Акафист Пресвятой Богородице перед Ея иконой, именуемой "Казанская"

Кондак 1

Избранной от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти:

Радуйся, Заступнице усердная рода христианскаго.

Икос 1
Ангел предстатель послан бысть рещи Богородице "Радуйся", егда Бог Слово воплощашеся во утробе Ея: и мы, грешнии, прославляюще явление чудныя Ея иконы и Божественнаго Младенца Спаса Христа, со умилением вопием Благодатней:

Радуйся, Богоизбранная Отроковице.
Радуйся, Мати Божия.
Радуйся, Царице Небесе и земли.
Радуйся, светлое Церкве Небесныя и земныя украшение.
Радуйся, Ангелы чтимая.
Радуйся, певаемая от Серафим.
Радуйся, светлое пророческое сбытие.
Радуйся, апостолов похвало.
Радуйся, мученическое исповедание.
Радуйся, преподобных венче.
Радуйся, праведных веселие.
Радуйся, грешных упование.
Радуйся, Заступнице усердная рода христианскаго.

Кондак 2

Видящи, Всенепорочная, с высоты Небеснаго жилища Своего, идеже с Сыном Твоим в славе пребываеши, скорбь рабов Твоих в новопросвещеннем граде, яко гневнаго ради Божия посещения вера Христова поругаема бывает агарянским зловерием, благоволила еси явити икону Свою, чудесы ю прославляющи, да утверждаемии знаменьми Твоея благодати, христолюбивии людие верно вопиют Богу: Аллилуиа.

Икос 2

Разумение трикратнаго явления Богоматере мудрая отроковица ищущи, тече ко властем, поведающи им дивное явление и грозное прещение: мы же дивящеся свыше данному отроковице вразумлению, благоговейно вопием к Преблагословенней:

Радуйся, устнами чистыми хвалу Богови совершающая.
Радуйся, тайны благодати Божия верным открывающая.
Радуйся, верных известная похвало.
Радуйся, молние, неверных устрашающая.
Радуйся, славою чудес Твоих верных разум озаряющая.
Радуйся, агарянскаго зловерия обличение.
Радуйся, гордыни их низложение.
Радуйся, веры христианския утверждение.
Радуйся, почитания святых икон освящение.
Радуйся, скорбь нашу в радость претворяющая.
Радуйся, несумненною надеждою нас увеселяющая.
Радуйся, Заступнице усердная рода христианскаго.

Кондак 3

Сила Вышняго благодатию Богоматере умудри и укрепи отроковицу к исканию многоценнаго Божия дара, и та, с верою дерзающи о Господе, приступи к труду и, скрытое в земли обретши сокровище святыя иконы Богоматери, радостно возопи к Богу: Аллилуиа.

Икос 3

Имеющи благоутробное промышление о новопросвещенных людех града Казани, от пречестныя Твоея иконы токи чудес источила еси, Владычице, слепым телесныма очима зрение подавающи, омраченных же душевно светом богопознания и благочестия озаряющи, девствующим под осенением Твоея иконы пристанище небурное дарующи. Сего ради зовем Ти:

Радуйся, явлением иконы Твоея тьму лютых обстояний отгоняющая.
Радуйся, лучами чудес всех просвещающая.
Радуйся, слепых прозрение.
Радуйся, омраченных смыслом просвещение.
Радуйся, славо Православия.
Радуйся, тихое пристанище ищущих спасения.
Радуйся, Мати целомудрия.
Радуйся, покрове и ограждение девства.
Радуйся, Еюже ликовствует все множество верных.
Радуйся, Еяже ради рыдает демонское полчище.
Радуйся, всех христиан вожделенная Помощнице.
Радуйся, всех скорбящих Радосте.
Радуйся, Заступнице усердная рода христианскаго.

Кондак 4

Бурю смятений и крамолы врагами воздвигнутую в стране нашей утолити тщащься блаженный Ермоген, списатель чудес Твоея, Богомати, иконы, слезно пред нею моляшеся и, видев, яко воинству православному в щит и победное знамение Твоя икона даровася, верою укрепляемый до конца живота своего, вопияше Богу: Аллилуиа.

Икос 4

Слышавше православнии воини откровенную Преподобным Сергием святителю Арсению тайну, яко предстательством Богоматере суд об Отечестве нашем преложен на милость, икону Богоматерню, яко знамя победное, приимше, исхитиша матерь градов русских из рук супостат и возопиша Заступнице христиан:

Радуйся, Мати Бога Вышняго.
Радуйся, яко за всех молиши Сына Твоего, Христа Бога нашего.
Радуйся, яко всем твориши спастися в державный Твой покров прибегающим.
Радуйся, Заступнице всех сущих в скорбех и болезнех.
Радуйся, всем молящимся сокрушенным сердцем пред пречистым Твоим образом полезная дарующая.
Радуйся, избавление зол всем, невозвратно надежду имущим на Тя.
Радуйся, тихое и доброе пристанище.
Радуйся, скорая Помощнице.
Радуйся, готовый и теплый покрове спасения.
Радуйся, источающая нам неоскудныя милости.
Радуйся, предваряющая на помощь.
Радуйся, избавляющая от всех бед.
Радуйся, Заступнице усердная рода христианскаго.

Кондак 5

Боготечная звезда явися Твоя, Богомати, икона, всю страну Российскую обтекающая, лучами чудес Твоих осиявающая всех блуждающих по морю страстнаго жития, мрак печалей и мглу всяких недуг и скорбей прогоняющая и наставляющая на путь спасения с верою к Тебе притекающих и вопиющих к Богу: Аллилуиа.

Икос 5

Видев царь Петр, яко от святыя иконы Богоматерни благодатию Божиею содеваются многия чудеса, приемлет ю в путеводительницу воинству своему и в день брани на свеев в щит и покров, и победив до конца врага с помощию Богоматере, тем камень совершенный во основание новаго царствующего града положи, икону же Твою чудную, яко освящение, яко щит и ограждение, в сердце града постави. Сего ради вопием Пречистей:

Радуйся, жилище и доме Христа Бога нашего.
Радуйся, вместилище неизреченныя Его славы.
Радуйся, граде одушевленный, присно царствующий.
Радуйся, палато преукрашенная.
Радуйся, Радосте градов и весей.
Радуйся, непобедимое христиан в бедах хранилище и предградие.
Радуйся, Церкве Православныя похвало.
Радуйся, Русской земли утверждение.
Радуйся, христолюбиваго воинства Помощнице.
Радуйся, врагов одоление.
Радуйся, от бед избавление.
Радуйся, Матерними Твоими щедротами всех посещающая.
Радуйся, Заступнице усердная рода христианскаго.

