АКАФИСТ ПРЕПОДОБНОЙ МАТЕРИ НАШЕЙ МАРИИ ЕГИПЕТСКОЙ
Кондак 1

Избранной от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная, ты же, яко имея дерзновение к щедрому Богу, молитвами твоими настави на стезю твоего покаяния любовию тебе зовущих:

Радуйся, чудо милосердия Божия, Марие равноангельная.
Икос 1

Ангела во плоти узрев тя в пустыни Иорданской великий Зосима, на воздусе стоящую и о мире молящуюся, со удивлением и ужасом одержим весь трепетом быв, слезами обливаяся, вопияше тебе таковая:

Радуйся, благодати и света исполненная; радуйся, прозрения даром украшенная.

Радуйся, в молитвах твоих к Богу на воздусе вземлемая; радуйся, пустынное сокровище, от мира утаенное.

Радуйся, безплотных сожительнице; радуйся, Духа Святаго селение.

Радуйся, чудо милосердия Божия, Марие равноангельная.
Кондак 2

Видяще старца благоговейнаго ужаса исполнена, тихим гласом рекла еси тому преподобная: не бойся, авво Зосимо, несмь дух, но земля, прах, и пепел, и всячески плоть, ничтоже духовное когда помыслившая и ни единыя добродетели имущая. Жена есмь грешница, недостойная взирати на небо, и со страхом грешными усты зову Богу: Аллилуиа.
Икос 2

Разумети ища дивную тайну, в тебе сокровенную, старец паде пред ногама твоима, глаголя: заклинаю тя именем Господа нашего Иисуса Христа, Егоже ради наготу носиши сию, не скрый от мене жития твоего, да величия Божия яве сотвориши. С нимже и мы дерзаем ублажити тя сице:

Радуйся, смирения светлая высото; радуйся, дарований духовных богатство неисчерпаемое.

Радуйся, любве ради Божия тело свое умертвившая; радуйся, в пустыни непроходней едина, с единым Богом пребывшая.

Радуйся, райскою красотою сияющая; радуйся, безстрастия светом озаренная.

Радуйся, чудо милосердия Божия, Марие равноангельная.
Кондак 3

Силою Вышняго укрепляема, исповем ти, человече Божий, грехи и беззакония моя, - отвещала еси Зосиме, - стыжуся, отче, прости мя, но понеже тело мое наго видел еси, обнажу ти и дела моя, обаче молю тя первее: не бежи от мене, не терпя слышати безместная, яже аз содеях; но, милосердствуя о мне, молися за мя, блудную, и Богу, не возгнушавшуся мною, зови: Аллилуиа.
Икос 3

Имея милосердие неизреченное, с мытари и грешники вечерявый, Той и мне, в глубину погибели падшей, простре руку Свою Божественную, егда бо возжелах аз внити в храм Господень, некая сила возбрани ми вход, сердца же моего коснувыйся свет разума, показа ми тину дел моих; и начат плакатися о гресех, в перси биющи и горько рыдающи; мы же, покаянию твоему веселящеся, пение приносим ти сицевое:

Радуйся, яко нощи прешедшей возсиявает ти заря спасения; радуйся, яко глас Христов призывает овча заблуждшее от дебрей далеких греха.

Радуйся, яко слезными токи омываеши вся твоя скверны; радуйся, яко слезами твоими очищаеши одеяние души твоея.

Радуйся, яко Отец щедрот объятия Своея любве тебе отверзает; радуйся, яко ведый твоя тайная рукописания грехов твоих раздирает.

