Тропарь, кондак, канон, акафист и молитвы праведному Иоанну Русскому

Молитвы
Канон
Акафист
Тропарь, глас 4

Ко Иоанну, вернии, ныне притецем, сущии в бедах и напастех, и припадем, благочестно зовуще из глубины души: праведне, помози нам, твоим молитвенником, потщися и избави належащия нужды, не презри молитвы скорбныя притекающих ко крову твоему, святе.
Кондак, глас 4

Евангельския любве служителя, правды Божия ревнителя, чистоты душевныя и телесныя хранителя, веру Христову исповедавша в страданиих, праведнаго Иоанна ублажаем и почитаем днесь, и житием его назидающеся, поем: радуйся, молитвенниче наш, от Бога прославленный.
Молитва I

О великий угодниче Божий, святый праведный Иоанне Русский, просиявый в земли Ассии равноангельным житием твоим, ревностию о Господе и подвигами во исповедании веры Христовы, града Неопрокопиона и всея земли Эллады пресветлое украшение, богохранимей стране Российстей, людем ея и во всем мире живущим православным христианом помоще и крепкое заступление! Благодарим Господа, дивнаго во святых Своих, в вере истинней непоколебимо тя утвердившаго, в стоянии за исповедание ея укрепившаго и доброе скончание подвига многотруднаго даровавшаго, последи же многая и великая чудеса нам явившаго чрез многоцелебную раку мощей твоих. Ныне, предстоя Небесному Царю, испроси у Него избавити вся грады и веси страны нешей Российстей и земли Эллады от глада, труса, мраза, огня, смертоносных болезней, от нашествий иноплеменных и междоусобных браней, исходатайствуй христолюбивому воинству российскому во бранех с врагами Отечества нашего победу и одоление. Помози всем путешествующим, болящим, в заточении сущим, в скорбех и гонениих за святую веру Православную терпящим. Соедини всех православных людей любовию ко Христу Богу нашему и Церкви Его Святей, даруй нам дух любве и мира к братскому единению всех верных. Умоли Господа, да подаст нам дух покаяния и сокрушения о гресех наших и всесильною Своею благодатию да поможет и укрепит в борьбе со страстьми и похотьми, да дарует нам дух смирения и кротости, дух братолюбия и незлобия, дух ревности по Бозе и спасении ближних.

Помяни и нас, грешных, молящихся тебе: страждущих и болящих исцели, скорбящих утеши, бедствующим скорую помощь подай, всем же чтущим и любящим тя испроси христианскую кончину живота, безболезненну, непостыдну, мирну и добраго ответа на Страшнем Судищи Христове. Буди нам помощник и покровитель во спасение, да твоими молитвами сподобимся в нынешнем и будущем веце прославляти в Троице славимаго Бога, Отца, и Сына, и Святаго Духа ныне и присно, и во веки веков. Аминь.
Молитва II

О всеблаженный исповедниче Христов и великий чудотворче Иоанне, Эвбеи сокровище, Греческия страны похвало и людей Российских сродниче! Ты в пленении агарянском лютая биения и влас сожжение твердо за Христа претерпел еси, благочестием же своим, подвиги и чудесы верныя премного укрепил еси, неверныя же умягчил еси и просветил, по кончине же бесчесленными чудесы и исцеленьми просияваеши. Вемы, угодниче Божий, яко велие дерзновение имаши ко Господу, нам же, бедствующим, сострадаешь тако тепле, яко не терпиши и зрети ны в лютых недузех или тяжцих скорбех сущими, и сего ради и непризываемый скоро притекаеши, телеса и души врачуя, бесы изгоняя, заблуждшия обращая, наипаче же от малых детей всякую болезнь и горесть отгоняя.

Се бо и ныне греси мнози отяготиша ны и изнуряющими скорбьми души наша сотрошася, силы же телесныя оскудеша, и како унынию и тягостней печали противостати возможем, аще не ты сам, святче Божий, восстанешь по нас и противу врагов наших благодатне ополчишься! Испроси же, благоприятными твоими ко Господу молитвами, телесными недуги страждущим совершенное исцеление, всем же спасительное терпение и благодарение; скорби, бесовские наветы и искушения отврати; вся же, елика попустит Господь, научи во очищение понести благоразумне; нас же, во тьме неведения и забвения заповедей Божиих сущих, просвети, выну неуклонне творити волю Божию настави, бесплодия духовнаго разреши, очищение, освящение и просвещение душам нашим даруй; да с тобою вкупе выну и во веки веков прославим Всеблагаго Бога и Пречистую Богордицу, твоим всемощным заступлением. Аминь.
Молитва III (о построении храма св. прав. Иоанна Русского в г. Москве)

О великий угодниче Божий Иоанне, звездо благочестия, кротости и смирения, от России воссиявшая мысленно, Афонских отец похвало и всея Церкви Православныя дивное украшение! Призри на нас грешных, на помощь тя призывающих в сем деле создания святаго храма во славу великаго Бога и Спаса нашего Иисуса Христа и на похвалу святому имени твоему. Ей, святче Божий, благодати тезоимените! Паки и паки призываем твое милостивное предстательство, укрепи благодатию Господнею сие изволение наше и богоданную ти силою в совершение скоро произведи, молитвенники о храме твоем укрепи, делателем сам соработай, жертвователем и благодетелем даруй вся потребная для спасения и сего временного жития. Иоанне праведне, буди нам ходатаем пред Господом, Емуже слава во веки веков. Аминь.


