Акафист Преподобному и Богоносному отцу нашему Иову, Почаевскому чудотворцу


Кондак - 1

Избранный чудотворче и земли нашея добрый учителю, всея же вселенныя усердный молитвенниче, преподобне отче Иове, чистым твоим житием просвещаема обитель твоя и вси православнии людие благодарственная о тебе Святей Троице возносят хваления. Ты же яко имеяй дерзновение ко Господу, предстатель буди о душах наших неусыпный и на страсти воинствующим скорый помощник, да в радости сердца зовем ти:

Радуйся, Иове, преславный угодниче Божий, и обители Почаевския украшение.

Икос - 1

Ангел благовестник воистинну явился еси нашим людем от врагов Церкви обуреваемым отче наш Иове, елико писанми твоими и книг священных печатанием, толико и богоугодным житием и славным еже к Богу отшествием, ныне же и всей вселенней предстатель теплый являешися у Престола Владычня; сего ради зовем ти:

Радуйся, истинныя Церкви добрый воине; радуйся, православия светлый светильниче. Радуйся, отцы наша от ереси оградивый; радуйся, чада их во благочестии утвердивый. Радуйся, спасения ради дом родителей издетска оставивый; радуйся, о души твоей попечение паче всех показавый. Радуйся, яко твоим отроческим подвигом старцы удивишася; радуйся, яко от юности во Ангельском образе к тем сопричтен был еси. Радуйся, обитель Угорницкую твоим житием просветивый; радуйся, множайшими труды монастырь Дубенский прославивый. Радуйся, немощных в вере утверждение; радуйся, неведущих вразумление.

Радуйся, Иове, преславный угодниче Божий, и обители Почаевския украшение.

Кондак - 2

Видяще иноцы Угорництии ревностное твое в духовном житии преспеяние, схимонаха и пресвитера тебе быти устроиша, обаче Волынская земля на вящшия труды тя подвизающи, устрои тебе игумена быти во граде Дубенстем ко отражению еретических поползновений, православным же людем ко окормлению духовному и к неленостному Господеви воспеванию: Аллилуиа.

Икос - 2

Разум совершен воистинну отче показал еси, егда душевнаго ради устроения на гору Почаевскую уклонился еси и вместо начальствования послушанию паки предался еси, обаче в лучший того подвиг Господь тебе вменяше вторицею приятое зде игуменство, братие же Почаевстии взываху ти с веселием:

Радуйся, наш отче новый и предивный; радуйся, благочестия образе. Радуйся, начальство, яко служение, приявший; радуйся, Богу и ближним волею поработивыйся. Радуйся, яко в начальстве твоем Христова смирения подобие является; радуйся, яко того ради покой душам нашим обретается. Радуйся, о людех доброе моление возносивый; радуйся, на демоны мужественно ополчивыйся. Радуйся, Ангельскаго ликостояния приобщивыйся; радуйся, добрый путевождь ко спасению нам явивыйся. Радуйся, спасающимся ободрение; радуйся, ленящимся обличение.

Радуйся, Иове, преславный угодниче Божий, и обители Почаевския украшение.

Кондак - 3

Сила Духа Божественнаго обогати тя Иове премудре, егда татя монастырския пшеницы обличив, абие прощение тому даровал еси и утаенное паки ему возвратил еси покаяния его ради и алчущаго телесе насыщения, сие бо сотворив, окамененную умягчил еси душу и научил еси пети: Аллилуиа.

Икос - 3

Имеяй присное попечение о душе твоей отче преподобне, возлюбил еси пещерное затворение, идеже дни и нощи в молитве провождая, единому Богу беседовал еси, темже и свет благодати его темную пещеру яко Фаворскую гору облиставаше и научаше всех взывати тебе:

Радуйся, молитвы непрестанное кадило; радуйся, слез неистощимый кладезю. Радуйся, древним Киево-Печерским затворником уподобивыйся; радуйся, тех благодатныя дарования стяжавый. Радуйся, яко молитвами твоими братия в терпении укрепляшеся; радуйся, яко воздыханьми твоими демони от твоея обители отгнашася. Радуйся, в темную пещеру небесный свет призвавший; радуйся, и в наша страстныя души благодать от Господа приносящий. Радуйся, скалы Почаевския твердейший адаманте; радуйся, всея страны нашея преславный светильниче. Радуйся, вселенския Церкве преславный столпе; радуйся, всех молящихся прибежище.

Радуйся, Иове, преславный угодниче Божий, и обители Почаевския украшение.

Кондак - 4

Бурю еретических нахождений отгнати желая, был еси в богоспасаемом граде Киеве со освященным Собором Православных, идеже неврежденную веру дерзновенно исповедал еси и к томужде вся люди увещевал еси, тем же и священныя книги тиснением предавати во обители Почаевстей не преставал еси, яко всем чтущим сия истинную веру содержати и православно пети Богу: Аллилуиа.

