Акафист святителю НЕКТАРИЮ ЭГИНСКОМУ чудотворцу



Дни памяти:

16 сентября (н.ст.)

22 ноября (н.ст.)



Тропарь, глас 1

Силиврии отрасль и Эгины хранителя, в последняя лета явльшагося, добродетели друга искренняго, Нектария почтим, вернии, яко божественнаго служителя Христова: точит бо цельбы многоразличныя благочестно вопиющим: слава Прославльшему тя Христу, слава Давшему ти чудес благодать, слава Действующему тобою всем исцеления.


Кондак, глас 2

Божественный гром, труба духовная, веры насадителю и отсекателю ересей, Троицы угодниче, великий святителю Нектарие, со Ангелы предстоя присно, моли непрестанно о всех нас.


Кондак 1

Взбранный Нектарие, Пентаполя митрополите и Эгинский чудотворче, приносим ти прошения о болящих сродниках наших: изряден бо явился еси целитель раковыя язвы и прочих недугов, всей вселенней благодать даруя, сего ради единеми усты и единем сердцем воспеваем ти присно: Радуйся, Нектарие, Архиерею Божий.


Икос 1

Ангела хранителя во святем крещении обретый, от младых ногтей равноангельскаго жития возжелал еси, отче наш Нектарие; ныне же со Ангелы зрением Славы Божия наслаждаяйся, моли всех Ангелов Владыку о поющих ти сицевая:

Радуйся, венчанных родителей плоде благословенный.

Радуйся, от чрева матери Богом освященный.

Радуйся, издетска навыкший послушанию.

Радуйся, от юности изучивый Писания.

Радуйся, Божиих словес одушевленная книго.

Радуйся, живая боголюбия скрижаль.

Радуйся, Богом избранный за кротость и смирение.

Радуйся, дом оставивый духовнаго ради учения.

Радуйся, яко тебе ради буря зельна на мори утишися.

Радуйся, яко поясом твоим надломленная мачта укрепися.

Радуйся, орля юное, имуще криле умныя молитвы.

Радуйся, елене, взыскавый источники покаяния.

Радуйся, Нектарие, Архиерею Божий.


Кондак 2

Видящи тя на воздусе молящася, черница некая пристрашна бысть, Боголюбче; ты же дар молитвы сокрывая, уста девы клятвою запечатлел еси, Господу в сердце воспев: Аллилуиа.


Икос 2

Разум Христов молитвою стяжал еси, святый Нектарие, во еже разумети, что есть воля Божия, благая, угодная и совершенная; научи и нас на всяком месте воздевати руки к Богу без гнева и сомнения, да приимеши от нас похвальная:

Радуйся, во юдоли плачевне восхождения положивый.

Радуйся, плоды Духа израстивый.

Радуйся, чадо горы Афонския.

Радуйся, ключу молитвы Иисусовы.

Радуйся, древляго благочестия светило.

Радуйся, граде Святыя Троицы.

Радуйся, благодатию осененный.

Радуйся, Херувиме огненный.

Радуйся, соль земли обетованныя.

Радуйся, слезами сеявый, пожавый радостию.

Радуйся, на немже процвете святыня Христа.

Радуйся, яко Бог благодействова тя.

Радуйся, Нектарие, Архиерею Божий.


Кондак 3

Силою Вышняго облеченный, отче Нектарие, силу словес Христовых утвердил еси: во Царствии Моем, - Той рече, - ни женятся, ниже посягают, но яко Ангели на небеси, выну поют: Аллилуиа.


Икос 3

Имущи Пречистая Богородица в услужении все воинство небесное, тебе, угодниче, аки Ангела во плоти, воспевателя чудес Своих постави: мы же, Мариин омофор над тобою зряще, со страхом и любовию припадаем ти:

Радуйся, тайный избранниче Богоматере.

Радуйся, велений Ея исполнителю.

Радуйся, духа кротости от Чистыя Голубицы приявый.

Радуйся, в песнех духовных Приснодеву прославивый.

Радуйся, учай угождати неба и земли Царице.

Радуйся, молитвами Матере милость у Сына обретый.

Радуйся, мерило праведности и мудрости палато.

Радуйся, высото рассуждения и смирения глубино.

Радуйся, Эгинский крине, нектар покаяния точащий.

Радуйся, Эдемская пчело, медом богословия нас снабдевающая.

Радуйся, мироварнице, миро изливающая.

Радуйся, чаше духовного омовения.

Радуйся, Нектарие, Архиерею Божий.


