АКАФИСТ праведному Симеону Богоприимцу


Кондак 1
Избранный в благовестника явления Христова в человецех, святый праведный старче Симеоне, похвальная пения приносим ти, Богоприимче, ты же, яко имеяй дерзновение ко Господу, Егоже во объятиях Твоих носил еси, моли спастися нам, любовию зовущим:
Радуйся, Симеоне, старче праведный, Богоприимче преблаженне.

Икос 1
Ангел Господень послан бысть извествовати старцу Симеону, яко воистину от Девы родитися имать обетованный Спас миру Христос. Егда бо той, чтущу ему книгу пророка Исаии, достиже места, идеже бе написано: «се Дева во чреве приимет и родит сына Еммануила», и недоумеваяй о реченных, помышляше в себе, како могут сия быти, тогда явися ему Ангел и возвести, яко не имать видети смерти, дондеже видит рождшагося от Девы Христа Господня. Таковому дивному о нем промышлению Божию чудяшеся, воззовем к нему таковая:
Радуйся, с сединами старческими и мудрость истинную стяжавый;
Радуйся, Духом Божиим, яко муж праведен и благочестив свидетельствованный.
Радуйся, во всех оправданиих Господних непорочно и непреткновенно ходивый;
Радуйся, всем житием Твоим Господеви угодивый.
Радуйся, Симеоне, старче праведный, Богоприимче преблаженне.

Кондак 2
Видя старец, яко умножающимся летом живота, умножаются ему труд и болезнь, зело скорбяшe душею, яко продолжися время пришельствия его, на земли темже желание имый разрешитися и ко отцем прейти, слезне просяще отпущения себе, зовый Богу: Аллилуиа.

Икос 2
Разум недоразуменный возвещенных от Ангела разумети, старец ища, недоумеваше, в себе глаголя: что сие есть странное и неудобь сказаемое таинство, яко Дева во чреве зачнет и родит Сына. Егда Дева чиста, яко мужа не знает, родити может, и кто будет сей, иже имать родитися без мужа, Сын Девы. Паче же и паче испытуя писании, уразуме от них велию сию благочестия тайну, яко подобает Богу явитися во плоти, да спасет человека Богом же и человеком. Темже мы, дивному премудрости Божия совету чудящеся воспоим блаженнаго сотаинника премудрости, зовуще к нему таковая:
Радуйся, яко святою жизнию сердце твое очистил еси;
Радуйся, яко чистотою сердца пламенную любовь к Богу стяжал еси.
Радуйся, яко любовию к Богу ум твой чист сотворил еси;
Радуйся, яко чистотою ума разум Божественных писаний уяснил еси себе.
Радуйся, яко разумением писаний к вере во Христа приведен был еси;
Радуйся, яко верою и упованием к чаянию утехи Израилевой наставлен был еси.
Радуйся, Симеоне, старче праведный, Богоприимче преблаженне.

Кондак 3
Сила Духа Божия воздвиже во он день старца приити в церковь, и егда введоста родителя Отроча Иисуса, сотворити има по обычаю законному о Нем, и той, узрев Отроча, абие уразуме Духом, яко Сей есть обетованный Спас миру Христос, и радуяся возопи Богу: Аллилуиа.

Икос 3
Имея ум зряй к Богу и быв в Дусе, прият тогда старец Симеон Младенца Иисуса на руку своею и благослови Бога, и рече к Марии, Матери Его: «се лежит сей на падение и на востание многим во Израили и в знамение прорекаемо, яко да откроются от многих сердец помышления их.» Таковому убо прозрению святаго дивящеся, ублажим Богоприимца пении сими:
Радуйся, Боговедче прозорливый, Христа Господня, во образе младенца четыредесятодневна явльшася, Духом Божиим абие познавый;
Радуйся, Богопроповедниче святый, Бога Того во плоти пришедша, во спасение миру велегласно проповедавый.
Радуйся, Боголюбче благочестивый, пришествием чаянныя тобою утехи Израилевой несказанно обрадованный;
Радуйся, Боговидче преблаженный, Бога во плоти явльшася, не умными точию, но и телесныма очима узревый.
Радуйся, Богоприимче праведный, всю тварь содержащаго дланию, старческими твоими дланьми восприявый;
Радуйся, Богоносче истинный, Бога, Егоже небо и земля носити не могут, во объятиях твоих телесне носивый.
Радуйся, Симеоне, старче праведный, Богоприимче преблаженне.

