Влад́ычнему Прест́олу предсто́я во св́ете невеч́ернем, мол́ися о всем мире.
Святителю отче Ниќолае, моли Бога о нас.

Образ плодон́оснаго др́ева явл́яеши нам, Ниќолае равноап́остольне, укорен́ился бо еси в Евангелии Царствия Божия, возраст́ал еси в благоч́естии и дост́игл еси соверш́енства, плод́ы же мол́итв и труд́ов твоих явл́яет стран́а Яп́онская в сын́ех и дщ́ерех Ц́еркве Христ́овы.
Святителю отче Ниќолае, моли Бога о нас.

Ни во что же вмен́ил юность в́озраста твоего и стремл́ения ея, священне Ниќолае, егд́а пл́амень Божественный ражж́е твою душу, желание сердца твоего исполн́яя и приобщ́аяся апостольскому подвигу, Ев́ангелие вечное благовеств́уя в Японии.
Пресвятая Богородице, спаси нас.

Д́ева и Непор́очная М́ати Спас́ителя м́ира, Твою под́аждь помощь раб́ом Тво́им, изб́ави молитвами от бед и вс́якаго грех́а Тво́я люди во ́еже причащ́атися благод́ати Неб́есней в земн́ом жити́и и в́идети сл́аву Неб́есную в жизни в́ечней.

Кондак, глас 4:

Стр́анника и приш́ельца при́ят тя страна Японская, равноап́остольне свят́ителю Ниќолае, в нейже исп́ерва позн́ал еси себ́е, яко чужд́аго, об́аче теплот́у и свет Христов источ́ая, прелаѓал еси враѓи тво́я в с́ыны дух́овныя, ́имже разда́я благодать Божию, созид́ал еси Церковь Христову, о нейже н́ыне мол́ися, и тебе бо с́ынове е́я и дщ́ери взыв́ают: радуйся, п́астырю добрый наш.

Икос:

Яв́ился еси, равноапостольне святителю Ниќолае, в стране Японстей, нос́я в себе образ во́истинну Христов, любовию побежд́ая сопрот́ивныя, низлаѓая ́идольскую пр́елесть, утвержд́ая и созид́ая Божию Церковь, порожд́ая вод́ою и Д́ухом с́ыны и дщ́ери Царствия Божия. Н́ыне ч́ада тво́я, о н́ихже м́олишися, сохран́яюще в́еру Христову, к тебе взывают: радуйся, п́астырю добрый наш.

Седален, глас 8.

Прем́удростию Божественною просвет́ив твою д́ушу, был еси свет́ильник на свещнице, всем свет́яй в Японии, яз́ычеством затм́енной. И возси́я денн́ица в сердц́ах мн́огих, и С́олнце Пр́авды Христос облист́а, яко да в́идят Его невидимшии и ув́еруют, и спасутся. Мол́и ́убо Христа Бога о ст́аде тво́ем, и прегреш́ений оставл́ение даров́ати ч́ествующим с в́ерою память твою.

Слава, глас 7:

Юность твою Христ́у дал еси и освят́ил еси всеѓо себ́е, ап́остолом р́авный, Ниќолае сл́авне, св́етом Божиим си́яя, был еси светильник, на высот́е пост́авленный, указ́ующий путь в́ечныя жизни, к н́ейже чрез пуч́ину жит́ейскаго м́оря мн́огия с́ыны и дщ́ери твоя прив́ел еси в стран́е Японстей.

И ныне, глас тойже:

Покр́ове христианом и Благая Пом́ощнице на земл́и, Заст́упнице мира, Богородице Марие, утверд́и молитвами Тво́ими Церковь Сына Твоего в стране Японстей и во всем мире, и спаси люди Тво́я от вс́якаго зла.

