КАНОН СВЯТОМУ И БЛАЖЕННОМУ МАКСИМУ,
ХРИСТА РАДИ ЮРОДИВОМУ, МОСКОВСКОМУ ЧУДОТВОРЦУ
Глас 4.

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.
Святый блаженный Максиме, моли Бога о нас.
Причастием еже к Богу, преподобне, свет был еси и, к Нему отлучився, Максиме блаженне, желанием крайним, благим надеждам своим, отче, исполнение приял еси.
Святый блаженный Максиме, моли Бога о нас.
Желанием еже к Богу распалаем, мир оставил еси, спутника, отче, обрет, Христа, Максиме славне, с Нимже стезю прошел еси спасительную, радуяся.
Слава Отцу и Сыну и Святому Духу:
Обогатитися никакоже истощаемыми возжелев, богатство и славу временную, мудре, и пищу мимотекущую, и мирское достояние доблемудренно отринул еси.
И ныне и присно и во веки веков. Аминь.
Красную, и избранную, и всечестную разумев Тя, Сын Божий, Пренепорочная, Сын Твой бысть, сыны сотвори благодатию, Владычице, чтущия Тя.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.
Святый блаженный Максиме, моли Бога о нас.
Усердно к мысленным совлечеся деянием, побеждая вражия полки Божественным пособием Духа.
Святый блаженный Максиме, моли Бога о нас.
Ранами и молитвенным воздержанием, и биении, преподобне, страсти мирския, отче Максиме, уязвил еси.
Слава Отцу и Сыну и Святому Духу:
Умориша врага постницы Твои, Иисусе, умершвление радостно, Владыко, Твое живоносное возжелевше. И ныне и присно и во веки веков. Аминь. Избавляющаго человеки преслушания, лютаго падения, всему Виновнаго, Чистая и Всенепорочная, родила еси.
Господи, помилуй. (3 раза).

Седален, глас 8:

Светом Божественным озаряем, в путь, ведущий к Божественным сиянием, ходил еси верно, отче преподобне, и вражиих отбегл еси прилог, и сын света и дне явился еси, Максиме Богоблаженне.
Слава Отцу и Сыну и Святому Духу:
Отче Богомудре и преблаженне Максиме, красная мира сего яко уметы вменив, весь, умом изменився, изменившемуся нас ради Христу последовал еси, и юрод Его ради нареклся еси и от неразумных скорби претерпел еси. И ныне о нам молися, память твою верно славящих, прехвальне.
И ныне и присно и во веки веков. Аминь.
Предстательнице верных, Богородительнице, скорбящих радосте и плачущих великое утешение, от чрева Твоего, Дево, всесвятаго преестественно Рождшагося непрестанно моли с Максмом преблаженным избавити нас в час испытания лютаго осуждения.

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающе: слава силе Твоей, Господи.
Святый блаженный Максиме, моли Бога о нас.
Соединився к стезе правды, в Богоспасаемый Божественный град вшел еси, преподобне, спасительным сиянием обогатився.
Святый блаженный Максиме, моли Бога о нас.
Единообразный, преподобне, смысл Богоносный видев, Божественными повестьми и Божественною одеждею одеялся еси.
Слава Отцу и Сыну и Святому Духу:
Сердце твое скрижаль очищену, Святаго Духа благодать, обретши, отче, написа совершенное безстрастие и любовь нелицемерну.
И ныне и присно и во веки веков. Аминь.
Седяй на Престоле превознесенне Херувимстем, яко престол, Тя имея, на руке Твоей почи, Марие Богоневесто, препрославленный Бог.

Песнь 5

Ирмос: Ты, Господи, мой свет, в мир пришел еси, Свет Святый, обращаяй из мрачна неведения верою воспевающия Тя.
Святый блаженный Максиме, моли Бога о нас.
Пресветлую зарю, Максиме, приим, яко солнце, явился еси и демонскую тьму отгнал еси, достославне.
Святый блаженный Максиме, моли Бога о нас.
Твоим желанием, Христе, отвергл все, преподобный, желание телесное, якоже сгребие мирское оттрясе.
Слава Отцу и Сыну и Святому Духу:
Силою Божественною душу укрепив, в мир вселился еси, опустевая страсти, отче Богомудре Максиме.
И ныне и присно и во веки веков. Аминь.
Рачение преста тленное, Дева бо нетленно роди Бога Слова, паче естества и слова Дева пребывает.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.
Святый блаженный Максиме, моли Бога о нас.
Ум твой весь к Богу простирая непрестанными поучении, плотскую любовь не пощадел еси, благих тебе ходатайству, Максиме, присвоение.
Святый блаженный Максиме, моли Бога о нас.
Ни скверны, ни враски приял еси, блаженне, посреде тебе мира живущу, честными же паче мольбами твоими очищаеши от душевныя скверны притекающия.
Слава Отцу и Сыну и Святому Духу:
Ты, плотских мудрований вышше имея помысл, не уязвился еси, посреде жен обнажаемь: безстрастия бо одеждею, Максиме, одеялся еси.
И ныне и присно и во веки веков. Аминь.
Усты, и помыслом, и сердцем, Пресвятая Богородице, Тя проповедуем: Тобою Богу примирихомся, отриновеннии преступлением первее праотца.

