Акафист святым женам-мироносицам

Кондак 1

Брани угаси и мир Твой умири, Человеколюбче Слове, святых мироносиц Твоих мольбами, да яко миро драгое песнь им ныне принесем: Радуйтеся, мироносицы честнии, Воскресения миропроповедницы славнии.

Икос 1

Ангел, во тьме нощней на камени светящеся, мироносиц чает грядущих, не терпяще им возвестити сия: Радуйтеся, яко Господь Сил воскресе; радуйтеся, яко Царь Славы восста. Радуйтеся, яко ветхая скорбь упразднися; радуйтеся, яко новая радость воссия. Радуйтеся, и печали отрите слезы; радуйтеся, и шедше, возвеселите апостолов. Радуйтеся, мироносицы честнии, Воскресения миропроповедницы славнии.

Кондак 2

Утру приближающуся и тьме оскудевающей мироносицы рыдаху, но на Бога уповающе, песнь победную со плачем растворяху: Аллилуиа.

Икос 2

Мироносицы Погребеннаго миропомазати тщатся, наша же погребенная души жен блаженных помазуют мирословесными похвалы: Радуйтеся, в ризы спасения облеченнии; радуйтеся, бисером добродетелей испещреннии. Радуйтеся, венцы смирения носящии; радуйтеся, красотою незлобия красящиися. Радуйтеся, благодеяний наших умащение; радуйтеся, грехопадениям нашим запинание. Радуйтеся, мироносицы честнии, Воскресения миропроповедницы славнии.

Кондак 3

Камень гробный небовестника держит, Воскресение извествующа, мы же на камени веры укрепльшеся, земными усты вопием: Аллилуиа.

Икос 3

Тецыте ко апостолом, о жены, тецыте и не закосните, глаголет светообразный, торжество сим проповедите и услышите сия: Радуйтеся, возлюбленнии Божии ученицы; радуйтеся, трудов Господних соработницы. Радуйтеся, о Господе воскресшем веселящиися; радуйтеся, о Христе восставшем торжествующии. Радуйтеся, истину неложно уверяющии; радуйтеся, правду благонадежно держащии. Радуйтеся, мироносицы честнии, Воскресения миропроповедницы славнии.

Кондак 4

Магдалино, покаяния дщи, научи нас Вертоградаря Небеснаго, Христа, зрети духовными очесы и в покаянии взывати: Аллилуиа.

Икос 4

Приидите, жены боголепныя, потщитеся гроб тощь видети, яко да Небеснаго Жениха обрящете воскресша и услышите песнословия сия: Радуйтеся, Христа со елеем сретающии; радуйтеся, со свещами на пир входящии. Радуйтеся, уныние от нас отлагающии; радуйтеся, вне чертога нас не оставляющии. Радуйтеся, бесовских страхований отгонительницы; радуйтеся, ангельския радости насадительницы. Радуйтеся, мироносицы честнии, Воскресения миропроповедницы славнии.

Кондак 5

Саломие, сынов громовых мати, красны песни воспой и громопобедное Воскресение возвеличи: Аллилуиа.

Икос 5

Бог Сый мира, Отец щедрот Воскресение Свое являет благодерзновенным женам и ублажает щедрыми словесы: Радуйтеся, глаголы вечныя разумевшии; радуйтеся, в заповедях святых любомудрствовавшии. Радуйтеся, смирения образ показующии; радуйтеся, кротости силу являющии. Радуйтеся, должником оставляти учащии; радуйтеся, о прощении грешных молящии. Радуйтеся, мироносицы честнии, Воскресения миропроповедницы славнии.

Кондак 6

Марие боговнимательная, боговещанному глаголу внемли, яко Господь славы восста и отвещавай в веселии: Аллилуиа.

Икос 6

О апостоли Христовы, проповедницы Слова, проповеданию веруйте женское носящих естество и мироносицам рцыте: Радуйтеся, Христа дерзновенно исповедающии; радуйтеся, Евангелие неустанно проповедающии. Радуйтеся, бесстрашнии Божии воительницы; радуйтеся, темных сил сокрушительницы. Радуйтеся наставницы смиренномудрия; радуйтеся, преподательницы благотерпения. Радуйтеся, мироносицы честнии, Воскресения миропроповедницы славнии.

Кондак 7

Марфо трудолюбивая, зри Восток богозарнаго Солнца и виждь, яко вся тварь обновляется и блистаяся поет: Аллилуиа.

Икос 7

Богопроповедников апостолов ублажим, Владычне Царство пришедшее благовестивших, и жен премудрых возвеличим купно: Радуйтеся, крепость на вас уповающих; радуйтеся, помощь к вам прибегающим. Радуйтеся, приступающих к вам надеяние; радуйтеся, припадающих к вам терпение. Радуйтеся, молящихся вам заступление; радуйтеся, взывающих к вам вспоможение. Радуйтеся, мироносицы честнии, Воскресения миропроповедницы славнии.

Кондак 8

Смерти Разрушившему силу, нощей и дней Содетелю хвалу принеси, Иоанно усердная, и утреннюю песнь воспой: Аллилуиа.

