АКАФИСТ СВЯТОМУ ВЕЛИКОМУЧЕНИКУ И ЦЕЛИТЕЛЮ ПАНТЕЛЕИМОНУ

Кондак 1
Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих:
Радуйся, великомучениче и целителю Пантелеимоне.

Икос 1
Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на Небо, идеже со ангелы и всеми святыми предстоя Престолу Господа славы, молися о нас, земных, почитающих тя звании сими:
Радуйся, светлосте благочестия; радуйся, преславный светильниче Церкве.
Радуйся, мучеников пречестных украшение; радуйся, верных в непоколебимом терпении утверждение.
Радуйся, юности преизрядная похвало; радуйся, поборниче Христов, в мужестве неодоленный.
Радуйся, произрастший в мире, премирен явивыйся; радуйся, ангеле во плоти, превосходяй смертных.
Радуйся, небожителю всеблаженный; радуйся, Божественнаго разума вместилище.
Радуйся, имже вера возвысися; радуйся, имже прелесть низложися.
Радуйся, великомучениче и целителю Пантелеимоне.

Кондак 2
Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.

Икос 2
Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Темже похваляюще дерзновение твое, глаголем ти сице:
Радуйся, угрозы Максимиана презревый; радуйся, советом нечестивых непокоривыйся.
Радуйся, насаждение истиннаго богопочитания; радуйся, искоренение демонскаго служения.
Радуйся, неистовства мучителей изобличителю; радуйся, идольския прелести низложителю.
Радуйся, разгнавый нечестивых соборища; радуйся, пременивый тленная на Небесная.
Радуйся, собеседниче невещественных ангелов; радуйся, сликовствователю многострадальных святых.
Радуйся, имже сатана посрамися; радуйся, имже Христос прославися.
Радуйся, великомучениче и целителю Пантелеимоне.

Кондак 3
Силою Вышняго, дарованною тебе, и крепким терпением твоим обезсилил еси мучителеву дерзость, мужественный победоносче: огня, зверей, колеса не убоявся и мечем усечен во главу, венец победы приял еси от Христа Бога, взывая Ему: Аллилуиа.

Икос 3
Имущи обитель твоя вседрагую главу твою, богомудрый страстотерпче, яко превеликое сокровище, радости исполняется о сем и, любовию воспевающе данную тебе от Бога благодать исцелений, благодарно зовет ти:
Радуйся, Никомидии светильниче всесветлый; радуйся, чтущей тя обители страже неусыпный.
Радуйся, имже охладе безбожие; радуйся, имже возрасте богопознание.
Радуйся, светлая страстотерпцев славо; радуйся, радостное православных слышание.
Радуйся, исцелений благодатный источниче; радуйся, дарований великих вместилище.
Радуйся, благовонное миро, облагоухающее души; радуйся, яко помогаеши призывающим тя.
Радуйся, слепым зрение даровавый; радуйся, хромым благошествие устроивый.
Радуйся, великомучениче и целителю Пантелеимоне.

Кондак 4
Бурею помышлений многобожия одержим, нечестивый царь смутися, увидев от завиствовавших тебе врачев, яко всякия неисцельныя недуги целиши ты именем Христа. Мы же, с веселием славяще дивнаго в тебе Бога, вопием Ему: Аллилуиа.

Икос 4
Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и, приемлюще скорая исцеления от всяких болезней, прославляху Бога и тебе величаху, всемилостиваго целителя своего, зовуще ти:
Радуйся, помазанный миром благодати; радуйся, храме Бога освященный.
Радуйся, великая благочестивых славо; радуйся, твердая озлобляемых стено.
Радуйся, мудрых превосходяяй разумом; радуйся, верных осияваяй мысли.
Радуйся, Божественных даров приятелище и многообразных нам милостей Господних источниче; радуйся, скорый помощниче страждущим.
Радуйся, обуреваемых пристанище; радуйся, заблуждших наставниче.
Радуйся, болящих туне врачуяй; радуйся, обильно исцеления источаяй.
Радуйся, великомучениче и целителю Пантелеимоне.

Кондак 5
Чудо преславное сотвори с тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызенно умершее отроча по молитве твоей ко Христу абие оживе и воста здраво. Познав убо Жизнодавца всех Истиннаго Бога, с твердою верою воззвал еси Ему: Аллилуиа.

Икос 5
Узре свет слепый, емуже с призыванием имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси. Сего ради тебе, славному угоднику Божию и чудному врачу, взываем:
Радуйся, к Богу велие рачение имеяй; радуйся, присногорящий огню Божественныя любве.
Радуйся, деятельный послушателю священных поучений Ермолая; радуйся, последовавый советам матере твоея Еввулы.
Радуйся, яко вся раздал еси, да Христа приобрящеши; радуйся, любовь к миру любовию Божиею победивый.
Радуйся, яко вместо сладких мира за Христа лютая страдания приял еси; радуйся, яко общник сотворился еси Страстем Христовым.
Радуйся, восторжествовавый над всеми страстьми; радуйся, украсивыйся благодатным безстрастием.
Радуйся, исполняяй радости притекающия к тебе; радуйся, туне исцеляяй всех благодатию Христовою.
Радуйся, великомучениче и целителю Пантелеимоне.