Кондак 4

Раковую язву кровоточащу на груди имея, иерей храма твоего, Нектарие, смятеся, егда ты явлься облобыза его, аки во плоти сый; он же исцеление получив, тебе невидиму бывшу, со слезами возопи Богови: Аллилуиа.


Икос 4

Слышаша мнози о дивнем исцелении, при жизни тобою содеянном, егда во стране Канадстей, святей Литургии служиме, в Дусе явился еси, чудотворче Нектарие, и расслаблена некоего мужа воздвигл еси, к Чаше его призывая; той же здрав бысть, веси Эгинския достиг и, тя во плоти узрев, велегласно взываше:

Радуйся, врачу гостеприимный, Греции похвало.

Радуйся, Николая Чудотворца славу стяжавый.

Радуйся, кладезю благостыни.

Радуйся, милосердый самарянине.

Радуйся, даром чудес обогащенный.

Радуйся, посещаяй люди смиренныя.

Радуйся, утешаяй нас чудесы неложными.

Радуйся, яко невозможная другим тебе возможна.

Радуйся, яко скорби наша на радость прелагаеши.

Радуйся, ты бо от очей наших слезы отираеши.

Радуйся, одержимых бесы свободителю.

Радуйся, раковыя язвы исцелителю.

Радуйся, Нектарие, Архиерею Божий.


Кондак 5

Боготечною звездою покаяния возшел еси, отче, над вселенней, лучи сокрушения о людских беззакониях выну испущаяй; озари умы наша к зрению грех наших, да умилостивим Владыку пением: Аллилуиа.


Икос 5

Видеша отроковицы чистыя Архиерея своего, в лепоте души и тела Богу предстояща, и познав в нем великаго молитвенника и чудотворца, согласно возгласиша ти, святителю Нектарие:

Радуйся, Христа присное жилище.

Радуйся, Духа дивное сокровище.

Радуйся, царское священие Великаго Архиерея.

Радуйся, призванный к Престолу Вечнаго Царя.

Радуйся, Плоти Христове сотелесниче.

Радуйся, Крове Святыя причастниче.

Радуйся, глашатаю покаяния.

Радуйся, ходатаю о нас пред Богом.

Радуйся, нектаре, Ангелы веселяй.

Радуйся, пламеню, демоны пожигаяй.

Радуйся, пучино щедрот.

Радуйся, море чудес преславных.

Радуйся, Нектарие, Архиерею Божий.


Кондак 6

Проповедниче Единаго Благаго, Нектарие блаженный, тя, смирившася под крепкую руку Божию, Той превознесе; в страстном мори влающихся не забуди чад твоих, но на брезе смирения постави я, да возвеличат Бога твоего, воспевая: Аллилуиа.


Икос 6

Возсиявшу свету блаженств Христовых, от степени в степень востекл еси, богомудре Нектарие: кротостию и миром, воздержанием и любовию душу свою просветил еси, да от нас ныне слышыши сицевая:

Радуйся, носивый ризу смирения.

Радуйся, обиды покрывавый прощением.

Радуйся, наслаждаяйся о множестве мира.

Радуйся, наследуяй землю кротких.

Радуйся, фиале покаяннаго плача.

Радуйся, чистоты сердечныя зерцало.

Радуйся, именем Иисусовым насыщенный.

Радуйся, водами Писаний напоенный.

Радуйся, милость и суд возвестивый.

Радуйся, любовию вражду упразднивый.

Радуйся, благочестивый житием.

Радуйся, гонимый правды ради.

Радуйся, Нектарие, Архиерею Божий.


Кондак 7

Хотя человек Божий совершен быти, Нектарие праведне, путь непорочных избрал еси: на Эгинстем острове житейское море, аки в ковчезе, преплавая, победительная воспевал еси Господеви: Аллилуиа.


Икос 7

Новаго Завета учитель изряден явился еси, слово Божие житием своим проповедавый: яко несть наша брань противу плоти и крове, но миродержателем тьмы века сего. Мы же о Господе возмогая, вопием ти, державне Нектарие:

Радуйся, доблий воине Иисуса Христа.

Радуйся, язво духовом злобы поднебесным.

Радуйся, вся оружия Божия восприявый.

Радуйся, препоясавый чресла истиною.

Радуйся, яко нозе твои красны благовестием мира.

Радуйся, яко на версе твоем утвержден шлем спасения.

Радуйся, щите веры, имже вернии ограждаются:

Радуйся, мечу обоюдоострый, ереси посяцаяй.