Кондак 4
Буря внутрь помышлений тревожных вниде в душу святыя Богоотроковицы, егда благословив Ю Симеон, приложи глаголати к Ней: и Тебе же самой пройдет душу оружие. Еже слышавше святая Дево, первее убо смутися о словеси сем, таже яко раба Господня сущи, предаде себе в волю Господню, зовущи Ему: Аллилуиа.

Икос 4
Слышаще Иосиф и Пречистая Матерь и Дева дивная проречения прозорливаго старца об Отрочате, чудяхуся о глаголанных о Нем. Мати же Его соблюдаша вся глаголы сия, слагающи в сердцы своем. Темже и мы, пророческим дивнаго старца глаголом чудящеся, воззовем тепле ему таковая:
Радуйся, пророче Божий, пророческаго дара богатно исполненный;
Радуйся, древних пророков удобрение и новых провидцев похвало.
Радуйся, яко страж верен, посреде двою Заветов, Ветхаго же и Новаго, на божественной стражи поставленный;
Радуйся, отсюду мимошедшая и грядущая мира и рода человеческого единым зрением ока соглядавый.
Радуйся, яко страж верен, неусыпне бдяй и стрегий, пришедшу Домовладыце Христу, абие во сретение исшедый;
Радуйся, страсти Христовы еще Младенцу сущу Ему предуведевый, и болезнь и тугу сердечную Матери Его предсказавый.
Радуйся, Симеоне, старче праведный, Богоприимче преблаженне.

Кондак 5
Боготечную звезду, предтечу Божественнаго света зрим тя, Богоприимче преблаженный. Сей бо, Егоже свет языком быти возвестил еси, возсия убо просвещение истины во всех языцех, от нихже и мы, светом Его просвещеннии, благодарне пети навыкохом Богу: Аллилуиа.

Икос 5
Видесте очи мои спасение Твое, Владыко, еже уготовал еси пред лицем всех людей, свет во откровение языком и славу людей Твоих, Израиля, возопил еси, блаженне Симеоне, приемь на руку твоею младенца Иисуса, Емуже мы ныне, со страхом и любовию покланяющеся, воспеваем ти, яко Богоприимцу и пророку, пения таковая:
Радуйся, всему миру, иудеем же и еллином, спасение во Христе уготованное проповедавый;
Радуйся, людем во тме и сени смертней седящим, свету возсияти им предвозвестивый.
Радуйся, высокомерие иудеов, мнивших, яко тех точию есть Царствие Божие, уничиживый;
Радуйся, и языком спасение во Христе Иисусе благовестивый.
Радуйся, неверие ожесточенных иудеов предуведевый;
Радуйся, спасение верою во Христа избранных от иудеов же и язык предуказавый.
Радуйся, Симеоне, старче праведный, Богоприимче преблаженне.

Кондак 6
Проповедник богоносный пришествия Христова, всем чающим избавления во Израили был еси, Богоносе Симеоне. Оттоле бо начаша людие Божии веровати, яко приблизися к ним Царствие Божие, веровавше же пояху Богу: Аллилуиа.

