Акафист Божественным Страстям Христовым
Кондак 1

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́ на Кресте́ ви́сяща, вся тварь измени́ся, не́бо ужасе́ся, основа́ния земли́ восколеба́шася. Мы же, недосто́йнии, благода́рственное поклоне́ние Твоему́ нас ра́ди страда́нию принося́ще, с разбо́йником вопие́м Ти: Иису́се, Сы́не Бо́жий, помяни́ нас, егда́ прии́деши во Ца́рствии Твое́м.


Икос 1

Ангелов ликостоя́ния восполня́я, не от Ангел восприя́л еси́, но мене́ ра́ди, Бог сый, челове́к быв, челове́ка, грех ра́ди уме́рша, животворя́щим Те́лом и Кро́вию Твое́ю оживи́л еси́, те́мже, толи́цей любви́ Твое́й благода́рни су́ще, вопие́м Ти:
Иису́се Бо́же, Любы́ Предве́чная, та́ко о нас земноро́дных возблаговоли́вый;
Иису́се, ми́лосте безме́рная, к челове́ком па́дшим до́лу низше́дый.
Иису́се, в плоть на́шу оболки́йся и сме́ртию Свое́ю сме́рти держ́аву разруши́вый;
Иису́се, Боже́ственными Твои́ми Та́инами нас обожи́вый.
Иису́се, страда́ньми и Кресто́м Твои́м весь мир искупи́вый;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 2

Виде́в Тя Ангел в вертогра́де Гефсима́нстем до по́та крова́ва в моли́тве подвиза́ющася, предста́в укрепля́ше Тя, егда́ я́ко бре́мя тя́жкое греси́ на́ши отяготе́ша на Тебе́: Ты бо, Ада́ма поги́бшаго на ра́мо восприи́м, Отцу́ предста́вил еси́, прекло́нь коле́на моля́ся. О сем у́бо с ве́рою и любо́вию пою́ Тебе́: Аллилу́иа.

Икос 2

Ра́зума неразуме́нна во́льнаго Твоего́ страда́ния не уразуме́ша иуде́е: сего́ ра́ди егда́ в нощи́ со свети́льники и́щущим Тя рекл еси́: Аз есмь; а́ще и падо́ша на земли́, но по сем связа́вше Тя, ведо́ша на суди́ще: мы же на сем пути́, припа́дающе к Тебе́, с любо́вию зове́м:
Иису́се, Све́те ми́ра, от ми́ра лука́ваго возненави́денный;
Иису́се, живы́й во Све́те Непресту́пнем, от о́бласти те́мныя я́тый.
Иису́се, Сы́не Бо́жий Безсме́ртный, от сы́на поги́бели на смерть указа́нный;
Иису́се, в Не́мже льсти несть, от преда́теля ле́стию лобза́нный.
Иису́се, ту́не Себе́ всем подава́яй, за сребре́нники прода́нный;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 3

Си́лою Божества́ Твоего́ проре́кл еси́ трикра́тное отверже́ние ученику́. Он же посе́м, а́ще и отрече́ся Тебе́ с кля́твою, оба́че, егда́ узре́ Тя во дворе́ архиере́йстем, Го́спода своего́ и Учи́теля, умили́вся се́рдцем, изше́д вон пла́кася го́рько: «При́зри у́бо и на мя, Го́споди, и порази́ жесто́кое се́рдце мое́, да слеза́ми мои́ми омы́ю грехи́ моя́, поя́ Тебе́: Аллилу́иа».

Икос 3

Име́яй вои́стинну власть по чи́ну Мелхиседе́кову, я́ко Архиере́й во ве́ки, стал еси́ пред беззако́нным первосвяще́нником Каиа́фою, Влады́ка и Госпо́дь всех; от Твои́х у́бо рабо́в прия́вый муче́ние, приими́ от нас сицева́я:
Иису́се безце́нный, це́ною ку́пленный, стяжи́ мя в Твое́ ве́чное насле́дие;
Иису́се, жела́ние всех, от Петра́ стра́ха ра́ди отве́рженный, не отве́ржи мя, грешна́го.
Иису́се, Агнче незло́биве, от лю́тых ве́прей терза́емый, изми́ мя от враг мои́х;
Иису́се Архиере́ю, Свое́ю Кро́вию вше́дый во Свята́я Святы́х, очисти́ мя от скверн пло́тских.
Иису́се свя́занный, име́яй власть вяза́ти и реши́ти, разреши́ моя́ тя́жкая прегреше́ния;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 4

Бу́рею христоуби́йства ды́шуще иуде́е, послу́шавше глас отца́ лжи и человекоуби́йцы искони́, диа́вола, отверго́ша Тебе́, пра́вый Путь, Истину и Живо́т; мы же Тя, Хри́ста, Бо́жию си́лу, в Не́мже вся сокро́вища прему́дрости и ра́зума сокрове́на cуть, испове́дующе, вопие́м: Аллилу́иа.