Кондак 6

Предстояще пред пречистым Твоим образом архиереев сословии и вси людие, монаси и мирстии, проповедуют, Госпоже Богородительнице, великия Твоя милости, яко грады ограждаеши, обители покрываеши, веси защищаеши, и, ведуще Тя воистинну Помощницу сильну и непобедиму, со слезами приносят Ти молитвы, да простреши к Сыну Твоему Богоносныя руце за люди Твоя, во еже избавити нас от всех бед и напастей, да благодарне вопием Богу: Аллилуиа.

Икос 6

Возсиявши просвещение истинное и отгнавши древле лесть агарянскую во новопросвещенней стране Казанской, ныне во всех градех российских светиши светом чудес и милостей: притекающии бо с верою ко Твоей иконе цельбоносней скорбей избавление, недугов исцеление и радости всякия исполнения приемлют, вопиюще Тебе усердно:

Радуйся, неистощимый источниче святыни.
Радуйся, многотекущая реко Божественная благодати.
Радуйся, грешных с Богом примирение.
Радуйся, грехов наших очищение.
Радуйся, благочестия Наставнице.
Радуйся, в добрых делех утверждение и помоще.
Радуйся, добрыя обеты приемлющая.
Радуйся, благим намерением способствующая.
Радуйся, злыя начинания разрушающая.
Радуйся, вражия козни расторгающая.
Радуйся, скорая человеком Помощнице.
Радуйся, милость сугубо нам подающая.
Радуйся, Заступнице усердная рода христианскаго.

Кондак 7

Хотящу народу православному исповедати милости Преблагословенныя Царицы Неба и земли и по силе благодарственная принести о избавлении его от нашествия иноплеменных, дивному храму, созданному в честь пречудныя иконы, победная в дар принесе, да вси памятующе милость Богоматере, спасшия град сей и страну, выну воспевают Богу благодарными усты: Аллилуиа.

Икос 7

Стольному граду России святая икона Твоя, Богомати, воистинну явися благая Одигитрия, якоже древле Цареграду: к Тебе бо прибегают людие, помощи Твоея на начало пути и дел своих просяще и благодарственная приносяще моления пред пречистою иконою Твоею за избавление от скорбей и напастей, Тебе Помощницу и Заступницу крепкую ведают. Темже благодарственно вопием Ти:

Радуйся, Российския страны покрове.
Радуйся, Православия в ней ограждение и утверждение.
Радуйся, несокрушимый щите воинов наших.
Радуйся, броне их неуязвимая.
Радуйся, козни врагов обличающая.
Радуйся, яко паучину их растерзающая.
Радуйся, нечестия обличение.
Радуйся, крамолы разрушение.
Радуйся, юных от заблуждений исправление.
Радуйся, старцев утешение.
Радуйся, душевредных учений низложение.
Радуйся, душеполезных знаний дарование.
Радуйся, Заступнице усердная рода христианскаго.

Кондак 8

Странно и сумнителъно неверующим слушати, како от иконы Твоея токи благодати истекают, воня животная благоухает: мы же, верующе слову, реченному Тобой, Владычице, к первонаписанней иконе: "С тобой Моя благодать и сила", уповаем, яко и с сею иконою благодать Твоя выну: темже благоговейно предстояще лобызаем ю, поклоняемся ей, яко Тебе Самей сущей, честь бо иконы на первообразное восходит, и Твоя благодать сею иконою знамения и чудеса содевает всем с верою притекающим к Тебе и вопиющим Богу: Аллилуиа.

Икос 8

Вся бывши горе, к Небесным взята, и земных не оставляеши, Богомати, священным Твоим предстательством: имаши бо матернее дерзновение ко Христу Богу нашему. Темже утверди в мире глубоце православных житие и вся полезная всегда даруй рабом Твоим, да величающе воспеваем Ти:

Радуйся, Невместимаго вместилище.
Радуйся, осененная силою Вышняго.
Радуйся, прозябшая Клас Небесный.
Радуйся, мир весь душепагубнаго глада избавльшая.
Радуйся, выну ходатайствующая за род наш.
Радуйся, яко много может молитва Твоя пред Сыном Твоим и Богом.
Радуйся, всех нас при Кресте Сына Твоего усыновившая.
Радуйся, всегда Матернюю любовь к нам являющая.
Радуйся, Ходатаице вечных благ.
Радуйся, и во временней жизни полезная нам подающая.
Радуйся, известное прибежище наше во всех скорбных обстояниих.
Радуйся, несомненное утешение в печалех.
Радуйся, Заступнице усердная рода христианскаго.

Кондак 9

Всякаго естества ангельскаго превышшая явилася еси, Пресвятая Дево: Бога бо зачала еси плотию, Невместимаго всеми вместила еси во утробе Твоей, на руках носила еси Носящаго весь мир дланию: темже, яко Честнейшую Херувим и Славнейшую без сравнения Серафим величающе Тя, вопием о Тебе Богу: Аллилуиа.

Икос 9

Вития многовещанныя, яко рыбы безгласныя, видим о Тебе, Богородице: недоумеет бо всяк язык благохвалити Тя по достоянию, изумевает ум пети Тя, Богородице; обаче Благая сущи, приими и от нас архангельский глас, Тебе вопиющих:

Радуйся, Благодатная.
Радуйся, яко Господь с Тобою.
Радуйся, Благословенная в женах.
Радуйся, обретшая благодать у Бога.
Радуйся, родившая Спасителя миру.
Радуйся, Мати Сына Божия.
Радуйся, Родительнице Вечнаго Царя.
Радуйся, израстившая нам плод живота.
Радуйся, освященная Духом Святым.
Радуйся, осененная силою Всевышняго.
Радуйся, верная Рабо Господня.
Радуйся, яко Тя блажат вси роди.
Радуйся, Заступнице усердная рода христианскаго.

Кондак 10

Спасти хотящи многия от находящих зол, скорбей и болезней, чудную икону Твою, Богомати, даровала еси, еяже ради слепии презирают, хромии ходят, разслабленнии возстают, беснующиися исцеляются, земли плодоносие подается, людие от смертоносныя язвы избавляются, грады и домы от огня спасаются: темже прославляюще Бога, дающаго нам таковыя милости, вопием Ему усердно: Аллилуиа.