Икос 6
Возсия Иерусалиму и всей земли иудейстей просвещение истины светом благовестия твоего, праведный старче; се бо и праведная Анна пророчица видящи на руку твоею Младенца Боголепна, и та разумев Духом, яко Сей есть пришедый избавити Израиля, приступи в той час и исповедашеся Господеви и глаголаше о Нем всем чающим избавления во Иерусалиме. Приступим убо и мы очищенным сердцем и умныма очима, Богомладенца на руку старчу держима зряще, воспоим сему таковая:
Радуйся, яко первый сретил еси обетованного Царя Израилева, исперва пришедша во град Свой и в дом Отца Своего;
Радуйся, яко славу новаго Храма паче славы древняго, первый узрел еси.
Радуйся, яко всем чаявшим избавления, чаянную ими утеху Израилеву яве указал еси;
Радуйся, яко возсияти звезде от Иакова и востати человеку от Израиля, якоже прорече Валаам, людем Твоим благовестил еси.
Радуйся, яко благовестием твоим сердца уповавших возвеселил еси, малодушныя же и унывающия укрепил и утешил еси;
Радуйся, яко свидетельством твоим о Христе и нас в вере и уповании утверждаеши.
Радуйся, Симеоне, старче праведный, Богоприимче преблаженне.

Кондак 7
Хотящу Симеону от нынешняго века преставитися прелестнаго, вдался еси яко младенец тому, Владыко Господи, но познался еси ему и Бог совершенный: темже удивися старец неизреченному Твоему снисхождению и радуяся возопи: Аллилуиа.

Икос 7
Дивны дела Твоя, Господи, вопияше ветхий денми старец, ко иже от него держимому Спасу мира: «Аще и мнюся держати Тя яко младенца, обаче не аз держу Тебе, но Ты держиши мя, яко Бог и Создатель всяческих, и яко Владыка живота и смерти, держиши мя и в животе сем, ветха суща старца. Отпусти убо мя ныне, по глаголу Твоему с миром, яко видесте очи мои спасение Твое.» Темже мирное от земных отшествие святаго старца славяще, воззовем к нему таковая:
Радуйся, яко клас зрелый пшеничный на землю, тако тихо старческую главу твою на ложе смерти склонивый;
Радуйся, яко путник дальним странствием утомленный, мирно сном смерти почивый.
Радуйся, многолетнее течение твое добре в вере и благочестии скончавый;
Радуйся, от временнаго сего жития в мире глубоце к вечному покою преставивыйся.
Радуйся, с надеждою скорого избавления от державы смертныя ко отцем твоим преселивыйся;
Радуйся, во уповании жизни вечныя дух твой радостно Господеви предавый.
Радуйся, Симеоне, старче праведный, Богоприимче преблаженне.

Кондак 8
Странно Бога превечна, яко младенца четыредесятодневна, на руку старчу держима зряще, удивимся неизреченному Того нас ради истощанию и ум на небеса вознесши, благодарне воззовем к Нему: Аллилуиа.

Икос 8
Весь еси желание и желаний краю сладчайший Иисусе, взываше праведный Симеон ко иже во объятиях его носиму Избавителю мира. Обаче, узрев Тя ныне Бога превечна, что восхощу прочее видети на земли: «Отпусти убо мя ныне раба Твоего, Владыко, да шед возвещу пришествие Твое во аде держимым узником, с верою Тебе ожидающим, яко да и аз купно с ними изведен буду во обители Царствия Твоего, идеже вижду славу Твою». Темже, блаженное преставление святаго старца поминающе, прославим его сердцем и усты возносимыми пении сими:
Радуйся, благий вестниче Христов и во аде от века содержимым узником пришествие Его благовестивый;
Радуйся, надеждою скораго избавления души прародителей и праотцев возвеселивый.
Радуйся, купно с ними Христом воскресшим, победителем смерти и ада, из обителей мрака изведенный;
Радуйся, с сонмом избранных Божиих, в рай сладости во обителех небесных водворенный.
Радуйся, к сонму святых царей, пророков и первосвященников ветхозаветных сопричтенный;
Радуйся, к блаженству святых небесных сил безплотных приобщенный.
Радуйся, Симеоне, старче праведный, Богоприимче преблаженне.