Кондак 6
Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда Света Истиннаго Христа, просвещающа всякаго человека, нечестиваго же царя и боги языческия укорив, чрез мечное усечение взыде к немерцающему свету на Небеси пети Богу: Аллилуиа.

Икос 6
С светлым лицем представ судилищу цареву, дерзновенно взывал еси, преблаженне, во услышание всех: «Всецелебная сила моя и слава — Христос есть, Истинный Бог, Владыка всех, мертвыя воскрешаяй и всяк недуг отгоняяй». За таковое исповедание ублажающе тя, глаголем:
Радуйся, уста громогласная Божества Христова; радуйся языче медоточный, вещаяй Его домостроительство.
Радуйся, витие превысшаго богословия; радуйся, сеятелю мудрый благочестия.
Радуйся, сладкозвучная веры свирель; радуйся, славный проповедниче Православия.
Радуйся, прежде смерти явивый дивная; радуйся, по смерти совершаяй чудная.
Радуйся, зрителю славы Христовой; радуйся, послушателю молящихся тебе.
Радуйся, подателю милости тоя требующим; радуйся, ходатаю благ почитающим память твою.
Радуйся, великомучениче и целителю Пантелеимоне.

Кондак 7
Миро излияся на душу твою, богомудрый целебниче, от Утешителя Духа; темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.

Икос 7
Егда узреша идольстии чтители многолетна расслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо нещадно за Христа стружему и опаляему бывшу, со умилением зовем:
Радуйся, наслаждения земная презревый; радуйся, благ вещественных превысший.
Радуйся, яко вся красная мира сего ни во что же вменил еси; радуйся, яко славу скоротекущую с себе отрясл еси.
Радуйся, неуловим пребывый ловлении велиара; радуйся, победивый мучителя коварства.
Радуйся, не пощадивый за Христа жизни своея; радуйся, враг явивыйся враждебныя плоти.
Радуйся, многобожия широту утеснивый; радуйся, Божественною силою идолы поправый.
Радуйся, острейшая стрело, язвящая враги; радуйся, предстателю, заступаяй верующия.
Радуйся, великомучениче и целителю Пантелеимоне.

Кондак 8
Страннолепно являшеся тебе Господь, ободряя и соблюдая в мучениях за имя Его: во образе бо пресвитера Ермолая, клокочущее олово, в неже ввержен был еси, охлади, и в мори отрешив велий камень от выи твоея, изведе неврежденна на землю. Ты же, паки представ пред царя, торжественне пел еси Христу Богу: Аллилуиа.

Икос 8
Весь умне на Небеси водворяяся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая:
Радуйся, премудрости Божественныя исполненный; радуйся, промышления Божия о нас таинниче.
Радуйся, богомудренных умов услаждение; радуйся, боголюбивых душ увеселение.
Радуйся, пресветлый Христов бисере; радуйся, освященный душею и телом.
Радуйся, во дворех перворожденных на Небеси вселивыйся; радуйся, в присноблаженных обитаяй чертозех.
Радуйся, света Троическаго зрителю; радуйся, в молитвах к Богу теплый о нас предстателю.
Радуйся, просвещение душам подаваяй; радуйся, скорбящим утешение низпосылаяй.
Радуйся, великомучениче и целителю Пантелеимоне.

Кондак 9
Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.

Икос 9
Вития многовещанныя не возмогут по достоянию восхвалити борения твоя, славный добропобеднице, како непобедимою силою Божиею юный леты победи древняго и исконнаго врага и посрами идольскую прелесть. Мы же, удивления исполненнии, зовем ти:
Радуйся, радостное зрелище ангелов; радуйся, благоговейное удивление человеков.
Радуйся, кровь за Христа излиявый и в смерти млеко источивый; радуйся, тело за Него мученической смерти предавый.
Радуйся, исповедничества правило; радуйся, доблий воине Царя царей.
Радуйся, тьмы державца победивый; радуйся, победою твоею Небесных и земных обвеселивый.
Радуйся, горняго мира обитателю блаженный; радуйся, дольняго мира мудрый странниче.
Радуйся, древо, украшенное плодами благодатных дарований; радуйся, носяй добропобедныя ветви.
Радуйся, великомучениче и целителю Пантелеимоне.

Кондак 10
Сострадания исполнен, яко истинный подражатель Подателя милости Господа, честный страдальче, Пантелеимоном (си есть, всемилостивым) от Него преименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.