Радуйся, победителю, от древа жизни вкушаяй.

Радуйся, человече Божий, странный смерти вторыя.

Радуйся, свидетелю веры истинныя.

Радуйся, райская ветвь спасения.

Радуйся, Нектарие, Архиерею Божий.


Кондак 8

Странное обретеся в тебе совершенство, точию совершенным в любве доступное; усоверши любовию души наша, любвеобильне Нектарие, да в мужа совершенна достигше, поем Богови: Аллилуиа.


Икос 8

Весь был еси в нижних, смиренным последуя, в вышних с Богом, сиречь с Любовию, пребывая; даруй нам, о, неботаинниче Нектарие, любве познание, во еже пети ти сицевая:

Радуйся, яко пленником содеялся еси любве Божия.

Радуйся, яко чад своих любовию пленил еси.

Радуйся, выю под иго Спасово подклонивый.

Радуйся, бремена ближних носивый.

Радуйся, в любве укорененный.

Радуйся, в милости утвержденный.

Радуйся, широту и долготу Креста разумеваяй.

Радуйся, высоту и глубину Древа постигаяй.

Радуйся, разумниче любве, разум превосходящая.

Радуйся, полноты Божия вместилище.

Радуйся, в уме держай елика истинна, праведна и честна.

Радуйся, сердцем любяй елика пречиста, доброхвальна и прелюбезна.

Радуйся, Нектарие, Архиерею Божий.


Кондак 9

Всякое естество ангельское и человеческое удивися образу, великий Нектарие, в тебе явленному: яко несть во Христе ни иудей, ни эллин, ни раб, ни свободь, ни мужеск пол, ни женский, но нова тварь, Искупителю твари поющая: Аллилуиа.


Икос 9

Ветия многовещанныя умолкоша, житию твоему, святый отче Нектарие, дивящеся, како свят был еси, грешным ся именовавый; духовен был еси, из земли перстныя взятый: по смерти вознесен был еси, при жизни умом до ада низшедый; мы же отверзше уста, аки дети вопием:

Радуйся, главо, веру возвысившая.

Радуйся, уста, безбожие посрамившия.

Радуйся, око, Боговедением просвещенное.

Радуйся, деснице, могуществом Его укрепленная.

Радуйся, смиряяй кичливыя умы.

Радуйся, сокрушаяй гордая сердца.

Радуйся, явивый силу в немощи.

Радуйся, в слезах нашедый радость.

Радуйся, умерый и живый.

Радуйся, земный и небесный.

Радуйся, горушное семя живота.

Радуйся, зрелый класе Воскресения.

Радуйся, Нектарие, Архиерею Божий.


Кондак 10

Спасти хотя душу свою, яко деву, единему Жениху ту обручил еси; ныне же вшед в невестник Христов с лики девственных, Нектарие славне, поеши песнь: Аллилуиа.


Икос 10

Стена еси всем прибегающим к тебе, достохвальне Нектарие, имаши бо благодать немощныя врачевати и к небесному наследию возводити: нас убо, чад твоих, уврачуй и в Царствие Христово возведи, да вседушно речем ти сицевая:

Радуйся, старче благодатный.

Радуйся, юниц путевождь преизрядный.

Радуйся, невинный пастырю невинных овец.

Радуйся, мудрый собирателю девственных жемчужин.

Радуйся, вселенныя духовный окормителю.

Радуйся, Евхаристии пламенный служителю.

Радуйся, гласе смиреннаго Христа.

Радуйся, глаголе зиждительнаго Духа.

Радуйся, в терпении искушенный.

Радуйся, скорбьми очищенный.

Радуйся, поборниче Божия правды.

Радуйся, наследниче Христовы славы.

Радуйся, Нектарие, Архиерею Божий.


Кондак 11

Пение Богоматери приносил еси, угодниче Божий, Материю Света Деву именуя, ныне же совершенне просветился еси разумением тайны воплощения, вознося горе глас: Аллилуиа.


Икос 11

Светом Божественныя славы просвещаема зрим тя, Нектарие, в чертозе славы: просвети одеяние душ наших Троическим сиянием, да воспеваем ти непрестанно:

Радуйся, каменю драгий Царевы диадимы.

Радуйся, молние Носимаго на Серафимex.

Радуйся, яко светла заповедь, просветившая очи твоя.

Радуйся, яко возлюбил еси ю паче злата и топазия.

Радуйся, сребро разжжено, очищено седмерицею.

