.

Канон, глас 1-й
Песнь 1
Ирмос: Твоя победительная десница боголепно в крепости прославися: та бо, Безсмертне, яко всемогущая противныя сотре, израильтяном путь глубины новосоделавшая.

Припев: Дивен Бог во святых Своих, Бог Израилев.

Врата смерти и вереи, Твоею смертию сокрушил еси Безсмертне, врата отверзи, Владыко, паче ума безсмертия усопшим, молитвами страстотерпец Твоих.

Припев: Упокой, Господи, души усопших раб Твоих.

Да Божественнаго живота сподобимся, сошел еси к смерти, тоя же испроверг сокровища, нас оттуду извлекл еси; ныне же, Жизнодавче, преставленныя упокой.

Слава: Ты мое тленное же и мертвенное восприим, в нетление облекл еси, и к безконечному житию и блаженному вознесл еси, идеже яко щедр, ихже приял еси, упокой.

И ныне: Рождшую еже от Бога Божие Слово, вернии воспоим: Та бо Всечестная путь жизни умершим бысть, Юже яко Богоприемницу и Богородицу, прославим.

Песнь 3
Ирмос: Едине ведый человеческаго существа немощь, и милостивно в не воображся, препояши мя с высоты силою, еже вопити Тебе Святый: одушевленный храме неизреченныя славы Твоея, Человеколюбче.

Дивен Бог во святых Своих, Бог Израилев.

Яко един благ сый, яко един многомилостив, яже благочестно к Тебе отшедшия, в небесных селениих упокой, идеже неизреченная радость и наслаждение, и идеже собор мученический веселится.

Упокой, Господи, души усопших раб Твоих.

Ты един явился еси на земли, Спасе мой, безгрешен, иже грехи мира вземляй яко милосерд; от мира сего преставльшихся верою, души упокой во дворех святых Твоих, в сладости райстей, Человеколюбче.

Слава: Смерти державу низлож, живот некончаемый всем верным источил еси Владыко; в том убо учини благочестно отшедшия, презирая безмерная прегрешения, и прощая грехи их, Человеколюбче.

И ныне: Без семене зачат, Чистая, Слово присносущное, плотски к нам пришедшее, и смерти крепость разорившее, и мертвым воскресение и жизнь вечную Своим милосердием дарующее.
Господи, помилуй. (Трижды)

Седален, глас 6-й
Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихя упокой, яко Человеколюбец.

Слава, и ныне:
Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Песнь 4
Ирмос: Гору тя благодатию Божиею приосененную, прозорливыма Аввакум усмотрив очима, из Тебе изыти Израилеву провозглашаше Святому во спасение наше и обновление.

Дивен Бог во святых Своих, Бог Израилев.

Умертвив ад непобедимою Твоею силою, вменен был еси в мертвых, един сый свободь, Христе, души свободи благочестивых, и еже в нем осуждения, святых мученик мольбами.

Упокой, Господи, души усопших раб Твоих.

Иже всех сый яко Владыка, противодостойную иже от Адама, Твоего заколения, избаву дал еси и цену; 2 темже молимся Твоим щедротам, преставльшияся упокой, согрешений подая оставление.

Слава: Приял еси, Спасе мой, еже во гробе положение; и яже во гробех жити осужденныя мертвецы, яко Бог, воскресил еси. Ныне же жизни присносущныя сподоби преставленныя, яко един человеколюбец.

И ныне: Спасеся род человеческий Рождеством Твоим: Ты бо родила еси нам ипостасный Живот, смерти потребление и к жизни соделовающий восход, Богородительнице пренепорочная Владычице.

Песнь 5
Ирмос: Просветивый сиянием пришествия Твоего, Христе, и осветивши Крестом Твоим мира концы, сердца просвети светом Твоего богоразумия, православно поющих Тя.

Дивен Бог во святых Своих, Бог Израилев

Исцеляяй от ада смертнаго, смерть прият, и смерти жало притупил еси; но Сам упокой, ихже приял еси, Жизнодавче, мученик мольбами.

Упокой, Господи, души усопших раб Твоих.

Умерщвления и тления человеки свободивый, души верно преставленных учини во дворех святых Твоих, отнюдуже отбеже всяка скорбь, и веселие водворяется.

Слава: Рай убо с Тобою повешенному яко, отверзл еси, ныне приими души, Владыко, к Тебе верою преставльшияся, подая им в Церкви первенец водворитися.

И ныне: Избавляющи на Тя надежды державу имущих, к пристанищу Божественныя воли тихо настави, Матерним Твоим дерзновением к Сыну Твоему, Благословенная Всенепорочная.