Икос 8

Мира и милости жертву приемлет Благоуветливый Владыка Христос от Своих рабов, совершающих мироносиц память и восклицающих: Радуйтеся, усердных и верных прославляющии; радуйтеся, лукавнующих рабов стужающии. Радуйтеся, оскудений наших восполнение; радуйтеся, немощей наших врачевание. Радуйтеся, огня яростливых смирительницы; радуйтеся, пламени гневливых угасительницы. Радуйтеся, мироносицы честнии, Воскресения миропроповедницы славнии.

Кондак 9

Марие христолюбивая и Сусанно ревностная, небоязненно тьму нощную одолевайте, ко гробу идуще, и смертную Одолевшему нощь воспойте: Аллилуиа.

Икос 9

Небо, веселися, земле, ликуй с мироносицами вкупе. Всезиждитель воскресе, Его же непрестанно хваляще, равноапостольным женам слагаем песнь: Радуйтеся, на одре лежащих восставляющии; радуйтеся, здравых верою укрепляющии. Радуйтеся, младенцев надежная защита; радуйтеся, отроков учащихся умудрение. Радуйтеся, мужей благочестивых доблесть; радуйтеся, жен непорочных чистота. Радуйтеся, мироносицы честнии, Воскресения миропроповедницы славнии.

Кондак 10

Звезды тьму расточают, месяц путь указует женам, да Солнцу воздвизающуся поклонятся и Богу Живому воспоют: Аллилуиа.

Икос 10

Пасху празднующе вечную, мирен дух сподобимся стяжати и мироносиц день немятежными почтим словесы: Радуйтеся, смиренных теплыя печальницы; радуйтеся, кротких верныя подружницы. Радуйтеся, умиление к покаянию дающии; радуйтеся, ко исправлению сердца́ сокрушающии. Радуйтеся, бесстрастия питием напояющии; радуйтеся, добродетелей сладостию питающии. Радуйтеся, мироносицы честнии, Воскресения миропроповедницы славнии.

Кондак 11

Царю мира и Спасу нашему вместо мира тленнаго славу воздают сестры мироносицы и Дивному во святых святую песнь: Аллилуиа.

Икос 11

Царь славы елеем милости помазует душ наших главы, веселится с нами жен святых собор и внемлет нашему словеси: Радуйтеся, смирение в сердца изливающии; радуйтеся, покаяния двери отверзающии. Радуйтеся, от клевет человеческих избавляющии; радуйтеся, лукавыя словеса обличающии. Радуйтеся, святою верою снабдевающии; радуйтеся, крепкою надеждою восперяющии. Радуйтеся, мироносицы честнии, Воскресения миропроповедницы славнии.

Кондак 12

Во образ мироносиц плач на радость преложи вселенная, воскреснут бо мертвии и восстанут иже во гробех и земнороднии воскликнут: Аллилуиа.

Икос 12

Приснодева и Богородица Всепресветлая предводительствует женам, яже змиев лютых попирают главы и от козней ограждают взывающих: Радуйтеся, во стране живых всельшиися; радуйтеся, о упокоении усопших ходатайствующии. Радуйтеся, в тесноте ослабу подающии; радуйтеся, в тяготах облегчение несущии. Радуйтеся, погибель от душ отводящии; радуйтеся, ко спасению вечному влекущии. Радуйтеся, мироносицы честнии, Воскресения миропроповедницы славнии.

Кондак 13

О жены всепетыя! Христа, Милостиваго Судию умолите о нас, хвалу смиренную принесших вам ныне и в кротости сердец воспевших: Аллилуиа (3).

Тропарь, глас 2

Мироносицам женам при гробе представ, ангел вопияше: мира мертвым суть прилична/ Христос же истления явися чуждь./ Но возопийте: воскресе Господь,/ подаяй мирови велию милость.

Кондак, глас 2

Радоватися мироносицам повелел еси,/ плач праматере Евы утолил еси/ воскресением Твоим, Христе Боже,/ апостолом же Твоим проповедати повелел еси:/ Спас воскресе от гроба.

Молитва

О жены благословении, мироносицы святии, мир Христов с любовию светлоносящии в сердцах ваших! Почитаем бесстрашную верность вашу, еюже, херувимов образующе, у Креста, яко окрест престола Господня небоязненно стояху, якоже повествует божественный Иоанн! Ублажаем и яже по Бозе ревность вашу, еюже движими, ко гробу идяху сущей тьме, помазати миры тщащеся погребеннаго Владыку! Прославляем чистую веру вашу, еяже ради воскресший Спас прежде инех вам предста и радости исполни сердца ваша! Почитаем и апостольское дерзновение ваше, имже страх иудейский поправше, Христа воскресшаго исповедаху пред народы, владыки и цари. Се, прибегаем к вам ныне мы телесы немощными, душами же и сердцы горящими. Умолите, мироносицы, со Приснодевою Богородицею Мариею всещедраго Жизнеподателя Сына Ея, да не попустит во тьму бездонную греха впасти нам. Душевныя и телесныя болезни наша всемощною рукою Своею да исцелит и крепость силы Своея нам низпослет. Заблудшим да путеводствует, скорбящих утешит, гладных напитает, плачущим да отрет слезу. Неразумливых умудрит, горделивых смирит, колеблемых в вере утвердит. Постящихся укрепит, молящимся да внемлет и всем вся, яже во благих намерения благословит и начинаниям содействует благодатию Своею. Мы же стезею спасения невозбранно текуще, якоже некогда и вы, усрящем Его, Истиннаго Бога и Светоносца. И в уготованный Им Чертог Небесныя Славы да внидем предстательствы вашими, веселяся о Отце, ликовствуя о Сыне, торжествуя о Дусе Святе. Аминь.