Икос 4

Слы́ша Пила́т кро́ткия Твоя́ глаго́лы, а́ки досто́йнаго сме́рти предаде́ Тя на пропя́тие, а́ще и сам свиде́тельствоваше, я́ко ни еди́ныя вины́ обре́те в Тебе́: ру́це у́бо свои́ умы́, но се́рдце оскверни́: мы же, чудя́щеся та́йне во́льнаго страда́ния Твоего́, со умиле́нием зове́м:
Иису́се, Сы́не Бо́жий и Сы́не Де́вы, от сыно́в беззако́ния уму́ченный;
Иису́се, пору́ганный и обнаже́нный, дая́й ле́поту кри́ном се́льным и одева́яй не́бо о́блаки.
Иису́се, насыще́нный ра́нами, пятию́ хле́бы пять ты́сящ насы́тивый;
Иису́се, Царю́ всех, вме́сто да́ни любве́ и благодаре́ния жесто́кия му́ки прие́мый.
Иису́се, нас ра́ди весь день я́звленный, уврачу́й я́звы душ на́ших;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 5

Богото́чною Кро́вию Твое́ю весь обле́клся еси́, одея́йся све́том, я́ко ри́зою. Вем, вои́стинну вем со проро́ком, почто́ червле́ны ри́зы Твоя́: аз, Го́споди, аз грехми́ мои́ми уязви́х Тя; Тебе́ у́бо, мене́ ра́ди уя́звленному, благода́рственно зову́: Аллилу́иа.

Икос 5

Прови́дев Тя в ду́се Богоглаго́ливый Иса́иа, безче́стием и ра́нами испо́лнена, ужа́сся вопия́ше: «Ви́дехом Его́, и не име́яше ви́да, ни добро́ты». Мы же, зря́ще Тя на Кресте́, с ве́рою и удивле́нием зове́м:
Иису́се, безче́стие терпя́й, челове́ка сла́вою и че́стию венча́вый;
Иису́се, на Него́же Ангелы зре́ти не мо́гут, по лани́тома зауше́нный.
Иису́се, по главе́ тро́стию ударе́нный, преклони́ во смире́ние главу́ мою́;
Иису́се, све́тлая Твоя́ очеса́ кро́вию омраче́нная име́вый, отврати́ очи́ моя́, е́же не ви́дети суеты́.
Иису́се, от ног до главы́ не име́вый це́лости, всего́ це́ла и здра́ва сотвори́ мя;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 6

Пропове́дник Твоего́ незло́бия я́влься Пила́т, показа́ наро́ду ничто́же бы́ти в Тебе́ досто́йно сме́рти; но иуде́е, я́ко зве́ри ди́вии кровь узре́вше, скрежета́ху на Тя зубы́ свои́ми, «распни́, распни́ Его́», вопию́ще; мы же, лобыза́юще пречи́стыя я́звы Твоя́, зове́м: Аллилу́иа.

Икос 6

Возсия́л еси́ в позо́р и удивле́ние Ангелом и челове́ком глаго́лющу о Тебе́ Пила́ту: «Се, челове́к». Прииди́те у́бо, пору́ганному нас ра́ди Иису́су поклони́мся, вопию́ще:
Иису́се, Тво́рче и Судие́ всех, от тва́ри Своея́ суди́мый и му́чимый;
Иису́се, прему́дрости Пода́телю, отве́та безу́мным не да́вый.
Иису́се, Врачу́ уя́звленных грехми́, даждь ми врачевство́ покая́ния;
Иису́се, Па́стырю пораже́нный, порази́ бесо́в, искуша́ющих мя.
Иису́се, плоть имы́й сокруше́нну, сокруши́ се́рдце мое́ стра́хом Твои́м;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 7

Хотя́й челове́ка от рабо́ты вра́жия изба́вити, смири́л еси́ Себе́ пред враги́ Твои́ми, Иису́се, и, я́ко а́гнец безгла́сен на заколе́ние веде́н был еси́, везде́ я́звы терпя́й, да всего́ исцели́ши челове́ка, зову́ща: Аллилу́иа.

Икос 7

Ди́вное показа́л еси́ долготерпе́ние, егда́ во́ини, руга́ющеся Тебе́, по глаго́лу непра́веднаго судии́, люте́йшими ра́нами уязвля́ху Пречи́стое Те́ло Твое́, я́ко обагри́тися ему́ от ног до главы́ кро́вию. Сего́ ра́ди со слеза́ми вопие́м Ти:
Иису́се человеколюби́вый, от челове́к те́рнием увенча́нный;
Иису́се, Божество́м безстра́стный, стра́сти терпя́й, да нас от страсте́й свободи́ши.
Иису́се, Спа́се мой, спаси́ мя, пови́ннаго всем му́кам;
Иису́се, все́ми оста́вленный, Утвержде́ние мое́, утверди́ мя.
Иису́се, от всех оскорбле́нный, Ра́досте моя́, возвесели́ мя;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 8

Ди́вно и стра́нно яви́стася Тебе́ Моисе́й и Илиа́ на Фаво́ре, глаго́люща о исхо́де Твое́м, его́же ны́не скончава́еши во Иерусали́ме. Та́мо у́бо ви́девша сла́ву Твою́, зде же спасе́ние на́ше узре́вша, зову́т: Аллилу́иа.