Песнь 6
Ирмос: Обыде нас последняя бездна, несть избавляяй, вменихомся яко овцы заколения, спаси люди Твоя, Боже наш: Ты бо крепость немощствующих и исправление.

Дивен Бог во святых Своих, Бог Израилев.

Яко милосерд, преставленным даруй прегрешений прощение, и вечное наслаждение подая, идеже сияет лица Твоего светлость, и озаряет страстотерпцы Твоя.

Упокой, Господи, души усопших раб Твоих.

Иже кровию от ребр Твоих истекшею мир искупил еси, верою усопшия убо, Христе, избави честными Страстьми Твоими, Ты бо цену за всех Себе дал еси.

Упокой, Господи, души усопших раб Твоих.

Иже создавый мя рукама пречистыма первее, и дух даровавый, и, к земли низпадша зле, паки обновивый краснейше, ныне души преставльшихся Сам упокой.

Слава: Чертогу Твоему светоносному, Господи, вселити сподоби, яже в вере к Тебе усопшия, тех презирая прегрешения, яко благ и милосерд и многомилостив.

И ныне: Поем Тя, Благословенная Чистая, Еяже ради нам возсия, сущим во тьме и сени смертней, правды незаходимое Солнце, Ты бо нашего спасения ходатаица была еси.

Господи, помилуй. (Трижды.)

Кондак, глас 8-й
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Икос
Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси, Создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа.

Песнь 7
Ирмос: Тебе, умную, Богородице, пещь разсмотряем вернии: якоже бо отроки спасе три Превозносимый, мир обнови, во чреве Твоем всецел, хвальный отцев Бог, и препрославлен.

Дивен Бог во святых Своих, Бог Израилев.

Сиянии пречистыя славы Твоея озаритися, Христе, подавай, от бури мирския к Тебе отшедшим, и тех сподоби с мученики взывати Тебе: хвалимый отцев Боже, благословен еси.

Упокой, Господи, души усопших раб Твоих.

Нов Адам воистинну быв, Адамов Содетелю, Иже клятву бо Адамову един потребил еси. Темже молимся Тебе: преставленныя упокой в сладости райстей, Христе, яко един милосерд.

Слава: Иже нашу естественную немощь един сведый яко Бог, благ же и милостив, вся, ихже преставил еси, идеже свет незаходимый присещает лица Твоего, учини, Христе, хвалимый отцев Боже и препрославлен.

И ныне: Закона сени, и древняя гадания Твоим преидоша Рождеством Богомати, Ты бо нам Божественныя благодати Свет возсияла еси; имже древних избавихомся долгов, Чистая, воспевающе Бога препрославленнаго.

Песнь 8
Ирмос: В пещи отроцы Израилевы, якоже в горниле добротою благочестия чистее злата блещахуся, глаголюще: благословите, вся дела Господня, Господа, пойте и превозносите во вся веки.

Дивен Бог во святых Своих, Бог Израилев

Скверну всю Твоих рабов усопших, Твоего человеколюбия росою отмыв, Тя песньми воспевати сподоби: благословите, вся дела Господня, Господа, пойте и превозносите Его во вся веки.

Упокой, Господи, души усопших раб Твоих.

Предстоятели, Спасе, десныя, верою оправдав молитвами страстотерпец, яже преставил еси верныя, покажи поющия: благословите, вся дела Господня, Господа, пойте и превозносите Его во вся веки.

Слава: Иже смерти и живота имеяй всякую власть, яже верою усопшия Твоего сияния улучити благоволи, взывающия: благословите, вся дела Господня, Господа, пойте и превозносите Его во веки.

И ныне: Спасения ходатаица нам была еси, всенепорочная, и в непреходимыя веки пребывания же и светлости; Тебе, Дево чистая, присно вся дела благословим и превозносим во вся веки.

Песнь 9
Ирмос: Образ чистаго Рождества Твоего огнепалимая купина показа неопальная; и ныне на нас напастей свирепеющую угасити молимся, пещь, да Тя, Богородице, непрестанно величаем.

Дивен Бог во святых Своих, Бог Израилев.

Пощади яко Бог человеколюбив и милостив Твое создание и упокой в селениях святых Твоих, идеже мученицы вси веселятся, верою преставленныя от временных, Многомилостиве.

Упокой, Господи, души усопших раб Твоих.

Имеяй милостей бездну, препобеждающую рабов Твоих прегрешения, ихже, прием, избра, упокой в недрех Авраамлих, Человеколюбче, и с Лазарем во свет Твой всели.