Тропарь, глас 1-й
Христу, нас ради от Девы рождшемуся, честная Магдалина Мария последовала еси, Того оправдания и законы хранящи; темже днесь всесвятую твою память празднующе, грехов разрешение молитвами твоими приемлем. (Дважды.)
Слава, и ныне, Богородичен: Гавриилу вещавшу Тебе, Дево, радуйся, со гласом воплощашеся всех Владыка, в Тебе, святем кивоте, якоже рече праведный Давид: явилася еси ширшая небес, поносивши Зиждителя Твоего. Слава Всельшемуся в Тя, слава Прошедшему из Тебе, слава Свободившему нас рождеством Твоим.

Канон, глас 8-й

Песнь 1

Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Припев: Святая равноапостольная Марие Магдалино, моли Бога о нас.
Божественными украшена добротами, и светолитии сияющи божественными, очерневшее мое сердце твоими молитвами, Марие, озари.
Святая равноапостольная Марие Магдалино, моли Бога о нас.
Освяти тя Слово Отчее, от духов злобы избавив яве, Емуже ученица бывши, дарований Святаго Духа исполнилася еси.
Слава: Вод исполнишися животворных от источника независтнаго, за милосердие на земли явльшагося Владыки, греха мутныя изсушила еси токи.
И ныне: Матерь естеством Содетеля поем тя, отроковице, примирившую Богу отпадшее естество человеческое, Богородительнице всенепорочная Владычице.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Святая равноапостольная Марие Магдалино, моли Бога о нас.
Возлюбивши первее благих Виновника, наше благосердно естество обожившаго, последовала еси Ему усердно, Марие, Того повинувшися божественным велением. (Дважды.)
Слава: Рыдающи, гроба избавителева достигла еси, первее видевши божественное, отроковице, Воскресение. Темже благовестница явилася еси вопиющи: Христос воста, руками восплещите.
И ныне: Спасает мя Слово воплощшееся, Пречистая, от Твоих пречистых кровей, Богатством благости, разрешая осуждение перваго падения. Егоже непрестанно моли, спасти стадо Твое.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)
Седален, глас 8
Обнищавшему Слову, премногим милосердием, Марие Магдалино, яве яко ученица истинно послужила еси; зрящи же Сего на Кресте вознесена, и во гробе положена, рыдала еси слезящи. Темже Тя почитаем, и твое совершаем верою торжество, мироносице славная, моли Христа Бога, грехов оставление подати чтущим любовию святую память твою.
Слава, и ныне, Богородичен: Яко Деву и едину в женах, Тя без семене рождшую Бога плотию, вси ублажаем роди человечестии, огнь бо вселися в Тя Божества, и яко Младенца млеком питаеши Зиждителя и Господа. Тем ангельский и человеческий род достойно славим пресвятое рождество Твое и согласно вопием Ти: моли Христа Бога согрешений оставление даровати покланяющимся верою пресвятому Рождеству Твоему.

Песнь 4

Ирмос: Услышах, Господи, смотрения Твоего таинство, разумех дела Твоя, и прославих Твое Божество.
Святая равноапостольная Марие Магдалино, моли Бога о нас.
Без смущения имущи мирскаго суетства мысль, Пришедшему мир весь спасти от лести послужила еси.
Святая равноапостольная Марие Магдалино, моли Бога о нас.
Мыющися слезами, гроба живоноснаго достигши, Ангела узрела еси, возвещающа Христово, Марие, Воскресение.
Слава: Сердце твое непорочное во оправданиях Христовых бысть, и Того единаго вожделела еси: краснаго добротою, достославная.
И ныне: Дреманием лености мя сон греховный, Отроковице, постиже: бодренною молитвою Твоею возстави мя к покаянию.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 5

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго? Но обрати мя, и к свету заповедей Твоих пути моя направи, молюся.
Святая равноапостольная Марие Магдалино, моли Бога о нас.
Прабаба, сию словесы прельстившаго, и изгнавшего от рая древле, зрящи ногами попираема чистых жен, нрав мужеский стяжавших, с ними вечно радуется.
Святая равноапостольная Марие Магдалино, моли Бога о нас.
Умершаго и во гробе затвореннаго, всем жизнь вдыхающаго, уязвляема любовию, сладцей Его любви приношаеши миро, Магдалино, честная Марие, и слезныя проливаеши ароматы.
Слава: По страсти Божественней, по страшнем Спасове вознесении, преходиши, слово всюду честное возвещающи, и многи уловляющи прельщающияся неведением, яко Слова ученица славная.
И ныне: Избавляет мя падшаго к греховным многоплетенным падежем, Иже из Тебе родитися благоизволивый за безмерную милость, Пресвятая Отроковице. Егоже умоли всякаго вреда избавитися, верою поющим Тя.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Святая равноапостольная Марие Магдалино, моли Бога о нас.
Глагол твоих орошение, печали вар отъят учеников, честная, якоже возопила еси: Христос воста, живот явися, ясное облиста солнце. (Дважды.)
Слава: Се твоя светозарная память возсия, просвещающи верныя, в ней поющия тя, и тму отгонящи лукавых бесов искушения, досточудная.
И ныне: Священства мысленное и неприкосновенное очистилище, свещник световиден явилася еси, и мост к Богу преводяй, исповедающим Тя Богородицу, Пренепорочная.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.) Слава, и ныне.
Кондак, глас 3
Предстоящи преславная у Креста Спасова со иными многими, и Матери Господни состраждущи, и слезы точащи, сие в похвалу приношаше, глаголющи: что сие есть странное чудо, Содержай всю тварь, пострадати изволи? Слава державе Твоей.
Икос
Владыка Христос и Царь создания, не оставль небеса, сниде, якоже изволи, и плоть тленную восприят волею. Егоже видевши Мати непорочная на Кресте пригвождаема, с девами честными предстоящи, и Магдалина Мария плачущи. Той бо тамо сущей, и теплейшую веру показующей, присно последоваше Христу, и гроб зряше, ожидающи и вопиющи: пострадати изволил еси, слава державе Твоей.