Икос 8

Везде́ от иуде́й гони́мый, мно́гия, ра́ди мно́жества грехо́в мои́х, претерпе́л еси́ поноше́ния и му́ки: еди́ни бо Тя проти́вна бы́ти ке́сарю глаго́лют, друзи́и я́ко злоде́я осужда́ют, ини́и же: «Возми́, возми́ и распни́», – вопию́т. От всех у́бо осужде́нному, и на пропя́тие ведо́мому, Тебе́, Го́споду, из глубины́ души́ глаго́лем:
Иису́се, непра́ведно осужде́нный, Судие́ наш, не осуди́ нас по дело́м на́шим;
Иису́се, изнемога́яй на пути́ под Кресто́м, си́ло моя́, в час ско́рби и озлобле́ния моего́ не оста́ви мене́.
Иису́се, взыва́яй о по́мощи к Отцу́, Подвигополо́жниче мой, в не́мощи мое́й укрепи́ мя;
Иису́се, безче́стие прие́мый, Сла́во моя́, от Сла́вы Твоея́ не отри́ни мене́.
Иису́се, Образе пресве́тлыя Ипоста́си Отчия, преобрази́ мое́ нечи́стое и мра́чное житие́;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 9

Все естество́ смяте́ся, зря Тебе́ на Кресте́ пове́шена, на небеси́ солнце́ лучи́ своя́ скры, земля́ потрясе́ся, заве́са хра́ма раздра́ся, каме́ние распаде́ся, ад уме́ршия изве́рже: мы же покланя́емся на ме́сте, иде́же стоя́сте пречи́стеи но́зе Твои́, пою́ще: Аллилу́иа.

Икос 9

Вети́я многовеща́нныя, а́ще и мно́го глаго́лют, но не мо́гут досто́йнаго благодаре́ния возда́ти Боже́ственным страсте́м Твои́м, Человеколю́бче: на́ша же душа́ и те́ло, се́рдце и вси соста́вы со умиле́нием к Тебе́ взыва́ют:
Иису́се, пригвожде́йся на Кресте́, пригвозди́ и упраздни́ рукописа́ние грехо́в на́ших;
Иису́се, ру́це со Креста́ простира́яй ко всем, привлецы́ и мя, заблу́дшаго.
Иису́се, Две́ре овца́м, в ре́бра прободе́нный, введи́ мя я́звами Твои́ми в черто́г Твой;
Иису́се, пло́тию распя́тый, распни́ плоть мою́ со страстьми́ и похотьми́.
Иису́се, скончава́яйся в му́ках, даждь ми, да се́рдце мое не су́дит и́но что ве́дети, то́чию Тебе́ ра́спята;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 10

Спасти́ хотя́й мир, слепы́х, хромы́х, прокаже́нных, немы́х и глухи́х исцели́л еси́, духо́в лука́вых отгна́л еси́; неразу́мнии же иуде́е, зло́бою ды́шуще и за́вистию му́чими, пригвозди́ша Тя ко Кресту́, не ве́дуще пе́ти: Аллилу́иа.

Икос 10

Царю́ Преве́чный, Иису́се, весь стра́ждеши за мое́ невоздержа́ние, да всего́ мя чи́ста сотвори́ши, во всем обра́з нам подая́й, да после́дуем стопа́м Твои́м, зову́ще:
Иису́се, Любы́ неизсле́димая, распе́ншим Тя греха́ не поста́вивый;
Иису́се, с во́плем кре́пким и со слеза́ми в вертогра́де моля́йся, научи́ и нас моли́тися.
Иису́се, вся проро́чествия о Тебе́ испо́лнивый, испо́лни во благи́х жела́ния се́рдца на́шего;
Иису́се, дух Твой в ру́це Отцу́ преда́вый, в час исхо́да моего́ приими́ дух мой.
Иису́се, ри́зы Твоя́ раздели́ти не возбрани́вый, кро́тко ду́шу мою́ от те́ла отдели́;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 11

Пе́ние всеумиле́нное приноша́ше Тебе́ Всенепоро́чная Ма́терь Твоя́, глаго́лющи: «Аще и стра́ждеши на Кресте́, но вем Тя, из чре́ва пре́жде денни́цы от Отца́ рожде́нна, ви́жду бо, я́ко тварь вся состра́ждет Тебе́; предае́ши дух Твой Отцу́, и Мой дух приими́ и не оста́ви Мене́, зову́щую: Аллилу́иа».

Икос 11

Яко светоприе́мная свеща́, у Креста́ Твоего́ горя́ще любо́вию к Тебе́, и Ма́тернею Де́ва Пренепоро́чная обдержа́шеся боле́знию, заходя́щу Тебе́ во гроб и́стинному Со́лнцу Пра́вды, с Не́юже и се́рдца на́шего моли́твы приими́ сицевы́я:
Иису́се, вознесы́йся на дре́во, да нас, па́дших, совознесе́ши ко Отцу́ Своему́;
Иису́се, де́вственнику Присноде́ву в Ма́терь дарова́вый, да нас де́вству и чистоте́ научи́ши.
Иису́се, Тебе́, Бо́га Сло́ва ро́ждшей, ученика́ Богосло́ва вручи́вый, вручи́ и нас всех Ея́ Ма́тернему заступле́нию;
Иису́се, ми́ра и а́да Победи́телю, победи́ неве́рие, го́рдость жите́йскую и по́хоть оче́с, в нас живу́щия.
Иису́се, сме́рти держа́вы разруши́телю, ве́чныя сме́рти изба́ви мя;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 12

Благода́ть Твою́ пода́ждь мне, Иису́се, Бо́же мой, приими́ мя, я́коже прия́л еси́ Ио́сифа с Никоди́мом, да, я́ко чи́стую плащани́цу, ду́шу мою́ принесу́ Тебе́ и воня́ми доброде́телей пома́жу пречи́стое те́ло Твое́, и, я́ко во гро́бе, в сердце́ мое́м име́ю Тя, зовы́й: Аллилу́иа.