Песнь 4

Жезл из корене Иесс́еова и цвет от неѓо, Христ́е, от Девы проз́ябл еси из горы, хв́альный приосен́енныя ч́ащи. Приш́ел еси, вопл́ощся от Неискусом́ужныя, невещ́ественный и Б́оже, слава силе Твоей, Господи.
Святителю отче Ниќолае, моли Бога о нас.

́Аще и п́ервее от сам́аго себ́е не возжел́ал еси, но в храме Б́ожии усл́ышав глас Господа твоего, яко зов́ет тя, возд́ел еси р́уце твои, Той тя препо́яса и повед́е в дальнюю стран́у на п́одвиг.
Святителю отче Ниќолае, моли Бога о нас.

С́еде на тя Господь, якоже на кон́я кр́епкаго, впуст́и тя в Японию и спас́ение ей бысть ежд́ение Его, Той бо сотвор́и д́ело Сво́е тобою, якоже Богодохнов́енным посл́ушником.
Святителю отче Ниќолае, моли Бога о нас.

Аз - реч́ет Япония иногд́а - р́адуюся и веселюся о Господе, яко спасение сод́елася моих чад дос́еле и в пр́едняя ап́остольскими труд́ы святителя Никол́ая.
Святителю отче Ниќолае, моли Бога о нас.

Род́ился еси к жизни ангельстей и отв́ергл еси мир и вся, ́яже в нем, зл́ая восхот́ев сл́авити т́очию Б́ога, мон́ах изр́ядный был еси и, свящ́енством украш́ен, яко ап́остол, пож́ил еси в стране Японстей и привел еси ко Христу люди мн́оги.
Святителю отче Ниќолае, моли Бога о нас.

Образ во́истинну Христов был еси, Ниќолае, святителю и апостоле, з́емлю хл́адну возд́елал еси р́алом любв́е Евангельския, в мол́итве и труд́ех пребыв́ая, с́еял еси с́емя спасительнаго благовестия и пожал еси жатву во сто крат. Ныне Церковь Японская, тобою насажд́енная, светло красуется.
Святителю отче Ниќолае, моли Бога о нас.

Свет Вост́ока Св́ыше прин́есл еси вост́оку дальнему в Японстей стране, Ниќолае равноапостольне, и возжегл еси свет сей в сердцах японских людей, и согр́ел еси их любовию Христовою, сам быв, яко огонь, пред Богом горящий, мол́ися о ч́адех твоих, мол́ися мир и любовь утверд́ити в мире.
Пресвятая Богородице, спаси нас.

Влад́ычице М́ати Божия, неразл́учна еси от Сына Твоего, Емуже предсто́иши в сл́аве Неб́есней и земнор́одных не оставл́яеши, молитвам их вн́емлеши и мол́ящихся Тебе посещ́аеши, в́едаеши бо челов́еческия сќорби серд́ечныя.

Песнь 5

Бог сый м́ира, Отец щедр́от, вел́икаго сов́ета Твоего Ангела, мир подав́ающа, посл́ал еси нам. Тем, Богораз́умия к свету наст́авльшеся, от н́ощи ́утренююще, славосл́овим Тя, Человекол́юбче.
Святителю отче Ниќолае, моли Бога о нас.

Свет повел́ений Б́ожиих возси́я на земл́и японстей твоими ап́остольскими труд́ы и пр́авде Христовой научишася т́амо живущии, и доброд́етель сотвор́иша по закону и имя Божие просл́авиша.
Святителю отче Ниќолае, моли Бога о нас.

Яко помян́ул еси Ѓоспода в сќорбех твоих, того ради услыша тя и пом́оже ти, да преумн́ожиши п́одвиги твоя, и книги, и чад дух́овных мн́ожество.
Святителю отче Ниќолае, моли Бога о нас.

Прест́а нечестие среди избр́анныя п́аствы твое́я, и апостольское вдохнов́ение косн́уся сердец их: егд́а бо ди́акон возглаш́аше мол́итвы, весь умил́ен, пад на кол́ена, мол́яшеся в рыд́аниях пред Богом, и с ним вся Церковь.
Святителю отче Ниќолае, моли Бога о нас.