Песнь 7

Ирмос: Отроцы еврейстии в пещи попраша пламень дерзновенно, и на росу огнь преложиша вопиюще: благословен еси, Господи Боже, во веки.
Святая равноапостольная Марие Магдалино, моли Бога о нас.
Недуги отгнала еси различныя, споспешествующаго Тебе Слова имущи, Емуже предстоиши ныне, вопиющи, мироносице: благословен еси, Господи Боже, во веки. (Дважды.)
Слава: Едина видела еси прежде инех, Живота нашего, Христа, воставша, вертоградаря же Того непщевала еси, вопиющи: благословен еси, Господи Боже, во веки.
И ныне: Уставила еси течение смертное, безсмертнаго Бога яко заченши, и рождши, Чистая, Емуже вси поим: благословен еси, Господи Боже, во веки

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 8

Ирмос: Седмерицею пещь халдейский мучитель богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Святая равноапостольная Марие Магдалино, моли Бога о нас.
Светло явися житие твое, зарями облиста, о Магдалино, добродетельных деяний, божественнаго проповедания, еже к Божию мановению, и лучами яже к Зиждителю любве, Емуже поеши со Ангелы: священницы, пойте, людие превозносите Его во веки. (Дважды.)
Слава: У Креста предстояла еси, зрящи неправедное, славная, заколение, Себе излиявшаго за неизреченную милость, и стенании и слезами обливаема, что странное, вопияла еси, Марие, чудо? Како умерщвляется и умирает смерть умертвивый, Живот сый естеством.
И ныне: Яко Божию Матерь Тя единомудренно славим, и твари вышшую, Чистая, о Тебе бо осуждение еже от Адама потребися, и отступльшее присвоися человеков существо, поющее: священницы, благословите, людие, превозносите Его во веки.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 9

Ирмос: Ужасеся о сем небо, и земли удивишася концы, яко Бог явися человеком плотски и чрево Твое бысть пространнейшее небес. Тем Тя, Богородицу, Ангелов и человек чиноначалия величают.
Святая равноапостольная Марие Магдалино, моли Бога о нас.
К божественней преложилася еси ныне радости, к райстей широте пространней, к мысленным и премирным обителем, идеже преподобных чинове; идеже есть глас чист светло празднующих, Марие богоносная. Темже Тя вси ублажаем.
Святая равноапостольная Марие Магдалино, моли Бога о нас.
Ничтоже предпочла еси сущих на земли паче любве Христа Бога, но Того единаго снедаема добротами, и непосредственно, всечестная, посылаемыми лучами, стопам Сего, вопияла еси, последующи: Тя величаю, Многомилостиве.
Слава: Обожение получивши боготворное, и потока напившися благодати, и мзды болезней приемши богоначально, и апостольским чином счетаема, Магдалино, ученица Слова, любовию чтущия Тя Твоими молитвами сохрани.
И ныне: Яко Мати пострадавшаго за ны, душетленных страстей мя избави; яко милостива, разреши согрешений моих пленицы; яко блага, ублажи ныне озлобленную мою душу бесовскими искушении, Дево Богородице, да пою Тя всепетую.

Моли Бога о нас, святая равноапостольная Марие Магдалино, яко мы усердно к тебе прибегаем, скорой помощнице и молитвеннице о душах наших. (Поклон.)
Тропарь, глас 1-й
Христу, нас ради от Девы рождшемуся, честная Магдалина Мария последовала еси, Того оправдания и законы хранящи; темже днесь всесвятую твою память празднующе, грехов разрешение молитвами твоими приемлем.
Кондак, глас 3-й
Слава: Предстоящи преславная у Креста Спасова, со иными многими, и Матери Господни состраждущи, и слезы точащи, сие в похвалу приношаше, глаголющи: что сие есть странное чудо, Содержай всю тварь, пострадати изволи? Слава державе Твоей.
И ныне, Богородичен: Тя ходатайствовавшую спасение рода нашего, воспеваем, Богородице Дево, плотию бо от Тебе восприятою Сын Твой и Бог наш, Крестом восприим страсть, избави нас от тли, яко человеколюбец.

.
[480x270]
Дни памяти:



4 августа (н.ст.)

в Неделю жен-мироносиц



Тропарь, глас 1

Христу, нас ради от Девы рождшемуся, честная Магдалино Марие, последовала еси, Того оправдания и законы хранящи. Темже днесь всесвятую твою память празднующе, грехов разрешение молитвами твоими приемлем.