Икос 12

Пою́ще Твое́ во́льное распя́тие, покланя́емся страсте́м Твои́м, Христе́, ве́руем с со́тником, я́ко вои́стинну Бо́жий Сын еси́, приити́ име́яй на о́блацех с си́лою и сла́вою мно́гою; тогда́ у́бо не посрами́ нас, Кро́вию Твое́ю искупле́нных и та́ко вопию́щих:
Иису́се многострада́льный, ры́данием Де́вы Ма́тере Твоея́ ве́чнаго пла́ча исхити́ ны;
Иису́се, от всех оста́вленный, не остави́ мя еди́наго в час сме́рти моея́.
Иису́се, с Магдали́ною нога́м Твои́м каса́ющася, приими́ мя;
Иису́се, с преда́телем и распе́ншими Тя не осуди́ мене́.
Иису́се, с разбо́йником благоразу́мным в рай введи́ мя;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.



Кондак 13

О Иису́се Христе́, Агнче Бо́жий, взе́мляй грехи́ ми́ра, приими́ ма́лое сие́ от всея́ души́ на́шея приноси́мое Тебе́ благодаре́ние и исцели́ ны спаси́тельными Твои́ми страда́ньми от вся́кия боле́зни душе́вныя и теле́сныя, огради́ ны Кресто́м Твои́м от враг ви́димых и неви́димых и при кончи́не живота́ на́шего не оста́ви нас, да сме́ртию Твое́ю изба́вльшеся ве́чныя сме́рти, вы́ну зове́м Тебе́: Аллилу́иа.

(Этот кондак читается трижды, затем икос 1 и кондак 1)

Икос 1


Ангелов ликостоя́ния восполня́я, не от Ангел восприя́л еси́, но мене́ ра́ди, Бог сый, челове́к быв, челове́ка, грех ра́ди уме́рша, животворя́щим Те́лом и Кро́вию Твое́ю оживи́л еси́, те́мже, толи́цей любви́ Твое́й благода́рни су́ще, вопие́м Ти:
Иису́се Бо́же, Любы́ Предве́чная, та́ко о нас земноро́дных возблаговоли́вый;
Иису́се, ми́лосте безме́рная, к челове́ком па́дшим до́лу низше́дый.
Иису́се, в плоть на́шу оболки́йся и сме́ртию Свое́ю сме́рти держ́аву разруши́вый;
Иису́се, Боже́ственными Твои́ми Та́инами нас обожи́вый.
Иису́се, страда́ньми и Кресто́м Твои́м весь мир искупи́вый;
Иису́се, Сы́не Бо́жий, помяни́ нас, егда́ прии́деши во Ца́рствии Твое́м.


Кондак 1

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́ на Кресте́ ви́сяща, вся тварь измени́ся, не́бо ужасе́ся, основа́ния земли́ восколеба́шася. Мы же, недосто́йнии, благода́рственное поклоне́ние Твоему́ нас ра́ди страда́нию принося́ще, с разбо́йником вопие́м Ти: Иису́се, Сы́не
Божий, помяни́ нас, егда́ прии́деши во Ца́рствии Твое́м.


Молитва ко Господу Иисусу распятому
На Кресте пригвожденный за ны, Иисусе Христе, Единородный Бога Отца Сыне, милости, любве и щедрот неизчерпаемая бездно! Вем, яко грехов ради моих, от неизреченнаго человеколюбия, Кровь Твою пролияти на Кресте изволил еси, юже аз, окаянный и неблагодарный, доселе скверными моими делы попирах и нивочтоже вменях. Тем убо из глубины беззакония и нечистоты моея умныма очима на Распятаго Тя на Кресте Искупителя моего воззрев, со смирением и верою во глубину язв, Твоего милосердия исполненных, себе повергаю, грехов прощения и сквернаго жития моего исправления прося. Милостив буди мне, Владыко и Судие мой, не отрини мя от лица Твоего, но всесильною Твоею рукою Сам мя к Тебе обрати и на путь истиннаго покаяния настави, да отныне положу спасения моего начало. Божественными страданьми Твоими укроти моя плотския страсти; излиянною Твоею Кровию очисти моя душевныя скверны; распятием Твоим распни мя миру с соблазнами его и похотьми; Крестом Твоим огради мя от невидимых враг, ловящих душу мою. Прободенными ногами Твоими от всякаго пути лукаваго возбрани ногам моим; прободенными руками Твоими руце мои от всякаго неугоднаго Тебе дела воздержи. Пригвожденный плотию, пригвозди страху Твоему плоть мою, да уклонився от зла, творю благо пред Тобою. Преклонивый главу Твою на Кресте, к земли смирения приклони вознесенную мою гордыню; венцем Твоим терновым огради моя ушеса, во еже не слышати неполезнаго; желчь устами вкусивый, положи хранение нечистым устом моим; отверстое копием имеяй сердце, сердце чисто во мне созижди; всеми Твоими язвами, всего мя сладце в любовь Твою уязви, да Тебе, Господа моего, возлюблю всею душею, всем сердцем, всею крепостию и всем помышлением. Даждь ми Себе странна и неимуща, где главы подклонити; даждь ми Себе Всеблагаго, избавляющаго душу мою от смерти; даждь мне Себе Всесладкаго, услаждающаго мя в скорбех и напастех Своею любовию, да Егоже первее ненавидех, прогневлях, от себе изгонях и ко Кресту пригвождах, сего ныне возлюблю, радуяся прииму и сладце Крест Его до конца жизни моей понесу. Не даждь отселе, о всеблагий Искупителю мой, ни единой моей воле совершатися, понеже зла есть и непотребна, да не паки впаду в тяжкую работу царствовавшаго во мне греха; но Твоя воля благая, спасти мя хотящая, да совершается во мне всегда, ейже мя вручая, Тебе, Распятаго Господа моего, умным очесем моего сердца представляю и молю из глубины души, да и в разлучении моем от бреннаго моего тела, Тебе Единаго на Кресте Твоем узрю, в руце мя защищения Своего приемлюща, и от воздушных духов злобы храняща, вселяюща же со грешники, покаянием Тебе благоугодившими. Аминь.