Икос 10
Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо, непобедимому страстотерпцу, зовем:
Радуйся, честное Христово избрание; радуйся, непорочное Богови благоухание.
Радуйся, твердый адаманте Церкве; радуйся, непоколебимый столпе, досязаяй до Небесе.
Радуйся, звери видимыя укрощаяй; радуйся, драконов невидимых сокрушаяй.
Радуйся, обагренный твоею за Христа кровию, срастворенною млеком; радуйся, неувядаемыя приемый венцы.
Радуйся, радость причинивый Ангелом и человеком; радуйся, прославленный Богом на Небеси и на земли.
Радуйся, небожителю, ликовствуяй с мученики; радуйся, насыщаяйся лицезрением Христа пресладким.
Радуйся, великомучениче и целителю Пантелеимоне.

Кондак 11
Песнь исходную приносим твоему за Христа заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.

Икос 11
Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим:
Радуйся, пресветлая звездо, на мысленной тверди блистающая; радуйся, луча, христоименитым людем светящая.
Радуйся, таинственно облиставаемый от Солнца Христа; радуйся, умне землю обтекаяй.
Радуйся, селение красное Пресвятаго Духа; радуйся, сосуде пречестный, изливаяй исцеления.
Радуйся, чистоты сокровище; радуйся, милости тезоимените.
Радуйся, Царствия Небеснаго наследниче; радуйся, вечныя славы сопричастниче.
Радуйся, предстателю бедствующим в мори житейстем; радуйся, безсребрениче, помогаяй призывающим тя с верою.
Радуйся, великомучениче и целителю Пантелеимоне.

Кондак 12
Благодати обилие приял еси, треблаженне, по обилию любве твоея ко Христу Богу. Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.

Икос 12
Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем:
Радуйся, благочестия трубо благозвучная; радуйся, мечу, посекаяй нечестие.
Радуйся, строганный на древе за Распростершаго руце Свои на древе Крестнем; радуйся, яко опаляем за Него, прелести пещь погасил еси.
Радуйся, язвами твоими враги уязвивый; радуйся, кровию твоею токи идольския крове изсушивый.
Радуйся, в кипящее олово вверженный за Христа; радуйся, погруженный за имя Его в водах морских.
Радуйся, промышлением Божиим неврежден в сих пребывый; радуйся, яко чрез огнь и воду мучения вшел еси в покой небесный.
Радуйся, изливаяй неизсякаемыя струи милости верным; радуйся, благосострадательный врачу, исцеления благодатная подаваяй.
Радуйся, великомучениче и целителю Пантелеимоне.

Кондак 13
О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.

Этот кондак читается трижды, затем 1-й икос и 1-й кондак


Икос 1
Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на Небо, идеже со ангелы и всеми святыми предстоя Престолу Господа славы, молися о нас, земных, почитающих тя звании сими:
Радуйся, светлосте благочестия; радуйся, преславный светильниче Церкве.
Радуйся, мучеников пречестных украшение; радуйся, верных в непоколебимом терпении утверждение.
Радуйся, юности преизрядная похвало; радуйся, поборниче Христов, в мужестве неодоленный.
Радуйся, произрастший в мире, премирен явивыйся; радуйся, ангеле во плоти, превосходяй смертных.
Радуйся, небожителю всеблаженный; радуйся, Божественнаго разума вместилище.
Радуйся, имже вера возвысися; радуйся, имже прелесть низложися.
Радуйся, великомучениче и целителю Пантелеимоне

Кондак 1
Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих:
Радуйся, великомучениче и целителю Пантелеимоне.

Молитва



О, великий угодниче Христов, страстотерпче и врачу многомилостивый Пантелеймоне!
Умилосердися надо мною, грешным рабом, услыши стенание и вопль мой, умилостиви Небеснаго, Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением, не возгнушайся греховных язв моих, помажь их елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь
.
Молитва первая
О великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и триипостасныя Его славы наслаждаяйся, телом же и ликом святым на земли в Божественных храмех почиваяй и данною ти свыше благодатию различная чудеса источаяй, призри милостивным твоим оком на предстоящия люди, честней твоей иконе умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалех утешитель, в недузех лютых страждующим врач, напаствуемым скорый покровитель, очесем недугующим прозрения датель, ссущим и младенцем скорый предстатель и исцелитель: исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа ныне и присно и во веки веков. Аминь.