Икос 10

Стена еси, Богородице, стране Российстей, градом ограждение и слава, православному воинству на враги укрепление. Темже, благодаряще Тя, вопием:

Радуйся, прославляющих Тя прославляющая.
Радуйся, не чтущих Тя посрамляющая.
Радуйся, врагов устрашение.
Радуйся, от нашествия иноплеменных избавление.
Радуйся, воинов крепосте.
Радуйся, в дни брани забрало и ограждение.
Радуйся, в дни мира живоносный саде, увеселяющий сердца верных.
Радуйся, оружие, егоже трепещут демони.
Радуйся, спасительный елей, умащающий греховныя раны кающихся.
Радуйся, теплое наше упование.
Радуйся, несумненная наша Надеждо.
Радуйся, тихое и доброе пристанище.
Радуйся, Заступнице усердная рода христианскаго.

Кондак 11

Пение хвалебное и благодарственное приносят Тебе, Владычице, припадающе ко иконе Твоей и любезно лобызающе ю, дев лицы, под державным покровом Твоим тихое и мирное иноческое житие провождающии, и возложивше на Тя все упование, радостно вопиют Богу: Аллилуиа.

Икос 11

Яко светоприемную свещу, зрим Твою честную икону, Пресвятая Владычице: та бо невещественный огнь благодати Твоея восприемши, и в подобиих ея новы возжигает светильники, причастны тояжде силы благодатныя, и озаряет чудесы, наставляющи на путь спасения всех вопиющих Ти сице:

Радуйся, Невесто Неневестная.
Радуйся, Богоизбранная Отроковице, Мати Дево.
Радуйся, добрая Наставнице непорочнаго девства.
Радуйся, Хранительнице ревнующих о чистоте.
Радуйся, жен похвало.
Радуйся, дев величание.
Радуйся, вдов заступление.
Радуйся, сирот призрение.
Радуйся, нищих Питательнице.
Радуйся, нагих одеяние.
Радуйся, печальных утешение.
Радуйся, скорбящих веселие.
Радуйся, Заступнице усердная рода христианскаго.

Кондак 12

Благодать дати восхотевши почитающим Тя с любовию, Богородительнице, присущую Ти силу благодатную оставила еси во святых Твоих иконах, ибо Божественная благодать, спребывающи тем (иконам), знамения и чудеса выну содевает и душевных и телесных недуг исцеление всем с верою приходящим подает Твоими Богоматерними непрестанными к Богу молитвами о вопиющих Ему: Аллилуиа.

Икос 12

Поюще Твоя чудеса, бывшая в древняя и настоящая времена, хвалим Тя, яко Живоносный Источник благодати, яко неистощимую реку чудес, яко бездну милости и щедрот, и все упование по Бозе возлагающе на Тя и в сей и в будущей жизни, прославляюще Тя, вопием:

Радуйся, христиан непостыдное упование.
Радуйся, верных спасительное прибежище.
Радуйся, ненадежных надеяние.
Радуйся, отчаянных спасение.
Радуйся, бане, омывающая совесть.
Радуйся, росо, оживляющая души.
Радуйся, болезней врачевство скорое и безмездное.
Радуйся, от всех бед быстрое избавление.
Радуйся, Утешительнице во всякой скорби.
Радуйся, из глубины погибели спасающая.
Радуйся, отрадо в день смерти.
Радуйся, единая Надеждо и по смерти.
Радуйся, Заступнице усердная рода христианскаго.

Кондак 13

О Всепетая Мати, рождшая всех святых Святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, души спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: Аллилуиа.
(Этот кондак читается трижды, затем икос 1 и кондак 1)


Икос 1
Ангел предстатель послан бысть рещи Богородице "Радуйся", егда Бог Слово воплощашеся во утробе Ея: и мы, грешнии, прославляюще явление чудныя Ея иконы и Божественнаго Младенца Спаса Христа, со умилением вопием Благодатней:

Радуйся, Богоизбранная Отроковице.
Радуйся, Мати Божия.
Радуйся, Царице Небесе и земли.
Радуйся, светлое Церкве Небесныя и земныя украшение.
Радуйся, Ангелы чтимая.
Радуйся, певаемая от Серафим.
Радуйся, светлое пророческое сбытие.
Радуйся, апостолов похвало.
Радуйся, мученическое исповедание.
Радуйся, преподобных венче.
Радуйся, праведных веселие.
Радуйся, грешных упование.
Радуйся, Заступнице усердная рода христианскаго.

Кондак 1

Избранной от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти:

Радуйся, Заступнице усердная рода христианскаго.



Молитвы Пресвятой Богородице перед Ея иконой, именуемой "Казанская"

Молитва первая
О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя: не отврати лица Твоего от прибегающих к Тебе, умоли милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь Свою Святую да незыблему соблюдет от неверия, ересей и раскола. Не имамы бо иныя помощи, не имамы иныя надежды, разве Тебе, Пречистая Дево: Ты еси Всесильная христиан Помощница и Заступница. Избави всех с верою Тебе молящихся от падений греховных, от навета злых человек, от всяких искушений, скорбей, бед и от напрасныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия Твоя, сподобимся Небеснаго Царствия и тамо со всеми святыми прославим Пречестное и Великолепое Имя Отца и Сына и Святаго Духа. Аминь.

Молитва вторая
О, Пресвятая Владычице Богородице, Царице Небеси и земли, вышшая ангел и архангел и всея твари честнейшая, чистая Дево Марие, миру благая Помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящияся, со слезами к Тебе припадающия и покланяющияся пречистому и цельбоносному образу Твоему, и помощи и заступления Твоего просящия. О, Всемилостивая и Премилосердая Дево Богородице Чистая! Воззри, Госпоже, на люди Твоя: мы бо грешнии не имамы иныя помощи, разве Тебе и от Тебе рождшагося Христа Бога нашего. Ты еси заступница и предстательница наша. Ты еси обидимых защищение, скорбящим радование, сирым прибежище, вдовам хранительница, девам слава, плачущим веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой Пречистый образ с Предвечным на руку Твоею держимым Младенцем, Господем нашим Иисусом Христом взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему: яко Тебе слава подобает ныне и присно и во веки веков. Аминь.