Канон молебный ко святому праведному Иоанну Русскому, исповеднику
Творение Даниила монаха

Тропарь, глас 4.
От земли призвавый тя в Небесные обители/ соблюдает и по смерти нетленно тело твое, праведне,/ты бо во Асию якоже пленник взят был еси,/ идеже и Христу пожил еси, Иоанне,/ Егоже убо моли спастися душам нашим.

Слава, глас 4.
Ко Иоанну, вернии, ныне притецем,/ сущии в бедах и напастех, и припадем,/ благочестно зовуще из глубины души:/ праведне, помози нам, твоим молитвенником,/ потщися и избави належащия нужды,/ не презри молитвы скорбныя/ притекающих ко крову твоему, святе.

И ныне, Богородичен:
Не умолчим никогда, Богородице,/ силы Твоя глаголати, недостойнии,/ аще бо Ты не бы предстояла молящи,/ кто бы нас избавил от толиких бед,/ кто же бы сохранил доныне свободны?/ Не отступим, Владычице, от Тебе,/ Твоя бо рабы спасаеши присно от всяких лютых.

Песнь 1.

Ирмос: Воду прошед, яко сушу, и египетского зла избежав, израильтянин вопияше: Избавителю и Богу нашему поим.

Святче Божий Иоанне, молися о нас.
Тяжкими удручаемъ напастьми,/ к тебе простираю и тело, и душу,/ моляся ти, преподобне отче,/ от печалей и бед мя избавити.

Святче Божий Иоанне, молися о нас.
Плоти волнения наход, блаженне Иоанне, возмущает мя непрестанно,/ умири, отче, тишиною,/ богоприятными предстательствы твоими.

Святче Божий Иоанне, молися о нас.
Демонов полчища лукавая воюют на раба твоего немилосердно,/ отреши их силою Креста,/человеколюбными предстательствы твоими.

Пресвятая Богородице, спаси нас.
Дево, Врата Божия, отверзи ми врата милосердия/ и от врат смертоносного греха Матерним дерзновением Твоим свободи мя.

Песнь 3.

Ирмос: Небесного круга Верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Святче Божий Иоанне, молися о нас.
От человек, недугующих лукавством всегда, дышащих хульно угрозы,/ ты мя спаси, лютую сих ярость разжени,/ благочестных утверждение, отче всеславне.

Святче Божий Иоанне, молися о нас.
Устроивый разумно дом души/ и изрядно украсивый, Богоблаженне,/благодать Духа приимый и Света исполняемь, явися, яко столп огненный.

Пресвятая Богородице, спаси нас.
Чистоты девства отпад, Всечистая,/ весь осквернен есмь страстию блуда,/ но, рождшая Судию согрешающих человек,/ всякого осуждения, Дево, мя избави.

Катавасия: Небесного круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Избави от бед рабы твоя, Богоносе,/ яже верою несумненною к тебе прибегающия,/ яко к скорому помощнику в нуждах.

Призри благосердием, Всепетая Богородице,/ на мое лютое телесе озлобление/ и исцели души моея болезнь.
Предстатель теплый и столп непобедимый/ показался еси, мудре,/ верою вопиющим тебе и благочестно взывающим:/ Богоносе Иоанне, предвари и от бед избави нас,/ всегда Троице предстояй.

Песнь 4.

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святче Божий Иоанне, молися о нас.
Исцелений дарования, к тебе прибегающии, почерпаем радостно/ и славим тя, источниче чудес.

Святче Божий Иоанне, молися о нас.
Каппадокиян сословия и Прокопиян благочестивыя множества,/ Афонских отец собори и Российстии вернии людие/ помощника знают и предстателя вси восхваляют тя.

Святче Божий Иоанне, молися о нас.
Прошед мужественнейше облак плоти твоея деянием,/ внутрь был еси, приснопамятне, Света Божественнаго,/ яко возжелел еси.

Пресвятая Богородице, спаси нас.
Дом была еси, Пречистая, Бога всех яко Приснодева,/ сего ради дом мя покажи добродетелей,/ одушевленных Божественною благодатию.

Песнь 5.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Святче Божий Иоанне, молися о нас.
Сохрани нас предстательствы твоими, блаженне,/ и рукою твоею крепкою горькия демоны низложи, всечудне.

Святче Божий Иоанне, молися о нас.
Даруй нам здравие, молящимся тебе, и души, и тела всегда/ и благоуханную крепость, отче всебогате.

Святче Божий Иоанне, молися о нас.
Исцели люди, притекающия к тебе, чудне,/ и пагубныя болезни, и огня, и мучений всяческих всецело избави.

Пресвятая Богородице, спаси нас.
О тебе радуется, Богородице, всякая тварь,/ ангельстии собори и человечестии языцы вси славят.

Песнь 6.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Святче Божий Иоанне, молися о нас.
Чудес тя сокровище вем и источника благих, Иоанне,/ немощей исцеляюща страсти и налоги бесов отгоняюща,/ и молюся, еже спасти ныне от пагубы мя злых,/ благодати тезоимените.

