Акафист Леушинской иконе Божией Матери «Аз есмь с вами, и никтоже на вы»

(Для келейного чтения)

Кондак 1

Взбранной Воеводе и Спасительнице российския, яко избавльшеся от злых, благодарственная восписуем Ти, раби Твои, но яко имущая державу непобедимую от всяких нас бед свободи и от враг видимых и невидимых спаси, да зовем Ти: Радуйся, Владычице, Горняя Спасительница Богохранимаго отечества Российскаго.

Икос 1

Ангелов и всех небесных сил честнейшая, Владычице, вложила в сердце благодатней игумении Леушинстей Таисии написати образ Похвалы Твоея и нарещи его «Аз есмь с вами, и никтоже на вы» яко знамение спасения нас, грешных. Егоже и узрев искусно инокинею написаным, взываше к милосердию Твоему сице:

Радуйся, Похвало Богоматери возсиявшая.
Радуйся, списком с Нея обновившаяся.
Радуйся, местом явления Леушино избравшая.
Радуйся, на всю Россию просиявшая.
Радуйся, чудотворною нареченная.
Радуйся, тайною Божественною окропленная.
Радуйся, блаженной игумении в Леушино четырежды являвшаяся.
Радуйся, святыми явлениями ю просвещавшая.
Радуйся, Леушинскую обитель садом Своим в Северной Руси возрастившая.
Радуйся, в Северный Удел Свой ту обустроившая.
Радуйся, Иверию, Афон, Киев и Дивеево Леушином продолжившая.
Радуйся, Покров Свой над ним простершая.
Радуйся, Владычице, Горняя Спасительница Богохранимаго отечества Российскаго.


Кондак 2

Видяще множество чудес от иконы Твоея святыя изливающихся, Пренепорочная Дево, яко Ты еси Спасительница всех в пучине волн житейских утопающих, зряще Твое Матернее к нам милосердие, в покаянии поклоняемся месту явления Твоего и хвалебную песнь воспеваем всех Творцу: Аллилуия.

Икос 2

Разумев посещение Пресвятыя Богородицы чрез дарение иконы на основание храма Божия благочестивым купцом, блаженная игумения Таисия со умилением слезно молящися, исполнила есть волю Владычицы об устроении в Леушино девичей обители, мы же дивящеся свыше данному старице благословению, благоговейно вопием к Преблагословенней:

Радуйся, Звездо над отечеством Российским возсиявшая.
Радуйся, горняя верным показавшая.
Радуйся, землею Русскою прославленная.
Радуйся, седмь сотен насельниц собравшая.
Радуйся, ободрение верных.
Радуйся, очищение скверных.
Радуйся, поддержание падающих.
Радуйся, утоление страждущих.
Радуйся, благочестивым купцом принесенная.
Радуйся, до времени сокровенная.
Радуйся, в многоскорбныя времена открытая.
Радуйся, благодатию покрытая.
Радуйся, Владычице, Горняя Спасительница Богохранимаго отечества Российскаго.

Кондак 3

Силою Вышняго укрепи нас, Преблагословенная Владычице, во дни погружения в пучину страстей, да не погибнем без покаяния в бедах внезапных, наипаче же от потопления. К Тебе молитвенно притекаем, усердно взывающе Всемилостивому Спасу: Аллилуия.

Икос 3

Имуще велию любовь к Твоему милосердию и желание прославити Тя, Богоизбранную Заступницу рода христианскаго, уповая на Твою милость, великая игумения моляше Тя, Владычице, почтити образом Твоим святым дивный Собор Похвалы Твоея, в камне Тя прославляющий. Такожде и мы к Тебе, Пречистая, прибегаем, умильно вопиюще Ти:

Радуйся, Утешительнице унывающих.
Радуйся, окормление бедствующих.
Радуйся, Похвалою от всех родов нареченная.
Радуйся, неусыпным Акафистом почтенная.
Радуйся, Иоанном Предтечею славимая.
Радуйся, Похвалы достойная единая.
Радуйся, северными лесами приятая.
Радуйся, пятиглавым собором прославленная.
Радуйся, в камне запечатленная.
Радуйся, благодатию окропленная.
Радуйся, твердыня восхождения.
Радуйся, млеко утешения.
Радуйся, Владычице, Горняя Спасительница Богохранимаго отечества Российскаго.