Радуйся, чудо милосердия Божия, Марие равноангельная.
Кондак 4

Бурею скорбных помыслов одержима, узрела еси во угле притвора церковнаго икону Причистыя Богоматери и, стеня, воззвала еси к Ней: повели, о Владычице, да и мне, недостойной, отверзутся божественныя входы, и буди Ты ми Споручница, яко егда узрю Крест Сына Твоего, мира и иже в мире отвергуся и изыду, аможе Ты повелиши мне, зовущи Богу: Аллилуиа.
Икос 4

Слышавше глас, издалеча глаголющ: ащи Иордан прейдеши, добре покой обрящеши, на колена падши пред Приснодевою, рекла еси: о Владычице! Не гнушается девственная чистота Твоя моея недостойныя молитвы, буди мне спасения Учительница, руководствующая на путь покаяния! Тем убо Ангели Божии, написующе исповедание твое, возглашаху тебе в той час сицевая:

Радуйся, от тьмы греха к чистому свету покаяния преходящая; радуйся, неистовство страстей и любовь плотскую отринувшая.

Радуйся, вся узы и сети врага растерзавшая; радуйся, тяжкое бремя студныя работы диавола во благое и легкое иго Христово пременившая.

Радуйся, от смерти греховныя к вечному животу возстающая; радуйся, от врат погибели к вратам рая восходящая.

Радуйся, чудо милосердия Божия, Марие равноангельная.
Кондак 5

Богосветлыми лучами благодати просвещает тя Пресвятая Дева, Та бо Споручница грешных к Богу сущи, отверзает тебе двери милосердия Божия и врата храма святаго, в оньже внитши, со многими слезами поклонилася еси Живоносному Древу, имже мир спасен бысть, и распеншемуся Господу, Кровь Свою за твое избавление излиявшему, благодарственно воспела еси: Аллилуиа.
Икос 5

Видев тайны Божия и како готов есть приимати кающихся, всехвальная Мария, воззвала еси всем сердцем: Владычице Богородице! Не остави мене! - и устремилася еси в пустыню обонпол Иордана, мы же, почитая бегство твое, сретаем тя пении сими:

Радуйся, яко всепрощающею любовию Спаса уранися сердце твое; радуйся, яко сокровище благодати, тобою приятое, потщалася еси сокрыти в пустыни.

Радуйся, яко мира греховныя сладости скоротечно и невозвратно отбегла еси; радуйся, яко бегством твоим демоны огнем попалила еси.

Радуйся, яко тем бегством Небеса возрадовала еси.

Радуйся, чудо милосердия Божия, Марие равноангельная.
Кондак 6

Проповедуеши всем падшим и отчаянным, всечестная, Божие человеколюбие и силу покаяния, како грешную душу омывает, очищает, светлит и возводит горе и веселие творит Ангелом Божиим, с нимиже и мы бренными усты зовем: Аллилуиа.
Икос 6

Возсия мирови от пустыни Иорданской свет великих подвигов твоих, Марие приснославная, многия бо лета, аки адамант тверд и столп непоколебим, пребыла еси, яко со зверьми лютыми, с похотьми твоими борющися и оружием креста отражая разжженныя стрелы лукаваго, сего ради дивящеся пачеестественному терпению твоему, любовию зовем ти:

Радуйся, яко злострадания и труд в пустыни четыредесят и осмь лет понесла еси; радуйся, яко солнечнаго зноя опаление, наготу и мраз нощный претерпела еси.

Радуйся, яко гладом и жаждою истаявала еси; радуйся, яко всякое пожелание плоти конечно умертвила еси.

Радуйся, яко в борьбе со грехом, в тебе живущим, до крове подвизалася еси.

Радуйся, чудо милосердия Божия, Марие равноангельная.
Кондак 7

Хотя препятие сотворити твоему светлому к небеси шествию, всеблаженая, исконный враг рода человеческаго не престаяше влагати ти помыслы нечистыя, огнь греховный в удесех твоих разжигая и предлагая тебе на память прежняго жития твоего; ты же, многострадальная, повергалася еси на землю, слезами обливаяся и призывая в помощь Приснодеву, и не воставала еси от земли день и нощь, дондеже сладкий свет осияваше тя, воздвизая благодарственно пети Богу: Аллилуиа.
Икос 7

Новый человек, по Богу созданный, явилася еси, преподобная, умертвив бо всеконечно ветхаго человека, во Христа облеклася еси, всечудная, седмьнадесят лет безчисленныя беды пострадах. Зосиме рекла еси: «Оттолеже и до днесь сила Божия грешную мою душу и тело смиренное соблюде». Приими убо и от нас, недостойных, похвалы сицевыя:

Радуйся, яко умертвила еси страстей взыграния; радуйся, яко самое естество победила еси.