Икос - 4

Слышаша иноцы Почаевстии непрестанную молитву Иисусову, твоими усты глаголемую, отче Иове, слезы же из очию твоею текущия видеша и твоею учительною беседою назидающеся, образом же жития твоего умиляющеся, глаголаху:

Радуйся, молитвенниче наш предобрый; радуйся, учителю наш кроткий. Радуйся, благодатныя слезы источаяй; радуйся, и наша сердца умиляяй. Радуйся, яко духовную жертву непрестанно ко Господу возносиши; радуйся, яко райская утешения во уме твоем присно предносиши. Радуйся, Крестителя в воздержании подражателю; радуйся, многострадальнаго в долготерпении соревнователю. Радуйся, тою обою дарований приобщивыйся; радуйся, Ангельскаго сослужения сподобивыйся. Радуйся, нищих питателю; радуйся, скорбящих утешителю.

Радуйся, Иове, преславный угодниче Божий, и обители Почаевския украшение.

Кондак - 5

Боготечней звезде уподобился еси преподобне, обходя землю Галицкую и Волынскую, светом же православия вся просвещая, ревнителем веры сугубую ревность внушая, добрых сердца в православии утверждая, ленивых же присно воздвизая к пению Богу: Аллилуиа.

Икос - 5

Видеша монаси и простии людие игумена Почаевския обители земли копанием и древес саждением и гноя собиранием себе смиряюща, яко другому Дамаскину дивляхуся, и всяку гордыню еретическую возненавидеша, в православии же души своя утверждаху, глаголюще:

Радуйся, добраго подвига вождю; радуйся, истинныя веры утверждение. Радуйся, злочестивую гордыню еретиков обличаяй; радуйся, православное смиренномудрие возношаяй. Радуйся, яко тобою красоту благочестия познахом; радуйся, яко тобою суету мирскую в себе попрахом. Радуйся, богатым мира сего доброе вразумление; радуйся, нищим и трудником благое утешение. Радуйся, крест лишений волею подъявый; радуйся, той крест нам носити пособствуяй. Радуйся, Павла скинотворца последователю; радуйся, Христа Бога рабе благий.

Радуйся, Иове, преславный угодниче Божий, и обители Почаевския украшение.

Кондак - 6

Проповедник православныя веры и благочестия чрез все житие твое быв, Иове преподобне, сие святою кончиною твоею запечатлел еси, уже за седмицу предрек, безболезненно по причащении Святых Таин, прияти сподобился еси, никакоже о мире сем жалея, но разрешитися хотя и со Христом быти, во еже непрестанно воспевати Серафимскую песнь: Аллилуиа.

Икос - 6

Возсия благолепною красотою мертвенное тело твое преподобне, еже бо в житии твоем постом и трудами сокрушал еси, тоежде Господь по успении твоем нетлением и благоуханием прослави, нас же пети тебе научи:

Радуйся, небес пресельниче; радуйся, и земли молитвенниче. Радуйся, исхождение твое от земных предуведевый; радуйся, о том тепле возвеселивыйся. Радуйся, яко и нас в бесстрашии ко смерти утверждаеши; радуйся, яко упованию на милость Божию нас научаеши. Радуйся, любителей временнаго живота обличителю; радуйся, будущаго воскресения нетленный плотию свидетелю. Радуйся, плоть свою в житии распинати поревновавый; радуйся, туюжде по смерти благоуханну явивый. Радуйся, неверующих явное обличение; радуйся, надеющихся доброе утверждение.

Радуйся, Иове, преславный угодниче Божий, и обители Почаевския украшение.

Кондак - 7

Хотя Бог о нетлении мощей преподобнаго Иова известити Церковь, трищи в сонном видении того являет митрополиту Дионисию, аки жива и волю Господню извествующа, ему же веровав Дионисий прослави Вседержителя и угодника Его с песнию: Аллилуиа.

Икос - 7

Новаго тя о вселенней предстателя и чудотворца уведе освященный собор, монаси же и вси людие, егда пришедшу Дионисию на гору Почаевскую и житие твое уведевшу, честное твое тело из недр земли изнесеся нетленно и благоухания исполнено, чудеса же исцелений точаще, во еже вопити всем:

Радуйся, чудотворче новый и великий; радуйся, всех святых сопричастниче. Радуйся, землю Волынскую погребением твоим освятивый; радуйся, явлением мощей твоих в православии нас утвердивый. Радуйся, яко тобою исцеления хромии и слепии приемлют; радуйся, яко твоего нетленнаго телесе демони трепещут. Радуйся, и нас, пред гробом твоим стоящих умиления исполняяй; радуйся, к желанию спасения нас подвизаяй. Радуйся, аки живый, по смерти многим явивыйся; радуйся, небесным силам духом твоим приобщивыйся. Радуйся, чудес источниче; радуйся, на демоны нам крепкий помощниче.

Радуйся, Иове, преславный угодниче Божий, и обители Почаевския украшение.

Кондак - 8

Странное и дивное чудо показал еси преподобне, Иове, егда вскоре по прославлении твоем явился еси посреде двою Ангелу моляся в Церкви Почаевстей и плат миром исполненный девице некоей дал еси возложения ради на раны болящему игумену Досифею, той же исцеление прием абие к твоему гробу здрав припадаше, поя Богу: Аллилуиа.