Святче Божий Иоанне, молися о нас.
Предстателя тя нищих проповедуем и стража Каппадокии всея,/ искушений избавляюща стадо,/ нечестивых вред отгоняюща,/ и всех благочестивых от бед избавити молимся.

Святче Божий Иоанне, молися о нас.
Пристанище тя в скорбех имамы и в печалех предстателя, всеблаженне,/ и всесовершенное от бед спасение,/ и реку дарований неисчерпаемую,/ родник благодеяний и источник исцелений приснотекущий.

Пресвятая Богородице, спаси нас.
Объятии Твоими и персьми, о Владычице, к Сыну Твоему, ходатайствующи,/ покажи Твоим чадом, Дево, Его Крест, и копие, и губу, и трость/ и тако умилостиви Его о нас, много согрешших.
Катавасия: Молитву пролию ко Господу/ и Тому возвещу печали моя, яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.
Таже: Избави от бед рабы твоя, победоносче,/ яже верою несумненною к тебе прибегающия,/ яко к скорому помощнику в нуждах.
Чистая, Яже словом Слово неизреченно/ в последния дни рождшая,/ моли Его, яко имущая Матернее дерзновение.

Кондак, глас 8:

В честней памяти твоей, святе,/ веселится о тебе Россия,/ во благочестии тя воспитавшая,/ и целебным мощем твоим радуется Асия,/ идеже, узкий путь прошед страдальческого плена и постнических подвигов,/ сосуд честен явился еси Божия благодати,/ еяже проси и нам, чтителем твоим, да зовем ти:// Радуйся, Иоанне, благодати тезоимените.

И посем прокимен, глас 4:
Честна пред Господем/ смерть преподобных Его.
Стих: Что воздам Господеви о всех, яже воздаде ми?

Евангелие от Луки, зачало 24:
Во время оно, ста Иисус на месте равне, и народ ученик Его, и множество много людей от всея Иудеи и Иерусалима, и помория Тирска и Сидонска, иже приидоша послушати Его и исцелитися от недуг своих, и страждущии от дух нечистых, и исцеляхуся. И весь народ искаше прикасатися Ему, яко сила от Него исхождаше, и исцеляше вся. И той возвед очи свои на ученики своя, глаголаше: блажени нищии духом, яко ваше есть Царствие Божие. Блажени, алчущии ныне, яко насытитеся. Блажени, плачущии ныне, яко возсмеетеся. Блажени будете, егда возненавидят вас человецы, и егда разлучат вы и поносят, и пронесут имя ваше яко зло, Сына Человеческаго ради. Возрадуйтеся в той день и взыграйте, се бо мзда ваша многа на небеси.

Не лиши мя твоего теплаго предстательства,/ Иоанне праведне,/ но разруши, молюся, силою твоею дерзости безсильныя/ и стреляния демонов нечаемая,/ болезней избави, и искушений, и скорбей/ и всех свободи бесовских нападений,/ да тя почитаю, и любовию воспеваю, и покланяюся, и величаю/ твоя, святе, деяния богоприятная.

Песнь 7.

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Святче Божий Иоанне, молися о нас.
Душу сладости и радости всякия покажи исполнену, Богомудре Иоанне,/ иже тя тепле воспевающих и вопити всегда научи:/ отец наших Боже, благословен еси.

Святче Божий Иоанне, молися о нас.
Освещенный страстию твоею/ омрачена мя грехми просвети,/ любовию приходяща честным твоим мощем, и взывати сподоби:/ отец наших Боже, благословен еси.

Святче Божий Иоанне, молися о нас.
Искушений, и бед, и нужды, и печали, и вреда демонов свободи/ яже на тя благочестно надеющияся и с верою зовущия:/ отец наших Боже, благословен еси.

Пресвятая Богородице, спаси нас.
Человеков Творец, во чреве Твоем вселився, Богорадованная,/ всех, бурею колеблемых, покрова сподоби, вопиющих:/ отец наших Боже, благословен еси.

Песнь 8.

Ирмос: Царя Небесного, Егоже поют вои ангельстии, хвалите и превозносите во вся веки.

Святче Божий Иоанне, молися о нас.
Потопляемым житейскими треволнении руку подаждь, всеблаженне,/ поющим и превозносящим Христа во веки.

Святче Божий Иоанне, молися о нас.
Твоих честных мощей касающихся/ исполни благоухания Божественнаго,/ Господа поющих верно во веки.

Святче Божий Иоанне, молися о нас.
Молящихся непрестанно, Богоносе,/ и благодати просящих приими,/ и славословящих Бога во веки.

Пресвятая Богородице, спаси нас.
От скверн мое сердце, Дево, покаяния очисти водами,/ да Тя славлю во вся веки.

Песнь 9.

Ирмос: Воистинну Богородицу Тя исповедуем, спасение Тобою, Дево Чистая, с бесплотными лики Тя величающе.

Святче Божий Иоанне, молися о нас.
Звезду, Иоанне, тя знаменосную исповедуем,/ нам свет облиставающую, благочестивии,/ православно Христу служащии.

Святче Божий Иоанне, молися о нас.
Волнением, Богоносе, обуреваемым многих зол,/ твоим молитвенником помози,/ отгоняя стрелы врага.

Святче Божий Иоанне, молися о нас.
Молитву мою приими, смирившагося,/ и тяжких, Богоносе, злостраданий и греха мя избави.