Слава: Избавитель и Спас быв роду человеческому, распятия ради, яже от нас преставил еси, яко благодатель, наслаждения Божественнаго сподоби, и живота нетленнаго, и веселия и светлости.

И ныне: О яже паче ума чудес Твоих! Ты бо, Дево, едина всем, иже под солнцем, подала еси разумети новейшее чудо, Пречистая, Твоего рождества недоуменнаго; темже Тя вси величаем
.




[551x604]

Чин литии, совершаемой мирянином дома и на кладбище

Молитвами святых отец наших, Господи Иисусе Христе, Боже наш, помилуй нас. Аминь.

Слава Тебе, Боже наш, слава Тебе.


Святый Боже, Святый Крепкий, Святый Безсмертный, помилуй нас. (Трижды)

Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. (Трижды)

Слава:, и ныне:

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Господи, помилуй. (12 раз)

Слава и ныне:

Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.



Псалом 90
Живый в помощи Вышняго, в крове Бога Небеснаго водворится. Речет Господеви: Заступник мой еси, и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится: обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему. Яко ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его; с ним есмь в скорби, изму его, и прославлю его; долготою дний исполню его, и явлю ему спасение Мое.
Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. (Трижды)



Тропарь, глас 4-й:
Со духи праведных скончавшихся, душу раба Твоего, Спасе, упокой, сохраняя ю во блаженной жизни, яже у Тебе, Человеколюбче.
В покоищи Твоем, Господи, идеже вси святии Твои упокоеваются, упокой и душу раба Твоего, яко Един еси Человеколюбец.
Слава: Ты еси Бог, сошедый во ад, и узы окованных разрешимый, Сам и душу раба Твоего упокой.
И ныне: Едина Чистая и непорочная Дево, Бога без семени рождшая, моли спастися душе его.



Седален, глас 5-й:
Покой, Спасе наш, с праведными раба Твоего, и сего всели во дворы Твоя, якоже есть писано, презирая, яко Благ, прегрешения его вольная и невольная, и вся яже в ведении и не в ведении, Человеколюбче.
Кондак, глас 8-й: Со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная.



Икос:
Сам Един еси Безсмертный, сотворивый и создавый человека, земнии убо от земли создахомся, и в землю туюжде пойдем, якоже повелел еси, Создавый мя и рекий ми: яко земля еси, и в землю отъидеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа.
Честнейшую Херувим...
Слава Отцу и Сыну и Святому Духу, и ныне и присно и во веки веков. Аминь.
Господи,помилуй (Трижды), благослови.
Молитвами святых отец наших...
Во блаженном успении вечный покой подаждь, Господи, усопшему рабу Твоему (имя), и сотвори ему вечную память.
Вечная память. (Трижды)
Душа его во благих водворится, и память его в род и род.

Молитва об усопших Пресвятой Богородице

Пресвятая Госпоже, Владычице Богородице! К Тебе прибегаем, Чистая: Ты бо еси стена необоримая, предстательство и покров всем, прибегающим к Тебе с верою и упованием! Молим Тя, Преблагословенная, услыши молитву недостойных раб Твоих и предстани присно за усошпих рабов Твоих. Ты выну ходатайствуеши о православно-чтущих Тя, прибегающих к покрову Твоему и тепле молящихся Тебе в болезнех, скорбех и напастех; но Твое ходатайство, Твое заступление наипаче благопотребно нам по смерти нашей; Ты выну являеши скорую помощь Твою рабом Твоим и не престаеши всем молящимся Тебе являти Свое благосердие и изливати великия и богатыя милости Сына Твоего и Бога нашего на всех верующих: на Тя единую по Бозе имамы твердую надежду и упование: никтоже, Тебе моляся, отходит от Тебе без помощи, радости, и утешения, и услаждения. Молим Тя, о, Пресвятая Богородице, Владычице мира, надеждо ненадежных, буди убо днесь ходатаицею к Рождшемуся от Тебе за усопших рабов Твоих, умоли Сына Твоего и Бога нашего дати им прощение и оставление прегрешений. Моли, Богородице, много бо может моление матернее ко благосердию Владыки; от Тебе бо приемлет Господь всяко слово прошения, приими убо и Ты наши молитвы и моления, приносимыя Тебе, Пресвятая Дево, от всего сердца нашего и всея души нашея за души усопших рабов Твоих. Молим Тя, помози им. Владычице, матерним Твоим ко Господу дерзновением достигнути тихаго пристанища в небесном Иерусалиме; помози им, Заступнице усердная, непостыдно предстати на страшнем и втором пришествии Сына Твоего, идеже кийждо от своих дел
или прославится, или постыдится; помози им, Благодатная, оправдатися пред лицем Седящаго на престоле славы, да не постыдятся пред Ангелы и всеми Святыми, пред всем миром, горним и дольним. О, Всепетая Мати, Владычице Богородице, молим Тя, заступи, спаси, сохрани и будущия изми муки усопших рабов Твоих, да не погибнут во век, но да спасутся Твоими молитвами и прейдут от смерти в живот. Мы же, грешнии и недостойнии раби Твои, не отступим от Тебе, не престанем во умилении взывати к Тебе: Пресвятая Госпоже, Царице и Владычице! моли Сына Твоего и Бога нашего об усопших рабех Твоих, да даст им Господь отпущение прегрешений; посли им, Благодатная, достигнути вожделеннаго отечества и узрети блага небесныя, ихже око не виде, ухо не слыша и на сердце человеку не взыдоша; моли о них, Богородице, да сподобятся, по Твоему предстательству, вкушати блага сии во царствии Сына Твоего, Христа Бога нашего, Ты бо еси единая благословенная в женах многомощная Заступница, надежда, покров и прибежище всем, притекающим к Тебе, – Ты еси мост, преводяй сущих от земли на небо и райских дверей отверзение. Аминь.