Икос - 8

Весь еси воистинну обители твоея покров и заступление Иове преславне, сие бо православнии людие разумеша, егда тя на небеси узреша Богородице молящася о спасении святыя Лавры, монахов же и мирских челевек, от агарян зело осаждаемиих, но от того часа в радости тебе поющих:

Радуйся, всемощный наш заступниче; радуйся, святыя обители стено необоримая. Радуйся, нападения агарянская отражаяй; радуйся, стрелы на главы их возвращаяй. Радуйся, яко умолил еси Ангельским Силам явитися к тех поражению; радуйся, яко многие агаряне ко Христу тогда привел еси. Радуйся, ратники на обитель воюющия в послушники Ея претворивый; радуйся, непокоривыя беглецы сотворивый. Радуйся, дерзости богоборныя посрамление; радуйся, терпения христианского увенчание. Радуйся, упования еже на тя не посрамивый; радуйся, молитвенники твоя спасый и прославивый.

Радуйся, Иове, преславный угодниче Божий, и обители Почаевския украшение.

Кондак - 9

Всякия отступства и колебания в вере народом и обителию твоею претерпенная, отпустив преподобный Иов, молитвами своими землю Волынскую ко православию возврати и в ней святыню Почаевскую твердейший оплот истинныя веры ныне являет, приходящим к ней тьмочисленным людем, святыя же мощи его усты и сердцем целующим и поющим Богу: Аллилуиа.

Икос - 9

Витии славы твоея явишася православнии архиереи и весь освященный собор, егда мощи твоя, от отступник православия сокровенная, паки изнесоша во святую Церковь поклоняющимся христианом и в веселии глаголющим:

Радуйся, православныя Волыни солнце; радуйся, истинныя Церкве звездо. Радуйся, заре правды нощи прешедшей возсиявшая; радуйся, луче, тьму ереси разгнавший. Радуйся, в нове твоих мощей явлений паки чудеса источаяй; радуйся, тем отступление от православия в конец обличаяй. Радуйся, яко моления верных исполняти не престал еси; радуйся, яко согрешения отец наших не помянул еси. Радуйся, и нас врагом прощати научаяй; радуйся, и нас в долготерпении утверждаяй. Радуйся, малодушных обличение; радуйся, кающихся прощение.

Радуйся, Иове, преславный угодниче Божий, и обители Почаевския украшение.

Кондак - 10

Спасения нашего буди и ныне ходатай Иове преподобне, зане многия растленныя обычаи нечестивии людие введоша во страну нашу и теми крепость наша оскуде, но в сокрушении сердец наших к твоему заступлению припадаем, на твое же предстательство уповающе, вопием Богу: Аллилуиа.

Икос - 10

Стена твердая православной веры в земле Волынстей и Галицстей чрез все житие твое был еси отче преподобне, но и по преставлении твоем явленьми и исцеленьми за истину побораеши, еще же и невидимо душам чад твоих беседуеши, да вси вопием ти:

Радуйся, спасения нашего поборниче; радуйся, искушений злых отгнателю. Радуйся, ко Господу дерзновение о нас стяжавый; радуйся, от Того благодать исцелений приявый. Радуйся, яко со Ангелы в раи днесь водворяешися; радуйся, яко со Апостолы и мученики тамо ликуеши. Радуйся, купно с ними о Церкви предстателю; радуйся, милосердия Божия к нам ходатаю. Радуйся, кающияся еще в житии твоем возлюбивый; радуйся, ныне тех молитвы, яко фимиам к небесному Престолу возносяй. Радуйся, и всех молящихся скорый слышателю; радуйся, смиренных сердцем покровителю.

Радуйся, Иове, преславный угодниче Божий, и обители Почаевския украшение.

Кондак - 11

Пение наше благодарное, от любве чистыя приносимое, приими угодниче Божий, яко же вдовицине лепте зане духовное имение наше нищетно пред тобою, благими же делы подражати тебе не возможем, но сокрушенная воздыхания о гресех наших приносяще, твоих добродетелей славою утешаемся, поюще Богу: Аллилуиа.

Икос - 11

Светильник православныя веры и столп благочестия был еси отче наш Иове, словом, житием, любовию, верою, чистотою, в них же и нас твоими молитвами укрепи, всякия же ереси и развращенныя обычаи от нас далече отжени, да благодарственное сотворим ти пение:

Радуйся, Божий избранниче; радуйся, Ангелов собеседниче. Радуйся, и от нас духом любве твоея не отступивый; радуйся, и нам от духа твоего дарования разделяяй. Радуйся, яко зрящии нетленное тело твое на страсти телесная ополчаются; радуйся, яко чтущии о святем житии твоем, душу свою очистити тщатся. Радуйся, ревновати о своем спасении нас научаяй; радуйся, и ближних спасению служити нас подвизаяй. Радуйся, ревностию о православии сердца наша распаляяй; радуйся, покаянием о гресех души наша сокрушаяй. Радуйся, духовнаго сна разгнателю; радуйся, духовныя бодрости подателю.