Молитва

О преславный мучениче и доблий воине Небеснаго Царя, Пантелеимоне всеблаженне, милостиваго Бога преизрядный подражателю, иже Христа на земли дерзновенно исповедав и многообразныя за Него муки претерпев, неувядаемый приял еси венец на Небеси, идеже вечнаго наслаждаешися блаженства и со дерзновением Престолу трисолнечнаго Божества предстоиши! К твоему христоподражательному состраданию по Бозе прибегаем вси мы, грешнии, и всеусердно молим тя, теплаго заступника и предстателя нашего: не престай призирати на нас, сущих в нуждах и скорбных обстояниих, и твоею молитвенною помощию и целебоподательною силою избавляй нас присно от лютых зол, всегубительства и всякия иные беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии, запечатленную мученичеством и многопобедною твоею кончиною, в нейже по данней ти благодати и наименован от Христа Пантелеимоном, милости тезоименитым, милующим всех притекающих к тебе в скорбех и болезнех. Сего ради, ведуще тя, милостиваго во всем помощника и целителя, с верою взываем к тебе: услыши нас и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли милостиваго Бога, да помилует нас, грешных и недостойных, по велицей милости Своей, да избавит от труса, потопа, огня, меча и всякаго праведнаго гнева и прещения, благовременне подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие, православным же на вся враги победу и одоление, и всех нас от враг видимых и невидимых да сохранит благодатию Своею и непобедимым ополчением ангел Своих, имиже ограждаеми и наставляеми да поживем в веце сем в покаянии, чистоте и в творении богоугодных дел; да сподобимся твоим теплым предстательством христианскую кончину улучити безболезненну, мирну, непостыдну, избавитися от козней воздушных князей тьмы и от вечныя муки, и быти наследниками вечнаго, всеблаженнаго Царствия. Ей, угодниче Божий! Не престай молитися за ны грешныя, да твоим ходатайством временных и вечных бед избавлени, величаем тебе, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.

Тропарь, глас 3

Страстотерпче святый и целебниче Пантелеимоне, моли Милостиваго Бога, да прегрешений оставление подаст душам нашим.

Кондак, глас 5

Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.


Песнь 1

Ирмос: Во глубине постла иногда фараонистское всевоинство преоруженная сила, воплощшееся же Слово всезлобный грех потребило есть: Препрославленный Господь, славно бо прославися.

Запев: Святый великомучениче и целителю Пантелеимоне, моли Бога о нас.

Приступль усердно ко Христу, прежде скончания еже о Христе, мертвеца первее воздвиже. Ныне же мя, пребогате, умерщвена греховными снедении, твоими мольбами, о Пантелеимоне, оживи.

Святый великомучениче и целителю Пантелеимоне, моли Бога о нас.

Возсия якоже звезда, нося во юности старостный и богомудрый разум, добротою же тела, благолепие души стяжав, препрославленному Слову явился еси прекрасен.

Святый великомучениче и целителю Пантелеимоне, моли Бога о нас.

Умертвився миру, и во Христа, блаженне, одеявся, банею крещения бысть богоносен орган, и приятелище действа Духу, всем угождая, всем уврачуя недуги.

Слава: Премудрость сестру себе притворив, и причастник жизни ведом от нея почтеся, и венцем дарований украсися, Божественныя зари, блаженне, облистая светлостию.

И ныне: Благословеньми, Пресвятая Чистая, естество, удалено преслушанием бывшее от Зиждителя Христа, рождьши венчала еси, и тления свободила еси, темже радующеся, вси вернии Тя ублажаем.
Песнь 3

Ирмос: Процвела есть пустыня яко крин, Господи, языческая неплодящая церковь, пришествием Твоим, в нейже утвердися мое сердце.

Словеса Духа услышав, был еси яко земля добрая и благоплодная, приемши семя многоценно, и рождьши, треблаженне, спасение душам.

Умертвил еси мудрование змиина угрызения, и душу оживил еси, Богодухновенен быв, и Цареви всех предстоя.

Посрамил еси безбожное мучителей повеление, и Христови притекл еси, вместо всех Сего стяжав, и был еси, Богомудре, великий купец.

Слава: Матере твоея благочестие возлюбль, славне, отчее же возненавидел еси безбожие многомятежное, яко имея разум, лучьшее избрал еси.

И ныне: Носяи Божественным мановением, всю тварь Господь, на руку носится Твоею, Дево. Егоже ныне моли, избавити от бед поющыя Тя.

По 3-й песни поем катавасию: Моли Бога о нас, святый великомучениче и целителю Пантелеимоне, яко мы усердно к тебе прибегаем, скорому помощнику и молитвеннику о душах наших.

И по сем Господи, помилуй, 12 раз, Слава, и ныне.
Седален, глас 4.

Добляго страдальца благочестия Христова восхвалим светло Пантелеимона, вернии, псалмы и пении и песньми духовными, имже мучительство невидимаго врага силою Божественною попрася и недугов исцеление богатно от Господа даровася творящим верно Божественный и честный праздник его.
Слава, глас тойже:

Ермолая мудраго, мучениче, словеса послушал еси и оставил еси абие художество земное, яко мерзко, яко некрепко, яко губительно, имея Христовы страсти, учения жизни в сердце твоем, неисцельно страждущим здравие, Пантелеимоне, даруя. Темже молися о творящих любовию память твою.
И ныне:

Треволнении страстными, безсовестный обуреваемь, Чистая, призваю Тя тепле: да не презриши мене, окаяннаго, погибнути, бездну милосердия рождши, разве бо Тебе надежды не имам, да не врагом убо обрадование и смех, надеявся на Тя, явлюся, ибо можеши, елико хощеши, яко Мати сущи всех Бога.
Песнь 4

Ирмос: Пришел еси от Девы, не ходатай, ни ангел, но Сам, Господи, воплощься, и спасл еси всего мя человека, тем зову Ти: слава силе Твоей, Господи.