Кондак, глас 2:

Вышния красоты желая, нижния сладости и телесная одеяния в ничтоже вменил еси и нестяжание паче суетнаго мира возлюбил еси. Ангельское житие проходя, скончался еси, блаженне Максиме: с нимиже Христа моли непрестанно о всех нас

Икос:

Ангел на земли житием показався, Ангельския полки удивил еси, и демоны устрашил еси, и человеки просветил еси чудес твоих зарями, Богоносе и преблаженне отче наш Максиме. И ныне нас вразуми воспевати песнь к твоему хвалению, радостным гласом сице глаголющих: радуйся, оставивый тленное мудрование и приемый нетленный венец; радуйся, терпеливый душею; радуйся, целомудренный разумом и к Богу воззрением; радуйся, предоблий юроде, иже злокозненнаго врага под ногами сотрый; радуйся, яко нижнее мудрование оставль и вышняго Царствия достигий; радуйся, целителю болезней и отгонителю страстей; радуйся, Максиме блаженне, моля непрестанно о всех нас.

Песнь 7

Ирмос: В пещи Авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.
Святый блаженный Максиме, моли Бога о нас.
Содержимь Христовою подобно, отче, Божественною любовию, других спасти радостно весь сам ся, вопия, издал: благословен Бог отец наших.
Святый блаженный Максиме, моли Бога о нас.
С Небесе тебе поданую, отче, приим пищу, сею препитал еси благопокорно приемлющия твоя повеления и долу влекущий грех оставляющия, блаженне.
Слава Отцу и Сыну и Святому Духу:
Последовав отеческим преданием, отче мудре, пагубы отриновение заповеда, зовуще: благословен Бог отец наших.
И ныне и присно и во веки веков. Аминь.
Вышняго освященное Божественное селение, радуйся, Тобою бо дадеся радость, Богородице, зовущим: благословенна ты в женах, Всенепорочная Владычице.

Песнь 8

Ирмос: Руце распростер Даниил львов зияния в рове затче, огненную же силу угасиша, добродетелию препоясавшеся, благочестия рачители, отроцы, взывающе: благословите вся дела Господня Господа.
Святый блаженный Максиме, моли Бога о нас.
Всесветлая звезда сущ во тьме и страсти, световодя к жизни светлей: твориши бо жены нечистыя целомудренно жити и отгониши лютыя недуги, вопия: благословите вся дела Господня Господа.
Святый блаженный Максиме, моли Бога о нас.
Ты исцели ум мой в крове чудных и мудрых, преподобне, повелений Божиих, многи уловил еси юродствовати Господа ради, ведый наругаемь быти, вопия чистейшею душею: благословите вся дела Господня Господа.
Слава Отцу и Сыну и Святому Духу:
Совершен един, Иже весть своя прославляти, Господь, преподобныя: сий бо гробу посылаемь и Ангелов светлословлении почитаемь, вопиющих: благословите вся дела Господня Господа.
И ныне и присно и во веки веков. Аминь.
Избавляяй нас, возсия из Тебе Господь, Дево Чистая, Егоже моли, Владычице, просветити поющия Тя и обстояния нас избавити, вопиющия: благословите вся дела Господня Господа.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.
Святый блаженный Максиме, моли Бога о нас.
Всем сердцем, Максиме, Троице усердно предложився и от Нея лучи Богодельно приемь, световиден был еси и со Ангелы ликуеши.
Святый блаженный Максиме, моли Бога о нас.
Желанием Божественным приединився и воздержанием просвещаемь, будущих благ в причастии уже быв, Максиме Богоблаженне, и в наслаждении.
Слава Отцу и Сыну и Святому Духу:
Твоя болезни и поты прият веселие, никакоже конца имуще, в немже питаяся, Максиме преподобне, нас непрестанно поминай.
И ныне и присно и во веки веков. Аминь.
Разори души моея облаки, Света облаче, святая Владычице, и сильна соделай мя на страсти, борющия мя, Спаса всех рождшая и Избавителя.