Молитва иная ко Господу Иисусу распяту
Го́споди Иису́се Христе́, Сы́не Бо́га жива́го, Тво́рче не́ба и земли́, Спаси́телю ми́ра, се аз, недосто́йный и па́че всех грешне́йший, смире́нно коле́на се́рдца моего́ пред сла́вою вели́чества Твоего́ преклони́в, воспева́ю крест и страда́ния Твоя́, и благодаре́ние Тебе́, Царю́ всех и Бо́гу, приношу́, я́ко благоизво́лил еси́ вся труды́ и вся́кия беды́, напа́сти и муче́ния, я́ко челове́к, понести́, да всем нам во вся́ких печа́лях, ну́ждах и озлобле́ниих состра́ждущий Помо́щник и Спаси́тель бу́деши. Вем, всеси́льне Влады́ко, я́ко вся сия́ Тебе́ у́бо не бы́ша потре́бна, но челове́ческаго ра́ди спасе́ния, да всех нас иску́пиши от лю́тыя рабо́ты вра́жия, Крест и страда́ния претерпе́л еси. Что у́бо возда́м Тебе́, человеколю́бче, о всех, я́же пострада́л еси́ мене́ ра́ди гре́шнаго; не вем, душа́ бо и те́ло, и вся блага́я от Тебе́ суть, и вся моя́ Твоя́ суть, и аз Твой есмь. То́чию на безчи́сленное Твое́, благоутро́бне Го́споди, милосе́рдие наде́яся, пою́ Твое́ неизрече́нное долготерпе́ние, велича́ю неисповеди́мое истоща́ние, сла́влю Твою́ безме́рную ми́лость, покланя́юся пречи́стым Страсте́м Твои́м и, вселюбе́зно лобыза́я я́звы Твоя́, вопию́: поми́луй мя гре́шнаго, и сотвори́, да не безпло́ден бу́дет во мне Крест Твой святы́й, да причаща́яся зде с ве́рою страда́ниям Твои́м, сподо́блюся ви́дети и сла́ву Ца́рствия Твоего́ на небеси́! Ами́нь.

Канон Божественным
Страстям Христовым

Песнь 1
Ирмос: Волно́ю морско́ю Скры́вшего дре́вле гони­́теля мучи́теля, под земле́ю скры́ша спасе́нных о́троцы: но мы я́ко отрокови́цы Го́сподеви пои́м, сла́вно бо просла́вися.

Припев: Сла́ва Страсте́м Твои́м, Го́споди.

Приклони́л еси́ коле́не моля́ся, Ему́же покланя́ется вся́кое коле́но небе́сных, зем­ны́х и преиспо́дних. Приклони́ся к моле́нию моему́ и услы́ши мя, я́коже Оте́ц моля́щася Тя услы́ша.

Сла́ва Страсте́м Твои́м, Го́споди.

О́тче, в моле́нии глаго́лал еси́, да Тебе́ и́стиннаго Сы́на пока́жеши, на ра́ны гото́в есмь, а́ще и еди́наго зла не сотвори́х: мене́, Иису́се мой, мно́га зла сотво́риша, мно́гих изба́ви муче́ний.

Слава: В по́те лица́ твоего́ хлеб твой сне́­си, рекл еси́ па́дшему челове́ку: те́мже, я́ко вторы́й Ада́м, егда́ моли́лся еси́, пот Кро́ве излива́шеся из Пречи́стаго Те́ла Твоего́: бра́шно бо Твое́ во́лю О́тчу твори́ти. Ни еди́ну у́бо за́­поведь Твою́ сотво́ршаго, Иису́се Христе́, по­́том Кро́ве Твоея́ ка́плющим омы́й мя.

И ныне: Не ктому́ земля́ проклята́ есть, Кро́вию бо Сы́на Твоего́ благословля́ется: земле́ благослове́нная, Пречи́стая Де́во, воздвигни мя, прах и пе́пел, на славосло́вие Христа́, Бо́га на́шего.

Песнь 3
Ирмос: Тебе́ на вода́х пове́сившаго всю зе́млю неодержи́мо, тварь ви́девши на ло́бнем ви́сима, у́жасом мно́гим содрога́шеся, несть свят, ра́зве Тебе́, Го́споди, взыва́ющи.

Сла́ва Страсте́м Твои́м, Го́споди.

Отягче́ни бы́ша сном Апо́столи, егда́ отше́л еси́ от о́чию их на моли́тву в вертогра́де Гефсима́нстем: лени́ваго мя и уны́лаго на Твое́ поклоне́ние воздви́гни.

Сла́ва Страсте́м Твои́м, Го́споди.

Я́ко и́стинный Па́стырь, ви́дев во́лка Иу́­ду гряду́ща, Аз есмь, дру́же, глаго́лал еси́ уче­нику́ лука́вому, к покая́нию наставля́я па́дшаго. Мене́, всегда́ согреша́юща и николи́же в чу́вство приходя́щаго, напра́ви, Го́споди мой, на путь пра́вый, и от че́люстей мы́сленнаго во́лка си́лою Твое́ю изба́ви.