Последуя Владыце любовию, расточил еси богатство нищым, себе обнажая к страданию, еже и прошел еси, вечныя надежди провиде.

Хваления Богови жертву принесл еси, яве возгнушався идольских треб, все же шатание нечестивых, страстотерпче, попрал еси.

Снедаемым завистию, и гневом борющым, непоборимую силу сим представил еси, мучениче, и победил еси злочестивое томление вооружився.

Слава: Иже старца Симеона рукама Держимый, старца тя глаголы, Пантелеимоне, улови, к Божественному разумению, и ко многих спасению и избавлению.

И ныне: Юныя и девы во вслед Тебе потекоша, Деву и Отроковицу Тя и Матерь знающе. Едина бо обоя во едино собрала еси, несказанно Богоневесто.
Песнь 5

Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим: иного бо разве Тебе Бога не знаю.

Радостно подвиги подъял еси мучения. огражден силою Божественною и терпением, твердо мучения подъемля, радуяся вопияше: иного бо разве Тебе Бога не знаем.

Юношеско ты противление имея, и твердостию души воставление стяжав, всяку язву доблественне претерпе, и мужеским, блаженне, умом благодатию Божественнаго Креста укрепляемь.

Слава: Несогласное отрину вещание заблуждьших, Небесным учением, страдалец, и многим спасению преславну бысть виновник, твоим действом о Христе укрепляемь.

И ныне: Речения премудрых и гадания вся, Препрославленая, и пророк проречения, Тя проображаху, проявленно напоследок быти Божию Родительницу, иныя бо разве Тебе Чистыя не знаем.
Песнь 6

Ирмос: В бездне греховней валяяся, неисследную милосердия Твоего призываю бездну, от тли, Боже, мя возведи.

Идолы лестныя оплевал еси, и возносимую прелесть упразднил еси, чудодействуя дивная, и творя исцеления, Богомудре.

Венечник показася всеизрядне, сквозе бо огнь ты пройде и воду, и на колеси протязаемь, преславно погубил еси безумныя.

Слава: Мучителей суровьство низложил еси, не удобь носимая биения телесная, душевною крепостию пострадал еси, Богомудре, благодатию.

И ныне: Содержаи концы земли яко Бог, Твоима руками, Чистая, держится, описанием тела, иже Божественным зраком не описанный.

По 6-й песни паки катавасия:

Моли Бога о нас, святый великомучениче и целителю Пантелеимоне, яко мы усердно к тебе прибегаем, скорому помощнику и молитвеннику о душах наших.

И по сем Господи, помилуй, 12 раз, Слава, и ныне.
Кондак, глас 5-й:

Подражатель сый Милостиваго и исцелений благодать от Него прием, стратотерпче и мучениче Христа Бога, молитвами Твоими душевныя наша недуги исцели, отгоняя присно борца соблазны от вопиющих верно: спаси ны, Господи.
Икос:

Безсребренника память, добляго страдальца, вернаго целебника, благочестно воспоем, христолюбцы, да приимем милость, паче же оскверншии, якоже и аз, своя храмы, душам бо и телом, возлюбленнии, исцеления подавает. Потщимся убо, верная братия, в сердцах наших имети его крепость, избавляюща о лести вопиющия: спаси ны, Господи.
Песнь 7

Ирмос: Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.

Законно стражда, и победив врага, пристанище благоутишно, иже в мори славне обуреваемым был еси, свет же сущым во тьме жития, ихже пети научил еси, благословен Бог отец наших.

Блажен еси и добро тебе есть ныне преблаженне. восприимшему пребогатную и блаженную надежду свою, уготованную верою Господеви зовущым, благословен Бог отец наших.

Слава: Святых души, и праведных лицы, и безплотных чин ангельский прият, сликовника, блаженне, мечем бо усечен быв во главу, поеши радуяся, благословен Бог отец наших.

И ныне: Оружие еже прежде древа животнаго, нас отлучившее, ныне обращаемо приемлет, знаменавшыяся кровию, иже из ребр Сына Твоего изшедшею, Пренепорочная. Благословена еси, Яже Бога плотию Рождьшая.
Песнь 8

Ирмос: В пещь огненну ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.

Художное Твоея благоцветущия души, неразумие отца исцеляет, подающи свет верою преблаженне притекающым, и ко Спасу Христу наставляющи.

По Христе заклан быв, к вечней жизни преминул еси. и Богозванен явися, именованием Божиим богомудре: тем почитаем тя, и превозносим Христа во веки.

Слава: Витийское отложь, и лютое мудрец поучение, Христовем призыванием, и лютых страстей корения посекаеши, исцеляя поющыя Христа во веки.