ЧИТАТЬ ТОЛЬКО КЕЛЕЙНО!
память 1 ноября

КАНОН СВЯТОМУ МУЧЕНИКУ УАРУ,
емуже дана бысть благодать умолити за умершия Клеопатрины прародители, не сподобльшияся прияти святаго крещения*


Канон, глас 8, имый краестрочие: умоли, Уаре, за внешния наши роды
Песнь 1

Ирмос: Колесницегонителя фараоня погрузи, чудотворяй иногда, Моисейский жезл крестообразно поразив и разделив море, Израиля же беглеца пешеходца спасе, песнь Богови воспевающа.

Святый мучениче Уаре, моли Бога о нас.

Умолен буди, Господи, святым Твоим Уаром мучеником и облецися в милость и щедроты; и сия даже до ада излиются, Человеколюбче, и ущедрят, яже от нас просимыя, богатным Твоим милосердием.

Святый мучениче Уаре, моли Бога о нас.

Мучениче Христов великий, озлобленныя и безпомощныя воспомяни, седящия во мраце тьмы не просветимыя, и не престани, припадая ко щедрому Господу, дондеже утешит я богатным Своим милосердием.

Святый мучениче Уаре, моли Бога о нас.

О роде Клеопатры дивныя умолити возмогл еси, славный страстотерпче, убо и днесь, возмогая, возможеши свободити от мук, иже от нас воспоминаемыя, аще прилежно о них ко Господу помолишися, тебе бо ради утешит я Владыка богатным Своим милосердием.

Слава Отцу, и Сыну, и Святому Духу и ныне и присно и во веки веков. Аминь.

Богородичен:<Безпомощным Благая Помощнице, призри от славы Своея, Владычице, ко мраку адову и виждь беды умиленных, пред Тобою нами воспоминаемых, и не престани о них умоляя Своего Сына и щедраго Господа и Владыку, дондеже утешит я богатным Своим милосердием.
Песнь 3


Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Лик святых Сил Небесных подвигни с собою на молитву, мучениче, и сотвори дело пречудно, и велико, и честно, паче же радость неимущим надежды и утешения не уповающим, горьким нашим неверно умершим прародителем и еже с ними воспоминаемым, еже даровати сим от Господа прощение и велию милость.

Изрядный страстотерпче и Христу любимый, увеждь, коль желательна свобода мучимым и отрада, сице убо и наша сродники, и иже с ними неверия ради вечныя муки притяжавшия, меры не обрящут своим радостем, аще испросиши сим от Господа прощение и велию милость.

Уаре, добропобедный страдальче, милостив буди и к нашим молением, и зри удрученных несказанную нужду, и сам, от жалости понужден, неотступно молися к Человеколюбцу Владыце, да подаст им прощение и велию милость.