Кондак, глас 3

Предстоящи, преславная, у Креста Спасова со иными многими, и Матери Господни состраждущи, и слезы точащи, сие в похвалу приношаше, глаголющи: что сие есть странное чудо? Содержай всю тварь пострадати изволи. Слава державе Твоей.



Кондак 1

Уготованная Господом к равноапостольному служению, святая Марие Магдалино, возлюбленному ти Христу последовала еси; темже песньми с любовию восхваляем тя: ты же, яко имущая дерзновение велие ко Господу, от всяких нас бед молитвами твоими избави, да с радостию выну зовем ти: Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Икос 1

Ангелов Творец и Господь сил, предуведевый благое произволение твое, святая мироносице, от града Магдалы избра тя, свободив от диавольския сети; ты же по сих верная служительница Господеви явилася еси, ревнующи о прославлении Его житием и служением. Мы же, чудящеся таковому о тебе Божию смотрению, во умилении сердец зовем ти:

Радуйся, от Сына Божия из тьмы диавольския в чудный свет Его призванная.

Радуйся, Того благодатию телом и духом до конца чиста пребывшая.

Радуйся, с чистотою сердца и нищету духовную до конца сохранившая.

Радуйся, первее всех воскресшаго Христа узрети сподобившаяся.

Радуйся, силу вражию добре победившая.

Радуйся, крепкою верою и теплою любовию ко Христу Богу просиявшая.

Радуйся, всем сердцем Спаса Христа возлюбившая.

Радуйся, верно Тому даже до смерти послужившая.

Радуйся, душею твоею благодатно обновившаяся.

Радуйся, проповедь Евангелия в сокровище сердца своего вместившая.

Радуйся, проповедь Воскресения Апостолом возвестившая.

Радуйся, ангельскою беседою почтенная.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 2

Видящи святая Мария себе от седми лютых бесов избавлену, всем сердцем Победителю ада Христу Богу прилепися, вся люди научающи не усты токмо, но и всем житием Богу служити, вопиющи Тому: Аллилуиа.



Икос 2

Разум человеческий недоумевает, помышляя, из каковыя беды на высоту ангелоподобнаго жития благодатию Христовою возшла еси, достохвальная Марие Магдалино. Темже и мы, добрую тя предстательницу имуще, молимся тебе тепле: избави и нас от бездны греховныя, да любовию вопием ти таковая:

Радуйся, лютаго демонскаго рабства избегшая.

Радуйся, лесть лукавых бесов яве обличившая.

Радуйся, в напасти вражией ко Христу Богу прибегати всех научившая.

Радуйся, никомуже отчаяватися в велицей греховней скорби побуждающая.

Радуйся, ко святости всем грешником путь показавшая.

Радуйся, всемощную силу благодати Христовы познавшая.

Радуйся, достойнаго Богу благодарения добрая наставнице.

Радуйся, истиннаго богохваления верная учительнице.

Радуйся, в житии твоем правый путь земнаго течения нам показавшая.

Радуйся, всем грешником пред Богом благая заступнице.

Радуйся, душ наших от лести сатанинския защитнице.

Радуйся, во всякой скорби теплая ко Христу наша ходатаице.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 3

Силою божественныя благодати, купно же и своим благим произволением, безпечально оставила еси дом отца твоего, якоже древле Авраам, и радостно последовала еси Христу Богу: темже молим тя, ученице Христова, славная Марие, молитвами твоими и наша сердца просвети любовию к Богу, да и ныне и присно взываем Тому: Аллилуиа.



Икос 3

Имущи богодарованную ти премудрости силу, мужески отвергла еси, Марие Магдалино, красная сего мира и, яко ученица добрая, премногим милосердием обнищавшему за ны Слову истинно послужила еси. Сего ради и мы со умилением вопием ти:

Радуйся, добрая Христова ученице.

Радуйся, истинныя любве к Богу наставнице.

Радуйся, суету мира сего добре познавшая.

Радуйся, мужески его радости отвергшая.

Радуйся, красная мира сего ни во чтоже вменившая.

Радуйся, чину иноческому добрый путь жития предпоказавшая.

Радуйся, всех ко Христу Богу путеводствующая.

Радуйся, для дел милосердия из дому земнаго изшедшая.

Радуйся, Христово милосердие зде и на небеси обретшая.

Радуйся, яко тем блаженства вечнаго достигшая.

Радуйся, мудрая агнице, от злых волков к доброму пастырю Христу прибегшая.

Радуйся, во двор словесных овец Его вшедшая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 4

Буря бесовския ярости превеликою силою устремися на храм души твоея, святая Марие, но того поколебати до конца не возможе: обрела бо еси спасение на твердем веры Христовы камени, на немже ты, мудрая жено, недвижимо стоящи, учиши всех Всеблагому Богу воспевати песнь: Аллилуиа.



Икос 4

Слышаще, богомудрая Марие, яко в последовании Христу обрела еси истинное веселие сердца, правду, мир и радость о Дусе Святе, тщимся и мы явитися в лице причастник сего Царства Божия. Тебе же, яко причастнице того сущей и путь нам к нему показавшей, рцем вси таковая:

Радуйся, небесную Иисусову сладость возлюбившая.