Кондак 9
Всякое колено небесных и земных и преисподних поклонится о имени Иисусове, и всяк язык исповесть, яко Господь Иисус Христос в славу Бога Отца. Веселися убо и радуйся, старче праведный, яко Сей есть, Егоже яко Младенца умалена на руку твоею приял еси, и Емуже ныне, яко Богу с лики безплотных сил на небеси зовеши: Аллилуиа.

Икос 9
Вития многовещанныя недоумеют изрещи велию славу твою, святый Богоприимче Симеоне, еюже прослави тя Христос Бог во Царствии славы Его. Предстоя бо близь Престола Святыя Троицы купно с Пречистою Богородицею и Предтечею Иоанном, со дерзновением молишися о всех с верою к тебе притекающих и просящих твоего заступления и помощи; сего ради, славяще дивное прославление твое на небеси и на земли, вопием тебе таковая:
Радуйся, яко купно со святым Предтечею в неизреченней славе близ предстоиши Престолу Святыя Троицы;
Радуйся, Егоже на земли Младенца видел еси, Сего на небеси ныне со всеми святыми зря, радуешися.
Радуйся, яко со Христом, Егоже во объятиих твоих носил еси, ныне на небеси в вечней славе Его царствуеши;
Радуйся, яко с лики ангелов на небеси, трисвятою песнию Его воспеваеши.
Радуйся, яко велие дерзновение имаши ко Господу, Егоже Младенца на руку твоея приемь, Бога исповедал еси;
Радуйся, яко весь мир христианский великаго предстателя и ходатая тя стяжа.
Радуйся, Симеоне, старче праведный, Богоприимче преблаженне.

Кондак 10
Спасти хотяй от заточения и уз праведнаго Петра Афонскаго, яве предста ему Богоприимец в темнице, со святителем Христовым Николаем, дивен видением, честен образом, в ветхозаветнаго священства ефод облечен, в руце же жезл златый имеяй. Темже удивися преподобный чудному видению сему, радуяся возопи Богу: Аллилуиа.

Икос 10
Царь превечный, дивнаго отсюду ходатая и крепкаго заступника показа нам — тебе, великий угодниче Божий Симеоне. Сам бо святитель Христов Николай, хотяй спасти преподобнаго, настави его прилежно вопити к тебе о заступлении и помощи, многомощен бо еси, глаголаше, у Бога и велие дерзновение имаше к Нему. Якоже убо преподобнаго Петра Афонскаго представ, спасл еси, свободу и избавление от уз ему даровав, тако и нас в бедах и обстояниих сущих не укосни спасати предстательством твоим, да зовем ти:
Радуйся, теплый молитвенниче о всех, с верою тебе призывающих.
Радуйся, скорый помощниче всех к твоему заступлению прибегающих.
Радуйся, яко великий во иерарсех святитель Христов Николай, многомощнейша ко Христу Богу предстателя тя указа;
Радуйся, яко явлься со святителем Николаем преподобному Петру Афонскому, чудесне того от уз и темницы свободил.
Радуйся, яко сим его на стезю иноческаго жития наставил еси;
Радуйся, яко сим и нас в нуждах наших прибегати к твоему заступлению научил еси.
Радуйся, Симеоне, старче праведный, Богоприимче преблаженне.

Кондак 11
Пение умиленное приносит ти весь мир христианский, святый угодниче Божий Симеоне, великий же Новград славит тя, яко милостиваго избавителя своего от болезни и губительства смертнаго. Егда бо праведный гнев Божий постиже отцы наша и болезнь смертная нападе на ня, благоволил Бог явити людем своим цельбоносную икону твою, яже и до днесь во обители иночестей светло сияет, благодать подающи исцелений всем с верою к тебе прибегающим, Богу же зовущим: Аллилуиа.