Богородичен: Всемирная надеждо, богоприятное селение, наше к Богу примирение, Марие Владычице, приими прошения настоящаго предстояния и не престани моляся к Сыну Своему и всяческих Господу, да подаст безнадежным Тебе ради прощение и велию милость.
Седален, глас 5:

Аще молишися за весь мир, великомучениче, и не престаеши, прося всем милости и всяким преступником всеми образы люто Владыце досадившим и непрестанно досаждающим, иже мертвыми делы себе до конца умертвившим и ничтоже приобретшим, яко зло сотворшим, такоже, страстотерпче, предстани и о наших умерших сродницех, яко возможная начиная, не отступи, моляся и припадая к милующему всех Господу, да простит и помилует, иже во тьме седящия и люте зело огорченныя.
Другий седален, глас 3:


Радости вечныя насельниче, Небесному покою тезоименитый, Уаре великий, дерзая, да дерзнеши воспомянути пред Господем умиленныя четы наших прародителей, аще бо и не в гробе оных полагаем тя, усердным же прошением к жалости, еже от них, совокупляем тя. Темже припади и молися, не отринет бо предстояния твоего Владыка, но от безмерныя благостыни приклонен, пошлет преогорченным избавление и велию милость.
Слава, и ныне, Богородичен:

Пресветлая Госпоже, от Небесных сил превоспеваемая, и выну возвеличаемая, Мати Царя всяческих, где убо и когда хощет умножитися Твоя слава и величество, не тогда ли, егда грешныя заступаеши и весь мир молитвами Своими покрываеши, темже и днесь умножи, Владычице, велелепоту Твоего превозхождения, избави теплыми Твоими молитвами от лютых мук неверныя наша и некрещенныя сродники и с яже о них и с ними воспоминаемыя, и подаждь оным избавление и велию милость.
Песнь 4


Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакумом зову ти: силе Твоей слава, Человеколюбче.

Ельма убо, страстотерпче, всех любиши с верою к тебе прибегающих, темже и любимь быти от молящих тя благопоспеши. Что же ино с желанием прославити тя Человеколюбный сотворит, не поданием ли просимыя милости умиленным и всякия отрады лишенным вечным узником, тако и впредь, о доблий мучениче, не оскудей о сих моляся.

Зима люта и спасения безплодие облежит в нечестиих умершия и плач безотраден, зде убо вочтени* суть, иже от нас воспоминаемыя. Ты же, страстотерпче, соединити сих к роду праведных потщися и не оскудей о них моляся.

Адова мрачная темница во веки да не обымет прародители и сродники наша и вся, воспоминаемыя с ними: тебе, дивному страдальцу, силу неверия и греховную мощь низложившу, тако и впредь сих еже с Клеопатриным родом простити не оскудей, мучениче, моляся.

Богородичен: Тобою, Пречистая, познахом славити всяческих Содетеля, и от Тебе Плотоносца непрелестна Спаса величати навыкохом, и Тя, Владычицу, хвалим, и Тебе поклоняемся, и молим, помилуй умершия в неверии наша сродники, и еже избавити сих не оскудей к Сыну моляся.
Песнь 5

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Всяко дарование, мучениче, и всяка милость от милостиваго Господа изливаемы, аще и предивны, и пречудесны суть, слагаеми же к прощению в нечестии умерших, величество преизящно сему оставляют. Темже и днесь великая сотворити потщися, Владыку, мучениче, умолити.

Не отвратися, Господи, от нашего умиления, ниже помяни множество грехов наших, паче же помяни древния Своя милости, и ради щедрот Твоих, и ради Уара страдальца добляго, не оскудей в богатстве безмернаго Твоего милосердия, но излей милости и прощение, еже от нас воспоминаемым.

Есть убо, великомучениче, и достизает человеколюбие Владычне и к сущим в мори далече, темже предстани и днесь и, припадая, умоли Его еже помиловати удаленныя и веры, и Крещения отчужденныя умершия наша сродники и всем, иже с ними воспоминаемым, даровати прощение и велию милость.

Богородичен: Предстани, Владычице, нашему изнеможению и буди выну в нуждах, помогая нам всюду и присно, Ты бо еси христианская Надежда и Упование, темже не отрини наша прошения, но сотвори совершена и исполнена неисписанною Твоею благодатию.
Песнь 6


Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Шатания вражия да не возрадуются, души в корысть получивши, ты же, мучениче, теплыми своими молитвами разруши хотения его, умоляя Господа еже простити нами воспоминаемыя, и от вечныя муки тоя и нас избавити.

Начало нашему подвигу Клеопатрина рода прощение, отсюду убо виновное восприяхом возставити тя на молитву, и о еже нами поминаемых не презри, великомучениче, и не отрини грешных предстояние, но, потщався, испроси у Владыки Христа оным прощение и от горьких мук избавление.

Иже неверия ради срете конец зол, и чаяние благих весьма погибе прогневания Божия ради, ты же, страстотерпче, дерзновение прием, радость отпущения вместо страшнаго томления от Небеснаго Царя испроси и, извед от горести, соблюди во Владычней милости.