Ел́еем любв́е исп́олнил еси сос́уд твоего с́ердца, ап́остолом равный Ниќолае, егд́а избр́ал еси многотр́удное ж́ительство в стране Японстей дал́ече от сродник, дал́ече от друѓов твоих, дал́ече от земл́и твое́я, насажд́ая Церковь Христову, Богом утвержд́аемый.
Святителю отче Ниќолае, моли Бога о нас.

Труд и болезнь возлож́ил еси на себе, Богом зв́анный, Ниќолае святителю, и сќорби мн́огия претерп́ел еси и всего себ́е пр́едал еси п́одвигу ап́остольскому и сотвор́ил еси себ́е ж́ертву ж́иву твоем́у Господу, Еѓоже слово благовест́ил еси л́юдем японским.
Святителю отче Ниќолае, моли Бога о нас.

Иерусал́има Небеснаго взысќуя, отош́ел еси от пред́ел отец твоих и от земл́и твоея, Авра́аму под́обяся, и обр́ел еси обетов́ания з́емлю, ид́еже не покой и веселие, но сќорби мн́оги при́ял еси, радуяся, яко н́ива церќовная произращ́ает Богу н́овыя люди.
Пресвятая Богородице, спаси нас.

Всел́енная хран́ится Твоим заступл́ением, Богор́одице Мар́ие, Преч́истая М́ати Д́ево, любв́е Божия изр́ядное вмест́илище, избр́анная от всех род́ов, во еже послуж́ити спас́ению м́ира, вся яз́ыцы Тво́им благос́ердием посещ́аеши и м́олишися даров́ати спасение всем жив́ущим на земл́и.

Песнь 6

Из утр́обы Иону млад́енца изблев́а морсќий зверь, ́якова при́ят. В Д́еву же вс́ельшееся Слово и плоть при́емшее пройде, сохр́аншее нетл́енну, Еѓоже бо не пострад́а истл́ения, Р́ождшую сохран́и неврежд́енну.
Святителю отче Ниќолае, моли Бога о нас.

Ангел хран́итель тя руковожд́аше на пут́и тво́ем терн́истом. Т́емже кр́отостию Христа твоеѓо и м́удростию Д́уха враѓи приобр́ел еси в др́уги тво́я.
Святителю отче Ниќолае, моли Бога о нас.

Воев́аше л́юдиe друг на др́уга - п́аства твоя прот́иву р́одины твое́я, но Начальник м́ира тя умудр́и держ́атися м́еры раз́умныя, ́якоже похвал́иша тя ́обе.
Святителю отче Ниќолае, моли Бога о нас.

Осл́абы не дав́ал еси твоем́у т́елу, ни твоем́у духу, претружд́ая их до конца, д́ондеже дело соверш́ил еси д́ивное, ́якоже никт́оже ин пр́eжде теб́е.
Святителю отче Ниќолае, моли Бога о нас.

́Ясно пропов́едал еси Триед́инаго Бога, люб́овь Свою излив́ающа на все созд́анное, наипаче же человека, еѓоже приобщ́и Божественней жизни вочелов́ечение Единороднаго Сына Божия, Ем́уже посл́едующе, воспри́емлем возрожд́ение вод́ою и Д́ухом, ́еже Церковь твор́ит во имя Отца и Сына, и Всеблаѓаго Ут́ешителя.
Святителю отче Ниќолае, моли Бога о нас.

Вес́елия сердце твое исполн́яшеся, при́емля мн́огия труд́ы и сќорби, в́едал бо еси, яко всяк, посл́едуяй Христу Спасу, при́емлет крест и по Нем ́идет. Животвор́ящий Крест с́илою мн́огою утверд́и тя, сл́овом и житием возвещ́ающа всем, яко м́ожем вся во укрепл́яющем нас Иисусе.
Святителю отче Ниќолае, моли Бога о нас.