И ныне: Безсмертия зарю вемы источника Тя, Богородице, яко Рождьшую Слова Безсмертнаго Отца, Иже всех смерти избавляющаго, превозносящих Его во веки.
Песнь 9

Ирмос: Безначальна Родителя Сын, Бог и Господь, воплощься от Девы нам явися, помраченныя просветити, собрати расточенныя, Тем Всепетую Богородицу величаем.

Преставися радуяся к желанию конечному, идеже вселься, преблаженне, блаженныи конец прияти сподобися. воистину сыи со Владыкою своим, во веки безконечныя.

Желание получил еси, и любве Твоея исполнение, каплющей еще теплей крови, яко за Христа излиявшейся, от Негоже радуяся приял еси венцы подвиг твоих.

Львом уста, и зверем зияния, якоже Даниил древле ты обуздал еси, весть бо стыдетися, мучениче, добродетели и безсловесное естество, темже тя преславне, сошедшеся ублажаем.

Слава: Богатную милость тебе Христос дарует, сокровищ исцелением нам даруя, и всемилостива изволением, тя подав всякому скорбящему, и пристанище тихо, и предстателя и защитителя.

И ныне: Яко руно, Всенепорочная, дождь Небесныи во утробе заченши нам родила еси, иже тишину дающаго, яко Бога Того поющым и Тя, Всепетую Богородицу проповедающым.

Молитва великомученику и целителю Пантелеймону

О, великий угодниче Христов, страстотерпче и врачу многомилостивый Пантелеймоне! Умилосердися надо мною, грешным рабом, услыши стенание и вопль мой, умилостиви Небеснаго, Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением, не возгнушайся греховных язв моих, помажь их елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь!

Молитва в болезни

Господи Боже, Владыко жизни моей, Ты по благости Твоей сказал: не хочу смерти грешника, но чтоб он обратился и жив был. Я знаю, что эта болезнь, которою я страдаю, есть наказание Твое за мои грехи и беззакония; знаю, что по делам моим я заслужил тягчайшее наказание, но, Человеколюбче, поступай со мною не по злобе моей, а по беспредельному милосердию Твоему. Не пожелай смерти моей, но дай мне силы, чтобы я терпеливо сносил болезнь, как заслуженное мною испытание, и по исцелении от нее обратился всем сердцем, всею душою и всеми моими чувствами к Тебе, Господу Богу, Создателю моему, и жив был для исполнения святых Твоих заповедей, для спокойствия моих родных и для моего благополучия. Аминь.

Боже, милостив буди мне грешному (поклон).
Боже, очисти грехи моя, и помилуй мя (поклон).
Создавый мя, Господи, помилуй (поклон).
Без числа согреших, Господи, прости мя (поклон).
Владычице моя, Пресвятая Богородица, спаси мя грешного (поклон).
Ангеле, хранитело мой святый, от всякаго зла сохрани мя (поклон).
Святый (апостоле, или мучениче, или преподобне отче, имярек) моли Бога о мне (поклон).

По сем глаголи начало:

Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе, Царю Небесный:
Трисвятое по Отче наш (вместо «яко Твое есть царство»: без священника нужно читать: «Молитвами святых отец наших»), Господи, помилуй (12).
Слава и ныне:
Приидите поклонимся (трижды).
Псалом 50:
Помилуй мя, Боже:
Верую во единого Бога Отца:

По сем Канон:
Канон за болящего
Глас 3-й.
Песнь 1

Ирмос. Пресекаемое море жезлом древле, Израиль пройде яко по пустыни, и крестообразно яве, предуготовляет стези. Сего ради поем во хвалении чудному Богу нашему, яко прославися.

Запев. Милостиве Господи, услыши молитву раб Своих, молящихся Тебе.

В день печали нашедшия на ны к Тебе, Христе Спасе, припадающе, твоя милости просим, облегчи болезнь раба Твоего, изреки нам, яко сотнику: «иди, се здрав есть отрок твой».

Милостиве Господи, услыши молитву раб Своих, молящихся Тебе.

Мольбы и моления с воздыханием к Тебе, вопием Сыне Божий: помилуй нас. Воздвигни со одра лежащаго, яко раслабленнаго словом: «возьми одр твой, глаголя отпущаются ти греси твои».

Слава: Твоего, Христе, образа подобию поклоняющиеся, верою целуем, и болящему здравия просим, подражающе кровоточивый, яже подольце риз Ти коснуся исцеление недуга приять.

И ныне: Пречистая Госпоже Богородице, всем известная помощница, не презри нас к Тебе припадающих моли яко блага Своего Сына и Бога нашего, дати здравие болящему, да Тя с нами прославляет.
Песнь 3

Ирмос. Иже от несущих вся приведый, словом созидаемая, совершаемая духом Вседержителю Вышний: в любви Твоей утверди мене.

Иже от тяжких болезней на земли повержен к Тебе Христе, с нами вопиет, подаждь здравие телеси его, яко же Езекии плакавшемуся к тебе.