Радуйся, жизнь истинную во Христе обретшая.

Радуйся, тояжде образ и нам верно показавшая.

Радуйся, в радости небесней ныне присно живущая.

Радуйся, райския снеди непрестанно вкушающая.

Радуйся, огнь любве к Богу в сердце твоем возжегшая.

Радуйся, Христом Богом, яко раба Ему верная, возлюбленная.

Радуйся, прилежная о нас к Богу молитвеннице.

Радуйся, в бедах наших помощнице.

Радуйся, наша благая и кроткая учительнице.

Радуйся, Духа Святаго пречестное жилище.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 5

Боготечная звезда, спутствующи Христу, славная Марие, посреде мироносиц явилася еси. С нимиже ныне выну предстоящи Святей Троице, и нас молитвами твоими к священному тех лику совокупи, путь темный жития нашего светом твоим озаряющи, да радостно возопием Богу: Аллилуиа.



Икос 5

Видящи, святая Марие, Христа Бога на Кресте висяща, дивное мужество показала еси: мнози бо от ученик Учителя своего оставиша; ты же, непрестанными Божественными ученьми Того душу и мысль разжегши, немощь естества женскаго превозмогла еси и тако причастилася еси спасительней Христовой страсти. Сего ради мы, сицевое твое доблественное мужество зряще, вопием ти:

Радуйся, мудрых жен красото и удобрение.

Радуйся, христиан всех доброе радование.

Радуйся, Христу Богу, на Кресте висящу, сострадавшая.

Радуйся, непоколебимей любви к Тому нам путь показавшая.

Радуйся, сицевою любовию в предстательстве о нас к Богу дерзновение велие обретшая.

Радуйся, женам доброто и похваление.

Радуйся, христианом крепкое прибежище.

Радуйся, паче сильных мужей крепчайшая.

Радуйся, мудрецов мира сего мудрейшая.

Радуйся, яко тебе тайная премудрости Своея Бог явил есть.

Радуйся, яко тебе истинному богословию Сам Бог Слово научил есть.

Радуйся, Христа Бога паче жизни своей возлюбившая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 6

Благодатию Твоею немощная врачуеши и некрепкия сосуды тверды соделоваеши, Христе Царю: мироносицы бо жены у Креста Твоего мужески предстоят и благодать крестную всем небоязненно возвещают; лицы же мудрых жен, ликам Ангельским уподобитися тщащеся, бодренно выну взывают Троице Святей: Аллилуиа.



Икос 6

Взыскующи озаритися светом истиннаго богоразумия, егда Бога на Кресте висяща видела еси, глаголала еси слезящи, дивная Марие: «Како Жизнь смерть вольную ныне приемлет?» Мы же, славное просвещение твое благодатию Святаго Духа ведуще, вопием ти сицевая:

Радуйся, Христа распята от глубины души оплакавшая.

Радуйся, веселие вечное в селениих небесных обретшая.

Радуйся, нам образ добраго плача показавшая.

Радуйся, яко ты еси наше непрестанное радование.

Радуйся, всех скорбящих утешение неложное.

Радуйся, яко Христу, Его ради, на земли спострадала еси.

Радуйся, яко с Ним о Нем на небеси прославляешися.

Радуйся, всех врагов наших крепкая победительнице.

Радуйся, во всех скорбех наших скорая помощнице.

Радуйся, яко всем христианом воспоминание твое пресладко.

Радуйся, яко всей Церкви Христовой имя твое пречестно.

Радуйся, истинная лозо винограда Христова.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 7

Хотящи уразумети Креста всепобедительную силу, до конца Христовой страсти предстояла еси у Креста Спасова со иными женами, преславная Марие, Матери же Господни болезненно состраждущи, тако недоуменно вопияла еси: «Что сие есть странное чудо? Содержай всю тварь пострадати изволи.» Мы же на Живоносный Крест волею Вознесшемуся любовию вопием: Аллилуиа.



Икос 7

Дивная жена явилася еси, блаженная Марие, любовию твоею ко Христу Богу: тую бо горестными изъявляя рыданьми, ко Снятому со Креста припадающи, слезами пречистыя язвы Его омыла еси. Еще же благообразному Иосифу и правдолюбивому Никодиму последующи, ко гробу Спасову со иными святыми женами текла еси, ово плачущи, ово плачущую неутешно Матерь Его Пренепорочную, Ейже душу лютое оружие пройде, утешающи. Мы же, таковую твою доблесть ведуще, смиренно взываем ти:

Радуйся, пречистыя язвы Христовы слезами омывшая.

Радуйся, Матери Того Пренепорочней яве сострадавшая.

Радуйся, Христа даже до гроба не оставившая.

Радуйся, во гроб полагавшуюся Жизнь недоуменно зревшая.

Радуйся, слезам покаяния наша добрая учительнице.

Радуйся, теми слезами греховныя скверны омывати нас наставляющая.

Радуйся, теми же сердце наше окамененное умягчати побуждающая.

Радуйся, образ истинной мудрости нам показавшая.

Радуйся, памятовати выну страсти Христовы нас научающая.

Радуйся, славная Марие, купно с Пренепорочною Девою Мариею, наша верная ходатаице.

Радуйся, добрая слуго Христова.