Тропарь Пресвятой Богородице перед Ея иконой, именуемой "Казанская"

Тропарь, глас 4
Заступнице усердная, Мати Господа Вышняго, за всех молиши Сына Твоего, Христа Бога нашего, и всем твориши спастися, в державный Твой покров прибегающих. Всех нас заступи, о Госпоже Царице и Владычице, иже в напастех и скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Кондак, глас 8
Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы: ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.

Величание
Величаем Тя, Пресвятая Дево, Богоизбранная Отроковице, и чтем образ Твой святый, имже точиши исцеления всем с верою притекающым.



КАНОН ПРЕСВЯТОЙ БОГОРОДИЦЕ ПРЕД ИКОНОЙ «КАЗАНСКАЯ»

глас 4
Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
Благоговеют Ти, Богородице, Ангелов начальницы, и святых чини честно служат, праведнии красуются, Небесных Ходатаицу блажат Тя, купно же и земля и Небо в веселии светло восхваляют Тя, и мы, грешнии, милости просим: озари наша сердца, Владычице, воспети песнь святыя Твоея иконы явлению.
Приидите, соберитеся, христоименитии людие, умы тайно очистившеся, во святую церковь Матере Христа Бога нашего, источает бо нам неоскудно от святыя иконы источник духовен, целебен душам и телом, песнь вопиющим: благословен из Тебе рождейся Бог наш.
Дивит, Пренепорочная, и ужасает всяк слух странно чудо Божественнаго Твоего рождества: Херувимскаго Творца зачала еси! Како Огнь нестерпимый во утробе носила еси! Како сущую Жизнь плотию облекла еси и Живот всему миру родила еси, Бога купно и Человека!
Под кров Твой, Дево Госпоже, прибегаем, вси роди человечестии, просвети нас светом Рождества Твоего, грешныя рабы Твоя, молящияся прилежно и кланяющияся пречистей Твоей иконе, просяще от Тебе прияти великия милости.
Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.
Кую Ти достойную похвалу наше принесет конечное неможение, яко явлением пречистыя Твоея Божественныя иконы независтныя источники целебныя источаеши верно прибегающим к Тебе рабом Твоим?
Божественныя Твоея иконы святое явление, Богородице Дево, яко светозарное возсия нам солнце, преславных чудес лучи пущающи, тьмы лютых обстояний отгоняющи священными Твоими, Владычице, предстательствы.
Исполнила еси благодати иногда первописанную Твою икону, Госпоже Дево Богородице, и ныне таже благодать истинствует сиянием веры чудес, яко Тоя ради первописанныя, ко спасению верно к Тебе по Бозе прибегающим.
Покланяемся, Богородице, Твоему пречистому образу и пресладкому Твоему Младенцу, превечному и незаходимому Свету Христу, Имже спасла еси от лютых зол и тления смертнаго все человеческое естество.
Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Почтим, людие, чистыя в чистоте икону Девы Богородицы и Тоя Божественнаго Младенца, Христа Бога нашего, и лобызаем, и прославляем со страхом и трепетом: почитаем бо икону благочестно, паче же почитаем Самую Тую сущую Чистую Богоматерь.
Давид Божественный и чудный пророк, издалеча провидя, глагола: лицу Твоему помолятся богатии людие. Мы же, вернии, покланяемся и лобызаем честную икону, душами купно и телесы освящаемся.
Евангелия Христова богогласный списатель Лука Божиим мановением всенепорочный Твой написует образ, Богородице, и Младенца Превечнаго на руках Твоих вообразив, к немуже притекающия напастей и бед избавляеши, и вся покрываеши, и спасаеши Твоею милостию.
Ты еси похвало и венец святым всем, о Царице, Ты упование наше и Помощнице по Бозе, и на Тя надежду спасения нашего возложихом вси. Тебе молимся, яко Божии Матери: одожди грешным рабом Твоим богатыя Твоя душеспасительныя милости.
Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Всяко, Пречистая, существо воспети недоумеет Тя: паче бо Горних умов превозвысилася еси, рождши неприступнаго и страшнаго Всецаря и Бога. Но яко милостива и скорая человеком Помощница, вонми молению раб Твоих и даруй Твою помощь.
Идеже осенит благодать Твоя, Богородице, страхом исчезают демони и разрушается злокозненное тех мечтание, бегают дуси темнии, радуется же верных все множество, Тебе песнь хвальну от сердца вопиюще; радуйся, Божественный покрове душ наших.
Безочесным сладкое зрение дается, глухим слышание, немым благоглаголание, хромым хождение, прокаженным очищение, демонствуемым целомудрие и в болезнех сущим различных исцеление, осенением пречистыя Твоея, Богородице, иконы.
Не умолчим никогдаже, Богородице, псалмы и песньми воспевати величия Твоя, Обрадованная: Бога бо воистину воплотившагося родила еси во спасение наше всемирное и избавление.
Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.
Божественнаго Твоего Рождества, Дево Госпоже, пребогатая благодать, юже древле изглашением предала еси пречистому Твоему образу, неоскудне действовати великая же и преславная, во спасение на Тя надеющимся.
Идеже прославляется святое имя обрадованныя Богородицы, тамо всяческих благих источницы проливаются; приидите в чистоте, человецы, се бо явлением Божественныя Девы иконы сказует Царицы пришествие, во спасение всех верных.
Целения болезней, отгнание же страстей и душепитательное спасение, грехов прощение и вечное избавление от пречистыя Твоея иконы, Владычице, верно приходяще, приемлем, Богомати Всенепорочная.
К Тебе, Госпоже, прибегают роди правоверных, просят великия милости и приемлют неоскудно сущии в недузех исцеление, в страстех пременение, в печалех утешение; источи мне, Владычице, каплю душеспасительную, да со всеми и аз пою Твое величие.
Кондак, глас 8

Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы, ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.
Икос