́Истинный п́астырь, свет́ильник в м́ире, свет во тьме пребывающим, путевождь не имущим духовнaго зрения был еси, Ниќолае, да спас́еши люди, Богом тебе вруч́енныя, всем вся был еси в Церкви Христове и причт́ен еси предсто́ящим Божественному Прест́олу Агнца, закл́аннаго за весь мир.
Пресвятая Богородице, спаси нас.

Лиц́у Твоему богатии л́юдстии предсто́ят и м́олятся, Владычице, и сл́авят Тя и Сына Твоего, Еѓоже родил́а еси р́ади спас́ения м́ира и избавл́ения от сќорби, быв́ающая в л́юдех р́ади грех их, пода́еши всем прибеѓающим к Тебе радость на земли и радость вечную, Ты бо еси Радость всех радостей.

Кондак
Глас 2.

Тв́ердаго и Боговещ́аннаго пропов́едателя Евангелия Твоего, Господи, возм́ездил еси Богол́епно, труд́ы бо его и бол́езни при́ял еси п́аче всех жертв заќонных и всесожж́ений. Того мол́итвами соблюд́и нас от непри́язни.

Икос

Не дад́е Дав́идски сна очес́ем своим, ни в́еждома сво́има дрем́ания, д́ондеже прелож́и японцем все слово Твое, Господи, В́етхаго и Н́оваго Завета, и все Твое служ́ение, и все Богосл́овие в меру дов́ольную равноап́остол Твой, святитель Ниќолай. И се н́ыне, благодар́яще труд́ы его неуст́анныя, Яп́онская Церковь Правосл́авная процвет́ает в благоч́естии и мн́ожится исполн́ением. Тоѓо мол́итвами убо соблюд́и нас от непри́язни.

Песнь 7

Отроцы благоч́естию совоспит́ани, злочест́иваго вел́ения небр́егше, ́огненнаго прещ́ения не убо́яшася, но, посред́е пламене сто́яще, по́яху: отцев Боже, благословен еси.
Святителю отче Ниќолае, моли Бога о нас.

Люб́овию к Богу и л́юдем разжиз́аем, не убо́ялся еси огня зл́обы и н́енависти людей стропт́ивых, но, Богом укрепл́яем, ш́ествовал еси путь твой терн́истый, взыв́ая: отц́ев Боже, благослов́ен еси.
Святителю отче Ниќолае, моли Бога о нас.

́Абие по приш́ествии твоем нач́ат язык японский изуч́ати, яко да не инояз́ычник нар́оду б́удеши, и дар Пятидес́ятницы ап́остольския получ́ив, скоро преусп́ел еси, взывая: отцев Боже, благослов́ен еси.
Святителю отче Ниќолае, моли Бога о нас.

Вс́юду быв́ая и с́емя с́еятеля вергая, Госп́одню попеч́ению с верою предав́ал еси, т́емже и приумнож́ашеся н́ива труд́ов твоих плодонош́ением, и вќупе с мн́ожеством п́аствы твое́я взыв́ал еси: отц́ев Боже, благослов́ен еси.
Святителю отче Ниќолае, моли Бога о нас.

Радость сердцу твоему бысть, равноап́остольне святителю Ниќолае, егд́а рожд́ал еси Богу в куп́ели Крещ́ения люди н́овыя и егд́a сын́ове противл́ения от зл́обы к любве, от тьмы ко свету, от нев́ерия к в́ере прехожд́аху и быв́аху н́овы ап́остолы пр́ежде гон́ителие.
Святителю отче Ниќолае, моли Бога о нас.

Ап́остольски любовь твою яв́ил еси, егд́а враѓа, яко др́уга, при́ял еси, Сав́абе, хот́евша тя умертв́ити, и плен́ил еси его ́истиною в послуш́ание Христ́ово и нар́ек еси
тоѓо Павла, и сотвор́ил еси его христиан́ина и свящ́енника Бога В́ышняго, ́иже благов́естник Евангелия преб́ысть до смерти.
Святителю отче Ниќолае, моли Бога о нас.