Слава: Се ору́жием и дреко́льми я́ко на разбо́йника прихо́дят, Его́же я́ко же́ртву нескве́рну в це́ркви иска́ти подоба́ше: о мои́х гресе́х же́ртву приноси́мую Тебе́, Го́споди, не пре́зри.

И ныне: Косну́вся у́ха усече́ннаго, изцели́ раба́ архиере́ова Сын Твой, Врач душ и теле́с: вся моя́ душе́вныя и теле́сныя, Де́во, изцели́ боле́зни, Цели́теля ро́ждшая.

Седален, глас 6-й
Не отвеща́л еси́ ничто́же власть на Тебе́ мне́вшему име́ти, го́рдым противля́яйся: но мно́гою лже́ю безсту́дных утружде́н, молчи́ши, да мя многоглаго́лания изба́виши и вся терпе́ти научи́ши.

Слава, и ныне, Богородичен: Премени́ скорбь мою́ на ра́дость, Де́во Богоро́дице, Я́же мно́ги ско́рби претерпе́ла еси́, зря́щи многостра́ждуща Сы­́на Твоего́, мене́ ра́ди осужде́ннаго.

Песнь 4
Ирмос: На кресте́ Твое́ Боже́ственное истоще́ние прови́дя Авваку́м, ужа́сся вопия́ше: Ты си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Сла́ва Страсте́м Твои́м, Го́споди.

Не отвеща́л еси́ словесе́ безсту́дному И́родови, сы́нови поги́бели, усе́кнувшему уже́ Иоа́нна Предте́чу, и глас Твой: до́браго отве́та при кончи́не мое́й сподо́би мя, Христе́.

Сла́ва Страсте́м Твои́м, Го́споди.

Зна́мения иска́ше И́род чуде́снаго, не разу́мея ве́лия чу́да, я́ко Бог тва́ри предстои́т: зна́менай мя све́том лица́ Твоего́, Христе́ мой, и даждь весе́лие се́рдцу моему́ боле́з­ненному.

Слава: Закрыва́ху лице́ Твое́ бию́ще, На́ньже Херуви́ми зре́ти не мо́гут, крила́ми закрыва́ющеся: покры́й мя Твои́м заступле́­нием.

И ныне: Измени́ся лице́ Твое́, Де́во, егда́ узре́ла еси́ Сы́на Твоего́ я́ко злоде́я ведо́ма от иуде́ев. Мно́гое вои́стинну долготерпе́ние Твое́, Сы́не и Бо́же Мой, – со воздыха́нием ре́кла еси́.

Песнь 5
Ирмос: К Тебе́ у́тренюю, милосе́рдия ра́ди Себе́ ис­тощи́вшему непрело́жно и до страсте́й безстра́стно прекло́ншемуся, Сло́ве Бо́жий: мир пода́ждь ми, па́дшему, Человеколю́бче.

Сла́ва Страсте́м Твои́м, Го́споди.

Земля́, подно́жие ног Твои́х, израсти́ на главу́ Твою́ те́рние, Иису́се мой. Изыди́те, дще́ри Иерусали́мския, и зри́те Царя́ сла́вы в венце́ терно́вом, и́мже венча́ Его́ неблагода́рный род евре́йский.

Сла́ва Страсте́м Твои́м, Го́споди.

Лжи́ви сы́нове челове́честии в ме́рилех: Тебе́, всем вся су́щаго, три́десятию сре́брени­ков оцени́ша, и село́ кро́ве купи́ша, Кровь Твою́ излия́вше, Е́юже испери́ ри́зы моя́, я́же по креще́нии и обеща́нии покая́ния оскверни́х.

Слава: Повину́тися подоба́ше Бо́гу, а не иуде́ом, судие́ безу́мный, и не осужда́ти на смерть Влады́ку и Судию́ вся́ческих. Мене́, повину́вшася скве́рным страсте́м, к покая́нию наста́ви, Го́споди, да не в смерть осуж­де́н бу́ду.

И ныне: Заклина́ете Бо́гом Живы́м Бо́га Жива́го, пребезу́мнии: но не́бо и земля́ отвеща́ют, я́ко Бог есть, сия́ пострада́вый, и Сын мой, – Де́ва ма́терски веща́ше.

Песнь 6
Ирмос: Ят бысть, но не удержа́н в пе́рсех ки́товых Ио́на: Твой бо о́браз нося́, страда́вшаго и погребе́нию да́вшагося, я́ко от черто́га, от зве́ря изы́де, приглаша́ше же кустоди́и, храня́щии су́етная и ло́жная. Ми́лость сию́ оста́вили есте́.

Сла́ва Страсте́м Твои́м, Го́споди.

Изше́л еси́, Иису́се, нося́ крест Твой. Да я́коже А́вель от Ка́ина, от иуде́ев постра́ждеши, изы́ди и ны́не и взыщи́ мене́ заблу́ждшаго.

Сла́ва Страсте́м Твои́м, Го́споди.

Гряде́ши я́коже Исаа́к и́стинный, на ра́мо Твое́ крест восприе́м. Да на нем же́ртву от мои́х гресе́х принесе́ши Отцу́, в воню́ благо­уха́ния.

Слава: Ви́де Иа́ков ле́ствицу утвержде́ну до Небе́с: се есть Крест Твой, и́мже возведи́ ум мой от ни́жних к го́рним оби́телем.