Радуйся, Иове, преславный угодниче Божий, и обители Почаевския украшение.

Кондак - 12

Благодать непрестанныя молитвы и о теле небрежения, радости же духовныя и к ближним сострастия обильно стяжал еси отче Иове, тем же и нас ленивых и грешных, тоя причастники сотвори твоими всемощными молитвами, да мучительства страстей избавльшеся, воспоим Богу: Аллилуиа.

Икос - 12

Поюще твое дивное житие на земли и на небеси прославление, молим тя Иове преподобне: утверди молитвами твоими православную веру во стране тебе присной, всю же Христову Церковь на земли противу неверия и ереси защити и укрепи, наша же не отвергни хваления сицевая:

Радуйся, Апостольскаго служения сопричастниче; радуйся, пустыннических подвигов ревнителю. Радуйся, нищеты духовныя благий образе; радуйся, плача духовнаго богатный стяжателю. Радуйся, яко кротостию твоею души татий и злодеев, аки наследие доброе Господеви привел еси; радуйся, яко со всеми алкавшими и жаждавшими правды ныне во дворех Божиих насыщаешися. Радуйся, от Бога со всеми милостивыми помилованный и прославленный; радуйся, со всеми чистыми сердцем лицем к лицу ныне Того созерцаяй. Радуйся, и нас от небесных с любовию назираяй; радуйся, всем о православии трудящимся помощь от Господа подаваяй. Радуйся, обитель твою от всякаго обстояния сохраняяй; радуйся, и о всей вселенней молитвы Господеви возносяяй.

Радуйся, Иове, преславный угодниче Божий, и обители Почаевския украшение.

Кондак - 13

О всеблаженне преподобне Иове, православныя веры великий ревнителю и ереси твердый обличителю! Малаго сего моления от убогих сердец наших к тебе возносимаго не отвержи, но буди нам присный в вере и покаянии наставник, в подвизех благий помощник и пред Господом о спасении нашем неустанный молитвенник, о тебе вопиющих Богу: Аллилуиа.

Сей кондак читается трижды, затем снова читается икос - 1, кондак - 1, и молитва.

МОЛИТВА ПРЕПОДОБНОМУ И БОГОНОСНОМУ ОТЦУ НАШЕМУ ИОВУ

О преподобне отче Иове, иноков трудолюбнаго жития богомудрый наставниче, кротости и воздержания, чистоты и целомудрия, братолюбия и нищелюбия, терпения и бдения от ранней юности до поздней старости неутомимый подвижниче, веры православныя великий ревнителю и непреоборимый поборниче, земли Волынския и Галицкия светило богосветлое и святыя Почаевския обители непобедимый защитниче! Призри оком благоутробия твоего на нас недостойных чад твоих, к тебе усердно по вся дни прибегающих и на боголюбивыя люди сия, пред твоими духоносными и многоцелебными мощами собравшияся и благоговейно к тем припадающия, и испроси предстательством твоим ко Всевышнему Владыце им и нам вся, яже к животу и благочестию, полезная и благопотребная: болящия исцели, малодушныя ободри, скорбящия утеши, обидимыя заступи, немощныя подкрепи и поверженныя долу возстави, всем вся, благодатию тебе от Бога данною, даруй по коегождо нужде и потребе, во спасение души и во здравие телу. Вознеси, угодниче Божий, всемощную молитву твою, да будет в стране нашей выну мир и тишина, благочестие и благоденствие, в судах правда и милость, в советех мудрость и благое преспеяние, да утверждается же во благих человецех верность, в злых же страх и боязнь, во еже престати им от зла и творити добрая, да тако в стране нашей Царство Христово растет и множится и да прославится в нем Бог, дивный во Святых Своих: Ему же единому подобает всякая слава, честь и поклонение Отцу, и Сыну, и Святому Духу, ныне и присно, и во веки веков. Аминь.

Тропарь, глас 4

Многострадальнаго праотца долготерпение стяжав, Крестителеву воздержанию уподобляяся, Божественныя же ревности обою приобщаяся, тех имена достойно прияти сподобился еси, и истинныя веры был еси проповедник безбоязнен, тем же монахов множество ко Христу привел еси, и вся люди в православии утвердил еси, Иове, преподобне отче наш, моли спастися душам нашим.

Кондак, глас 4

Явился еси истинныя веры столп, Евангельских же заповедей ревнитель, гордыни обличение, смиренным же предстатель и научение, тем же и ублажающим тя, грехов отпущение испроси, и обитель твою невредиму сохрани Иове, отче наш, многострадальному подобный.

Величание

Ублажаем тя, преподобне отче наш Иове, и чтем святую память твою, наставниче монахов, и собеседниче Ангелов.

Кондак – 1
Избранниче Христов и обители Почаевския новый чудотворче, скорбящих скорый утешителю и недужных благодатный целителю, преподобне отче Амфилохие, любовию восхваляюще богоугодное житие твое, песнь благодарения о тебе Богу приносим. Ты же яко дерзновенный к Нему молитвенник и теплый о нас ходатай, испроси всем с верою к тебе приходящим, от душевных и телесных зол свобождение, да выну зовем ти:Радуйся, преподобне отче Амфилохие, теплый наш заступниче и предивный целебниче.