Кондак 4

Недоумевает ум наш, како подобает прославляти Тя, Спасительнице России, и дивное явление Твое в селении Леушино благодатным образом Твоим святым «Аз есмь с вами, и никтоже на вы». Мы же, дивящеся таковому Твоему произволению, из глубины души воспеваем Богу: Аллилуия.

Икос 4

Слышащи благодатная старица повеление Твое, Владычице, молитися пред Образом Твоим «Аз есмь с вами, и никтоже на вы», возрадовася и устави чин Акафиста Неусыпнаго в Леушинстем монастыре, идеже Ты, Преблагословенная, явися воплощенным образом Божественныя любви. Сего ради благодарственно и радостно поем Ти похвальная сия:

Радуйся, великия обители откровение.
Радуйся, ея благоговейное почтение.
Радуйся, благочестивою монахиней написанная.
Радуйся, словом Спасителя надписанная.
Радуйся, в сердцах молящихся "Богу вся возможна" начертавшая.
Радуйся, всех взывающих "Господи, спаси Россию" соединившая.
Радуйся, поругание от безбожников предсказавшая.
Радуйся, обильный урожай душ святых собравшая.
Радуйся, на вырубание сада Своего со слезами взирающая.
Радуйся, сими слезами души многих искупающая.
Радуйся, любовь к Царем Православным в сердцах всевающая.
Радуйся, дерзость неверных отсекающая.
Радуйся, Владычице, Горняя Спасительница Богохранимаго отечества Российскаго.

Кондак 5

Богоявленною звездою возсия икона Твоя спасительная, озаряющи путь заблуждающим в пустыне брани и возвещающи благословение Божие служащим Пречистому Твоему образу, призывает и нас велегласно воспевати Богу: Аллилуия.

Икос 5

Видевше чудеса преславныя не токмо от иконы Твоея «Аз есмь с вами, и никтоже на вы», но и от всех по подобию сея иконы списанных изображений, припадающе к ним со умилением, вопием Ти:

Радуйся, вселенскую любовь подающая.
Радуйся, веру в Свой Покров несущая.
Радуйся, словесы "Азъ есмь съ вами" утешающая.
Радуйся, глаголы "И никтоже на вы" ободряющая.
Радуйся, "Объятия Отча" нарицаемая.
Радуйся, "Уссурийскою" на востоце называемая.
Радуйся, "Даневскою" в Малой России сказуемая.
Радуйся, "Леушинскою" в Великой России именуемая.
Радуйся, святым Иоанном Кронштадтским "Спасительницею России" нареченная.
Радуйся, Леушинскую обитель во образ лавры Киевския устроившая.
Радуйся, молитвы за Россию возносящая.
Радуйся, иконою Своею к пастырю Кронштадтскому пришедшая.
Радуйся, Владычице, Горняя Спасительница Богохранимаго отечества Российскаго.

Кондак 6

Проповедающе чудеса Твоя, Богородице, от иконы Твоея, «Аз есмь с вами, и никтоже на вы» именуемыя, молим Тя, Пресвятая Дево, Богоизбранная Отроковице, со слезами: спаси от бед рабы Твоя, Богородице, и избави нас от нужд и печалей, научающи воспевати Богу: Аллилуия.

Икос 6

Возсия во едину от нощий свет небесный, на месте идеже имяше Похвальский собор создатися, егда Дева явися со свещею по подобию светоприемной звезды. Людие, зряще сие чудо, дивляхуся, славяще Тя, Мати Божия, и Сына Твоего, мы же, воспоминающе дивное сие видение со умилением Тебе глаголем:

Радуйся, Свете зари небесныя, в пучине жития нас проводящий.
Радуйся, Храме живый, всех нас животворящий.
Радуйся, Свеще у Престола Сына Своего присногорящая.
Радуйся, Лампадо неугасающая.
Радуйся, в бедах сущих спасающая.
Радуйся, честныя иконы Твоя чудесами прославляющая.
Радуйся, Похвальский собор освятившая.
Радуйся, великой игумении седмижды явившаяся.
Радуйся, чудными видениями ея утешавшая.
Радуйся, Ангельским славословием "О, Всепетая Мати" ея обрадовавшая.
Радуйся, с праведным Симеоном Богоприимцем показавшаяся.
Радуйся, Небесную сладость Царствия Божия старице открывшая.
Радуйся, Владычице, Горняя Спасительница Богохранимаго отечества Российскаго.