Радуйся, гусли духовныя, Спасова цевнице.

Радуйся, в сердцы имя Божие написавый.

Радуйся, любовию подвиг веры оправдавый.

Радуйся, святыню Духа носивый.

Радуйся, освятивый души, растленныя страстьми.

Радуйся, праведностию, аки виссоном убеленный.

Радуйся, Троицы познанием озаренный.

Радуйся, Нектарие, Архиерею Божий.


Кондак 12

Благодать, от Бога ти данную, умножая умножил еси, рабе Божий, благий и верный Нектарие, темже и нас куплю духовную деяти сотвори, да обретше лихву, Христу воспоим: Аллилуиа.


Икос 12

Поюще твоя чудеса, пречудне Нектарие, вемы, яко Христос в тя богатно вселися, сего ради чудодейну десницу Его на нас низведи, глаголющих сице:

Радуйся, преемниче древних отцев.

Радуйся, новый угодниче Христов.

Радуйся, Великия Церкве красото.

Радуйся, всемирная надеждо.

Радуйся, себе уничиживый, Богом прославленный.

Радуйся, в последних ходивый, первым поставленный.

Радуйся, дела обители точию знавый, егоже знает вселенная.

Радуйся, чуждый дольния славы, небесною мздою почтенный.

Радуйся, иже по кончине недвижим лежай, недужна восстави.

Радуйся, иже многим явивыйся, плач о кончине устави.

Радуйся, две златницы, монашества и священства, от Бога получивый.

Радуйся, с лихвою цельбы и чудес злато Христу возвративый.

Радуйся, Нектарие, Архиерею Божий.


Кондак 13

О священная главо, дивный врачу Архиерею Божий Нектарие! Приими ныне малое, обаче теплое моление чад твоих, благодати сущей в тебе верующих. Даруй нам недугов исцеление и от вечныя избави погибели, да Христу Спасу нашему взываем с радостию: Аллилуиа.


(Этот кондак читается трижды, затем икос 1 и кондак 1)


Молитва

О мироточивая главо, Святителю Нектарие, Архиерею Божий! Во времена великаго отступления, нечестию мир пленившу, благочестием просиял еси и главу прегордаго Денницы, уязвляющаго нас, сокрушил еси. Сего ради дарова ти Христос врачевати язвы неисцельны, за беззакония наша нас поразившия. Веруем: возлюби тя Бог праведнаго, да тебе ради нас, грешных, помилует, от клятвы разрешит, от недуг избавит, и по всей вселенней страшно и славно будет имя Его, Отца и Сына и Святаго Духа, ныне и присно и во веки веков. Аминь.

Канон Свт. Нектарию Эгинскому, митр. Пентапольскому

(Для келейного чтения)

Тропарь, глас 1

Силиврии отрасль и Эгины хранителя,/ в последняя лета явльшагося,/ добродетели друга искренняго,/ Нектария почтим вернии,/ яко божественного служителя Христова:/ точит бо цельбы многоразличныя благочестно вопиющим:/ слава прославльшему тя Христу,/ слава давшему ти чудес благодать,// слава действующему тобою всем исцеления.

Канон, Глас 6

Песнь 1:

Яко по суху пешешествовав Израиль по бездне стопами, гонителя фараона, видя потопляема. Богу победную песнь поим, вопияше.

Припев: Святителю Отче Нектарие, моли Бога о нас

Приидите, вернии, песнь духовную возопиим, и прославим Христа Бога, иже светло прославил есть Нектария, Святителя Богомудрого и молитвенника о душах наших.

С Вышними Лики яко Святитель, яко Божий служитель предстоя, о нас прилежно молися, Богоблаженне Нектарие, получити нам вечная благая молитвами Твоими.

Слава: Избран быв Господеви служити Честному Евангелию, Блаженне, Нектарие, во благоразумии люди, учении премудрыми Отче возрастил еси.

И ныне: Священный лик пророческий проявляше издалеча хотящую Тя быти Божию истинную родительницу Чистая, вышшую херувим и всея твари.

Песнь 3:

Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Припев: Святителю Отче Нектарие, моли Бога о нас

Искапая Божественную сладость из устен Твоих Отче, и горькаго безбожия изсушил еси капли, напоив благочестивых питием Божияго разума Блаженне.

Божиим судом произбран быв, Святитель показался еси, безкровны жертвы Богу принося, пожершемуся нас ради, Отче Святителю Нектарие.

Слава: Гроб, идеже лежит честное тело Твое, благовоние источает яко рай Божий, облагоухая верныя, Святителю преславне и всечестне Нектарие.