Радуйся, яко всякий грех от души и плоти твоея потребила еси; радуйся, яко в сердце и умерщвленных удесех твоих носиши Иисуса, тобою любимаго.

Радуйся, яко облеклася еси в одежду веселия духовнаго; радуйся, яко вошла еси в вечный покой Сына Божия.

Радуйся, чудо милосердия Божия, Марие равноангельная.
Кондак 8

Странное и преславное изменение твое, преподобная, видяще, демонов темныя полки горько рыдаху, вся же силы небесныя радостию играюще, песнь Христу воспеваху, прославляюще Божие милосердие, грехами людскими не преодоленное, велиим гласом зовуще: Аллилуиа.
Икос 8

Вся была еси в Бозе, Марие всебогатая, егда Зосима, обходя пустыню, видети тя сподобися. «Заклинаю тя, отче, Спасителем Богом, да никомуже речеши, яже слышал еси от мене, дондеже Бог от земли возмет мя», - вещала еси тому - ныне с миром отыди, в посте же грядущаго лета причасти мя Святых Христовых Таин на брезе Иорданстем, то рекши, аки горлица пустыннолюбивая и неудержимая, от очию старца скрылася еси, той же поклонися до земли и целова место, идеже стоясте стопы ног твоих, зовый таковая:

Радуйся, яко обнажившися студа греховнаго, паче снега убелилася еси; радуйся, яко паче лучей солнечных просветилася еси.

Радуйся, яко вся грехи твоя забвенны и прощенны суть у Бога; радуйся , яко часть твоя со святыми.

Радуйся, яко первее блудница, днесь невеста Христова сотворилася еси.

Радуйся, чудо милосердия Божия, Марие равноангельная.
Кондак 9

Всяк помысл и ум ужасают болезни твоя, всехвальная, како труд пустыни любве ради Божией претерпела еси, взываше превеликий во отцех Зосима, рыдая: О мати духовная! Ты Богу приблизилася еси, хотел бых, аще бы можно было, во след тебе ходити и зрети честное лице твое и купно с тобою немолчно пети: Аллилиуиа.
Икос 9

Витийство земнородных не довлеет достойно похвалити твоя подвиги, всесветная, кто же доволен изрещи слезныя токи, яже пролияла еси в молитвах к Богу! Кто болезни твоя изочтет, кто исповесть всенощныя бдения, борения и тесноту жития твоего! Пустыню всю чудесы просветивши, яко солнце, просияла еси, всечудная, тем убо молим тя: озари лучами света твоего наши сердца и испроси оставление грехов всем вопиющим тебе таковая:

Радуйся, помраченный образ Божий в светлости велицей в себе возобразившая; радуйся, небесными ароматы благоухающая.

Радуйся, звездами чудес украшенная; радуйся, лучами добродетелей сияющая.

Радуйся, величия Божия всем концем земли благовествующая; радуйся, небо и землю к пению славы Господа твоего призывающая.

