Тропарь преподобномученика Адриана Пошехонского
глас 4
Христову мученику Адриану тезоименит был еси, преподобне,/ многия труды подъял еси в жизни временней,/ обитель иноческую созидая в пустыни,/ идеже пострадал еси даже до крове от злых разбойник/ и мученическую смерть от них приял еси,/ Адриане славне,/ чудес благодатию обогатився,/ предстоиши всех Царю, Христу Богу,/ Егоже моли спастися душам нашим.

Кондак преподобномученика Адриана Пошехонского
глас 4
Христа ради доблественне претерпел еси/ и венец нетления от Него восприял еси страдания своего,/ приходящим же с верою к тебе подавши цельбы,/ о преподобномучениче Адриане, приснопамятне,/ молитвенниче о душах наших.

Кондак мученика Варлаама
глас 4
Явился еси преудивлен крепостию, всесожжения ливан благовонен себе принесл еси, жертву Христу, и венец почести приим Варлааме, присно моли за ны, страдальче.

Ин тропарь преподобного Варлаама Индийского
глас 8
Слез твоих источники пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенныя, сияя чудесы, Варлааме отче наш,/ моли Христа Бога спастися душам нашим.

Тропарь преподобного Варлаама, 1-го игумена Печерского, в Ближних пещерах
глас 1
Мира красная и славу его оставль,/ притекл еси в пещеру,/ идеже от силы преуспевая в силу,/ был еси вождь Христова стада, всеславне Варлааме,/ еже яко упас добре, упаси и нас, молим тя,/ сохраняя от всех зол, да тя ублажаем.

Кондак преподобного Варлаама, игумена Печерского, в Ближних пещерах
глас 2
Отеческаго прещения не устрашился еси,/ ласканиям того не повинулся еси,/ ниже лестию низложился еси женскою, всечестне Варлааме,/ но непобедимь от тех пребыл еси,/ надеяся на Господа своего, Емуже молися о душах наших.

Тропарь преподобного Иоасафа, царевича Индийского
глас 4
От духовнаго наставника научився,/ царю Иоасафе, Бога познати,/ Крещением же просветився,/ люди к вере обратил еси,/ и отцу твоему от купели приемник быв,/ царство оставив, пустыню достигл еси/ и в ней трудолюбие подвизался еси./ Моли Христа Бога со учителем твоим Варлаамом/ спастися душам нашим.

Ин тропарь преподобного Иоасафа, царевича Индийского
глас 4
Из чрева матерня/ прекрасное вселение бысть Святаго Духа,/ преславне Иоасафе,/ и от блаженнаго Варлаама безценный бисер, Христа,/ в сердце своем приял еси,/ и Божественным Крещением Индию просветил еси,/ отеческое же нечестие исправль,/ приведе его от тьмы ко свету Богоразумия/ и, оставив тленное на земли царство,/ пустыню достиг и своего учителя,/ темже на Небесех от Живоначальныя Троицы/ венцем царским венчася,/ моли о нас, чтущих честную твою память.