Кондак 7

Хотящи показати любовь Твою велию к христианскому роду, Пресвятая Владычице, избрала еси в жребий Свой девичию обитель в селении Леушино и в ней насельниц число умножила еси до седми сот, да вси, обуреваемии страстьми житейскаго моря, возмогут обрести зде тихое и надежное пристанище ко спасению, и Тобою наставляеми сподобятся наследия Царствия Небеснаго и пети со всеми Святыми Всеблагому Богу: Аллилуия.

Икос 7

Новый источник чудес явися в стране северней икона «Аз есмь с вами, и никтоже на вы» нарицаемая, егда безбожныя ополчишася на землю Русскую, ввергнути ю в геенну огненную желающи. Ты же, Всемилостивая, явилася еси Спасительницею России по молитвам святаго праведника Твоего Иоанна. Тем же славяще Тя вопием:

Радуйся, Духом Святым осененная.
Радуйся, благодатию Божиею предочищенная.
Радуйся, Горних сил похвало.
Радуйся, яко Господь с Тобою.
Радуйся, Своего избранника праведнаго Иоанна Кронштадтскаго посетившая.
Радуйся, его молитвам внимавшая.
Радуйся, ко спасению Россию ведущая.
Радуйся, колеблющихся вразумляющая.
Радуйся, падающих подымающая.
Радуйся, безбожныя обличающая.
Радуйся, беззаконников безумных посекающая.
Радуйся, от плевел сердца очищающая.
Радуйся, Владычице, Горняя Спасительница Богохранимаго отечества Российскаго.



Кондак 8

Странное и радостное видение явила еси святому праведному Иоанну Кронштадтскому, показуя ему Предвечнаго Младенца Господа Иисуса Христа на руках Твоих, Пресвятая Дево. Не отвержи и нас, Мати Божия, да радостно вопием Богу нашему и Сыну Твоему и Царю Славы Христу: Аллилуия.

Икос 8

Весь мир православный славит имя Твое, Пречистая Богородице. Радостно и утешительно есть взирати на Лик Твой лучезарный, имже являеши многия и преславныя чудеса, наипаче же во время шествия нашего по водам земных страстей и печалей. Егда же грех наших ради страшное потопление на ны найдет внезапу, да спасемся Тобою от погибельнаго омута греха, благодарными усты воспевая Ти сице:

Радуйся, глубину милосердия Твоего грешным показующая.
Радуйся, утопающих держащая.
Радуйся, недуги наша душевныя и телесныя изцеляющая.
Радуйся, всех, яже с Тобою, спасающая.
Радуйся, к покаянию призывающая.
Радуйся, молящимся внимающая.
Радуйся, нераскаянных грешников исправление.
Радуйся, в бедах наших спасение.
Радуйся, правосудие Божие являющая.
Радуйся, беззаконнующих от лица земли истребляющая.
Радуйся, о конце мира сего напоминающая.
Радуйся, слезами Россию омывающая.
Радуйся, Владычице, Горняя Спасительница Богохранимаго отечества Российскаго.

Кондак 9

Вся Ангельския силы восхваляют Тя, Пречистую Деву, превыше всех светлостей; истинно Чистейшую Тя величает вся тварь без конца. Ты же молиши о всех верно зовущих о Тебе Богу: Аллилуия.

Икос 9

Ветия многовещанныя не могут воспети достойно Твой светозарный Лик, о Преблагословенная и Мати Владыки Небесе и Земли. Твой образ святый над бурными водами дней наших земных скользящий хранит нас от потопления в житейских буднях, всегда веселяще взор стремящихся к Тебе выну. Мы же умиленно взирающе на образ сей со Святым праведником, благоговейно лобызающего ноги Пречистаго Сына Твоего, радостно вопием сице:

Радуйся, молитвами святаго Иоанна Кронштадтскаго Россию спасавшая.
Радуйся, в смутные времена свой народ не оставлявшая.
Радуйся, пастырю Кронштадтскому явившаяся.
Радуйся, образом Своим «Аз есмь с вами, и никтоже на вы» Россию и ныне спасающая.
Радуйся, Предвечнаго Младенца Господа Иисуса Христа показующая.
Радуйся, благодатную радость дарующая.
Радуйся, Церкви Православныя цвет благоуханный.
Радуйся, на спасение людем образ Свой давшая.
Радуйся, мудрости и мужеству научающая.
Радуйся, в вере всех прибегающих к Тебе утверждающая.
Радуйся, обетование о молитвенном предстательстве за Россию не изменяющая.
Радуйся, народ российский воскресившая.
Радуйся, Владычице, Горняя Спасительница Богохранимаго отечества Российскаго.