Радуйся, чудо милосердия Божия, Марие равноангельная.
Кондак 10

Спасителя Бога животворящее Тело и Кровь вземше, в день таинственныя Христовы вечери, авва Зосима, по завещанию твоему, в вечер зело поздень изыде на брег Иордана, неуклонно в пустыню лунным светом осияваемую, зря, и моляшеся к Богу, глаголя: покажи ми, Господи, сокровище Твое, еже в пустыни сокрыл еси! Покажи ми ангела во плоти, да не отыду тощ, нося моя грехи на обличение, но да радуяся, зову Тебе: Аллилуиа.
Икос 10

Стену непроходну мысляше старец быти Иордану реце, между ним и тобою, преподобная: обаче ты, став на одной стране реки, знамением крестным Иордан знаменала еси и купно с тем знамением взошла еси на воду; Зосима же, видев идущу тя к себе верху воды, ужасеся и радостию вопияше тебе:

Радуйся, горняго рая Божия обитательнице; радуйся, яко тварь повинуется велению твоему.

Радуйся, яко волны стелются под честныя нозе твоя; радуйся, яко Иордан тебе служит, луна и звезды небесныя дивятся святыни твоей.

Радуйся, силы Божией дивное проявление; радуйся, храм одушевленный Бога Живаго.

Радуйся, чудо милосердия Божия, Марие равноангельная.
Кондак 11

Пение подобаше тебе приносити Всемогущему Богу, авво, по воде шествующи, рекла еси тому: что твориши, священник сый, како дерзаеши кланятися мне, убозей, сам носяй страшныя Таины Христа Бога! Имже верою и любовию, прах и земля покланяющися, со страхом зову: Аллилуиа.
Икос 11

Светом небесным блистаяся, причастилася еси Божественных Таин и радости премирныя исполнися, на небо руце воздевши, рекла еси: ныне отпущаеши рабу Твою, Владыко! Обращися к старцу, вещала еси: прости, авво Зосимо! В грядущее же лето узриши мя паки в пустыни, якоже хощет Господь, моли Его о мне, отче мой, моли, поминая всегда мое окаянство. И паки Иордан знаменавши, прешла еси верху той воды, старец же, не смея надолзе держати тя, стеня и рыдая, взываше в след тебе таковая:

Радуйся, мертвость Иисуса в теле носящая; радуйся, Воскресения Его славою сияющая.

Радуйся, благодатию, яко ризою света, облеченная; радуйся, яко ангели Божии дивятся чистоте твоей.

Радуйся, яко силы адския ужасаются и трепещут от славы твоея; радуйся, светозарная обитель Всесвятыя Троицы.

Радуйся, чудо милосердия Божия, Марие равноангельная.
Кондак 12

Благодатию Божественною окриляема во един час долготу пустыни прешла еси и в нощь спасительныя Христовыя страсти, по причащении Божественныя Тайныя вечери, сном святым уснула еси, о мире моляся, дух твой Господу предала еси, Емуже со ангелы в неисповедимой радости зовеши ныне: Аллилуиа.
Икос 12

Поюще надгробное пение, богомудрый Зосима, нозе твои честныя слезами омываше, и много молився тебе, покрыв тело твое землею, наго сущее и ничтоже имеющее, точию ветхую мантию, юже исперва тебе даде, радостию и страхом многим одержим, величию Божию дивяся, стояше, зовый к тебе таковая:

Радуйся, яко чадо света сущи, прешла еси к Свету невечернему; радуйся, яко дух твой с веселием прияша селения святых.

Радуйся, яко тело твое упокоися в могиле, юже лев от пустыни тебе ископа; радуйся, яко тобою показа мне Господь, колико отстою от меры совершенства.

Радуйся, о всем мире к Богу ходатаице; радуйся, постников высото, преподобных славо, страдальцев красото.

Радуйся, чудо милосердия Божия, Марие равноангельная.
Кондак 13

О преподобная мати, богоблаженная Марие! Приими от нас ныне приносимое тебе моление и, Свету неприступному предстоя, молися Всещедрому Богу, да милостив быв, ниспослет светозарную благодать покаяния всем заблуждшим чадом Небеснаго Отца и от греха к отеческому дому востекших в райских селениих сподобит вкупе с тобою во веки благодарственно пети Ему: Аллилуиа, Аллилуиа, Аллилуиа.