Богородичен: Кая, Владычице, злоба превозможет Твоя матерния молитвы? Воистину убо, аще предстанеши и днесь, моля за просимыя Тобою, сотвориши оным радостное прощение, избавление и велию милость.
Кондак, глас 4:

Христу последуя, мучениче Уаре, Того испив чашу, и венцем мучения увязеся, и со Ангелы ликовствуеши, моли непрестанно за души наша.
Икос:


Воспомяни наша глаголы, светлый жителю Небесный, Христов славный великомучениче Уаре, вечному покою тезоименитый, и великими твоими страдании непроходимое и светлое покоище приобретый от непреходныя темницы, и томления непрестаннаго, и нужды, потщися богоприятными твоими молитвами избавити рабы умиленныя, ихже ради молим тя, предстояще и во усердии взывающе, исполни наша прошения, святе, и Христа Бога моли непрестанно за души наша.
Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице, ликующе, пояху: благословен еси, Боже отец наших.

Яко же солнце, Господи, всех просвещаеши, и всем дождь независтно изливаеши, и прогневающим Тя милость непрестанно даруеши, и ныне послушай Уара, Твоего страдальца, и пролей милость Твою до конца оныя отчужденным сродником нашим и яже с ними неверным, Человеколюбче.

Ныне, якоже и прежде, щедр буди, Господи, и умолен явися, Владыко, якоже о Клеопатре содея, сице и о нас, Милостиве, сотвори; посли Своя щедроты и милосердие ко еже нами воспоминаемым, источник бо еси милости неисчерпаемый.

Аще пророк, восперяяся, поет милости Твоя, Господи, во веки, убо не оскудевша Тя в щедротах веруем, яко милосердия Твоего пределы неизмеримы, и от пучины во глубину потопшим излияти милости Тя умоляем, исполни убо ради мученика сие, о Владыко наш.

Богородичен: Гору Тя сказует премудрый во пророцех, мы же тому и еже от Тебе Каменю Богородия изыти без примешения мужеска, веруем; Имже наше спасение и от глубин адовых возведение получихом, Владычице, возведи и днесь от ада воспоминаемыя нами, да Тя, Всемилостивую, непрестанно величаем.
Песнь 8


Ирмос: Мусикийским органом согласующим и людем безчисленным поклоняющимся образу в Деире, три отроцы не повинувшеся, Господа воспеваху и славословяху во вся веки.

Шары да будут словеса древния Твоя, милости, Господи, сказующия и нашу надежду воздвижущия, яко послушал еси святыя Твоя, Господи, еже помиловати неверныя умершия, ихже и днесь приводим Ти на молитву, да прошения их ради ущедриши инославно умершия, ведением и неведением Тебе, Владыко, досадившия.

Агнче Божий, Пречистою Своею Кровию нас искупивый, Феклино и блаженнаго Григория моление услышав, Мефодия со многими и Макария прием прошения, и отраду, и избаву зловерным подав умершим, и Златоустаго о сих молитися написати воздвигнув, приими убо, Владыко, с сими славнаго Уара и молитвами их воспоминаемыя от нас прости и помилуй.

Радость нам испроси, великомучениче, возвеселимся бо, аще обрящем твоими молитвами избавленныя от вечных мук наша сродники; всегда бо Твоя молитвы Владыка слышит и прошения исполняет, ты же убо не оскудей о сих и ныне моляся, да тя выну прославляем.

Богородичен: Пренепорочная Владычице, обилуй множеством милосердия и щедрот, дивная и Безневестная Мати Царева, нам бо милости взыскающим, где инде сию обрящем, аще не к Тебе поспешим, припадающе, Ты бо Поток сладости преизобилен нам родила еси, Преблагословенная.
Песнь 9

Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес, тем Тя, Богородицу, Ангелов и человек чиноначалия величают.

О Бозе да возможеши, Уаре славный, богоприятными твоими молитвами восприяти и излияти милости, иже до конца оныя отчужденным, Един бо есть щедрот и милосердия Родитель, и вся Ему возможна яко Владыце, к Немуже неотступно, страдальче, молися, простити и помиловати яже от нас воспоминаемыя.

Дело соверши предивно, о великомучениче, и славе твоей прикладно, еже от Господа прощение и праведнаго Его гнева пременение испросити огорченным темнаго зловерия ради нашим прародителем и еже сих, в горести и во ожидании лютейших сущих, да возмеши в безстрашное избавление, идеже веси Владыка прощенныя положити.