Пресвятая Богородице, спаси нас.
Надежду спасения падших роди Тя, Богородице, ведуще,/ непрестанно единомудренно Тя ублажают.

И абие: Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Таже: стихиры на целование честных мощей или иконы святаго, глас 2:

Молимся тебе, отче Иоанне:/ невидимых всех и видимых козней, нас стужающих, избави,/ под кров твой, тепле, прибегающих.
Разжженныя стрелы врага человекоубийцы, отче,/ отжени от нас теплыми к Троице твоими молитвами,/ яко избавльшеся сих тя величаем.
Звезду вси ясную, от России возсиявшую мысленно,/ Прокопиян и Капподокиян славу,/ Афонских отец похвалу,/ Божественнаго Иоанна песньми почтим.
Испроси мир от Бога, духа тишину,/ до конца терпение, душ спасение,/ нам, твоим молитвенником,/ восхваляющим любовию твоя чудеса.
Таже: Вся Ангелов воинства, Предтече Господень,/ апостолов двоенадесятице,/ святии вси с Богородицею,/ сотворите молитву,/ во еже спастися нам.

Трисвятое, по Отче наш:

Посем тропари, глас 2.
Приидите, поклонимся, вернии,/ и, со благоговением и любовию облобызающе славныя и всечестныя мощи Иоанна Богомудраго,/ очисти уста, очи и чело и помолимся,/ яко да и нас сподобит конца спасительнаго и Божественнаго/ своими ко Господу молитвами.

Слава: В вышних с Ангелов лики и с победоносцев соборы/ святая твоя душа радуется, блаженне,/ и свеселится с преподобных множествы,/ с лики пророк же и святителей,/ вкупе с Божественными чинми,/ долу же всечестное тело,/ пении и песньми достойно от нас почитаемое, славится.

И ныне: Все упование мое на Тя возлагаю,/ Мати Божия,/ сохрани мя под кровом Твоим.
*****************************************Акафист ко святому праведному Иоанну Русскому, исповеднику

Тропарь, глас 4:
От земли пленения твоего/ воззвавый тя к Небесным селением, / Господь соблюдает невредимо и цельбоносно тело твое,/ праведне Иоанне,/ ты бо, в России ятый и во Асию проданный, посреде агарянскаго злочестия благочестно пожил еси во мнозе терпении / и, сеяв зде слезами,/ жнеши тамо неизглаголанною радостию.// Темже моли Христа Бога спастися душам нашим.

Кондак, глас 8:
В честней памяти твоей, святе,/ веселится о тебе Россия,/ во благочестии тя воспитавшая,/ и целебным мощем твоим радуется Асия,/ идеже, узкий путь прошед страдальческаго плена и постнических подвигов,/ сосуд честен явился еси Божия благодати,/ еяже проси и нам, чтителем твоим, да зовем ти:// Радуйся, Иоанне, благодати тезоимените.

Кондак 1
Избраннаго исповедника Христова и чудотворца предивнаго, поборника святыя веры православныя, Российскою землею рожденнаго и в земли Эллады возсиявшаго, святаго праведнаго Иоанна похвальными песньми почтим; ты же, угодниче Божий, яко предстояй пред престолом Царя Славы, от всяких нас бед свободи, с любовию и благодарением зовущих ти: Радуйся, святый праведный Иоанне, скорый помощниче и преславный чудотворче.

Икос 1
Ангелов Творец и всея твари Создатель избра тя, праведне Иоанне, во еже народи России и Эллады духовно соединити, и яви тя Церкви Своей Святей великаго чудотворца, имущаго к Нему дерзновение молитися о исцелении недугов душевных и телесных, о избавлении от всяких бед и скорбей. Темже мы, сынове российстии, благоговейне преклоняем пред тобою колена телесная и сердца наша и умиленно глаголем:

Радуйся, земный Ангеле и человече небесный;
Радуйся, благодати тезоименитый.
Радуйся, кротости и послушания образе;
Радуйся, молитвы благоуханное кадило.
Радуйся, терпением злобу мира сего победивый;
Радуйся, венцем исповедническим от Господа украшенный.
Радуйся, земли Асии подвиги своими озаривый;
Радуйся,чудесы твоими землю Эллады наполнивый.
Радуйся, звездо Российския земли;
Радуйся, Отечество земное молитвами твоими не оставляяй.
Радуйся, Христа ради на земли пострадавый;
Радуйся, с Ним на Небесех воцаривыйся.
Радуйся, святый праведный Иоанне, скорый помощниче и преславный чудотворче.

Кондак 2
Видя Христос Господь сердца твоего благое намерение, Иоанне блаженне, предначерта ти тернистый и многотрудный путь спасения: егда был еси с воинством царя Петра, плениша тя агаряне и в раба продаша в землю Асии во град Прокопион, идеже ты пребыл еси непоколебим в вере православней и жизнь твою посвятил еси Богу, непрестанно усты и сердцем воспевая Ему: Аллилуиа.