Икос 11
Светозарная свеща бывшим во тьме искушений и бед отцем нашим явися чудотворная икона святаго Богоприимца Симеона, паче чаяния надеждою спасения веселящи сердца их. Хотя бо спасти град от губительства смертнаго, предивно явися святый Архиепископу Новгородскому Ионе, и повеле храм обыденный создати во имя его, и ту святую икону его поставити, да источает исцеления людем, в покаянии с верою к ней прибегающим. Сего ради, праведно слышит от нас святый чудотворец благодарственная пения таковая:
Радуйся, града нашего стено и утверждение;
Радуйся, от смертоносныя язвы и губительных болезней благонадежное ограждение.
Радуйся, от напастей и бед скорое избавление;
Радуйся, от враг видимых и невидимых мощное защищение.
Радуйся, во всех благих крепкое вспоможение;
Радуйся, о гресех наших теплое умилостивление.
Радуйся, Симеоне, старче праведный, Богоприимче преблаженне.

Кондак 12
Благодать неоскудных исцелений и источник неизсякаемых духовных даров и во грядущая людем оставити восхотев, Человеколюбец Господь дарова нам пречистую икону твою, святый Богоприимче Симеоне, от неяже аки от Богоносных твоих рук, держащих подателя всех благ Бога, мы ныне различная дарования приемлем, благодарне зовуще Ему: Аллилуиа.

Икос 12
Поюще славим многомощное предстательство твое и крепкое заступление о нас грешных, святый Богоприимче Симеоне. Воистину бо стена нерушима и покров державен еси граду и обители, в нейже от лет древних, яко звезда светозарная, возсия нам чудотворная икона твоя, к нейже мы ныне припадающе и тепле молящеся, тебе со слезами взываем сице:
Радуйся, яко обитель тобою хранима, яко многоценное сокровище имуще честную икону твою, благодарне о ней утешается и радуется;
Радуйся, яко хотящии благочестно жити в ней от искушений мира, плоти и диавола, покровом твоим ограждаеши.
Радуйся, яко добре труждающимся помощник крепок являешися;
Радуйся, яко скорбящим утешение, болящим исцеление, малодушествующим успокоение молитвами твоими подаеши.
Радуйся, яко всяк в нужде ко святей иконе твоей прибегаяй, скорое утешение и благовременную помощь приемлет;
Радуйся, Богодарованное нам прибежище, надеждо, покров и заступление наше.
Радуйся, Симеоне, старче праведный, Богоприимче преблаженне.

Кондак 13
О великий угодниче Божий и Богоприимче Симеоне! Приими ныне малое сие, обаче от чистаго сердца приносимое тебе моление наше, и, яко многомощный предстатель ко Христу Богу, испроси нам оставление грехов и мирную кончину живота нашего, и вечныя молитвами твоими избави нас муки, о тебе вопиющих Богу: Аллилуиа, Аллилуиа, Аллилуиа.
Этот кондак читается трижды, затем икос 1-й и кондак 1-й

Молитва святому праведному Симеону Богоприимцу
О великий угодниче Божий и Богоприимче Симеоне! Призри на мя грешнаго, ко святей иконе твоей припадающа и просяща твоего заступления и помощи: скорбь бо обдержит мя от обстоящих мя ныне бед и зол, и утешения не имам многоболезненней души моей. Исках помощи от человек, и не обретеся. Возопиях ко Господу, и не услыша мя, аз прогневах пречистую благость Его беззаконьми моими, и множеством многих грехов моих преогорчих человеколюбную утробу Его. И кто ми ныне помощь явит; кто ми скорбь утолит; кто даст отраду и успокоение многомятежней душе моей? К тебе, великий угодниче Божий, прибегаю грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих, и твоего заступления и помощи требующих. Моли убо Человеколюбца Господа, яко да простив ми безчисленная моя прегрешения, не отвратит милость Свою от мене, но яко благ и сострадателен, явит и мне безконечное Свое милосердие, и в лютем напастей и бед моих озлоблении подаст ми всесильную помощь Свою, и преогорченной душе моей ослабу, мир, укрепление, утешение и успокоение дарует. Ей, великий угодниче Божий, вознеси Богоносныя руце твоя ко иже во объятиих твоих носитися изволившему Христу Богу нашему и моли благость Его, да не отринет моления сердца моего недостоинства ради моего, но явит мне благовременне милость Свою, во славу безконечных щедрот Своих и многомощнаго предстательства твоего, о немже подобает Ему всякая слава и благодарение купно со Отцем и Пресвятым Его Духом ныне и присно и во веки веков. Аминь.