Смысл очистивше и ум, притецем к Богородице, светло песньми ублажающе Ю, и пречистую икону Ея прославляем и чтим и, припадающе, покланяемся, яко Самой, сущей оной: честь бо иконы на первообразное восходит, и почитаяй и покланяяйся ей почитает самое первообразное, якоже Божественнии отцы рекоша. И аще кто не чтит Пресвятыя Богородицы и не покланяется иконе Ея, анафема да будет: посрамляет бо и погубляет не чтущия Ю, избавляет же от великих бед и зол благонравныя и богобоящияся рабы Своя.
Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.
Приидите, почерпем отпущение от неистощимаго источника, точащаго святыню, Пречистыя Девы, и Тоя Пречистаго Младенца, Божия Слова, нас ради вочеловечшагося. К Немуже возопиим: Творче, Избавителю препрославленный со Отцем и Духом, Боже, благословен еси.
Неусыпную, Чистая, и Богоприятную имущи молитву и непреодолеемую державу крепости, врагов наших дерзость, яже на ны, разори, и выя их под нозе верному воинству нашему низложи, да возвеселимся о Тебе, раби, Сыну Твоему вопиюще: отец наших Боже, благословен еси.
Радуемся и веселимся, вернии людие, чудному явлению иконы Пречистыя Владычицы Богородицы: река бо явися неисчерпаема, целебную воду точащи, слепым бо видети дает, и глухим слышание, хромым хождение и всем, сущим в недузех, безмездно исцеление.
Неиспытана глубина, недоведомо таинство, непостижим образ, Дево, зачатия Твоего, зачатие без семене, без мужа рождество, Безплотный воплотися, Превечный младенствует, Сын Божий Сын Тебе, Девы, бывает. Емуже вопием: Боже, благословен еси.
Песнь 8

Ирмос: Отроки благочестивыя в пещи Рождество Богородичо спасло есть, тогда, убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Ум Ангельский и человеческий ужасается, Богородице: како Бога Небеснаго, ложеснами объемши, воплотила еси? Како, Младенца рождши, яко Сына на руку носиши? Егоже ужасается тварь и трепещут горнии престоли, вопиюще непрестанно: Свят, Свят, Свят еси, Боже, препетый и превозносимый во веки.
Радуйся, сущая радосте всего мира, со Архангелом Гавриилом вопием Ти, Богородице. Радуйся, вместилище Невместимаго. Радуйся, Благодатная, носило Божества всего. Радуйся, Адамово воззвание, с Тобою Господь и Тебе ради с нами, спасая нас. Егоже поем и превозносим во веки.
Корень Иессеев освященный, корень греха нашего исторгнула еси, жезл Ааронов процветший, Жизнодателя цвета израстивши Христа, стамно манноприемная, смерти всю силу сокрушила еси и в породу жизни возвела еси род человеческий, темже Тя поем, добрых виновную.
Ты похвала христианом еси, Владычице, Ты оружие на враги и стена к Тебе прибегающим. Тя и ныне на помощь призываем, Госпоже: не даждь врагом вознестися на люди Твоя, иже Тебе не хвалят, ни Сына Твоего, Богородице, и Твоей иконе не кланяются, сих победи и души наша спаси.
Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.
Тебе, твердую Помощницу роду человеческому, Богородице Марие, лик пророческий многообразно провозвести: сень святую, небес пространнейшую, скрижаль Богописанную и купину неопалимую, дверь Богопроходную, гору же и лествицу, и мост, и жезл процветший, мы же воистину Богородицу Тя величаем.
Тайна глубины рождества Твоего ум ангельский ужасает, Дево, и пречистая икона демоны прогонит, и лица нечестивых омрачает, и в студ поревает: не терпят бо взирати на силу ея, бегают же и исчезают. Мы же любезно покланяемся и лобызаем и Тя, Богородицу, величаем.
Предстательница сущи неотступна к Вышнему Царю, яко имущи Матерне дерзновение непостыдно, в мире глубоце православных житие утверди, и отечество наше возвыси, и вся полезная даруй всегда рабом Твоим, да Тя, Богородице, величаем.
О всемилостивая христианом Помощнице! Не может Тя воспети достойно ум человеческий и ангельский, яко всея твари честнейши, Небесных и земных славнейши: всех бо родила еси Творца и Бога. Но, о Владычице, приими милостивно, юже Тебе от сердца возложихом песнь, спасай нас всегда, на Тя бо надеемся.
Светилен

Да почтится всепетая Мати Божия, Жизнь сущую рождши, Христа Бога нашего, райских дверей отверзение и всего мира очищение, к Животу возведение. Сей есть пророки глаголавый, Тому поклонимся, Богу и Спасу душ наших.

Акафист Пресвятой Богородице перед Ея иконой, именуемой "Песчанская"

[574x688]

Кондак 1

Взбранная Воеводо, всего мира Утешительнице и Надеждо спасения рода христианского, к Тебе припадаем во вся дни жизни нашея, яко к источнику всех духовных дарований, и молим Тя: услыши нас, вопиющих к Тебе в часы дневныя и нощныя, в болезнех и скорбех, в нуждах и напастех, всегда в радости зовущих.

Радуйся, Владычице мира, иконою Твоею Песчанскою сердца наша утешающая.

Икос 1

Ангелом предстателем наченши, восхваляет Тя, Матерь Божию, вселенная вся, яко Ты еси свет просвещения разума нашего, посредница наша между нами и Богом, Твоя Матерния молитвы много могут пред Престолом Вседержителя, Ты десницею Своею приводиши нас от земли к небеси, Ты неизглаголанное и непостижимое спасения нашего сокровище, и сего ради не вемы, грешнии, киими похвалами воспети благодарная Тебе, приими же от благих сердец величания сия:

Радуйся, в райской сладости всегда пребывающая.
Радуйся, таковые радости всем желающая.
Радуйся, любящих Сына Твоего чады Своими именующая.
Радуйся, милосердия Божия нам Ходатаице.
Радуйся, о продлении жизни на земли Сына Своего умоляющая.
Радуйся, за умерших всех без покаяния выну скорбящая.
Радуйся, со ангелом хранителем Хранительнице наша усердная.
Радуйся, на страшнем суде Сына Твоего едина надеждо на спасение наше.
Радуйся, Владычице мира, иконою Твоею Песчанскою сердца наша утешающая.

Кондак 2

Видиши, о Преблагословенная Мати Божия, како велико беззаконие рода человеческаго, и того ради попусти Господь на землю и живущия на ней глады, моры, трусы, сухости и потопления. Ты же, Всемилостивая, умоли Всеблагаго Бога, да удалит от рода сего фараонитское жестокосердие, и да будет он покорен деснице Господней, да приидет в совершенное покаяние, возопив Ему согласно: Аллилуиа.