В́идети л́юди яп́онския, Христу привед́ены, пл́аменне жел́ал еси, р́авный ап́остолом Ниќолае, сеѓо р́ади л́ета мн́ога преб́ыл еси тамо, науч́аяся м́удрости стран́ы то́я, и Бож́ественныя глаѓолы прелож́ил еси в разум́ение ч́адом тво́им на язык их. Ныне, предсто́я Престолу Владычню, о них мол́ися.
Пресвятая Богородице, спаси нас.

Естеств́а уст́авы побежд́аются в Тебе, М́ати Д́ево, ибо рожд́ение Тво́е от непл́одных род́ителей пресл́авно есть, и Слово плоть бысть в чр́еве Твоем, и по см́ерти Твоей гроб и умерщвл́ение не удерж́аста Тя, но Сын Твой пресел́и Тя в пренеб́есныя, ид́еже м́олишися Ему с равноап́остольным Ниќолаем о всел́енней.

Песнь 8

Ч́уда преест́ественнаго показ́а образ огнер́осная пещь др́евле: огнь бо не опал́и ́юныя д́ети, Христово явл́яя безс́еменное от Девы Бож́ественное рождеств́о. Тем, воспев́ающе, воспо́им: да благослов́ит тварь вся Господа и превозн́осит во вся веки.
Святителю отче Ниќолае, моли Бога о нас.

Един прот́иву т́ысящи, изш́ел еси, не оружием, но кротостию и люб́овию, благод́атию же Христа, и победил еси враѓи, и ввел еси избр́анныя в Церковь Божию, всех поуч́ая: да благослов́ит тварь вся Господа и превозн́осит во вся веки.
Святителю отче Ниќолае, моли Бога о нас.

Мудрый зижд́итель быв, на тв́ердом ќамени в́еры созд́ал еси Церковь Японскую, ин́ого бо основ́ания никт́оже может полож́ити п́аче пол́оженнаго Христом. Т́емже, на в́еки утвержд́ена тобою, воспев́ает: да благослов́ит тварь вся Господа и превозн́осит во вся веки.
Святителю отче Ниќолае, моли Бога о нас.

Путь вс́якия плоти наст́а день и тебе проидт́и, и благослов́ив людей твоих, и приобщ́ився Христовых Таин, конец земн́аго труда при́ял еси, всех рыд́ати по теб́е ост́авив, и по смерти их наставл́яя: да благослов́ит тварь вся Господа и превозносит во вся веки.
Святителю отче Ниќолае, моли Бога о нас.

́Аще и ́умерл еси, но жив в Господе пребываеши, чудотвор́я ко гр́обу твоему притеќающим и имя твое призыв́ающим, и по всей Японии прин́осиши славу Христову, несл́ышным гласом вопи́я: да благослов́ит тварь вся Господа и превозн́осит во вся веки.
Святителю отче Ниќолае, моли Бога о нас.

Ниќолае свят́ителю, ап́остоле и праведниче, был еси в́ерен даже до см́ерти Христу Спасу, призв́авшему тя в вертогр́ад Свой, подвиз́ался еси Его ради, да сочет́аеши в́етви д́ивия с Лоз́ою Божественною, ныне, в́идяще те плодонос́ящия, велич́аем и благослов́им Его во в́еки.
Святителю отче Ниќолае, моли Бога о нас.

Апостола во́истинну п́одвигом, Ангела жити́ем, нравом отца чадолюб́ива, такова вед́аша тя людие яп́онстии, ́ихже возлюб́ил еси п́аче, н́ежели сам́аго себ́е, и тех р́ади л́ета мн́ога отдал еси благов́естию в них Евангелия, и возд́елал еси сердц́а их, яко ниву плодон́осну, н́ыне в радости вечней о них непрестанно мол́ися.
Святителю отче Ниќолае, моли Бога о нас.