Молитва иная
О Богоприимче Симеоне! Услыши нас, грешных раб Божиих (имена), и не отыми покров твой святый от нас, моли благость Господа, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире жизнь нашу, и во всем благом благое поспешение испроси, вся к животу и благочестию потребная нам даруя, яко да тихое и безмолвное житие поживем во всяком благочестии и чистоте, и тако в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает, со Отцем и Пресвятым Его Духом, ныне и присно и во веки веков. Аминь.

Молитва третья
О, великий угодниче Божий Богоприимче Симеоне! Предстоя Престолу Великаго Царя и Бога нашего Иисуса Христа, велие дерзновение имаши к Нему, во объятиих твоих нашего ради спасения носитися изволившему. К тебе убо, яко многомощному предстателю и крепкому о нас молитвеннику, прибегаем мы, грешнии и недостойнии. Моли Благость Его, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стезе заповедей Своих утвердит нас. Огради молитвами твоими в мире живот наш, и во всем благом благое поспешение испроси, вся яже к животу и благочестию потребная нам даруя. Якоже древле Великий Новоград явлением чудотворныя иконы твоея от губительства смертнаго избавил еси, тако и ныне нас и вся грады и веси страны нашея от всяких напастей и бед и напрасныя смерти предстательством твоим избави, и от всех враг видимых и невидимых покровом твоим защити. Яко да тихое и безмолвное житие поживем во всяком благочестии и чистоте и, тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего. Ему же всякая слава подобает со Отцем и Пресвятым Его Духом, ныне и присно и во веки веков. Аминь.

Тропарь праведному Симеону Богоприимцу
Тропарь, глас 4:
Симеон старец днесь веселится, восприят на руку свою Младенца, Превечнаго Бога, от уз плоти разрешитися прося и вопия: видеста очи мои спасение Твое мирови.

Кондак, глас 4:
Старец днесь отрешитися от уз моляшеся сего жития тленнаго, Христа восприят на руки Зиждителя и Господа.

Величание
Величаем тя, святый праведный Симеоне Богоприимче, и чтим святую память твою, ты бо молиши за нас Христа Бога нашего.

Память 3/16 февраля

Память святого и праведного Симеона Богоприимца

КАНОН
Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Старче праведный Симеоне, моли Бога о нас.

В праведных селениих радостно водворяяся Праведнаго Господа, Симеоне праведный, иже Божественное твое совершающия преставление оправдати моли, преблаженне.

В законе быв священнодетель, священнейше, Егоже закон проповеда, Младенца видел еси и естества законом, Богоприимче, умер, к безсмертней, радуяся, прешел еси жизни.

Слава Отцу, и Сыну, и Святому Духу.

Руками держащаго вселенныя концы, Девическими носима руками, видел еси и, честными твоими прием объятии, Моисея вышший явился еси, пребогате.

И ныне и присно, и во веки веков. Аминь.

Богородичен: Полный истощавается, Превечный начинается, Слово одебелевает, Содетель зиждется, Невместимый вмещается, во чреве Твоем воплощаемь, Богоблагодатная.

Песнь 3

Ирмос: Яко неплоды, роди от язык Церковь, и многое в чадех изнеможе сонмище, чудному Богу нашему возопиим: Свят еси, Господи.