И кое убо чудо явится сего дивнейши, кая слава знаменитейши, и кое милосердие таковаго больши, аще ты, мучениче, сожалев, умолиши милостиваго Господа отпустити грех нечестия, иже от нас поминаемых, и лютаго томления оных избавити.

Богородичен: Владычице милостивая, человеколюбивая и зло не помнящая, приими жалость нашего прошения и ходатайствуй неотступно о милости к милостивому Твоему Сыну и Владыце, еже помиловати и простити грех инославия умершим сродником нашим и яже с ними помянутым, отпущение и место сим милости неотъемлемо подати.

Светилен:

Праведно убо да будет, Владыко Господи, простившему Ти Клеопатрины прародители, и днесь услышати молитву Уара Твоего великомученика и наше, многогрешных, предстояние: от мук избавити, иже с жалостию пред Тобою воспоминаемыя. Темже ускори, Щедрый, и потщися яко милостив помиловати сих, яко можеши, хотяй.

Слава, и ныне, Богородичен:

Потщися, Владычице, услышати нашу молитву, яже в Твоей Церкви к Тебе приносимую, и Сама, Богородительнице, преклони на милость Сына Своего и Владыку еже помиловати и от праведнаго гнева разрешити умершия прародители, други же и сродники наша, ускори убо, Всемилостивая, избавити сих, можеши бо яко милостива, хотящая всем милости.
Стихиры:

Что ти принесем, чудный мучениче, всяка бо Церковь почитает тя, яко прославляемаго от Владыки Христа славою Небесною, Иже дарова тебе благодать великаго к Нему дерзновения, и ныне предстоиши Ему со Ангелы, славный Уаре, Христов страстотерпче, Егоже моли простити умершия инославно и спастися душам нашим.

Святый мучениче Уаре великий, зря Христовы страдальцы, ранами тяжкими обложенныя, ревностию по Владыце разжигаемь, Небеснаго Царя пред мучителем исповедал еси, и о Нем усердно пострадал еси, и с Ним ныне царствуеши, Егоже моли послати милость умершим в неверии и спастися душам нашим.

Предивный Уаре, слава твоя велелепная, в нетленных радостех веселишися, с Небесными Силами в Вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни убо и нас в твоем веселии, воспомяни и наших сродников томление, умерших в нечестии, и моли Христа Бога сих помиловати и спастися душам нашим.

Иже вечному покою соименный, славный мучениче, от Бога нам дарованный на пользу нашу и на спасение, иже за Христа в страданиих просветився, равностоятель святым Ангелом явился еси и Господа молиши даровати мирови смирение и еже от нас воспоминаемым избавление, мы же тя усердно воспеваем: приими наша прошения, глаголюще,и вознеси оныя ко Христу Богу, и низпосли всем велию милость.

Приидите убо, мучениколюбцы, стецытеся усердно днесь, возвеличим страстотерпца, Небеснаго венечника, славнаго Уара великомученика, и возопием к нему, молящеся и глаголюще: о дивный воине и храбрый, Царя Христа воеводо, сниди к настоящему ликованию во еже видети с молением предстояние, и приими наше прошение, и не забуди помиловати нами поминаемыя, падшия в неверии еже о нас сродники, якоже и Клеопатрин род неверный молитвами своими от вечных мук свободил еси, тако воспомяни воспоминаемыя выну наши деды и прадеды, и яже с ними вочтенныя, елицы противобожне погребенныя, умершия некрещенныя. За сих убо предстани ко Христу Богу, к Твоему Подвигоположнику, за Негоже усердно пострадал еси, и потщися испросити оным от вечныя тьмы избавление и душам нашим прощение и велию милость.

Прекрасная Слову палато, вожделенная Царская ложнице, одушевленный Христов чертоже, Непорочная Невесто Отча, Марие, Пречистая Девице, призри ко умиленным нашим прошением и виждь, яко бедствуем от жалости, зряще страждущих лютая наших прародителей и ближников, аще бо и по достоинству, но премногое выну сретают томления, и скорбь, и мучение; призри убо, Всемилостивая, на сих от высот Своея радости, и лютыми оных нуждами подвигнися, и не престани от прошения, Владычице, дондеже умолиши Своего Сына и Господа подати безпомощным прощение и велию милость.
Молитва святому мученику Уару

О, святый мучениче Уаре досточудный, ревностию по Владыце Христу разжигаемь, Небеснаго Царя пред мучителем исповедал еси, и о Нем усердно пострадал еси, и ныне предстоиши Ему со ангелы, и в вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь.