Светилен.

Ангельскаго жития желая, преподобне, покорил еси страсти плотския мужески и равноангелен был еси, Богоносе отче Максиме.
Слава Отцу и Сыну и Святому Духу, и ныне и присно и во веки веков. Аминь.
Тя Предстательницу имамы вси грешнии, о Пресвятая Дево! Ты благопременна сотвори Твоего Сына матерними Твоими молитвами


Тропарь блаженного Максима, Христа ради юродивого, Московского

глас 4
Терпением своим велию мзду на Небесех стяжал еси,/ в буйство волею Христа ради преложися/ и на Небо мысленное, яко на колеснице огненней,/ возшел еси, премудре Максиме./ Днесь мы ныне чтим честных мощей твоих обретение/ вкупе с благочестивыми и верными людьми царствующаго града Москвы,/ да вси вопием ти:/ моли Христа Бога/ спастися душам нашим.
Кондак блаженного Максима, Христа ради юродивого, Московского

глас 8
Верою и любовию твое честное обретение празднующих, блаженне,/ сохрани и соблюди от всякий злобы и соблазна змиина,/ имаши бо дерзновение ко Владыце всех Христу,/ Егоже моли спасти люди, моляшиятися,/ да вси вопием ти:/ радуйся, отче Максиме, царствующему граду Москве похвало.


Молитва блаженному Максиму

Угодниче Божий, молитвенниче наш теплый и скорый помощниче, блаженне Максиме! Припадающе к раце мощей твоих прославляем многотрудныя подвиги юродства твоего Христа ради, возлюбив бо Единаго Бога от всея души твоея, ты мирскими красотами не восхотел еси наслаждатися; роднаго жилища, любве сродник, богат­ства и славы временныя отреклся еси и безприютное житие возлюбил еси. Прилежав о спасении души, плоть твою наготою телесною, мразом и зноем, постом и бдением, долговременным на земли лежанием изнурил еси и вся страсти ея духови покорил еси, на земли пожив небесно, во плоти духовно, умом весь к премирным вземся, плотскую мудрость отринул еси и, быв мудр о Христе, юрод мирови показался еси, от неразумных многия обиды и биении благодушно притерпевая и многих нечестивых на путь спасения наставляя. Темже, по скончании твоих подвигов, всеправедный Судия нетле­нием честных твоих мощей и многими чудесы тя прослави, душу же твою святую в Небесныя обители всели, идеже, предстоя Престолу Неприступнаго Божест­веннаго Света, в Нем, яко в зерцале, видиши наша нужды, слышиши наша к тебе прошения и яко друг Христов имаше велие к Нему дерзновение молитися о нас. Сего ради усердно просим тя: помолися Господу Богу о нас, к земли приверженных, да и мы, в подражание твоему ангелоподобному на земли житию, не погрязнем в суетных житейских попечениих и в земных наслаждениих, не прельщаемся и не прилепляемся всею душею к тленным мира сего благом, но да обратит Господь Своею благодатию наша мысли и желания к небесным и укрепит желати восприятия будущих нетленных сокровищ, да подаст нам, слабым, силу к побеждению страстей, мыслей и желаний греховных, да пленит наш кичливый ум в послушание веры, избавит от высокоумия, суемудрия, ложных пагубных учений и дарует нам мудрость духовную, да растворит окамененная сердца наша слезами умиления и сокрушения о наших согрешениих, согреет их любовию к Нему, нашему Создателю, и к ближним нашим. Испроси всем, во всякой нужде сущим и к твоему заступлению прибегающим, всякий дар, коемуждо благопотребен: больным — исцеление, печальным — утешение, бедствующим — помощь, обиженным — защиту. Принеси ко Господу святую молитву о всех нас, многогрешных, яко да не по грехом нашим воздаст нам, ниже по беззакониим нашим накажет нас, но отвратит всякий гнев, праведно движимый на ны, и пробавит милость Свою, всяких нужд, бед, напастей, скорбей и болезней нас избавляя, имиже весть судьбами да наставит нас на путь спасения, подаст прочее время живота нашего в покаянии и благочестии прейти и христианскую кончину, неболезненну, непостыдну, мирну, и Небеснаго Царствия наследие получити со всеми святыми во веки веков. Аминь.