Припев: Старче праведный Симеоне, моли Бога о нас.

Возвысився деяньми священными, Богоглаголиве, яко световиден столп высок, Всесвятому Духу был еси, утверждаяся яве, темже восхваляем тя.

Закону Господа, разверзшаго ложесна Девича, и Младенца, плотоносна, Симеоне, бывша, видел еси, дарующаго всем избавление.

Слава Отцу, и Сыну, и Святому Духу.

Руками человека создавый, воплощься, руками твоими держим есть, освящая тя яве, и к жизни будущей просившася, блаженне, отпущает тя.

И ныне и присно, и во веки веков. Аминь.

Богородичен: Мысленную Тя клещу, угль носящу Божественный, от Твоих кровей воплощенна паче ума Симеон яко виде, Всенепорочная, радуяся, ублажаше.

Господи, помилуй, трижды.

Седален, глас 3

От Девы Тя воплощенна, Христе, радуяся, подъят священный Симеон, - ныне отпущаеши,- вопия,- раба Твоего, Владыко. Анна же непорочная, пророчица и славная, ныне исповедание и пение приносит Тебе. Мы же, Жизнодавче, вопием Ти: слава тако благоволившему.

Песнь 4

Ирмос: Седяй в славе на престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Припев: Старче праведный Симеоне, моли Бога о нас.

Престарелся еси в старости, верою же обновился еси, нова Младенца хотя видети, Симеоне, всесовершеннаго, обновляюща мир обетшавший прилогом ветхаго борца.

Ублажим согласно Симеона блаженнаго, яко сподобльшася видети Бога Блаженнаго, в плоть оболкшася, яко да сотворит блаженны, окаянны прежде бывшия.

Слава Отцу, и Сыну, и Святому Духу.

Законодавца Тя вем и законных естества воплощшагося кроме, закон же нов введшаго, Симеон взываше, Едине Господи, ныне отпусти мя к жизни нетленней.

И ныне и присно, и во веки веков. Аминь.

Богородичен: Иже рукою вся носяй, на руках носимый Приснодевы, Сию Херувим содела и Серафим вышшу, яко родительницу, Юже воспоим и благочестно ублажим.

Песнь 5

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Припев: Старче праведный Симеоне, моли Бога о нас.

Ума чистотою Богу Вседержителю, яко Ангел послужив, блаженне, кровными жертвами очистил еси древле люди Израилевы, кровь спасительную предзнаменав ясно.

Самого себе сотворил еси храм Богу всесвят делы Божественными, Богоглаголиве. Темже яко Младенца во святем храме видел еси Бога с плотию, тя преставляюща к Божественным селением.

Слава Отцу, и Сыну, и Святому Духу.

Воспоим днесь, духовно ликующе, вси Симеона Богоприимца и с ним Анну целомудрую, пророки суща Божия и Сего видевшия, нас ради младенствовавшаго.

И ныне и присно, и во веки веков. Аминь.

Богородичен: Не опалив ложесн Твоих естеством Неизменный, Едина Херувим святейши, Человек явися, из Тебе раждаемь, и отриновенныя тлением вся совокупи, Богомати, Рождеством Твоим.

Песнь 6

Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе, Царю сил.

Припев: Старче праведный Симеоне, моли Бога о нас.

Возопил еси, внегда видел еси Господа, Симеоне, яко обещался еси: ныне раба Твоего, Спасе, отпусти, во аде сущим всем Твое Божественное возвещающа воплощение.

Украсился еси и Моисея светлейший был еси, на руки добротою Краснаго приим, Симеоне старче, нас ради по нам Младенца бывша.

Слава Отцу, и Сыну, и Святому Духу. Вод тя исполнена Божественных суща и во адова дольная места сшедша, видевше тамо сущии узницы, Симеоне, Божественныя росы исполнишася.

И ныне и присно, и во веки веков. Аминь.