Икос 2
Разум богопросвещенный и веру несумненную имел еси, святче Божий, егда гнева агарян не устрашився, исповеда себе христианина быти и радостно восприял еси биения, узы железныя, огнем жжение и многи муки нестерпимыя. Темже все, таковому твоему дерзновеню и мужеству дивящеся, глаголем:

Радуйся, во страсе Божии добре воспитанный;
Радуйся, закону Господню верно наученный.
Радуйся, от юности твоея всего себе Богу предавый;
Радуйся, всегда в молитве утешение духовное обретавый.
Радуйся, злобы агарян не устрашивыйся;
Радуйся, муки нестерпимыя победно претерпевый.
Радуйся, за Господа распятаго огнем от мучителей опаленный;
Радуйся, Христовым страстем в телеси твоем приобщивыйся.
Радуйся, терпение крепкое во страданиих явивый;
Радуйся, от веры Православныя не отступивый.
Радуйся, Христа единаго всем сердцем возлюбивый;
Радуйся, воине Христов непобедимый.
Радуйся, святый праведный Иоанне, скорый помощниче и преславный чудотворче.

Кондак 3
Силою Вышняго укрепляем, со дерзновением проповедал еси Единаго Истиннаго Бога пред мучители твоими. Злочестивый господин твой, надеяся уловити тя и к вере своей привлещи, тело твое нача истязати. Ты же, страстотерпче Христов, жестокая биения от него претерпевая, укрепляющему тя Богу из глубины сердца воспевал еси: Аллилуиа.

Икос 3
Имея в души своей пламенное желание последовати Агнцу Божию, пострадавшему спасения нашего ради, праведне Иоанне, не убоялся еси мучений и молился еси за враги твоя и мучители, вопия: «Ничтоже мя разлучит от любве Твоея, Христе Боже», и от веры во Христа никакоже отступил еси. Сего ради величаем тя сице:

Радуйся, адаманте веры Христовы;
Радуйся, о всех христианах усердный молитвенниче.
Радуйся, даже до крове во исповедании Христа пострадавый;
Радуйся, в мужестве непоколебимом пребывый.
Радуйся, яко вся мучения претерпел еси, благодатию свыше укрепленный;
Радуйся, свирепство мучителей победивый.
Радуйся, страстем Христовым мужественный подражателю;
Радуйся, врагов Церкве Христовы посрамителю.
Радуйся, веру, надежду и любовь к Богу до конца сохранивый;
Радуйся, подвигом твоим христиан Прокопиона возвеселивый.
Радуйся, в сердце твоем образ Христа носивый;
Радуйся, страданьми за Него мзду многу на Небесех получивый.
Радуйся, святый праведный Иоанне, скорый помощниче и преславный чудотворче.

Кондак 4
Буря лютых мук и страстей мира сего не потопи корабля души твоея, праведне Иоанне, ты бо благодушие в телеснем пленении явил еси, кротость же, незлобие и смирение, и якоже Ангел на земли пожил еси, в трудех, посте и молитве подвизаяся, кесарю — кесарево, а Божие — Богу отдавая по слову Господа, нощию же без сна пребывая, о прощении своих согрешений, наипаче же о творящих ти обиды и озлобления молился еси, в сокрушении сердечнем поя Богу: Аллилуиа.

Икос 4
Слышавше и видевше дивное твое житие, кротость же, смирение и премногую добродетель, гонители твои удивишася и прославляху тебе, яко человека праведна. Егда же лютый господин твой узре в дому своем молитв твоих ради изобилие во всем и даде тебе ослабу, ты, огнем любве ко Господу окриляемь, умножил еси труды подвижническия, на всяку нощь течением слез помост притвора церковнаго в молитве орошая. Помози убо и нам подражати тебе, укрепи нас, от мглы страстей избави и даруй мужество духовное всем прибегающим ко предстательсту твоему и вопиющим тебе таковая:

Радуйся, унижением твоим евангельскому Лазарю уподобивыйся;
Радуйся, терпением твоим с многострадальным Иовом сравнивыйся.
Радуйся, смирившемуся нас ради Христу усердно подражавый;
Радуйся, подвигом твоим Ангелов удививый;
Радуйся, трудниче прилежный, земному господину верно послуживый;
Радуйся, кротостию и благостию своею сердце его победивый.
Радуйся, за творивших ти обиды и озлобления Богу молитвы возносивый;
Радуйся, злобу их на милость преложивый.
Радуйся, на паперти церковней нощи в молитвах проводивый;
Радуйся, подвижниче благочестия и исповедниче, во граде Прокопионе возсиявый.
Радуйся, любве и милосердия ко всем людем исполненный;
Радуйся, яко за ненавидящих и обидящих нас молитися подвизаеши.
Радуйся, святый праведный Иоанне, скорый помощниче и преславный чудотворче.

Кондак 5
Боготечная звезда, от России возсиявшая, явился еси, блаженне Иоанне, блистая чистотою ангельскою и лучами добродетелей твоих земли Асии и Эллады озарив. Егда же ты болен бе, и день своея кончины от Бога ведая, восхотел еси причаститися Святых Христовых Таин, иерей, Богом вразумленный, принесе тебе Святыя Дары во яблоце, их же прияв, праведную душу твою в руце Божии предал еси, и светильник нося, полн елея добрых дел, вшел еси в Царствие Небесное, во еже непрестанно со всеми святыми воспевати всех святых Святейшему Слову: Аллилуиа.