Этот кондак читается трижды, затем 1-й икос «Ангела во плоти…» и 1-й кондак «Избранной от Господа …».
Молитва

О великая Христова угоднице, преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающия. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящим — утешение, недугующим — исцеление, падшим — возстание, заблуждщим — укрепление, в делах благих преспеяние и благословение, сиротам и вдовицам — заступление и отшедшим от сего жития — вечное упокоение, всем же нам в день страшнаго Суда одесную страны общники быти и блаженный глас Судии мира услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.
Тропарь, глас 8

В тебе, мати, известно спасеся, еже по образу, приимши бо крест, последовала еси Христу и, деющи, учила еси презирати убо плоть, преходит бо прилежати же о души вещи безсмертней. Темже и со Ангелы срадуется, преподобная Марие, дух твой.
Кондак, глас 4

Греха мглы избежавши, покаяния светом озаривши твое сердце, славная, пришла еси ко Христу, Сего Всенепорочную и святую Матерь Молитвенницу милостивную принесла еси. Отонудуже и прегрешений обрела еси оставление и со Ангелы присно срадуешися.
Ин кондак, глас

Блудами первее преисполнена всяческими, Христова невеста днесь покаянием явися, ангельское жительство подражающи, демона креста оружием погубляет. Сего ради Царствия невеста явилася еси, Марие преславная.

Память: 1 / 14 апреля, в Неделю 5-ю Великого поста



Глас 4

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Припев: Святая преподобная Марие, моли Бога о нас.

Скверну прегрешении очисти смиренныя моея души, Твоею милостию, Христе, мглу и омрачение страстей отжени молитвами преподобныя Твоея.

Страстьми плотскими осквернивши душевное благородие, воздержанием паки, о честная, твои ум просветила еси, тучами слез твоих душу уяснивши.

Слава Отцу, и Сыну, и Святому Духу.

Египта страстей избегла еси, яко от греховна источника, и, фараона избавльшися лютаго осквернения, безстрастия ныне землю наследовала еси, и со Ангелы ликуеши присно.

И ныне и присно, и во веки веков. Аминь.

Богородичен: Зрящи Твою икону, Владычице, Богородительнице Чистая, и рождшагося Слова от Твоея пречистыя, Дево, утробы, и поручницу Тя к Сему тепле просит преславная.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Припев: Святая преподобная Марие, моли Бога о нас.

Возсмердешася душевныя и согнишася твоя раны, но источником слез твоих сия омыла еси тепле.

Побеждени быша тобою демонстии полцы, и страстная взыграния слезами уранила еси.

Слава Отцу, и Сыну, и Святому Духу.

Яко утренний облак и якоже капля, каплющи, была еси всем, проливающи воды покаяния спасительнаго.

И ныне и присно, и во веки веков. Аминь.

Богородичен: Тя Предстательницу, Чистая, и спасение, и крепость имущи, Креста святаго древу, честная, поклонися.

Ин кондак, глас 3

Блудами первое преисполнена всяческими, Христова невеста днесь покаянием явися, ангельское жительство подражающи, демона креста оружием погубляет. Сего ради Царствия невеста явилася еси, Марие преславная.

Седален, глас 8

Взыграния вся плотская обуздавши болезньми постническими, мужественное показала еси души твоея мудрование, Креста бо возжелевши образ видети, себе, приснопамятная, миру распяла еси, отонудуже и к ревности жития непорочнаго усердно воздвигла еси себе, всеблаженная, Марие преславная. Моли Христа Бога грехов оставление подати чествующим любовию святую память твою.

Слава Отцу, и Сыну, и Святому Духу. И ныне и присно, и во веки веков. Аминь.