И ныне: Разумети Рождества Твоего Чистая, неизреченныя глубины недоумеет ум человечь: Бог бо себе смирив щедрот ради, во чреве Твоем всего мя обнови.

Господи помилуй (трижды)

Седален, глас 8

Отче Отцев, Нектарие, священства правило, целомудрия образ, монашествующих крепость, Церкви утверждение, любве светильник, престол чувства, источник чудес и язык огнедохновенный: уста сладкоглаголива, сосуд Божественнаго Духа, и разумный был еси рай Богоблаженне.

Слава и ныне: глас тойже

Владычице, приими молитву раб Твоих, и избави нас от всякия нужды и печали.

Песнь 4:

Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

Припев: Святителю Отче Нектарие, моли Бога о нас

Ты исполнен Святаго Духа Священный Отче Нектарие, лукавыя духи от человек отгнал еси, верным же духовными учении Твоими сотворил еси.

Великую власть от Бога приял еси, болящия молитвою твоею исцелял еси и всех приходящих к Тебе ко Христу Богу привел еси.

Слава: Умертвив первее плотския мудрования воздержанием и труды, Святитель Божествен показался еси, и предстатель Троице всесвящен.

И ныне: Иже Богородицу Тя от души, Владычице мира Благая, исповедующих спаси: Тебе бо предстательство непоборимое имамы, истинную Богородительницу.

Песнь 5:

Божиим светом Твоим, Блаже, утреннюющих Ти душы любовию озари, молюся, Тя ведети, Слове Божий, истиннаго Бога, от мрака греховнаго взывающа.

Припев: Святителю Отче Нектарие, моли Бога о нас

Божия Божественне совершая, и чистейшим помыслом чистым прикасаяся, непорочен явился еси, служя Богу, яко Божий Святитель Священнейший.

От юности взем Крест Твой, благочестивно Христу Богу последовал еси, множество скорбей безропотно претерпел еси, нам же всем заступник пред Богом явился еси.

Слава: Ты еси Пастырь добрый и Учитель теплый, Святителю Нектарие, темже не престай моляся о хвалящих Тя и чтущих священную память Твою.

И ныне: Богородительнице Приснодево, Спаса Христа человеком рождшая, от бед и мук избави нас, прибегающих к Божественному Покрову Твоему.

Песнь 6:

Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, Многомилостиве.

Припев: Святителю Отче Нектарие, моли Бога о нас

Явился еси чуден в терпении Твоем всячески Христу угодил еси и Ангельстии чины удивил еси. Вся наша болезни исцели и молитву к Богу о нас вознеси.

Возшед на лествицу добродетелей, по нейже возшел еси к Горнему Иерусалиму и тамо узрел еси желаемого Христа. О нас прилежно Христа Бога моли, празднуюших священную память Твою.

Слава: Язык Твой Духом изощрен разумно, яко трость скорописца, написа в сердца благочестивых слово благодатное, Всесвященне Отче, Божиим мановением.

И ныне: Пречистая Владычице, рождшая человеком кормчию Господа, страстей моих непостоянное и лютое утоли смущение, и тишину подаждь серцу моему.

Слава и ныне. Господи помилуй (трижды)

Кондак

Преподобнически пожив, яко мудрый иерарх, прославил еси Господа добродетельным житием, Нектарие преподобне. Темже, Утешителя прославлен силою, Божественными мощми твоими, демоны отгониши и болящия исцеляеши, верою приходящия ти.

Песнь 7:

Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.

Припев: Святителю Отче Нектарие, моли Бога о нас

Божественную любовь смиренномудрием стяжав, многим был еси Учитель, скорбящим Утешитель, недугуюшим Врач и всем нам Путевождь ко Христу, Егоже ныне моли всех бед избавитися верою зовушим: благсословен еси Боже Отец наших.

Предстояще ныне Богу, Богоблаженне, не забуди нас, творяших память Твою и поющих Христу Богу: благословен Бог Отец наших.

Слава: Святейшая Церковь быв, озаряема добродетельными деянии, живущу имел еси в Тебе священне, Троицу несозданную, вопия: благословен Бог Отец наших.

И ныне: Спаси мя Мати Божия, содержима глубиною согрешений, и всякия врагов исхити злобы, да Твое спасаемь величаю Заступление.