Икос 5
Видевше людие града Прокопиона богоугодное житие твое и блаженную кончину, со слезами и благоговением погребоша тело твое во храме святаго великомученика Георгия. По кончине же твоей мнози недужнии — не токмо православнии, но инославнии и агаряне получиша исцеления у гроба твоего, благодарение Богу приносяще и тебе, яко теплому молитвеннику о всех страждущих, взываша тако:

Радуйся, яко сердце твое покаянными слезами омыл еси;
Радуйся, слезами и молитвами к смерти себе приготовивый.
Радуйся, яко всех обидящих тя простил еси;
Радуйся, незлобием Христовым духа злобы победивый.
Радуйся, в чистоте душу и тело твое сохранивый;
Радуйся, кончину свою предуведевый.
Радуйся, праведно жизнь земную скончавый;
Радуйся, возлюбившему тя Господу душу твою предавый.
Радуйся, венцем безсмертия от Господа увенчанный;
Радуйся, вечней радости с Ним по смерти приобщивыйся.
Радуйся, яко церковь великомученика Георгия прият честное тело твое;
Радуйся, яко во обителех Небесных водворися святая душа твоя.
Радуйся, святый праведный Иоанне, скорый помощниче и преславный чудотворче.

Кондак 6
Проповедником чудес и славы Божия явися клирик некий града Прокопиона, егда узре в соннем видении блаженнаго Иоанна, повелевающаго открыти гроб, в немже обретаются нетленныя мощи его. Темже вернии молитвенно возопиша ко Господу, да явит Он людем мощи Своего избранника, зовуще со благодарением Ему: Аллилуиа.

Икос 6
Возсиял еси, яко новое светило всему христианскому роду, праведне Иоанне, егода Божиим изволением обретено бысть нетленное и благоуханное тело твое, источающее обилие чудес всем с верою к твоему заступлению прибегающим. Темже уврачуй и облагоухай нас, верою и любовию тебе взывающих:

Радуйся, на земли, яко беплотен, поживый;
Радуйся, сосуде Божественныя благодати.
Радуйся, по смерти священнику церкве великомученика Георгия явивыйся;
Радуйся, праведниче Божий, в чудесех просиявый.
Радуйся, яко Христос с небесе призре на святыя мощи твоя;
Радуйся, яко столп огненный над ними показася.
Радуйся, святыя мощи твоя, якоже сокровище велие явити изволивый;
Радуйся, благоуханием от них верных возвеселивый.
Радуйся, яко нетлением тело твое прослави Господь;
Радуйся, яко мощей твоих демони трепещут.
Радуйся, яко во Царствии Небеснем со святыми пребываеши;
Радуйся, яко и нас, грешных, на земли не оставляеши.
Радуйся, святый праведный Иоанне, скорый помощниче и преславный чудотворче.

Кондак 7
Хотящим врагом град твой разорити и мощи твоя огню предати, явися страшное и преславное чудо: воини увидеша тя, Иоанне, стояща посреде огня и оставити град грозно им повелевающа. Тии же ужасошася видению, вон бежаша и никоегоже зла сотвориша. Вернии же людие паки обретоша мощи твоя, к нимже и мы припадающе вопием Богу победную песнь: Аллилуиа.

Икос 7
Новаго тя чудотворца и молтивенника во времена последняя дарова нам Человеколюбец Господь, егда оскуде вера, любы охладе, стихии земныя поколебашася. Темже молим тя, праведне Иоанне, не остави нас, грешных и слабых, в годину испытаний, укрепи молитвами твоими всех любящих тя и вопиющих ти таковая:

Радуйся, верных надеждо и заступление;
Радуйся, неверных страх и посрамление.
Радуйся, яко подвиги твоими град Прокопион освятил еси;
Радуйся, яко молитвами твоими землю Эллады облагоухал еси.
Радуйся, свет Христов в сердце твоем носивый;
Радуйся, тьму жизни нашея светом Христовых заповедей озаряяй.
Радуйся, о людех страны Греческия молитвенниче неусыпный;
Радуйся, помощниче людем Российским Богодарованный.
Радуйся, от разорения град твой и храм оградивый;
Радуйся, православных христиан прибежище.
Радуйся, яко ныне со всеми святыми престолу Божию предстоиши;
Радуйся, яко неизреченную славу Господню созерцаеши.
Радуйся, святый праведный Иоанне, скорый помощниче и преславный чудотворче.

Кондак 8
Странником и пришельцем был еси в стране пленения твоего, угодниче Божий, взыскующим Горняго Иерусалима Небеснаго, и тако странное для сущих от мира житие пожив, добродетельми многими к Богу приблизился еси, научая всех верных искати едино на потребу, еже есть богоугождение. Сего ради Сам Господь, видя смирение твое, возвеличи тя благодатию Своею, Егоже восхваляюще, поем ангельскую песнь: Аллилуиа.