Призри, Господи, на наше смирение, и не помяни беззаконий наших, но веры ради болящего, яко прокаженнаго словом исцели ему болезнь, да Твое, Христе, славится имя.

Слава: Церковь, юже еси освятил, на ту Христе не даждь поношения, но воздвигни невидимо в недузе на одре лежащаго, в нейже Тя молят, да не рекут невернии, где есть Бог их.

И ныне: К Твоему пречистому, Богородице, образу руце воздеюще вопием, услыши раб Твоих молитву и спаси в болезни лежащаго, да от болезни востав, воздаст обеты, яже в печали глаголаша уста его.
Седален, глас 8.

На одре греховном слежаща мя, и страстьми уязвлена, якоже воздвиг Петрову тещу и спас разслабленнаго носима со одром, тако и ныне посети, Милостиве, болящаго, понесый недуги рода нашего, Тебе единаго свемы терпелива и милосердна, милостива врача душам и телесем, Христа Бога нашего, наводяща недуги и паки исцеляюща, подавающа прощение кающимся о согрешениих единаго милосердаго и милостиваго.

Слава гл. 2: Аз грешный плачуся на одре своем слежа, прощение ми подаждь, Христе Боже, и от болезни воздвигни мя, яже есмь от юности грехи сотворил, избыти ми молитвами Богородицы сих даруй.

И ныне: Умилосердися и спаси мя воздвигни мя от одра болезненнаго, мощь бо моя во мне изнеможе и весь нечаянием одержим есмь, Мати Божия Пречистая, исцели недугующа, Ты бо еси помощница христианом.
Песнь 4

Ирмос. Положил еси к нам твердую любовь Господи: Единородного бо Твоего Сына за ны на смерть дал. еси Темже ти зовем благодаряще: слава силе твоей, Господи.

Уж отчаянна лютым недугом и к смерти приближавшася, возвати, Христе, на живо и даждь плачущимся утеху, да вси прославляем Твоя святыя чудеса.

К Тебе, Творче, каемся своих грех, яко не хощеши смерти грешничи, оживи, оздрави болящаго, да востав послужит Ти, исповедая с нами Твою благость.

Слава: Слезы Манасиины, Ниневитян покаяние, Давидово исповедание приим, вскоре спасл еси: и наши молитвы ныне приими, даждь здравие болящему, о нем же Ти молим.

И ныне: Подаждь нам Твою милость Госпоже, всегда на Тя надеющимся, испроси здравие болящему, врачебнии Твои руце с Предтечею, Богородице, ко Господу Богу простирающи.
Песнь 5

Ирмос. На земли невидимый явился еси, и человеком волею сожил еси непостижимый, и к Тебе утренююще, воспеваем Тя, Человеколюбче.

Дщерь Иаирову уже умершу, яко Бог оживил еси, и ныне возведи, Христе Боже, от врат смертных болящаго, Ты бо еси путь и живот всем.

Сына вдовича оживил, Спасе, и тоя слезы преложив на радость, спаси от недуга тлеющаго раба сего, да и наша скорбь и болезнь на радость прейдет.

Слава: Огненную болезнь тещи Петрове прикосновением Твоим исцелив, и ныне востави болящаго раба Твоего, да востав, яко Иона, послужит Ти.

И ныне: Скорбнии, смирении, грешнии, не имеющии дерзновения, к Тебе Пречистая Богомати вопием, умоли Сына своего Христа, дати болящему здравие телеси.
Песнь 6

Ирмос. Бездна последняя грехов обыде мя, и исчезает дух мой, но прострый, Владыко, высокую Твою мышцу, яко Петра мя Управителю, спаси.

Бездну милосердия и милости имея, Христе Боже, внуши моления раб Твоих. Ты бо еси Петром Тавифу воскресив, Ты и ныне в болезни лежащаго воздвигни, послушав церковных молитвенник.

Врачу душам и телесем нашим, понесый недуги всего мира, Христе, Енея Петром исцеливый, Ты и ныне болящаго исцели, Святых Апостол молитвами.

Слава: Преложи, Христе, на радость рыдание о недужнем скорбящих, да Твою получивше милость, внидут в дом Твой, со обетными дарами, славяща Тя в Троице единаго Бога.

И ныне: Приидите, о друзи, поклонимся молящеся о болящем Божии Матери, Та бо имеет власть недужная исцеляти, со безмездникома вкупе духовным невидимо помазающе маслом.
Кондак по шестой песни, глас 3.

Душу мою, Господи, во грехах всяческих, и безместными деяньми люте разслабленну, воздвигни Божественным человеколюбием, якоже и разслабленнаго воздвигл еси древле, да зову Ти спасаем: щедрый Христе, даждь ми исцеление.
Икос:

Иже руки Своея горстию содержай концы, Иисусе Боже, Иже Отцу собезначальный, и Духу Святому совладычествуя всяко плотию, явился еси, недуги исцеляя, и страсти очистил еси, слепца просветил еси, и раслабленнаго словом Божественным совоставил еси, сего право ходяща сотворив и одр повелел еси на рамо взяти. Тем же вси с ним воспеваем и поем: щедрый Христе, даждь ми исцеление.
Песнь 7

Ирмос. Прежде образу златому, персидскому чтилищу, отроцы не поклонишася, трие поюще посреде пещи: отцев Боже, благословен еси.