Икос – 1
Архангелу Рафаилу, молитвы страждущих Богу приносящему и здравие благодатию Его с небесе подающему, уподобяся преподобне, яко врач изрядный явился еси, исцеляющий наша недуги многоразличныя. Мы же, поминающе преславное твое житие, тако вопием ти:
Радуйся, земли Волынския святое прозябение;
Радуйся, родителей благочестивых чадо благословенное.
Радуйся, измлада в вере истинней воспитанный; радуйся молитвенное делание и телесное воздержание издетска возлюбивый.
Радуйся, от юности своея во благочестии просиявый;
Радуйся, добродетели родителей своих унаследивый.
Радуйся, искусному врачеванию, отцем своим, обученный; радуйся, благоговению и кротости матери своея подражати тщавыйся.
Радуйся, супротив похоти плоти, хранением девства и чистоты подвизавыйся; радуйся, на похоть очес целомудрием вооруживыйся.
Радуйся, гордости житейской смиренномудрием противуставый;
Радуйся, Христовы заповеди боголюбия и братолюбия исполнивый.
Радуйся, преподобне отче Амфилохие, теплый наш заступниче и предивный целебниче.
Кондак – 2
Видев на себе десницу Божию, выну тебе покрывающую, и скоротечность жития сего разумев, вся прелести мира лукаваго отвергл еси и на святую гору Почаевскую пришел еси, да всего себе в жертву Творцу своему в чине иночестем принесеши, непрестанно поя Ему: Аллилуия.

Икос – 2
Разума совершенна взыскаху в тебе православнии людие, видящии богоугодное твое житие. Ты же от обилия в сердце любве Христовы возымел еси о них отчее попечение. С высоты же небесныя дар духовнаго разсуждения восприим, сей достойно употребил еси в научение духовно младенствующим, сего ради похваляем тя, глаголющи:
Радуйся, смотрения Зиждителева исполнителю;
Радуйся, о спасении ближних попечителю.
Радуйся, Духа Святаго стяжателю;
Радуйся, во тме неверия блуждающих просветителю.
Радуйся, скорбящих и обремененных утешителю;
Радуйся, ревностный христиан окормителю.
Радуйся, Церкве земныя воителю;
Радуйся, полков демонских прогонителю.
Радуйся, святых отец последователю;
Радуйся, еретиков льстивых обличителю.
Радуйся, покаяния учителю;
Радуйся, от рабства греховнаго свободителю.
Радуйся, преподобне отче Амфилохие, теплый наш заступниче и предивный целебниче.

Кондак – 3
Силою Божиею укрепляемый, на высоту безстрастия мужественно возшел еси, блаженне, таже от Господа многия благодатныя дары прияв, спасению ближних ими послужил еси, смиренномудренно воспевая Щедродателю Богу: Аллилуия.

Икос – 3
Имея врачеваний дарование, воистину, яко новый источник благодати, на горе Почаевстей явился еси, отче Амфилохие, к тебе бо во множестве различными недуги страждущии, с верою и упованием усердно притекаху, и силою благодатных молитв твоих, безмездно здравие приемше, в радости благодарения взываху:
Радуйся, силою Вышняго препоясанный неисцельныя недуги врачевати;
Радуйся, Того же властию оболченный и мертвыя воскрешати.
Радуйся, слепыя зрячия сотворяющий;
Радуйся, глухим слух и немым язык отверзающий.
Радуйся, кости сокрушенныя исправляющий;
Радуйся, хребты сляченныя укрепляющий.
Радуйся, сухия руце и нозе токов жизни исполняющий;
Радуйся, огнем опаленная телеса обновляющий.
Радуйся, язвы и смрадныя струпы телесныя очищающий;
Радуйся, уды плоти растлевшия, и отсеченны быти имущия, чудесне врачующий.
Радуйся, разума лишившымся, молитвами к Богородице, ум здравый подающий;
Радуйся, страждущих от дух нечистых, именем Иисусовым свобождающий.
Радуйся, преподобне отче Амфилохие, теплый наш заступниче и предивный целебниче.

Кондак – 4
Даром прозрения, внезапу от Господа дарованным, буря нашествия иноплеменных тебе известися, с сего же часа издалеча зрел еси души и судьбы к тебе приходящих. И яко ревности о благочестии исполненный, грехи нераскаянных даром сим кротко обличал еси, да принесше достойный плод покаяния, чистым сердцем воззовут Богу: Аллилуия.