Икос 8
Весь был еси любве Божественныя исполнен, блаженне, светом благодати Божия сияя пред человеки, и святыя мощи твоя врачебница есть духовная, сокровище чудес, небесных аромат вместилище. Сего ради, дерзновение велие ко Господу имея, молишися за христианы, во всем мире живущия, и верою тя на помощь призыващим пособствуеши. Не остави убо и нас благодатною твоею помощию и заступлением, да благодарно тебе зовем:

Радуйся, даром любве к Богу и ближним исполненный;
Радуйся, всех приходящих к тебе скорый утешителю.
Радуйся, верою чудодейственною озаренный;
Радуйся, в молитвах и бдениих учителю наш предивный.
Радуйся, благодатную росу исцелений верным источаяй;
Радуйся, в милости неистощимый.
Радуйся, недугов лютых прогонителю;
Радуйся, православных людей тихое пристанище.
Радуйся, в сониих и видениих страждущих посещаяй;
Радуйся, в бедах и напастех помощь им подаваяй.
Радуйся, странниче земный, во Отечество Небесное вшедый;
Радуйся, во всем мире христианстем прославленный.
Радуйся, святый праведный Иоанне, скорый помощниче и преславный чудотворче.

Кондак 9
Всякое естество человеческое удивися, видевше чудеса преславная, от мощей праведнаго Иоанна истекающая, мнози убо восхотеша части их во инии места и грады отделити, обаче всем хотящим взяти их ты, угодниче Божий, возбранял еси. Егда же святогорцы русскаго монастыря моляхуся, да часть мощей твоих даруется им, благоволил еси принести на Афон в Сад Богоматере десную руку твою в благословение им и утешение. И бысть велие торжество: вси иноцы обители Пантелеимоновой, колена преклоняюще, сретоша десную руку твою от града Прокопиона принесенную, воспевающе Богу благодарственную песнь: Аллилуиа.

Икос 9
Ветии многовещаннии не возмогут изрещи силу любве православных эллинов, иже изгнанни бывше от Прокопиона неверными, изнесоша мощи твоя, праведне Иоанне, на остров Эвбея, идеже воздвигоша велий благолепный храм во имя твое, в немже и положени быша многоцелебныя мощи твоя. Темже и мы, молящеся в храме сем и предстояще пред ракою твоею, чудесы благоухающей, прилежно молим тя: услыши нас, товего предстательства просящих и благоговейне вопиющих:

Радуйся, верных и неверных в бедах утешителю;
Радуйся, яко тобою прославляется вера христианская.
Радуйся, страну Греческую и людей ея возлюбивый;
Радуйся, яко смотрением Божиим мощи твоя на землю Эллады принесени быша.
Радуйся, храму, имене твоему посвященному, покрове, Богом данный;
Радуйся, града Неопрокопиона и всея земли Эллады святой покровителю.
Радуйся, мощами твоими Гору Афонскую освятивый;
Радуйся, нетленною десницею во обители Пантелеимоновой пребываяй.
Радуйся, братии Афонскаго вертограда в подвизех скорый помощниче;
Радуйся, яко во всей Церкви Христовой имя твое прославляется.
Радвйся, яко всей стране Гречестей, яко солнце незаходимое, сияеши;
Радуйся, яко и Отчизну твою, страну Российскую, не оставляеши.
Радуйся, святый праведный Иоанне, скорый помощниче и преславный чудотворче.

Кондак 10
Спасение в бедах и напастех восхотев дати Господь верным чадом Своим, дарова нам тя, угодниче Божий, приял бо еси благодать целити недуги всем притекающим к тебе с молитвою: кровоточивии бо и прокаженнии прикосновением к раце мощей твоих очищаются, глусии слышат, разслабленнии здрави бывают, слепии прозревают. Мы же, поминающе скорое заступление твое, благодарным гласом восхваляем Бога, поюще Ему песнь: Аллилуиа.

Икос 10
Стена еси стране Гречестей и народу ея благочестивому, праведне Иоанне, и необоримый заступник всем призывающим имя твое, зане тако благоволи Сам Господь — быти тебе защитником христиан не токмо земли Эллады, но всех любящих и чтущих тя людей православных. Темже Элладския Церкве людие, Афонских отец собори, Российстей страны вернии и во всякой стране чтущии Бога восхваляют тя сице:

Радуйся, страже земли Эллады, нечестивыя отгоняяй;
Радуйся, всех благочестивых людей ея от бед избавляяй.
Радуйся, яко во всех странах живущим христианом благодатную помощь подаеши;
Радуйся, яко целебныя дары повсюду точиши.
Радуйся, от Господа власть на духи нечистыя приемый;
Радуйся, силою Божиею их изгоняяй.
Радуйся, оставленным врачами предивное поможение;
Радуйся, яко от смертоносных язв многих свобождаеши.
Радуйся, болящих младенцев присный врачевателю;
Радуйся, скорбящих их родителей благий утешителю.
Радуйся, проповедниче покаяния и ходатаю нашего спасения;
Радуйся, смиренномудрия и терпения учителю.
Радуйся, святый праведный Иоанне, скорый помощниче и преславный чудотворче.

Кондак 11
Пение всеумиленное приносим Христу Богу, прославльшему тя, праведне Иоанне, яко дарова нам великаго заступника, утешителя и молитвенника о спасении православных христиан, по всему лику земли обитающих. Темже славим тя, просяще твоего предстательства пред Господом о стране нашей Российстей, да избавимся от нашествий иноплеменных и междоусобных браней, и возможем в мире и тишине воспевати Христу Богу песнь: Аллилуиа.