Богородичен: Уловити мя всегда ищет вселукавый, но того мя сетей исхити, Владычице, и Божественным кровом крил Твоих цела соблюди.

Господи, помилуй, трижды. Слава, и ныне:

Песнь 7

Ирмос: Не послужиша твари Богомудрии, паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Припев: Старче праведный Симеоне, моли Бога о нас.

Законно Господу Вседержителю ты послужил еси, праведен яко истинно и в законе непорочен, блаженне, быв, темже поеши: препетый отцев Господь и Бог, благословен еси.

Радость скорбящих прииде, избавление Израилю воистину явися, яко Младенец в храме своем, отпусти мя к жизни будущей, Симеон вопияше, радуяся.

Слава Отцу, и Сыну, и Святому Духу.

За милосердие щедрот Твоих претруждена мя закона писменем, слячена мя старостию отпусти, Спасе, раба Твоего, яко видех Тя, Симеон взываше, на земли носяща плоть.

И ныне и присно, и во веки веков. Аминь.

Богородичен: Не истощив полный пречистых недр рождшаго Отца, в Твоих недрех, Чистая, яко Младенец седит, уготовая, имже восхоте уподобитися, Пречистая, священное яве седалище.

Песнь 8

Ирмос: Отроки благочестивыя в пещи Рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Припев: Старче праведный Симеоне, моли Бога о нас.

Овдовевший мир Божественныя славы пришедшаго невестоукрасити Пребожественнаго, вдова сущи, Анна всехвальная, и пророчества благодатию облистаемая, прослави Его и будущее всем предстоящим показаше Божественное избавление.

Законныя жертвы приносил еси Агнца за милосердие несказанное, кровь спасительную провозвещая издалеча, блаженне священниче, Егоже воплощенна прием, Симеоне, прославился еси паче Моисея и всех пророков.

Слава Отцу, и Сыну, и Святому Духу.

Видев Желаемаго, разрешение приял еси телесное, Богодохновенне, и, якоже зрелая пшеница, прешел еси ко отцем, славне, воспитан в старости добрей. Темже твою всепразднственную память радостию душевною совершаем.

И ныне и присно, и во веки веков. Аминь.

Богородичен: Яко крин, яко благовонен шипок, яко Божественное обоняние, обрет Тя Слово Пребожественное, Пречистая Богоневесто, и в Твою утробу вселися, благоухая наше естество, злосмрадия исполньшееся, еже от греха, Марие Богородице.

Песнь 9

Ирмос: Ева убо недугом преслушания клятву вселила есть; Ты же, Дево Богородице, прозябением чревоношения мирови благословение процвела еси. Тем Тя вси величаем.

Припев: Старче праведный Симеоне, моли Бога о нас.

Честны руце твои, воистину прикоснувшияся, Богоприимче, Божественным удесем, прикасающагося горам, якоже поет Давид, и дымятся: блажен воистину ты был еси. Темже достойно восхваляем тя.

Рака твоя источает верным исцеления, память же блаженная, сияющи паче солнца, и всех души просвещающи, и мрака мысленнаго исхищающи, священнотаинниче всечестне.

Слава Отцу, и Сыну, и Святому Духу.

Просвещают сиянием мысленным, яко солнце и луна подсолнечную, Анна целомудренная и пророчица, старец же Симеон славный. Ихже ради нас, Человеколюбче Господи, греховныя тьмы избави.

И ныне и присно, и во веки веков. Аминь.

Богородичен: Явльшуюся Тя, Матерь Божию, яко видев, Богородице, старец рече, якоже пророк: се Твой Сын, на востание и падение многих лежит, Владычице, и в знамение неудобосказуемое.

Светилен

Непременне по Ипостаси в Тебе, Богородительнице, плотию соединися безсеменно и младенствова Слово, Егоже на руках носящи, Херувимски, яко престол, ныне Богу Отцу принесла еси, и Симеон старец, радуяся, прият Того.

***