И ныне: Не пла́читеся Мене́, непови́нна, дще́ри Иерусали́мския, не пла́чи Мене́, Мари́е, Ма́ти Моя́: вско́ре бо возра́дуешися, егда́ воста́ну и просла́влюся.

Песнь 7
Ирмос: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе мертв, бездыха́­нен полага́ется, во спасе́ние нас, пою́щих: Изба́вителю Бо́же, благослове́н еси́.

Сла́ва Страсте́м Твои́м, Го́споди.

И́стинный Ты еси́ Дави́д, восприя́в бо крест, я́ко псалти́рь красе́н, на го́ру Голго́фскую возше́л еси́, да гне́ва Бо́га Отца́ нас свободи́ши пою́щих: благослове́н еси́, А́гнче Бо­́жий, во ве́ки, сотвори́вый ве́чное ми́рови из­бавле́ние.

Сла́ва Страсте́м Твои́м, Го́споди.

Я́ко до́брый до́му Отца́ Твоего́ строи́тель, Христе́ Бо́же, све́щник Крест Твой всем, на нем Сам я́ко свети́ло возсия́л еси́ ми́рови, да пое́м Тебе́: благослове́н еси́, А́гнче Бо́жий, во ве́ки, сотвори́вый ве́чное ми́ру избавле́ние.

Слава: Я́ко кади́ло в воню́ благоуха́ния, от растерза́ния Пло́ти Твоея́, Кровь Бо́гу От­цу́ прине́сл еси́, да приведе́ши мене́ к Нему́ пою́ща: благослове́н еси́, А́гнче Бо́жий, во ве́­ки, сотвори́вый ми́рови ве́чное избавле́ние.

И ныне: Егда́ узре́ла еси́ на Кресте́ Христа́, Сы́на Твоего́, Его́же безсе́менно родила́ еси́, Чи́стая, удиви́лася еси́ неизрече́нному Его́ долготерпе́нию: те́мже Тя с Ним прославля́ем.

Песнь 8
Ирмос: Ужасни́ся боя́ся, не́бо, и да подви́жатся ос­нова́ния земли́: се бо, в мертвеце́х вменя́ется в вы́шних Живы́й и во гроб мал странноприе́млется: Его́же, о́троцы, благослови́те, свяще́нницы, воспо́йте, лю́дие, пре­возноси́те во вся ве́ки.

Сла́ва Страсте́м Твои́м, Го́споди.

Се есть Сын Твой возлю́бленный, Бо́же О́тче, Его́же креща́ема от Иоа́нна и преобразу́ющася на Фаво́ре, послу́шайте, рекл еси́: послу́шай ны́не Его́ жа́ждуща моего́ спасе́ния, Ему́же, мене́ ра́ди уме́ршему, пою́: иску́пленнии кро́вию Его́ вси язы́цы и вся племена́, Го́спода по́йте и превозноси́те Его́ во ве́ки.

Сла́ва Страсте́м Твои́м, Го́споди.

Се есть Сын Твой, Бо́же О́тче, Его́же по́­слана уничижи́ша, я́ко зе́млю жела́нную, не я́ша ве́ры словесе́м Его́, досажде́нием и му­́кою испыта́ша, аз же зову́: ро́ди родо́в, иску́пленнии Кро́вию Его́, Го́спода по́йте и пре­возноси́те Его́ во ве́ки.

Слава: Се есть Сын Твой, Бо́же О́тче, рожде́нный не име́ ме́ста во оби́тели, живу́щь на земли́, друг мытаре́м и гре́шником, и ху́льник нарече́ся, на смерть поно́сную осуди́ся, да мене́, грехо́вною тягото́ю обремене́нна, в небе́сных селе́ниих упоко́ит, пою́ща: вся вну́тренняя моя́, Го́спода по́йте и превозноси́те Его во ве́ки.

И ныне: Се есть Соломо́н на Свое́м Пре­сто́ле, се Архиере́й на Свое́м олтари́, се есть Вождь, дая́й ору́жие непобеди́мое, се есть Сын Твой, Де́во, и Сын Бо́жий. Его́же Отец мене́ ра́ди не пощаде́, но на смерть предаде́, да Ему покланя́яся пою́: вси от ве́ка пра́веднии и гре́шнии, иску́пленнии Кро́вию Его, Го́спода по́йте и превозноси́те Его́ во веки.

Песнь 9
Ирмос: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся и вознесу́ со сла́вою непреста́нно, я́ко Бог, ве́рою и любо́вию Тя велича́ющия.

Сла́ва Страсте́м Твои́м, Го́споди.

Вем, кто вино́вен стра́сти Твоея́ на Гол­го́фе: аз, Го́споди, аз невоздержа́нием распя́х Тя, но не поста́ви мне греха́ сего́ ка́ющемуся.

Сла́ва Страсте́м Твои́м, Го́споди.

Не ктому́ Херуви́м храни́т врат Еде́мских, се бо, на дре́ве Живо́т мой Ты пове́шен еси́, Христе́. О, любве́ Твоея́ неизглаго́ланныя! Научи́ мя досто́йно благодари́ти Тя.

Слава: И́маши надписа́ние, Христе́ мой: Иису́с Назаряни́н, Царь Иуде́йский. Свиде́тельство сие́ есть ко Отцу́, я́ко до́бре во́лю Его́ сотвори́л еси́: в кни́ги живо́тныя напиши́ мя, молю́ Ти ся.