радуйся, Господеви, а не человеком угождавшая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 8

Странно, богомудрая Марие, явися тебе погребение всем жизнь подающаго Жизнодавца: Того любовию уязвляема, еще сущей тьме, ко гробу Его принесла еси миро и слезныя пролила еси ароматы. Темже и пребываеши ныне во благовонных рая селениих, со Ангельскими лики взывающи выну Богу: Аллилуиа.



Икос 8

Весь сладость, весь радость, весь жизнь тебе бысть Иисус, святая Марие: Того ради, видевши камень взят от гроба, Сего же не обретши, рыдающи текла еси к живому веры камени Симону и другому, егоже любляше Иисус, ученику, болезненно глаголющи има: «Взяша Господа от гроба, и не вем, где положиша Его.» Ныне же ты, свободившися от скорби тоя, со Христом вечно радуешися на небеси. Мы же на земли в таковую радость молитвами твоими внити чающе, со умилением вопием ти тако:

Радуйся, сиянием любве твоея ко Христу тьму ночную победившая.

Радуйся, нощному бдению в молитве нас научившая.

Радуйся, светом вечным на небеси осиянная.

Радуйся, и нищетою духовною Царство Небесное купившая.

Радуйся, яко по скорби о страстех Христовых обрела еси обильное утешение.

Радуйся, жено кроткая, наследнице земли небеснаго рая.

Радуйся, алкавшая и жаждавшая правды Христовы, яко ты ныне насыщаешися трапезы небесныя.

Радуйся, милостивая, милость Владыки обретшая и о нашем помиловании Того усердно просящая.

Радуйся, ты бо ныне, яко чистая сердцем, Бога лицем к лицу зриши.

Радуйся, яко сподобилася еси первее всех видети Воскресение Христа, вечнаго Мира.

Радуйся, изгнанная правды ради Христовы, яко твое есть Царство Божие.

Радуйся, приобретшая вечное веселие и мзду многу на небесех.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 9

Всяк чин Ангельский удивися великой тайне славнаго Воскресения Твоего, Христе Царю, ад же притрепетен бысть, видев, яко снизшел еси в преисподняя земли и сокрушил еси вереи вечныя, содержащия связанныя, Христе. Мы же радости жен мироносиц сорадующеся, с веселием вопием: Аллилуия.



Икос 9



Ветий многовещанных языки не довлеют достойно изрещи великую скорбь твою, славная Марие, егда стояла еси вне гроба плачущи. Кто бо возможет рещи болезнь души твоея, егда не обрела еси во гробе паче жизни своея возлюбленнаго ти Господа? Прискорбное сердце твое не возможе внимати утешению Ангелов светлых. Сицевую скорбь твою со умилением воспоминающе, воспеваем ти таковая:

Радуйся, видети Христа Иисуса в пещеру проникшая.

Радуйся, ныне Того на Престоле Славы седяща зрящая.

Радуйся, светлых небожителей еще сущи на земли узревшая.

Радуйся, от тех глас радости Воскресения Христова приимшая.

Радуйся, яко ты с ними ныне присно радуешися.

Радуйся, любовию миро Христу принесшая.

Радуйся, во благоухающую мира Христова воню сладце притекшая.

Радуйся, отвергшая радостей мира греховнаго горечь.

Радуйся, возлюбившая небесную Иисусову сладость.

Радуйся, добрая леторасле сада Иисусова.

Радуйся, благоплодная лозо вертограда Божия.

Радуйся, преукрашенный храм Духа Всесвятаго явльшаяся.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 10

Спасти хотя мир, аще и во гроб снизшел еси, Безсмертне, но адову разрушил еси силу и воскресл еси, яко Победитель, Христе Боже, женам мироносицам вещавый: «Радуйтеся». С нимиже и мы ныне песнь радости приносим ти: Аллилуиа.



Икос 10

Стены каменныя твердее бысть любовь Твоя к возлюбльшему тя Христу, мироносице славная Магдалино Марие: темже едина видела еси прежде инех Живота нашего, из гроба возставша; вертоградаря же Того непщевала еси быти и вопияла еси Тому, забывши естества немощь: «Аще Ты еси взял Его, повеждь ми, где еси положил Его, и аз возьму Его», но сладостный Того глас показа ти Учителя, нас же глашати научи тебе сице:

Радуйся, истиннаго Вертоградаря воскресша первее инех узревшая.

Радуйся, в вертограде небеснем водворившаяся.

Радуйся, гроздием Божия благодати ныне непрестанно питающаяся.

Радуйся, вином райских радостей веселящаяся.

Радуйся, яко твоя любовь к Богу естество победила есть.

Радуйся, яко тая и нас ревности Божией научила есть.

Радуйся, из уст Христовых вещание Воскресения первее приимшая.

Радуйся, Апостолом глаголы радости первее возвестившая.

Радуйся, вечную радость на небеси обретшая.

Радуйся, яко ты и нас к той радости тобою зовеши.

Радуйся, яко о сем о нас к Богу непрестанно ходатайствуеши.

Радуйся, яко Тому молитвы о нас тепле приносиши.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 11

Ни едино же слово довлеет воспети по достоянию божественную радость Воскресения Христова, юже со иными женами, славная Марие, Апостолом возвести в сей нареченный и святый день, праздников праздник и торжество из торжеств. Темже, пред величием неизреченных щедрот Твоих, Христе Царю, на нас бывших, преклоняющеся, со смирением и любовию зовем Ти: Аллилуиа.