Икос 2

Разумом совершенным небеснаго вестника Гавриила, благовествующаго Тебе волю Божию, яко Тебе единей быти блаженней в женах, восприяла еси, Мати Божия. Та же предрекла еси, яко ублажати Тя будут вси роди, и от того часа возопиют Тебе святое хваление сицевое.

Радуйся, от Превечнаго Бога всего мира избранная Отроковице.
Радуйся, вместилище, Спасителя Бога во утробу Свою приемшая.
Радуйся, Материю Того от Господа наименованная.
Радуйся, от тогоже времене весь мир Богоматернею любовию покрывающая.
Радуйся, живых надеждо и усопших упование в страшный час суда Божия.
Радуйся, к страшному ответу за жизнь нашу нас приуготовляющая.
Радуйся, от рождества до разлучения души от тела нашего нас не оставляющая.
Радуйся, Поборнице наша на рати злобных сил поднебесных.
Радуйся, Владычице мира, иконою Твоею Песчанскою сердца наша утешающая.

Кондак 3

Сила Вышняго спасе мир от потопления греховнаго воплощением от Тебе Сына Божия, Царице Небесная, ибо враг рода нашего диавол восхоте погубити в отчуждении от истиннаго Бога весь род человеческий, в беззаконии и идолослужении ходити поучая. Господь же разруши сети его посланием в мир Сына Своего Единороднаго, и Тя, Матерь Чистую, дарова нам, да побеждена будет сила вражия и да обратятся вси людие к Творцу своему Богу, вопиюще: Аллилуиа.

Икос 3

Имуще таковую Посредницу спасения нашего, молящеся не престаем взывати к Тебе: буди же нам ограждение и стена крепка и необоримая, сохрани нас в вере православной отеческой во вся дни жизни нашея, научи ны покорству чад Церкве Сына Твоего, юже стяжа Христос Кровию Своею честною. Сподоби нас благодарными быти Богу за великия милости Его, научи исполняти заповеди Его и уставы святоотеческия, направляющи нас, Всеблагая, на путь спасения. Избави от греха и гнева Божия, за еже воспевати Тебе благодарения таковая:

Радуйся, неусыпающая Молитвеннице и Ходатаице наша пред Престолом Божиим.
Радуйся, на небесех царствующая и нас доле не оставляющая.
Радуйся, всех радостей неисчерпаемый источниче.
Радуйся, сокровище, жизнь нашу услаждающее.
Радуйся, недремлющая, нас же спящих сохраняющая.
Радуйся, на труды дневныя нас благословляющая.
Радуйся, благодарения Богу приносити нас научающая.
Радуйся, во дни праздников на путь к храму Божию стопы наша направляющая.
Радуйся, Владычице мира, иконою Твоею Песчанскою сердца наша утешающая.

Кондак 4

Бурю внутрь имеюще помышлений спасительных, слышаша людие, окрест живущии, о велицей силе благодатней, исходящей от иконы Богоматере во граде Изюме, притекоша, припадающе ко образу с радостию великою, яко к Самей сущей Царице Небесней, имуще надежду на Тя, Пречистая, и в веселии сердец возопиша Богу: Аллилуиа.

Икос 4

Слышаша людие вси, яко верный Богу и Тебе, Богоматери, служитель Твой святитель Иоасаф, узрев во сне икону Твою, в неведомом храме в сорном месте лежащую, и лучезарное сияние из нея исходящее, потщася воспоминанием чуднаго видения направити стопы своя на путь искания святыни сея во всей обширной епархии своей. Егда же града Изюма достиже, вшед в церковь, виде икону Твою, Богомати, в притворе угли кадильныя ограждающую, и абие воспомянул есть нощное видение, и благодать от нея исходящую ощути, пад на колена, пред нею сице моляся: прости, Царице Небесная, небрежность твоих служителей, не ведят бо, чесо творят. Тебе же во умилении сердца возопи таковая:

Радуйся, икон Своих чудотворных Хранительнице усердная.
Радуйся, в сонных видениях от икон Своих многим силу благодатную показующая.
Радуйся, ветхи иконы лучезарным сиянием обновляющая.
Радуйся, христианом, в бедах сущим, ко святым иконам Твоим обращатися повелевающая.
Радуйся, неусыпающая Молитвеннице и Ходатаице наша пред Престолом Божиим.
Радуйся, святителя Иоасафа от ранния юности возлюбившая.
Радуйся, емуже чудотворную силу в иконе Твоей Песчанской открывшая
Радуйся, первыя его моления пред святынею сею приявшая.
Радуйся, Владычице мира, иконою Твоею Песчанскою сердца наша утешающая.

Кондак 5

Яко боготечную звезду, людие изюмстии икону Твою от рук святителя восприемше, потщашася новый храм Богу устроити. И бысть между создательми его распря на время некое: из загробнаго же мира умершая жена некоего богатаго помещика, трищи являющися мужу своему в сонном видении, повеле ему оставити скупость свою, еяже ради погибель души его бысть, и соорудити храм на богатство свое. Он же со страхом прият вразумление свыше, созда храм в честь Вознесения Сына Твоего, Пречистая, и в веселии сердца возопи Богу: Аллилуиа.

Икос 5

Видев исполнение Промысла Божия на себе во обретении святыни Песчанския, пребысть святитель Иоасаф во граде Изюме три дни и три нощи, по всяк час вознося в церкви благодарственное молебное пение пред Пречистым образом Богоматере, за еже удостоися чуднаго видения и глас слышати: сею иконою Пресвятая Владычица являет особое знамение Своего заступничества граду сему и страны целыя, чесо ради Богородице возопиим:

Радуйся, мира неиссякаемый источниче.
Радуйся, сердца наша неизреченною радостию наполняющая.
Радуйся, надежду имущих на Тя не посрамляющая.
Радуйся, иконам Своим силу чудодействовати дарующая.
Радуйся, земных и малодушных нас не оставляющая.
Радуйся, печаль житейскую от сердец наших прогоняющая.
Радуйся, безродных сирот заступающая Своим Покровом и благодатно сохраняющая.
Радуйся, райскою радостию души наша озаряющая.
Радуйся, Владычице мира, иконою Твоею Песчанскою сердца наша утешающая.