Песнь 8:

Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Припев: Святителю Отче Нектарие, моли Бога о нас

Гордаго змия смирением Твоим смирил еси Блаженне Нектарие, возвышаем к Богу чистыми Твоими разумы: темже Тя чтим, Христа превозносяше во веки.

Кто от человек не подивится долготерпеливому житию Твоему, Богоблаженне? Кто ли не возблагодарит Жизнеподателя за велия чудеса Твоя? Темже и нам, к Тебе притекающим, Небесную Благодать низпосли и вся недуги наша исцели.

Слава: Слышаша людие о велиих чудесех Твоих от мощей Твоих исходящих, в обитель Твою со всех концев притекают и слезно скорби своя Тебе приносяще возопиют: недуги наша исцели и молитву о нас ко Господу сотвори.

И ныне: Предстательнице необоримая оскорбляемых, и теплое заступление уповающих на Тя, от бед мя избави: Ты бо еси всех Помощница.

Песнь 9:

Бога человеком невозможно видети, на Него же не смеют чини Ангельстии взирати: Тобою бо, Всечистая, явися человеком Слово воплощенно. Его же величающе, с небесными вои Тя ублажаем.

Припев: Святителю Отче Нектарие, моли Бога о нас

В землю кротких Ты вселился еси Святителю, кроток и незлобив быв, с вышними совокупляяся воинствы: Отче, в вышняя прешел еси покоища.

Зриши Божия и Ангельския светлости, Патриарх и Мученик и Апостольския красоты, моля с ними Человеколюбца, оставление грехов и жития исправление даровати нам, хвалящим Тя.

Слава: Славно красится днесь светозарное торжество, во Свете Славы лица Божия предстоя, Святителю Нектарие, помяни нас, празднующих святую память Твою.

И ныне: С Богом на Тя Пречистая, упование возлагаем, иже из Тебе прошедшему сраспинаеми Христу: Твоими же к Нему мольбами невредимы даже до конца нас сохрани.

Молитвы святителю Нектарию.

Молитва первая

О, мироточивая главо, Святителю Нектарие, Архиерею Божий! Во времена великаго отступления, нечестию мир пленившу, благочестием просиял еси и главу прегордаго Денницы, уязвляющаго нас, сокрушил еси. Сего ради дарова ти Христос врачевати язвы неисцельны, за беззакония наша нас поразившия. Веруем: возлюби тя Бог праведнаго, да тебе ради нас, грешных, помилует, от клятвы разрешит, от недуг избавит, и по всей вселенней страшно и славно будет имя Его, Отца и Сына и Святаго Духа, ныне и присно и во веки веков. Аминь.

Молитва вторая

О, Святителю Нектарие, отче Богомудрый! Приими, блюстителю веры православныя, исповедание устен людей христоименитых, собранных днесь в храме благодатию Божиею, в тебе живущею. Весть бо достиже до предел Российских, яко ты, велий во святых угодниче Христов, во всех концех вселенныя призывающим имя твое являешися и от раковыя болезни исцеление даруеши. Слышахом об иерее, тебе тезоименитом и храм во имя твое созидавшем со скорбьми велиими. Раковою убо язвою грудною поражен бе, крови на всяк день точащейся, и страждаше люте, дела же своего святаго не оставляше. Внезапу ты, Святителю многомилостиво, с небесе сшед, ему во храме предстал еси в видимом образе. Он же непщуя тя собрата едина от смертных быти, прошаше молитв твоих и рече: “Боляй есмь вельми, обаче хощу святый олтарь наздати, да поне единожды святую Литургию вкупе с прихожаны совершу; послежде и умрети готов есмь, смерть бо мя не страшит.” Ты же, отче, безплотен сый, слезами лице свое орошаше! и объем страдальца, лобызаше и глаголя: “Не тужи, чадо мое, яко, болезнию испытан, здрав будеши. Вси убо о чудеси сем ведати имут.” Он же, исцелен быв, абие разуме, с кем беседоваше, тебе невидиму бывшу. О, великий угодниче Христов Нектарие! Храм оный свершен есть ныне, и чудеса твои аки море преизливающееся умножишася! Мы же познахом, яко молитве праведника должно поспешествуемой быти усердием нашим к службе Божией и решимостью за Христа умирати, да здрави обрящемся. Молят тя, отче праведный, болящая чада твоя: да совершается с нами воля Божия, благая, угодная и совершенная, не хотящи смерти грешнику, но еже обратитися и живу быти ему. Ты же, провозвестниче воли Божией, исцели ны благодатным явлением своим, да велик будет Бог на небеси и на земли во веки веков! Аминь.