Икос – 4
Евангельских словес благоразумнаго слышателя и сих мудраго исполнителя, зрим в тебе преподобне. Ихже ради на путь самоотвержения, лишений и скорбей ревностно возшел еси и за Христом неуклоно шествовал еси. Мы же, нерадящии о таковом восследовании своему Спасителю, во умилении и сокрушении сердец зовем ти:
Радуйся, желание быти со Христом выну имевый;
Радуйся, Того Единаго взыскати непрестанно тщавыйся.
Радуйся, монашескаго послушания строгий исполнителю;
Радуйся, на ниве Христовой ревностный делателю.
Радуйся, светозарное светило, руководящее нас ко спасению;
Радуйся, граде, стоящий верху горы, к нему же вернии притекают.
Радуйся, солию благочестия, мир от растления душевнаго сохраняяй;
Радуйся, многих ревности по Бозе исполняяй.
Радуйся, кротость и смирение Христово возлюбивый;
Радуйся, небесный покой еще в земнем житии обретый.
Радуйся, реко благодати Божия;
Радуйся, из неяже и ныне верою напояемся.
Радуйся, преподобне отче Амфилохие, теплый наш заступниче и предивный целебниче.

Кондак – 5
Боготечный защитник храма Святыя Живоначальныя Троицы в Лавре святей показался еси, егоже от осквернения и запустения защитив, безбожныя гонители от дому молитвы дерзновенно отгнал еси и верныя люди до крове стояти за веру Христову призвал еси, безбоязнено поюще Триипостасному Богу: Аллилуия.

Икос – 5
Видевше в тебе хулители злочестивии ревностнаго защитника обители Почаевския, и споборника крепкаго народу Божию разумевше, досады суще делателие безумнии, потщашася соделати тя немощна, страждуща и безчестна; мы же песнь хвалы приносим ти глаголюще:
Радуйся, за безбоязненное веры исповедание пострадавый;
Радуйся, за Бога в Троице Святей славимаго, во узилище влекомый.
Радуйся, заушения в подражание Господу Иисусу приявый:
Радуйся, с бесными и буими затворенный.
Радуйся, в жестоких мучениях долготерпевый;
Радуйся, в лютых злостраданиях не роптавый.
Радуйся, на мучители твоя не озлобивыйся;
Радуйся, любве божественныя преисполненный.
Радуйся, в долговременных злоключениях духовно бдевый и моливыйся;
Радуйся, Богородицу на помощь выну призывавый.
Радуйся, все упование свое на Господа возложивый;
Радуйся, в вере и надежде своей не посрамивыйся.
Радуйся, преподобне отче Амфилохие, теплый наш заступниче и предивный целебниче.

Кондак – 6
Проповедник покаяния и жития благочестнаго учитель показался еси, отче Амфилохие. Прежде бо исцелений телесных, исцелял еси души к тебе приходящих, от грехов и беззаконий. К сему же научал еси, яко скорби и болезни постигают нас за презрение жития богоугоднаго, егоже покаянием взыскати призывал еси, да сих избавльшеся, в радости воспоем: Аллилуия.

Икос – 6
Возсиял еси разсуждением духовным, от Господа тебе дарованным, егоже на душепопечение направляя, рабскаго плена работы страстем послушающих тя, благодатно свобождал еси. Ныне же достохвальная словеса от нас приими:
Радуйся, смирения и любве мечу обоюдоострый, козней вражиих посечение;
Радуйся, Апостолов подражателю, веры православныя утверждение.
Радуйся, мужественный подвижниче, обетов монашеских ревностное исполнение;
Радуйся, Ангелов собеседниче и ангельский образ носящих наставниче.
Радуйся, верный рабе Божий, исповедников наследниче;
Радуйся, отче милосердый, преподобных сопричастниче.
Радуйся, священниче Богом поставленный, Жертву Безкровную за люди непорочно приносити;
Радуйся, пастырю добрый, душу свою за словесныя овцы Христовы готовый положити.
Радуйся, врачу благодатный, водою и брашном, молитвою освященными, болящия исцелявый;
Радуйсядостойный пресвитере, силою благодати Божия скоро тем помогавый.
Радуйся, Богодарованный источниче, животворный и целительный;
Радуйся, любве Христовы преисполненный, падшия возставивый и отчаявшияся ободривый.
Радуйся, преподобне отче Амфилохие, теплый наш заступниче и предивный целебниче.

Кондак – 7
Хотя в сердце своем со Христом соединитися, непрестанно имя Его Сладчайшее усты призывал еси и огнем благодати Божия душу свою в достойный храм Сему предочистил еси. Сего ради и нас научаеши, ум и сердце от мира греховнаго отвращати и к Богу устремляти, дабы в вечном радовании пети Ему: Аллилуия.

Икос – 7
Новое зерцало апостольскаго уготования и желания разрешитися и со Христом быти явился еси, преподобне, егда беззаконнии и неблагодарнии на монастырском кладбище хотяху тя, неповиннаго умертвити. Но подвигом любве жертвенныя, сокелейника твоего Иринарха, от неумолимыя смерти спасен был еси. Сим образом и мы, в преданости Богу утверждаеми, глаголем ти сице:
Радуйся, Христа от юности своея возлюбивый;
Радуйся, душу и живот свой Ему всецело предавый.
Радуйся, волею своею Господу поработивыйся;
Радуйся, в непрестаннем уповании на Него утвердивыйся.
Радуйся, прежде смерти для мира греховнаго умерый;
Радуйся, жизнь вечную еще в земнем телеси во Христе обретый.
Радуйся, образе совершенныя веры и любве; радуйся, зерцало непостыднаго упования.
Радуйся, смирения Христова наследниче;
Радуйся, милосердия Его подражателю.
Радуйся, непрестанную память о смерти стяжавый;
Радуйся, сетей вражиих сею избегнувый.
Радуйся, преподобне отче Амфилохие, теплый наш заступниче и предивный целебниче.