П́авлу верх́овному, нар́одов уч́ителю, подражал еси, Ниќолае Богон́осне, себ́е отв́ергся, всем вся был еси, презир́ая вся б́еды и нап́асти, учил еси люди японския заќону Христовы любв́е сл́овом и д́елом твоим. Спасу всех помол́ися, да утверд́ит виноград, в н́емже трудился еси.
Пресвятая Богородице, спаси нас.

Отроков́ице Богонев́есто Мар́ие, родил́а еси Иисуса Сп́аса, обнов́ившаго мир и всеѓо обветш́авшаго человека, Своим воплощ́ением вз́явшаго Себе естеств́о наше, Кр́овию безгрешною ом́ывшаго грех́и наши и Воскрес́ением вх́оды в́ечныя жизни отв́ерзшаго нам.

Песнь 9

Неизглаѓоланное Девы т́аинство: Небо возси́я, и Престол Херув́имский, и светон́осный черт́ог показ́ася Христ́а Бога Вседерж́ителя, Сию благоч́естно яко Богор́одицу велич́аем.
Святителю отче Ниќолае, моли Бога о нас.

Фими́ам прин́осим тебе пред гр́обом твоим честн́ым, яко да с кад́илом вќупе и молитвы тво́я возн́осятся в́ыну ко Господу о преспе́янии вс́яческом п́аствы твоея и вел́икия Японии.
Святителю отче Ниќолае, моли Бога о нас.

Ед́инаго Б́ога пропов́еда вся дни живот́а твоего, Той тя и просл́ави п́одвигом ап́остольским и д́аром прозорл́ивства, и ж́изнию свят́ою, и в́ечным воздаянием.
Святителю отче Ниќолае, моли Бога о нас.

На смертном одр́е т́ела многотр́уднаго вся Япония тя почт́е вќупе с цар́ем сво́им, и даже до ныне почит́ает святую память твою и пр́осит благод́атныя п́омощи при гр́обе твоем.
Святителю отче Ниќолае, моли Бога о нас.

Иис́уса Имя пресл́адкое всегда во уст́ех и сердце им́е при жизни, Tой тебе пос́обствова в д́еле и п́одвизе, и Той тя упоќои в вечных сел́ениих по преставл́ении.
Святителю отче Ниќолае, моли Бога о нас.

Соб́ору свят́ых соприч́астник, подв́ижник благоч́естия и веры, возвест́итель глаѓолов в́ечныя Истины, проповедник спасения ты, св́яте Ниќолае, предсто́иши на Небесех в жизни безсм́ертней твоем́у Сп́асу, Еѓоже пропов́едал еси л́юдем японским.
Святителю отче Ниќолае, моли Бога о нас.

Тр́оица Свят́ая избр́а тя яко сос́уд живон́осный, пити́е жизнивечныя нос́ящий всем жаждущим правды Божия, и напо́ил еси с́ыны и дщ́ери твоя ́истиным Боговедением, и направил еси стоп́ы их пут́ем спасительным, и крестил еси их во имя Отца и Сына, и Святаго Духа.
Святителю отче Ниќолае, моли Бога о нас.

Отец и учитель, молитвенник и наст́авник л́юдем п́аствы твоея был еси, св́яте Ниќолае, равноапостольне первосвят́ителю Церкве Японския; сеѓо р́ади сердц́а многих привл́екл еси ко Христу и улов́ил еси их мр́ежею любв́е Его, мол́ися o всех, да будут всегд́а с Ним во веки.
Пресвятая Богородице, спаси нас.

Л́иствием смоќовным препо́ясана бысть иногд́а Ева р́ади грехопадения, Ты же, р́ясны злат́ыми одеяна и преукраш́ена Божественными благол́епотами р́ади послуш́ания в́оле Небеснаго Отца, прам́атерь кл́ятвы и смерти изб́авила еси и родил́а еси Жизнод́авца р́оду человеческому.