Кондак 10

Спасти хотя род человеческий от вечныя муки и потопления, Человеколюбец Господь Тебе Царицу Небесную дарова земным на помощь, глаголя: "Се Мати Моя". О, Преблагословенная, Ты еси печальным утешение, обидимым заступница, больным целительница, утопающим спасительница, вопиющим: Аллилуия.

Икос 10

Стена необоримая и столп нерушимый от лица вражия явилася еси, Пречистая Богородице, от бед и нужды всех просящих Твоего заступления избавляющи, грядущия на землю Русскую бедствия предсказавшая чрез преподобнаго Серафима, столпника Вырицкаго. Мы же с любовию взирая на чистейший Лик Твой глаголем сице:

Радуйся, народ Свой от врагов защитившая.
Радуйся, Вырицкаго столпника Своим молитвенником избравшая.
Радуйся, на тысящедневное стояние пред Своим Образом его позвавшая.
Радуйся, блокадный град на Неве отмолившая.
Радуйся, Спасительницею России явившаяся.
Радуйся, смертно болящих исцелившая.
Радуйся, монахинею Варсонофией и благочестивым архимандритом сохраненная.
Радуйся, в Киев-град принесенная и тамо до срока сокрытая.
Радуйся, в Свято-Георгиевской обители паки чудесами прославленная.
Радуйся, промыслом Божиим обретенная.
Радуйся, Малую и Белую Россию с Великою духовно соединяющая.
Радуйся, тех раздранные ризы обновляющая.
Радуйся, Владычице, Горняя Спасительница Богохранимаго отечества Российскаго.

Кондак 11

Пение похвальное всеумиленно приносим Ти, Всеблаженная Мати, всея страны Российския Спасительнице. Преблагословенная Мати Божия непрестанно изливаеши милости роду человеческому, мы же вси упование наше на Тя возложивше, радостно вопием Богу: Аллилуия.

Икос 11

Свет радости, о Всемилостивая Владычице, возсия во дни тыя, егда Ты, Преблагая, благословила еси написание честнаго образа Своего «Аз есмь с вами, и никтоже на вы». Жребий игумении великой даровала еси на небеси избраннице Своей, да гиблющия овцы словеснаго стада Церкви Российския и ныне воедино соберет, сего ради со умилением вопием Ти:

Радуйся, скорбных и немощных обымающая.
Радуйся, их любовию материнскою покрывающая.
Радуйся, верности Святой Руси научающая.
Радуйся, покоящияся под водами рукотворнаго потопа храмы не забывающая.
Радуйся, поруганные святыни защищающая.
Радуйся, память о затопленной обители Леушинской воскрешающая.
Радуйся, земныя стояния предстоянием Богу благословляющая.
Радуйся, благодать от затопленных храмов молящимся являющая.
Радуйся, со ангелы затопленныя Престолы посещающая.
Радуйся, «Аз есмь с вами, и никтоже на вы» нам возвещающая.
Радуйся, "яко и мы с Тобою, Пречистая", от нас приемлющая.
Радуйся, на Русскую Голгофу-на-водах возшедшая.
Радуйся, Владычице, Горняя Спасительница Богохранимаго отечества Российскаго.

Кондак 12

Благодать Божественную испроси нам у Сына Твоего, Преблагословенная Владычице, и простри Покров Твой святый, избави нас от невзгод и печалей, от мысленных затоплений на нас действуемых, да спасаеми Тобою воспоем Богу: Аллилуия.