Богородичен: Яко Деву и едину в женах, Тя, без семене рождшую Бога плотию, вси ублажаем, роди человечестии, Огнь бо вселися в Тя Божества, и яко Младенца млеком, питаеши Зиждителя и Господа. Тем, Ангельский и человеческий род, достоино славим пресвятое рождество Твое и согласно вопием Ти: моли Христа Бога согрешений оставление даровати покланяющимся верою пресвятому рождеству Твоему.

Крестобогородичен:

Агнца, и Пастыря, и Избавителя Агница зрящи на Кресте, восклицаше, плачущи, и, горько рыдающи, вопияше: мир убо радуется, приемляй Тобою избавление, утроба же Моя горит, зрящи Твое распятие, еже терпиши за милосердие милости. Долготерпеливе Господи, милости бездно и источниче неисчерпаемый, умилосердися и даруй согрешений оставление верою поющим Божественныя страсти Твоя.

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достоино взывающи: слава силе Твоей, Господи.

Припев: Святая преподобная Марие, моли Бога о нас.

Удалилася еси, бежавши, сущих в мире и сладких всех, едина же Единому чисто приобщилася еси крайним воздержанием и терпением дел твоих.

Телесная движения и разжжения воздержанием поистинне изсушила еси, отонудуже душу украсила еси, Марие всеславная, Божественными видении и детельми.

Слава Отцу, и Сыну, и Святому Духу.

Добродетельною твоею силою, слезами и постом крайним, молитвою же и варом, зимою и наготою приятелище была еси Святаго Духа честно.

И ныне и присно, и во веки веков. Аминь.

Богородичен: К Твоей иконе прибегши, и из Тебе Рожденнаго, Марие Дево, Тобою ныне обрете жизнь безсмертную, в раи ликующи.

Песнь 5

Ирмос: Ты, Господи, мой свет в мир пришел еси, Свет Святый, обращаяй из мрачна неведения верою воспевающия Тя.

Припев: Святая преподобная Марие, моли Бога о нас.В след Христа последовала еси, радующися, носящи крест свой на раме, Марие, и демоны уранила еси.

Показала еси нам покаяния лечбу, показала еси и стезю, ведущую паки к жизни негиблющей.

Слава Отцу, и Сыну, и Святому Духу.

Ты буди ми, честная, заступница непобедима и избави страстей мя, болезни же всякия мольбами твоими ко Господу.

И ныне и присно, и во веки веков. Аминь.

Богородичен: На Твою, Владычице Чистая, икону взираше, Тебе всегда молящися, страстей нападания преподобная посрамляше.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Припев: Святая преподобная Марие, моли Бога о нас. Потом греховную скверну омыла еси, к нетленней же славе твоею мыслию смотряющи, ныне обрела еси благоплодие болезнем твоим, славная.

Всем грешником, Марие, житие твое образ показася, безмерно согрешившим, в житии востати и скверну очистити слезами.

Слава Отцу, и Сыну, и Святому Духу.

Ущедри смиренную мою душу, Человеколюбче, юже оскверних, дея нечистая хотения плоти моея, но Ты мя преподобныя молитвами помилуй.

И ныне и присно, и во веки веков. Аминь.

Богородичен: Всею твоею душею и сердцем возлюбила еси от Девы рожденнаго Бога Слова, Живаго и воплощенна, глас тебе, преподобная, принесша.

Кондак, глас 4

Греха мглы избежавши, покаяния светом озаривши твое сердце, славная, пришла еси ко Христу, Сего Всенепорочную и святую Матерь Молитвенницу милостивную принесла еси. Отонудуже и прегрешений обрела еси оставление и со Ангелы присно срадуешися.

Икос

Змия, древле во Едеме запеншаго Еве прелестию древа, низвергла еси в ров Древом Крестным, славная Марие, и, отбегши сласти, чистоты возжелела еси, отонудуже и с девами сподобилася еси внутрь чертога внити твоего Владыки, с сими насладитися достоино. Того убо прилежно моли, яко да многих грехов разрешение подаст и Своея жизни нас сподобит со Ангелы присно радоватися.