И ныне: Не оста́ви Мене́ еди́ну, печа́ли испо́лнену, но вско́ре уте́ши Мя, утеше́ние Мое́, – Де́ва рече́. Аз же что возда́м Тебе́, Иису́се мой? Вни́ди в се́рдце мое́, да не ктому́ аз, но Ты во мне живе́ши, и аз в Тебе́.

Светилен
Черто́г Твой ви́жду, Спа́се мой, укра́шен­ный, и оде́жды не и́мам, да вни́ду в онь: про­свети́ одея́ние души́ моея́, Светода́вче, и спа­си́ мя.

Слава: Разбо́йника благоразу́мнаго во еди́нем часе́ ра́еви сподо́бил еси́, Го́споди: и мене́ дре́вом кре́стным просвети́ и спаси́ мя.

И ныне: Черто́же одушевле́нный, Де́во, несмь досто́ин черто́га небе́снаго, грехо́вныя ра́ди вины́, но молю́ Тя приле́жно, ра́ди обнаже́ннаго на кресте́ сладча́йшаго Твоего́ Сы́на и блага́го моего́ Го́спода, покры́й студ лица́ моего́ и спаси́ мя.

Молитва
На Кресте́ пригвожде́нный за ны, Иису́се Христе́, Единоро́дный Бо́га Отца́ Сы́не, ми­́лости, любве́ и щедро́т неизчерпа́емая бе́здно! Вем, я́ко грехо́в ра́ди мои́х, от неизрече́ннаго человеколю́бия, Кровь Твою́ пролия́ти на Кресте́ изво́лил еси́, ю́же аз, окая́нный и неблагода́рный, досе́ле скве́рными мои́ми де́лы попира́х и ни во что́же вменя́х. Тем у́бо из глубины́ беззако́ния и нечистоты́ моея́ у́мны­ми очи́ма на Распя́таго Тя на Кресте́ Искупи­́теля моего́ воззре́в, со смире́нием и ве́рою во глубину́ язв, Твоего́ милосе́рдия испо́лнен­ных, себе́ поверга́ю, грехо́в проще́ния и скве́рнаго жития́ моего́ исправле́ния прося́. Ми́лостив бу́ди мне, Влады́ко и Судие́ мой. Не отри́ни мя от лица́ Твоего́, но всеси́льною Твое́ю руко́ю Сам мя к Тебе́ обрати́ и на путь и́стиннаго покая́ния наста́ви, да отны́не по­ложу́ спасе́ния моего́ нача́ло.

Боже́ственными страда́ньми Твои́ми укроти́ моя́ плотски́я стра́сти; излия́нною Тво­е́ю Кро́вию очи́сти моя́ душе́вныя скве́рны; распя́тием Твои́м распни́ мя ми́ру с собла́зна­ми его́ и похотьми́; Кресто́м Твои́м огради́ мя от неви́димых враг, ловя́щих ду́шу мою́. Прободе́нныма нога́ма Твои́ма от вся́каго пути́ лука́ваго возбрани́ нога́м мои́м; прободе́нныма рука́ма Твои́ма ру́це мои́ от вся́каго неуго́днаго Тебе́ де́ла воздержи́. Пригвожде́н­ный пло́тию, пригвозди́ стра́ху Твоему́ плоть мою́, да уклони́вся от зла, творю́ бла́го пред Тобо́ю. Преклони́вый главу́ Твою́ на Кресте́, к земли́ смире́ния приклони́ вознесе́нную мою́ горды́ню; венце́м Твои́м терно́вым огра­ди́ моя́ ушеса́, во е́же не слы́шати кроме́ поле́знаго; желчь уста́ми вкуси́вый, положи́ хране́ние нечи́стым усто́м мои́м; отве́рстое копие́м име́яй се́рдце, се́рдце чи́сто во мне сози́жди; все́ми Твои́ми я́звами всего́ мя сла́дце в любо́вь Твою́ уязви́, да Тебе́, Го́спо­да моего́, возлюблю́ все́ю душе́ю, всем се́рд­цем, все́ю кре́постию и всем помышле́нием.

Даждь ми Себе стра́нна и неиму́ща, где главы́ подклони́ти; даждь ми Себе́ Всеблага́го, избавля́ющаго ду́шу мою́ от сме́рти; даждь ми Себе́ Всесла́дкаго, услажда́ющаго мя в ско́рбех и напа́стех Свое́ю любо́вию, да Его́же пе́рвее ненави́дех, прогневля́х, от себя́ изгоня́х и ко Кресту́ пригвожда́х, сего́ ны́не воз­люблю́, ра́дуяся прииму́ и сла́дце Крест Его́ до конца́ жи́зни мое́й понесу́. Не даждь отсе́­ле, о Всеблаги́й Искупи́телю мой, ни еди́ной мое́й во́ле соверша́тися, поне́же зла есть и не­потре́бна, да не па́ки впаду́ в тя́жкую рабо́ту ца́рствовавшаго во мне греха́; но Твоя́ во́ля блага́я, спасти́ мя хотя́щая, да соверша́ется во мне всегда́, е́йже мя вруча́я, Тебе́, Распя́таго Го́спода моего́, у́мным очесе́м моего́ се́рдца представля́ю и молю́ из глубины́ души́, да и в разлуче́нии мое́м от бре́ннаго моего́ те́ла, Те­бе́ Еди́наго на Кресте́ Твое́м узрю́, в ру́це мя защище́ния Своего́ прие́млюща, и от возду́ш­ных духо́в зло́бы храня́ща, вселя́юща же со гре́шники, покая́нием Тебе́ благоугоди́вшими. Ами́нь.