Икос 12

Поюще чудеса Твоя от иконы "Азъ есмь съ вами, и " изливающияся преобильно, Пречистая Дево, хвалим, поем и величаем Тя, поклоняемся образу Твоему сему святому, праведных молитвенников Твоих славословим, веруем и уповаем, яко испросиши, Пресвятая, одесную стояния у Престола Сына Твоего и Бога нашего воспевающим Тя сице:

Радуйся, материнский плач над Россиею простирающая.
Радуйся, слезами Своими ея омывающая.
Радуйся, Китеж-град в триех затопленных обителех явившая.
Радуйся, воды рукосотвореннаго моря Рыбинскаго раздвигшая.
Радуйся, на водах поминание приемлющая.
Радуйся, веру в воскресение Святой Руси укрепляющая.
Радуйся, заре духовнаго возрождения.
Радуйся, новым мучеником за Христа ограждение.
Радуйся, на западном рубеже России утвержденная.
Радуйся, от края и до края Святой Руси пронесенная.
Радуйся, землю Русскую поясом Своим опоясывающая.
Радуйся, Похвало Русская.
Радуйся, Владычице, Горняя Спасительница Богохранимаго отечества Российскаго.

Кондак 13

О Всепетая Мати, Пречистая Госпоже наша Богородице, Спасительнице всех с верою к Тебе притекающих, прими сие малое моление наше, избави нас от всяких бед, скорбей и напастей, возврати Святую Русь на дарованный ей Богом путь неповрежденныя веры, всякую злобу и вражду отжени от нас, избави от потопления мысленнаго, и будущия изми муки о Тебе вопиющих: Аллилуия.


Сей Кондак читается трижды,
затем икос 1 "Ангелом с небесе"
и кондак 1 "Взбранной Воеводе"

Икос 1

Ангелов и всех небесных сил честнейшая, Владычице, вложила в сердце благодатней игумении Леушинстей Таисии написати образ Похвалы Твоея и нарещи его «Аз есмь с вами, и никтоже на вы» яко знамение спасения нас, грешных. Егоже и узрев искусно инокинею написаным, взываше к милосердию Твоему сице:

Радуйся,Похвало Богоматери возсиявшая. Радуйся,списком с Нея обновившаяся. Радуйся,местом явления Леушино избравшая. Радуйся,на всю Россию просиявшая. Радуйся,чудотворною нареченная. Радуйся,тайною Божественною окропленная. Радуйся,блаженной игумении в Леушино четырежды являвшаяся. Радуйся,святыми явлениями ю просвещавшая. Радуйся,Леушинскую обитель садом Своим в Северной Руси возрастившая. Радуйся,в Северный Удел Свой ту обустроившая. Радуйся,Иверию, Афон, Киев и Дивеево Леушином продолжившая. Радуйся,Покров Свой над ним простершая. Радуйся,Владычице, Горняя Спасительница Богохранимаго отечества Российскаго.

Кондак 1

Взбранной Воеводе и Спасительнице российския, яко избавльшеся от злых, благодарственная восписуем Ти, раби Твои, но яко имущая державу непобедимую от всяких нас бед свободи и от враг видимых и невидимых спаси, да зовем Ти: Радуйся,Владычице, Горняя Спасительница Богохранимаго отечества Российскаго.





Молитва Божией Матери пред Ея иконою

«Аз есмь с вами, и никтоже на вы»

О, Всеблагая Заступнице рода христианскаго, Мати Держащаго вся десницею Своею Христа Бога нашего! Излей на ны милости и щедроты его. И да не убоимся и не устрашимся враг видимых и невидимых, яко рекла еси уповающим на Тя «Аз есмь с вами, и никтоже на вы».

Сохрани истинную Святую православную Церковь и обитель нашу от расколов и ересей. И положи начало покаяния народа нашего. Возврати Святую Русь на дарованный ей Богом путь неповрежденной веры, да наполнится фимиамом молитв и расцветет, аки крин сельный. Да поживем во благочестии и чистоте, всегда храними Тобою от искушения антихристова, нашествия иноплеменных, междоусобныя брани, труса, огня, глада и мора; от напрасныя смерти, пленения и раздоров семейных; монашеское житие укрепи и спаси ны, Пречистая, яко уповаем на Тя по реченному Тобою: «Аз есмь с вами, и никтоже на вы».