Икос 11
Светозарный светильник Божия благодати явился еси, праведне Иоанне, духовным сиянием подвигов твоих и чудес просветивый земли Асии и Эллады. Ты бо, Российскою землею рожденный, повсюду источаеши чудес величество и молишися о всех любящих и чтущих тя. Темже убо моли Христа Бога Отечеству твоему и всей стране Гречестей непоколебимыми и безмятежными быти, от навет вражиих и от агарянскаго нашествия их огради, воинству православному победу на враги даруй, да к тебе, яко крепкому о нас молитвеннику, взываем сице:

Радуйся, Церкве Вселенския Православныя преславное украшение;
Радуйся, о людех православных пред Богом дивный предстателю.
Радуйся, во дни бед и испытаний в земли Эллады чтущих тя не оставивый;
Радуйся, об Отечестве нашем и народе его теплый молитвенниче.
Радуйся, Ангеле земли нашея, во стране Гречестей прославленный;
Радуйся, и в Россиийстей стране благоговейне почитаемый.
Радуйся, светильниче, омраченныя души просвещаяй;
Радуйся, лампадо златая, елеем милости исполненная.
Радуйся, радости духовныя чтущим тя подателю;
Радуйся, спасительное христиан прибежище.
Радуйся, яко тобою страстей очищение приемлем;
Радуйся, у престола Божия о нас, недостойных, ходатаю.
Радуйся, святый праведный Иоанне, скорый помощниче и преславный чудотворче.

Кондак 12
Благодать Духа Святаго, живущая в тебе, блаженне, дивно показася в нетлении твоих честных мощей, в чудесех от них и исцелениих, ихже любовию лобызающе, славим о тебе Христа Бога, дивнаго во святых Своих. Сего ради не забуди и нас, усердно призывающих тя во времена тяжких бед и напастей, и молитвами твоими от них избави, не престани ходатайствавати всем нам телеснаго здравия и душевнаго спасения, со благоговением чтущих святую память твою и поющих Богу: Аллилуиа.

Икос 12
Поюще подвиги многострадальнаго жития твоего, почитаем страдания, хвалим долготерпение, славим кротость и смирение, ублажаем святую твою кончину и почитаем тя, яко небеснаго предстателя нашего, ты бо от бед и скорбей избавляеши, недуги врачуеши, печали утоляеши всех почитающих тя. Благодарим и величаем прославившаго тя Господа, даровавшаго нам дивнаго молитвенника и чудотворца, Егоже умоли спастися всем поющим ти таковая:

Радуйся, добропобедный воине Царя Небеснаго;
Радуйся, великий Христов угодниче.
Радуйся, плачем и скорбьми временными утешения вечнаго сподобивыйся;
Радуйся, кротостию своею и смирением землю праведных унаследивый.
Радуйся, чистотою и целомудрием от Бога украшенный;
Радуйся, цветом неувядаемым почтенный на небеси.
Радуйся, Ангельских Воинств собеседниче;
Радуйся, яко с преподобными и праведными светло торжествуеши.
Радуйся, милостивое заступление Божия Матере к нам приклоняяй;
Радуйся, светильниче, любовию своею нас освящаяй.
Радуйся, всех святых земли Российския сонаследниче;
Радуйся, яко предстоиши ныне со всеми святыми престолу Божию.
Радуйся, святый праведный Иоанне, скорый помощниче и преславный чудотворче.

Кондак 13
О пречудный и преславный чудотворче, святый праведный Иоанне, земли Российския благодатное рождение, подвижников Эллады похвало и украшение. Приими от любящих тя сердец малое сие моление и принеси его ко Христу Богу нашему, да сохранит нас от враг видимых и невидимых, от недуга и глада, от всякия скорби и внезапныя смерти, и сподобит вкупе с тобою во Царствии Небесном непрестанно пети Спасителю нашему и Богу песнь: Аллилуиа.

Этот кондак читается трижды, затем 1-й икос и 1-й кондак:

Икос 1

Ангелов Творец и всея твари Создатель избра тя, праведне Иоанне, во еже народи России и Эллады духовно соединити, и яви тя Церкви Своей Святей великаго чудотворца, имущаго к Нему дерзновение молитися о исцелении недугов душевных и телесных, о избавлении от всяких бед и скорбей. Темже мы, сынове российстии, благоговейне преклоняем пред тобою колена телесная и сердца наша и умиленно глаголем:

Радуйся, земный Ангеле и человече небесный;
Радуйся, благодати тезоименитый.
Радуйся, кротости и послушания образе;
Радуйся, молитвы благоуханное кадило.
Радуйся, терпением злобу мира сего победивый;
Радуйся, венцем исповедническим от Господа украшенный.
Радуйся, земли Асии подвиги своими озаривый;
Радуйся,чудесы твоими землю Эллады наполнивый.
Радуйся, звездо Российския земли;
Радуйся, Отечество земное молитвами твоими не оставляяй.
Радуйся, Христа ради на земли пострадавый;
Радуйся, с Ним на Небесех воцаривыйся.
Радуйся, святый праведный Иоанне, скорый помощниче и преславный чудотворче.

Кондак 1
Избраннаго исповедника Христова и чудотворца предивнаго, поборника святыя веры православныя, Российскою землею рожденнаго и в земли Эллады возсиявшаго, святаго праведнаго Иоанна похвальными песньми почтим; ты же, угодниче Божий, яко предстояй пред престолом Царя Славы, от всяких нас бед свободи, с любовию и благодарением зовущих ти: Радуйся, святый праведный Иоанне, скорый помощниче и преславный чудотворче.