Кондак – 8
Странное чудо является, блаженне, имя твое вкупе с Преблагословенной Богородицей и преподобным Иовом, молитвенно призывающим: малое бо приносяще вам прошение, абие таковым сугубым предстательством, от велиих скорбей и недугов приемлем скорое избавление, да вопием о вас Богу радующеся: Аллилуия.

Икос – 8
Весь любве Божественныя исполнен, свято окормлял еси людей множества, яко к старцу духоносному, во изгнание твое, в Мало-Иловицкую весь, к тебе притекающих. Ты же нужды их милостивно удовляя, к житию богоугодному многих приобщил еси. Тако и мы житием твоим, в истине и благочестии утверждаеми, зовем ти сице:
Радуйся, новый безсребренниче, болезни наша исцеляющий;
Радуйся, благовестниче изрядный, веру правую в земли нашей утверждающий.
Радуйся, служителю Божий, всем себе поработивый и многи ко Христу приведый;
Радуйся, подвижниче кроткий, обидящих тя милующий и любящий.
Радуйся, пастырю богомудрый, разум спасения людем подающий;
Радуйся, старче благодатный, души нераскаянных обновляющий.
Радуйся, отче святый, сердца чад ко отцем обращающий;
Радуйся, учителю покаяния, кающимся совесть омывающий.
Радуйся, пророче Бога живаго, страждущим милость изливающий;
Радуйся, громе богогласный, враги веры устрашающий.
Радуйся, простоты стяжателю, премудрыя века сего посрамляющий;
Радуйся, Истины служителю, смиренным разум озаряющий.
Радуйся, преподобне отче Амфилохие, теплый наш заступниче и предивный целебниче.

Кондак – 9
Всяких зол и скорбей, житие твое бысть исполнено, преподобне, имиже демони и злыя люди уязвити тя тщашася, но ничтоже успеша, обретше в тебе твердый столп веры и неиссякаемый источник любве, в нихже паче возрастая и сугубыя благодати сподобляяся, даже до кончины своея блаженныя, в благодушии пел еси Богу: Аллилуия.

Икос – 9
Всякий день и час многия молитвы возносил еси, отче, ко Пречистой Владычице нашей Богородице, Ея величие и матернюю любовь к нам грешным восхваляюще. Ныне же тя о обители твоей, купно со Иовом преподобным, теплаго заступника и неотступнаго молитвенника к Ней разумеюще, тако вопием ти:
Радуйся, избранниче Божия Матере;
Радуйся, святыя обители Ея преславный воине.
Радуйся, чудотворную икону Пречистыя свято почитавый;
Радуйся, и следу стопы Ея десныя, благоговейно покланявыйся.
Радуйся, славу Приснодевы на всяк день воспевавый;
Радуйся, на милость Ея упование свое полагавый.
Радуйся, в подвизех монашеских и трудех исповеднических Иову преподобному достойне подражавый;
Радуйся, отца сего святаго, чудотворения дар восприявый.
Радуйся, на жатву духовную Господем посланный;
Радуйся, на ниве Христовей рачительно потрудивыйся.
Радуйся, Царя Небеснаго благоволения искавый;
Радуйся, мирския славы и хваления, юродством бегавый.
Радуйся, преподобне отче Амфилохие, теплый наш заступниче и предивный целебниче.
И
Кондак – 10
Спасения нашего и ныне наставник буди преподобне, да зряще нетленное тело твое, от суетных и ложных мира сего отбегати научаемся; леность и небрежение о душе своей, трудом и молитвою попирая; о чистоте плоти и духа тщатися, всем сердцем поучаемся, в надежди спасения, поюще Богу: Алиллуия.

Икос – 10
Стена нерушимая от находящих зол был еси, преблаженне: скорбящих утешая, болящих исцеляя, бесы изгоняя, и от напастей сохраняя. Даже до днесь силу Божию в тебе сущую, всем с верою и любовию к тебе приходящим являеши, подвизая в благодарности пети тебе:
Радуйся, отче, яко еще живу ти сущу людие земли русския к тебе притекаху;
Радуйся, яко и ныне, потоцы народов святыя Руси, ищущих исцелений у цельбоносных мощей твоих, не оскудевают.
Радуйся, богоборцев лукавых обличителю; радуйся, богопротивнаго нечестия искоренителю.
Радуйся, мир Божий в себе стяжавый;
Радуйся, сладость сию неизреченную вкусити, многих сподобивый.
Радуйся, в истинном смирении сердце свое утвердивый;
Радуйся, сим оружием, купно с молитвою, демоны поразивый.
Радуйся, Отцу Небесному сыновне послуживый;
Радуйся, истинный Христа Спасителя учениче.
Радуйся, благозвучный Духа Святаго органе;
Радуйся, чистое Святыя Троицы жилище.
Радуйся, преподобне отче Амфилохие, теплый наш заступниче и предивный целебниче.