Молися о нас, Пресвятая Владычице Богородице, ко Господу Богу нашему, милующему и спасающему, да не лишит ны защиты и Царствия Своего присвоения, иже и сам рече верным Своим: "Азъ есмь с вами, и никтоже на вы". Емуже слава, держава, честь и поклонение, сила и величие подобает Отцу и Сыну, и Святому Духу, ныне и присно и во веки веков. Аминь. Кондак, глас 6

Призри на ны, Всепетая Богородице, возсияй просвещение сердцам омраченным и озиари стадо Твое, Пречистая елико бо хощеши, и можеши, яко Мати сущи Зиждителя Твоего, и возопий молящым Тя: аз есмь с вами, и никтоже на вы.

Величание

Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающим к нему.

Ино величание

Величаем Тя, Пресвятая Дево, Небесная наша Мати, и чтим образ Твой святый, имже всех притекающих к нему, заступаеши и благодатной силой души наша исполняеши.

Канон умилительный ко Пресвятой Владычице нашей Богородице


Песнь 1

Ирмос: Колесницегонителя фараоня погрузи, чудотворяй иногда Моисейский жезл крестообразно поразив, и разделив море, Израиля же, беглеца, пешеходца спасе, песнь Богови воспевающа.

От скверных устен хваление приими, Всенепорочная, якоже прежде Сын Твой, Бог же мой и Господь прият две лепте вдовицы и разрешение прегрешений моих подаждь, яко да по долгу славлю Тя.
Ангельское пение подобаше Ти, Матери Божией, Творца бо сих родила еси страшно и паче смысла, но приими, всех Царице, и от нас малое приношение, честную Твою икону почитающих.
Благотворити рабом Твоим произволивши, Владычице, противныя полчища врагов силою Сына Твоего и Твоею, Всемогущая, отгнавши от паствы Твоея, храм создати к защищению на вратех благоволила еси, Богоневесто.
Изыде от нечестиваго царя повеление не покланятися первообразно Сына Твоего, Дево, Божественному изображению, и Твоему, Богомати, и святых всех, и возмути верных собрание, но Ты же вскоре разорила еси.

Песнь 3

Ирмос: Утверждей в начале Небеса разумом, и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Иконоборцев нечестивых стремление услышавши, честная и Боголюбезная вдовица, ужасными руками икону Твою носящи, Всечестная, на волны морския слезоточащи пусти.
Скрывашеся убо судьбами Сына Твоего долгое время во глубинах морских, но манием Божественным в паству Твою изыде.
Чудо трепетное и славное видяху в мори, обитающии в Афонстей Горе, ибо последова светлость благодати Твоея и услади сиянием иконы всех, прославляющих Тя.
Радующеся, надеяхуся, Чистая, множества монашествующих одержание иконы Твоея получити, но Ты державною Твоею рукою обители Твоей подала еси яко хранилище некрадомо.

Седален, глас 4

Веселое днесь Заступницы нашея торжество, да взыграется тварь, да ликовствуют человечестии собори, созывает нас Святая Богородица видети огненосную икону Свою и лучами милости верных просвещающую. Тем, радующеся, вопием: спаси, Госпоже, от глада, огня, меча и всех бед почитающих явление Твое верно.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.

Нашествия нечестивых отгоняющи от паствы Твоея, Вратница быти изволила еси, Всеблагая, но сохрани сию и пребывати во веки благоволи поющую честное изображение светоносныя иконы Твоея, Владычице.
Виждь, Чистая, иноков соборы паствы Твоея, окружающих икону Твою благохвальную, разрешение грехов просящих и жития исправление, и Божественныя славы причастниками быти, Всенепорочная.
Всею душею и мысли правостию в пастве Твоей вси сликующе, псалмы и песньми духовными, и пением Божественным икону Твою почитают, прощение просяще и душ спасение, Ты же сие подаждь, Владычице Богоневесто.
Храм Твой просвещается, Владычице, светом Твоим, и украшается Божественными песньми, яко обогатися велиим сокровищем, иконою Твоею пречистою, Божественная же Твоя ограда силою благодати Твоея Небо словесное показуется.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Да посрамятся лица нечестивых и заградятся уста отрицающих и умаляющих светлую и Божественную икону Твою, Владычице, и во огнь негасимый и тьму вечную да послются мучитися.
Храм Твой, Дево, яко рай другий показася ныне, древо жизни имея — икону красоты Твоея, юже усердно вси со благоговением и любовию целующе, Отроковице, спасаемся.
Реку Тя сладкую и поток насыщения, манну Небесную, мед от камени, изобилие и благодать приснотекущую стяжавше, Отроковице, во обители обитающии благодарно поют рождество Твое.
Дивно превознесеся величие иконы Твоея, Богородице Дево, всюду бо лучи испущает и просвещает усердно поющих неизреченное рождество Твое, Владычице.