Кондак 6

Бысть некий учитель во граде Изюме, у негоже младенцы друг за другом умираша. Егда же последний бысть одержим болезнию велией, вземше родители его и несоша к иконе Твоей, Богомати, имуще едину надежду на Тя. Еще же на пути им сущим, конец постиже младенца сего. Родители же его, имуще великую веру Тебе, Пречистая, положиша младенца умершаго пред иконою Твоею. Во время же пения молебнаго начаша со слезами и воплем горьким взывати: Мати Божия, помози нам, спаси чадо наше. Ты же, Всемилостивая, видящи твердую веру их и упование на Тя, возвратила жизнь младенцу. Тогда же и людие, окрест стоящии, в радости неизреченной прославляху Тя, Пречистая, и Вседержителя Господа хваляху песнию: Аллилуиа.

Икос 6

Возсия икона Твоя чудотворная, Богомати, егда была принесена в новый созданный храм. Людие вернии стекахуся со всех стран жилищ своих и наполняху не толико храм, но и ограду, и в радости духовной взываху Ти сице:

Радуйся, первейшая Помощнице в создании храма нашего.
Радуйся, обогатившая оный иконою Твоею чудотворною.
Радуйся, поклонения наша приемлющая.
Радуйся, твердое основание упования нашего.
Радуйся, град наш Покровом Твоим присно покрывающая.
Радуйся, неусыпная Попечительнице наша.
Радуйся, Богоматернею любовию нас согревающая.
Радуйся, на всякий час в молитвах нас приемлющая.
Радуйся, Владычице мира, иконою Твоею Песчанскою сердца наша утешающая.

Кондак 7

Хотящи явити ко всем приходящим милосердие Свое и гнев Свой на служителя олтаря Господня, иже во искушение впад от врага рода человеческаго, завистию мучим, дерзнув запрети молебное пение Царице Небесней пред иконою Ея всем жителем, в весех живущим; егда принесоша его на одре и положиша пред чудотворным образом, нача молити Богородицу: Мати Милосердная, прости ожесточения сердца моего и воздвигни от одра болезни. По скончании же пения молебнаго, исцеление восчувствовав, востав, облобыза честный образ, со слезами благодарне вопия Богу: Аллилуиа.

Икос 7

Новое показа чудо Царица Небесная, егда во время пения "О Всепетая Мати" воскресшему младенцу уста откры и повелела еси ему гласом воздати хвалу Тебе. Вси же, зряще знамение сие, во умилении сердечнем возопиша Тебе тако:

Радуйся, умерших оживление.
Радуйся, рыдающих родителей увеселение.
Радуйся, чудесами от иконы Твоея к Себе призывающая.
Радуйся, безнадежных Надеждо крепкая.
Радуйся, Подательнице утешения унывающим.
Радуйся, в скорбех сущих приемлющая.
Радуйся, у Сына Твоего и Бога нашего всяких благ нам испрошающая.
Радуйся, всю жизнь нашу земную во благо нас устрояющая.
Радуйся, Владычице мира, иконою Твоею Песчанскою сердца наша утешающая.

Кондак 8

Странно и сумнительно неверующим слышати, о Преславная Мати Царя Небеснаго, како на Твой святый образ вернии людие очима своима и умиленными душами взирающе, и от скорбей избавляются, и от бед сохраняются. Буди же нам, Всеблагая, Ходатаица о спасении нашем, да вечно славим Тя со всеми небожители, вопиюще песнь: Аллилуиа.

Икос 8

Вся бывши горе и земных не оставляеши, о Всеблагая и Всемилостивая Мати Божия; Ты, якоже и Сын Твой, не хощеши смерти грешника, но еже обратитися и живу ему быти. За таковую Твою милость взываем вси Тебе:

Радуйся, иереев Божиих вразумление.
Радуйся, временно наказующая и вечно милующая.
Радуйся, в болезнех сущих к Себе призывающая.
Радуйся, истинному покаянию научающая.
Радуйся, надежду имущих на Тя никогдаже посрамляющая.
Радуйся, разслабленным телом и духом скорое врачевание подавающая.
Радуйся, во всякой беде и нужде нас не оставляющая.
Радуйся, во всякое скорби радость дарующая.
Радуйся, Владычице мира, иконою Твоею Песчанскою сердца наша утешающая.

Кондак 9

Всякое естество ангельское удивися о неописуемом мори чудес, изливаемом от икон Твоих, Богородице; Тебе ублажают вси роди, Тебе величают вся небесныя силы, и мы, земнороднии, Тебе едину отраду и утешение в жизни сей временней прославляюще, Тебе и Сыну Твоему вопием: Аллилуиа.

Икос 9

Ветии многовещаннии явишася людие, обретше помощь в велицем озлоблении своем, егда за беззакония их Господь попусти велицей болезни во граде Изюме быти и во всех весех его, и множество людей погибоша. Страх же нападе на всяк возраст. Темже взяша Пречистый образ Твой, несоша его освящения ради улиц и домов, с молитвою слезною взывающе: о Всеблагая Целительнице, спаси нас от смерти лютыя. Ты же, Всемилостивая, укротила бурю смертную, люди же научила еси благодарственно воспевати Богу славу подобающую. Тебе же Самой взывали сице:

Радуйся, слезы наша изсушающая.
Радуйся, бездно врачеваний неистощимая.
Радуйся, радость в храмины наша приносящая.
Радуйся, родителей милующая и детей сохраняющая.
Радуйся, веселие вечное нам уготовляющая.
Радуйся, с нами присносущая.
Радуйся, в земном уделе нас не оставляющая.
Радуйся, к небесному наследию нас руководствующая.
Радуйся, Владычице мира, иконою Твоею Песчанскою сердца наша утешающая.

Кондак 10

Спасти хотящи люди своя от зол многих, даровала еси икону Твою, Владычице, слепым в прозрение, хромым в хождение, расслабленным в возстание, беснующимся в исцеление, гордым в смирение, нераскаянным в покаяние, всем коегождо недуга исцеление, зол и скорбей и болезней отгнание, градов утверждение, земли плодоносие, за няже никтоже от земнородных возможет восхвалити Тя по достоянию, по величеству милости Твоея к роду человеческому. Мы же, любовию понуждаеми, дерзаем взывати Богу, усыновившему нас Тебе при Кресте Своем и даровавшему нам таковую Путеводительницу на небо: Аллилуиа.