Кондак – 11
Песнь благодарения во всех обстояниих скорбнаго жития своего, Подвигоположнику Христу, непрестанно приносил еси, угодниче Божий, мы же, обретше в тебе таковаго пред Богом заступника, и в находящих напастех защитника, по образу твоему, в скорбех и радостех своих, прилежим выну воспевати Господеви: Алиллуия.

Икос – 11
Светильник многосветлый явился еси, богоносе, зарями чудес и образом благочестия верныя просвещая. Но и по успении твоем не оскуде в тебе сия благодать, юже приходящим с верою ко гробу твоему щедро подаеши, да навыкнут славити Бога, всех чудес Источника, тебе же глаголати сице:
Радуйся, безсребренников и чудотворцев приемниче;
Радуйся, телес наших здравие и душ спасение.
Радуйся, яко тобою от страстей телесных избавляемся;
Радуйся, яко тобою сладостей духовных исполняемся.
Радуйся, обители твоея и веси отеческия славная похвало;
Радуйся, всех богомудрых премудрая доброто.
Радуйся, многих от погибели исхитивый;
Радуйся, безчисленных неврежденно сохранивый.
Радуйся, бесов многоплачевное поражение;
Радуйся, земли Волынския освящение.
Радуйся, сияние, скорбный мрак разгоняющее;
Радуйся, светило, тьму безбожия просвещающее.
Радуйся, преподобне отче Амфилохие, теплый наш заступниче и предивный целебниче.

Кондак – 12
Благодатию в горниле скорбей, яко злато очищенный, венцем исповедничества и преподобия блистающий, по скончании своем возвратился еси в обитель Почаевскую. Волею же Божиею во обретении нетленных мощей твоих в последняя лета нам явился еси, духовно всех утешая и пети Богу, дивному во святых Своих, воздвизая: Аллилуия.

Икос – 12
Поюще житие твое богоугодное и чудес множества, отче Амфилохие, восхвалити тя по достоянию недоумеем, но ведяще благоутробие твое к немощствующим, молимтися и ныне воспевающим тя ниспослати свою благостыню, да под молитвенным кровом твоим сохраняеми, в ревности о спасении, выну величаем тя звании сими:
Радуйся, Богом Отцем предъизбранный;
Радуйся, страдальческим житием предочищенный.
Радуйся, душу свою за ближния полагавый;
Радуйся, ныне же ю в раи обретый.
Радуйся, Духа Святаго добротами блистающий;
Радуйся, Того же благодатию благоухающий.
Радуйся, многими исцеленьми от гроба твоего источаемыми, свыше свидетельствуемый;
Радуйся, крестами облачными, в день земнаго прославления твоего явленными, от Небеснаго Отца прославленный.
Радуйся, от Подвигоположника Христа увенчанный;
Радуйся, с праведными сопричтенный.
Радуйся, во обители небесней блаженствующий;
Радуйся, у престола Святыя Троицы о нас ходатайствующий.
Радуйся, преподобне отче Амфилохие, теплый наш заступниче и предивный целебниче.

Кондак – 13
О преблаженне отче Амфилохие, дивный целебниче и притекающим к тебе скорый помощниче, не лиши и нас, смиренно к тебе припадающих, своего благодатнаго посещения: болезни наша исцели, скорби утоли, жизнь умири; да предстательством твоим ко Всевышнему Владыце, от всякаго зла и лукаваго действа избавльшеся, во веки веков поем Ему: Аллилуия.

Сей кондак глаголем трижды, и паки: Икос 1 «Архангелу Рафаилу…», Кондак1
«Избранниче Христов…»

МОЛИТВА
О, всеблаженне отче наш Амфилохие, земный Ангеле и небесный человече! Припадаем к тебе с верою и любовию и молим ти ся прилежно: яви нам смиренным и грешным святое свое заступление; се бо грех ради наших не имамы дерзновения просити о потребах наших Господа и Владыку нашего, но тебе, молитвенника благоприятнаго, к Нему предлагаем и просим тя со усердием многим: испроси нам от благости Его благопотребная дары душам и телесем нашим, веру праву, любовь ко всем нелицемерну, в злостраданиих терпение, тяжкими болезнями одержимым – от недугов исцеление, под бременем скорбей и напастей неудобоносимых падающих и жития своего отчаявшихся твоими молитвами получити скорое облегчение и избавление.
Не забуди, блаженне отче, и обитель сию святую, в ней же подвизался еси, присно тя чтущую, но соблюди ю и всех живущих и подвизающихся в ней и на поклонение в ню приходящих невредимыми от искушений диавольских и всякаго зла. Егда же приспеет наше от временнаго сего жития отшествие, и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа и твое вкупе с преподобным Иовом отеческое заступление во веки веков. Аминь.