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Призри благосердно на паству Твою, Пречистая, и всякий навет и вред присно востающи на ню осуети, и сохрани невредиму.
Покров и хранилище икона Твоя бысть, Владычице, еюже от врагов мысленных избавляются, прибегающи, иноков совокупления и верных соборы, душею и сердцем славословят Тя, Богомати.
Призывание имени Твоего воистину душам есть очистилище и скверных мыслей истребление, и отгнание лукавых духов, Богородице Приснодево.
Поем вси благоговейно икону Твою пречистую, в храм Твой входящи, в Божественное веселие, и душам исцеление почерпаем, Богоневесто.

Кондак, глас 4.

Совозсия днесь Свету Воскресения свет чистыя иконы Твоея, обоя весело торжествующе вопием: сохрани раб Твоих благодатию, Владычице.

Икос

Древле израильтеский люд столпом огня путенаставивый и чермную волну сему подславы в знамение свободы от работы мучительския, Той и ныне икону Своея Матере огнеобразну показует, во извество безмерныя благости и Хранительницу, море пешеходящую, Святоименной Горе подает; тем по долгу благодать почитающе, вопием: сохрани раб Твоих благодатию, Владычице.

Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.

О пастве Твоей Предстательница буди, Чистая Дево, и древния милости Твоя покажи на рабех Твоих, Бога рождшая, православно Сыну Твоему зовущих: благословен Бог отец наших.
Познаша, Владычице, роди агарянстии силу Твою, находящи суетно на любезную паству Твою, и падоша безчестною смертию праведно, Чистая Богоблаженная.
Блажен, Владычице, Божественный храм Твоея светлости, стяжав внутрь, яко велие сокровище, подобия Твоего Божественное изображение, егоже ныне целующе, славословим Христа, Тя прославльшаго.
Исполнися, Пречистая, уст Твоих Божественное проречение, блажат Тя Ангелов и человеков множества и поют согласно Рождество Твое: благословен Бог отец наших.

Песнь 8

Ирмос: Седмерицею пещь халдеиский мучитель, Богочестивым неистовно разжже, силою же лучшею, спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Юже возлюбила еси Богособранную паству Твою и пребывати выну в той благоволи, укрощающи безбожных агарянов волны, мирную жизнь подающи верою вопиющим: благословите, священницы, пойте, людие, Благодатную во вся веки.
Странна чудеса Твоя и преславна, Владычице, море, земля и небо послушает Ти, но соблюди плавающих мирнаго моря пучины, спасаеши бо преходящих от всех бед и возводиши к высоте Небесней поющих: людие, превозносите Божию Матерь.
Кто изрещи возможет чудес Твоих бездну и величия всечестныя иконы Твоея, от неяже изливается священной обители Твоей и всем приходищим всех благ независтво, ихже причащающеся, благочестно воспевают Благодатную во вся веки.
Радующеся поет Тебе, Богородице Всепетая, благочестивая и блаженная паства Твоя, Божественную благодать приемлюще, Дево, от Тебе и Царствия Сына Твоего причастниками просит Тобою, вопиющии: радуйся, Благодатная, во вся веки.

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Ужасошася Ангелов воинство и человеков роди, Всенепорочная, страшнаго и паче ума рождества Твоего, како и Дева пребыла еси, и Мати Божия быти сподобилася еси, сего ради по долгу поем, благословим и покланяемся иконе Твоей.
Ограждение и стена духовная, столп велий и утверждение обители Твоей и всем верным даровалася еси от Бога, ихже и сохрани неврежденных Божественное изображение иконы Твоея величающих.
Осуети, Дево, нечестивых советы и беззаконная ухищрения, часто находящия на стадо Твое и прожени сих далече со студом и конечному разорению предаждь, да познают силу и власть Твою, Богоневесто.
Призри, Дево, ныне на нас от высоты славы Твоея, Владычице, благоговейно икону Твою почитающих и прошения наша исполни Божественных даров, и прегрешений даруй оставление.