Икос 10

Стена еси всем прибегающим к Тебе, Дево, всегда являешися и почитателю иконы Твоея Игнатию, имевшему благое намерение посетити святый град Иерусалим и Святую Землю, юже освяти Господь стопами Своими; Помощница еси явилася, егда той пад пред образом Твоим, просяше на путь благословения и помощи Твоея. Ты же, Всещедрая, неотложно чрез рабу некую обильную помощь денежную подала еси ему, да исполнит благое желание свое. Он же умиленною душею вознесе Тебе благодарственное хваление сицевое:

Радуйся, добрая намерения благословляющая.
Радуйся, на путь к Царствию Небесному наставляющая.
Радуйся, спасительною истиною нас вразумляющая.
Радуйся, к благочестию и целомудрию жизнь нашу направляющая.
Радуйся, на опасных путех нас охраняющая.
Радуйся, от соблазнов мира сего мудро отводящая.
Радуйся, от погибельнаго пути сохраняющая.
Радуйся, посещающих святая места и различныя святыни обильно благословляющая.
Радуйся, Владычице мира, иконою Твоею Песчанскою сердца наша утешающая.

Кондак 11

Пение хвалебное благодарственное приносяще Тебе, Владычице, вемы, каковую скорбь приносим, грешнии, Сыну Твоему отступствы своими, маловерием, суеверием и прочим зловерием. Молити убо Тебе, Всемилостивая, не престаем: Своим предстательством и ходатайством пред Престолом Божиим соедини нас во Святей Соборней и Апостольской Церкви, да будут вси едино, якоже Отец, Сын и Святый Дух. Да в единстве веры воспеваем Богу: Аллилуиа.

Икос 11

Яко светоприемную свещу, явила еси, Владычице, икону Твою во граде сем Изюме, источник благодатныя воды открыла еси близ храма Сына Твоего, идеже икона Твоя чудотворная Песчанская пребывает, слепорожденному младенцу прозрение от нея даровала еси, за еже людие от времене того почерпают благий дар сей на пользу душевную и телесную. Тебе же Самой Владычице от усердия своего взывают:

Радуйся, жизни нашея укрепление.
Радуйся, водою святою немощи наша врачующая.
Радуйся, почерплющим ея силы обновляющая.
Радуйся, беззакония наша истребляющая.
Радуйся, с верою приемлющим исцеление недугов подавающая.
Радуйся, неистощимый кладезю сокровищ духовных.
Радуйся, скверну нечистоты нашея умывающая.
Радуйся, чудотворною силою водный источник доныне сохраняющая.
Радуйся, Владычице мира, иконою Твоею Песчанскою сердца наша утешающая.

Кондак 12

Благодать исходит всегда, Пречистая, от иконы Твоея Песчанския; яко непобедимая Воевода на враги наша видимыя и невидимыя, нечистыя духи прогоняеши, враждующия миром и любовию умудряеши, непокорныя наказуеши, раздоры семейныя соузом любве связуеши, неведущия и неверующия на путь истинный наставляеши, мы же, прославляюще Тя, Всеблагую Помощницу в жизни нашей, благодарно воспеваем Богу: Аллилуиа.

Икос 12

Поем Твое из древних времен дивное защищение Отечества нашего, егда постигоша его глады и моры, огнь и опустошение, нашествия иноплеменных и междоусобныя брани. У Тебе, Владычице, отцы и матери, и малая дети со слезами помощи прошаху, Ты же, Всеблагая, спасение даровала еси неотложно: покрыла Покровом Своим Отечество наше. Мы же Тебе, Избавительнице нашей, вопием сие благодарение и похвалы сицевая:

Радуйся, правоверных верная Хранительнице.
Радуйся, правыя брани Споборнице.
Радуйся, христианских обителей и всех святынь Хранительнице.
Радуйся, о Отечестве нашем пред Богом Молитвеннице.
Радуйся, Отечества нашего Небеснаго Зиждительнице.
Радуйся, во времена нашествия иноверных наша Свободительнице.
Радуйся, во время глада наша Кормительнице.
Радуйся, во время бедствий нас не оставляющая.
Радуйся, Владычице мира, иконою Твоею Песчанскою сердца наша утешающая.

Кондак 13

О Всепетая Мати, приими от нас благодарное пение сие, Тебе возносимое. Буди нам в жизни сей Ходатаица пред Богом о жизни вечной, да выну благодарно восхваляем Тя и Богу поем: Аллилуиа.
(Этот кондак читается трижды, затем икос 1 и кондак 1)

Молитва Пресвятой Богородице перед Ея иконой, именуемой "Песчанская"
О Премилостивая и Премилосердная Мати Божия, Покровительнице града нашего Изюма и страны нашея, купно же и всего мира Молитвеннице, приими коленопреклонение ума и сердца нашего и услыши молитвы, во умилении душ наших Тебе возсылаемыя, якоже издревле приимала еси и молитвы любящих душ зде, пред иконою Твоею возносимыя. Помози нам в побеждении прелестей и соблазнов мира сего, не попусти нам отверженным быти вечнаго небеснаго блаженства. Ты едина наша радость и утешение в жизни сей временней, Ты едина наша надежда в жизни вечней. Веруем, яко Ты Своею Богоматернею любовию и снисхождением удостоиши нас с Собою вожделеннаго Царствия Сына Твоего. Тебе убо просим: не отступай от нас, Всеблагая, защищай от всех козней вражиих, не попусти нас чрез грехи наша лишитися милосердия Божия, изжени из нас леность в молитве и посещения храма Божия. Избави нас от малодушия, уныния, вражды, гнева, подозрения, зависти, клеветы, ненависти и гордости бесовския. Вразуми поправших заповеди Церкве Христовы. Сродником нашим даруй мир и любовь, да согласно поживут родители и дети. Да будет в стране нашей правда Божия, да сохранятся в народе нашем святоотеческия обычаи. Вознеси, о Всеблагая, усердныя молитвы пред Богом о всего мира умирении, да не погибнет род людский в пламени опустошения всемирнаго, да познают вси народи Отца своего Небеснаго и Тя, Матерь Божию, Заступницу рода христианскаго. Приведи вси народы к истинному покаянию и жизни греховныя исправлению, да не будет нам страшен день страшнаго суда Божия, но сподобит нас Господь с Тобою вечныя радости небесныя, Емуже подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Тропарь Пресвятой Богородице перед Ея иконой, именуемой "Песчанская"
Люди верные со дерзновением притецем к чудотворному образу Богоматери Песчанской, ибо она дарует граду сему и стране нашей велию милость и спасение душам нашим.