Песнь 7

Ирмос: В пещи Авраамстии отроцы персидстеи, любовию благочестия паче, нежели пламенем опаляеми, взываху: благословен еси в храме славы Твоея, Господи.

Припев: Святая преподобная Марие, моли Бога о нас.

Скорбную и тесную шествовавши стезю яве, добротою добродетелей уяснивши душу, Небесную достигла еси жизнь некончаемую, идеже Свет безконечныи есть Христос.

Яже в мире поправши временная вся, ныне ликуеши со всеми воинствы Ангельскими, воспевающи: благословен еси в храме славы Твоея, Господи.

Слава Отцу, и Сыну, и Святому Духу.

Коварства вражия и оружия оскудеша вся крепким постом и молитвою твоею, преподобная, и слезами, и ныне убо отгонятся и страстей настояния, Марие честная.

И ныне и присно, и во веки веков. Аминь.

Богородичен: Неискусобрачно яже Бога безплотна порождши воистинну и Дева пребывши поистинне, Твоею силою, Всечестная, отгнала еси страстей и демонов воинства.

Песнь 8

Ирмос: Руце распростер, Даниил львов зияния в рове затче: огненную же силу угасиша, добродетелию препоясавшеся, благочестия рачители отроцы, взывающе: благословите, вся дела Господня, Господа.

Припев: Святая преподобная Марие, моли Бога о нас.

Весь сиянием добродетелей озаривши ум, Марие славная, Богу беседовавши, плоть бо истнивши постом многим и помыслом благочестивым, пела еси, радующися: благословите, вся дела Господня, Господа.

Креста знамением себе оградивши, Иорданския ногами немокренными твоими воды преплывши, Марие, верно и Небеснаго Христа, Телу и Крови Его, причащшися, - ныне отпущаеши рабу Твою, - рекла еси.

Слава Отцу, и Сыну, и Святому Духу.

Священник Божественный Зосима, таинник благодати, быстрину яко виде тя Иорданскую, славная, прешедшу немокренными ногами, страхом и трепетом одержимь быв, радуяся, пояше: благословите, вся дела Господня, Господа.

И ныне и присно, и во веки веков. Аминь.

Богородичен: Тобою, Пренескверная, тлю и скверну всю оттрясе, и облечеся, Владычице, в ризу безсмертну, и Тобою Твоему Сыну преподобная вопияше: благословите, вся дела Господня, Господа.

Песнь 9

Ирмос: Камень нерукосечный от несекомыя горы, Тебе, Дево, краеугольныи отсечеся, Христос, совокупивый разстоящаяся естества, тем, веселящеся, Тя, Богородице, величаем.

Припев: Святая преподобная Марие, моли Бога о нас.

Ныне нетленною и Божественною воистинну пищею насыщаема и Светом наслаждающися мысленным и Невечерним в Небесных селех, идеже Ангельстии чини о нас Бога молят.

Славы текущия и тленныя же возгнушавшися, Марие, славу и жизнь наследовала еси блаженную. Христа моли о совершающих твою всесвятую память всегда.

Слава Отцу, и Сыну, и Святому Духу.

Виждь мою скорбь, преподобная, и стенание сердца, виждь тесноту жизни моея, спаси мя от греха моего и душу мою ущедри твоими ходатайствы ко Господу.

И ныне и присно, и во веки веков. Аминь.

Богородичен: Владычице Чистая Богородице, грешников спасение, приими мольбу сию, избави мя от грех моих, Твоему Сыну прибегающа, молитвами преподобныя Твоея.

Светилен

Образ покаяния нам дадеся, Марие, твоим бо теплым умилением возврати побеждение, Заступницу стяжавши Богородицу Марию, с Неюже о нас помолися.

Богородичен

Свет возсиявший безлетный от Отца прежде век в лето ныне напоследок из Тебе, Дево, явися на спасение мира, к Немуже не престай о людех Твоих молящися.

*