Икос 11

Светозарная звезда греховному миру явилася еси, Магдалино Марие, егда по славнем Спасове вознесении, грады и веси преходящи и слово Евангелия всюду возвещающи, многи подклонила еси под благое иго Христово. Достигши же даже до древняго Рима, мужески Тиверию кесарю предстала еси и тому образом краснаго яйца и мудрыми словесы живоносную силу Христа уяснила еси, лукаваго же Пилата и безбожнаго архиерея обличила еси, да по беззаконным делом своим достойная приимут. Таковому подвигу апостольства твоего дивящеся, радостно вопием ти сице:

Радуйся, Христова учения славная благовестительнице.

Радуйся, языческия тьмы светозарная прогонительнице.

Радуйся, греховныя узы многих человек разрешившая.

Радуйся, Христовей мудрости всех научившая.

Радуйся, многия люди из тьмы неведения в чудный Христа свет приведшая.

Радуйся, образ твердаго стояния за правду Христову нам показавшая.

Радуйся, спасение душ грешников паче своея жизни возлюбившая.

Радуйся, заповеди Христовы добре уразумевшая.

Радуйся, тем верно последовавшая.

Радуйся, тьму языческую дерзновенно обличившая.

Радуйся, гнева кесарева не убоявшаяся.

Радуйся, злобу и коварство врагов Христовых тому показавшая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 12

Благодати от Бога изобильно исполненная, множество душ ко Христу привела еси, славная Марие: по сем же пришла еси во Ефес, идеже апостольски любовию со Апостолом любве спасению человек послуживши, блаженным успением ко Господу преставилася еси, Емуже ныне с многочисленными небесными певцы непрестанно поеши: Аллилуиа.



Икос 12

Поюще твое достохвальное житие на земли и славу, яже на небеси, радостно славим, поем и величаем дивнаго во святых Своих Царя Небеснаго: зане не токмо сама ты, святая Марие, Того благодатию, в селениих праведных ныне ликуеши, но и нас веселиши на земли, оставивши нам многоценное миро мощей твоих, яже мудрый Лев царь, из Ефеса в Константинград пренести повеле. Тыя и мы, яко источающия благодать неоскудную всем любовию притекающим, верою и любовию мысленно лобызающе, умильно воспеваем ти таковая:

Радуйся, на земли любовию ко Христу горевшая.

Радуйся, на небеси в райския обители Того вселившаяся.

Радуйся, верным твердое заступление.

Радуйся, благовонное миро, Церковь благоухающее.

Радуйся, кадильнице златая, фимиам молитвы о нас к Богу непрестанно приносящая.

Радуйся, источник исцелений неоскудный.

Радуйся, сокровище Божией благодати неиждиваемое.

Радуйся, Ангельских ликов верная соучастнице.

Радуйся, небесных чертогов славная жительнице.

Радуйся, яко мзда твоя многа есть на небесех.

Радуйся, яко радость твоя вечна есть во обителех святых.

Радуйся, яко ты и нам прияти радость, благодать же и славу непрестанно ходатайствуеши.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.



Кондак 13

О пречудное и предивное жен украшение, всем же христианом похвала и радование, Апостолом равная явльшаяся, мироносице славная Магдалино Марие! Нынешнее наше моление приемши, от всяких нас бед и скорбей душевных и телесных и от враг видимых и невидимых, на нас находящих, избави и к Царствию Небесному ходатайством твоим направи всех, со умилением и любовию поющих о тебе Богу: Аллилуиа.



(Этот кондак читается трижды, затем икос 1 и кондак 1)



Молитва

О святая мироносице и всехвальная равноапостольная Христова ученице Магдалино Марие! К тебе, яко верней и мощней о нас к Богу ходатаице, грешнии и недостойнии ныне усердно прибегаем и в сокрушении сердец наших молимся. Ты в житии своем страшныя козни бесовския испытала еси, но благодатию Христовою явно тех свободилася еси; и нас молитвами твоими от сети бесовския избави, да непрестанно во всем житии нашем делом, словом, мыслию и тайными помышлениями сердец наших верно послужим Единому Святому Владыце Богу, якоже Тому обещалися есмы. Ты паче всех благ земных Сладчайшаго Господа Иисуса возлюбила еси и Тому чрез все житие добре последовала еси, Божественными учении Его и благодатию не токмо свою душу питающи, но и множество людей от тьмы языческия ко Христа чудному свету приводящи; то ведуще просим тя: испроси нам у Христа Бога благодать просвещающую и освящающую, да, ею осеняеми, преуспеваем в вере и благочестии, в подвизех любве и самоотвержения, да неленостно тщимся служити ближним в их нуждах духовных и телесных, памятующе пример твоего человеколюбия. Ты, святая Марие, бодренно благодатию Божиею протекла еси житие на земли и мирно отошла еси во обители небесныя, моли Христа Спаса, да молитвами твоими сподобит нас непреткновенно совершити странствие наше в сей юдоли плача и в мире и покаянии скончати живот наш, да тако и в святости на земли поживше, вечныя блаженныя жизни на небеси сподобимся и тамо с тобою и всеми святыми вкупе выну восхвалим Троицу Нераздельную, воспоим Едино Божество, Отца и Сына и Духа Всесвятаго во веки веков. Аминь.