О Кресте Пресвятый Христов, Честное Древо животное, тобою смерть погибе и мертвии воскресоша, и ныне больнаго исцели и оживи, якоже при Елене умершую девицу.

Долгую и лютую болезнь Иовлю на гноищи и в червех того молящася, словом исцелил еси, Господи. И ныне же в церкви о болящем молим Тя, яко благ исцели невидимо молитвами Святых Твоих.

Слава: Вси свемы, яко умрети нам есть, Тебе Богу тако изволившу, но на мало время Милостиве, здравия просим болящему, премени от смерти на жизнь даждь скорбящим утеху.

И ныне: Пособствуй и помогай нашему сиротству, Богородице, Ты бо веси время и час, когда умолити Сына Твоего и Бога нашего, дати болящему здравие и прощение от всех грех.
Песнь 8

Ирмос.Служити живому Богу, в Вавилоне отроцы претерпевше, о мусикийских органах нерадиша, и посреди пламени стояще боголепную песнь воспеваху, глаголюще: благословите вся дела Господня Господа.

Здрава покажи, Владыко, болящаго раба Твоего, и скоро исцели, милостиве Христе Боже, и еще смерти не предаждь судней да Ти покаяние воздаст. Сам бо рекл еси: не хощу смерти грешничи.

Господи милостиве, твоя преславная чудеса и до нас ныне достигнут: бесы прожени, недуги погуби, раны исцели, болезни уврачуй, и потворы и чародеяния и всякие язи избави ны.

Слава: Запретивый, Христе, морским ветром, и страх ученик на радость преложивый, и ныне запрети тяжким болезнем, труждающим раба Твоего, да вси возвеселимся, хваляще Тя во веки.

И ныне: Избави, Богородице, от обышедших ны печалей, различных недуг, отравы же и чародейства, и бесовского мечтания и от урока злых человек и напрасныя смерти, молимся.
Песнь 9

Ирмос. На синайстей горе виде Тя в купине Моисей, неопально огнь Божества заченшую во чреве; Даниил же Тя виде гору несекомую, жезл прозябший, Исаия взываше, от корене Давидова.

Источниче жизни, подателю Христе милости, не отврати лица Твоего от нас, облегчи болезнь утружденному болезнею, и воздвигни яко Фаддеем Авгаря, да присно Тебе славит, со Отцем и Святым Духом.

Евангельскому верующе гласу, Твоего ищем обета, Христе: просите, рекл еси бо, и дастся вам. Тем ныне предстояще молим Тя, возстави со одра здрава лютым повержена недугом, да Тя с нами вкупе величает.

Слава:Мучимый недугом, внутрь невидимыми ранами, Тебе, Христе, с нами вопиет, не нам Господи, не нас ради, вси бо есмы исполнены грехов, но Матерними и Предтечевыми молитвами даждь исцеление болящему, да Тя вси возвеличим.

И ныне:Божия, Мати Пречистая, со всеми Святыми призываем Тя: со Ангелы и Архангелы, со пророки и патриархи, со Апостолом, с преподобными, праведными молися Христу Богу нашему, дати здравие болящему, дя Тя вси величаем.
Молитва

Боже сильный милостию, строяй вся на спасение роду человеческому, посети раба Своего сего ( имярек), нарицающа имя Христа твоего, исцели его от всякаго недуга плотскаго и отпусти грехи и греховные соблазны, и всяку напасть, и всякое нашествие неприязненно далече сотвори от раба Твоего, и воздвигни от одра греховнаго, и устрой его во святую Твою Церковь здрава душею и телом и делы добрыми славящаго со всеми людьми имя Христа Твоего, яко Тебе славу возсылаем, со безначальным Ти Сыном, и со Святым Духом ныне и присно и во веки веков. Аминь.

По окончании:

Достойно есть:
Слава и ныне: Господи, помилуй (трижды) Благослови:
Молитвами святых отец наших:

По сем нужно положить обычные отходные поклоны с молитвами:

«Боже, очисти мя грешнаго и помилуй мя!» (Поклон):
«Создавый мя, Господи, помилуй мя»! (Поклон).
«Без числа согреших, Господи прости мя!» (Поклон).
«Кресту Твоему поклоняемся, Владыко, и Святое Воскресение Твое славим» (Поклон).
«Достойно есть»... (Поклон)
«Слава и ныне»: «Господи, помилуй»(трижды) «Благослови»

и отпуст:

Молитвами святых Отец Наших, Господи, Иисусе Христе Боже наш, помилуй нас. Аминь.