Кондак 1

Непостижимым промыслом ко благу вечному мир уготовляяй, человеком времена и образ кончины определивый, остави, Господи, от века умершим вся согрешения их, приими я во обители света и радования, объятия Отчи отверсти им потщися и услыши ны, память их совершающия и поющия:

Господи, Любы Неизреченная, помяни усопшия рабы Твоя.

Икос 1
Адама падшаго и весь род человеческий от вечныя погибели спасаяй, послал еси, Блаже, в мир Сына Твоего, Крестом бо и Воскресением Его возсия и нам Живот Вечнующий. На безмерное Твое милосердие уповающе, чаем нетленнаго Царствия Славы Твоея, усопшим даровати того просим и молим Ти ся:

Возвесели, Господи, души житейскими бури истомленныя, да скорби и воздыхания земныя забвению предадят.

Услыши я, Господи, на лоне Твоем, яко же мать чада своя, и реки им: прощаются вам греси ваша.

Приими я, Господи, в блаженное и тихое пристанище Твое, да возрадуются о Божественней славе Твоей.

Господи, Любы Неизреченная, помяни усопшия рабы Твоя.

Кондак 2
Озарением Всевышняго просвещаем, преподобный Макарий глас от черепа языческа услыша: «Егда молитеся о страждущих во аде, отрада бывает язычником». О, дивныя силы молитв христианских, имиже преисподняя озаряется! Неверныя купно и верныя утешение премлют, егда о всем мире вопием: Аллилуиа.

Икос 2
Рече некогда Исаак Сириянин: «Сердце милующее о людех и скотех. и о твари всей молитвы слезныя ежечасно приносит, дабы сохранилися и очистилися». Такожде и мы вси дерзновенно всем от века умершим у Господа помощи просяще, взываем:

Низпосли нам, Господи, дар молитвы пламенеющий о умерших.

Помяни, Господи, вся заповедавшия нам, недостойным, молитися о них и изжени забвенныя ими грехи.

Помяни, Господи, вся без молитвы погребенныя.

Приими, Господи, в селения Твоя, вся от скорби или радости смертию напрасной скончавшияся.

Господи, Любы Неизреченная, помяни усопшия рабы Твоя.

Кондак 3
Повинны есмы в бедствии мира, в страдании безсловесныя твари, в болезнех и муках младенцев непорочных, грехопадением бо людей блаженство и лепота всея твари разрушься. О Величайший от страдальцев невинных, Христе Боже наш! Ты Един еси отпустити всем можеши. Отпусти же всем и вся и миру первозданное благоденствие подаждь, да обрящут Тя мертвии и живии, взывая: Аллилуиа.

Икос 3
Свете тихий, Искупителю всея вселенныя, любовию мир весь объемляй: се слышится со Креста вопль Твой о вразех Твоих: «Отче, отпусти им!» Именем всепрощения Твоего молитися Отцу Небесному об упокоении вечнем Твоих и наших враг дерзаем:

Прости, Господи, кровь неповинную пролившия, житейский путь наш скорбьми усеявшия, благоденствие свое слезами ближних своих устрояющия.

Не осуди, Господи, гонящия ны клеветою и злобою, милостию воздаждь, ихже обидехом или оскорбихом по неведению, и да будет свята молитва наша о них таинством примирения.

Господи, Любы Неизреченная, помяни усопшия рабы Твоя!

Кондак 4
Спаси, Господи, в тяжких мучениях скончавшияся, убиенныя, живыми погребенныя, землею засыпанныя, волнами и огнем поглощенныя, зверьми растерзанная, от глада, мраза, бури или падения с высоты умершия и радость Твою вечную подаждь им за скорбь кончины. Да благословят страданий своих время, яко искупления день, воспевая: Аллилуиа.

Икос 4
Всем, иже поемлеми суть могилой во светлой юности, иже на земли терновый венец страданий прияша, иже радости земныя не узреша, щедротами Твоея безконечныя любве воздаждъ, Господи, и под тяжким бременем трудов умершим воздаяние подаждь.

Приими, Господи, в чертози рая отроцы и девы и сподоби я ликовствования на вечери Сына Твоего.

Утиши, Господи, скорбь родителей о чадех умерших.

Упокой, Господи, вся рода и семени не имущия, о нихже несть кому молитву вознести Тебе, Создателю, да изчезнут греси их от блистания всепрощения Твоего.

Господи, Любы Неизреченная, помяни усопшия рабы Твоя.

Кондак 5
Яко последнее ко вразумлению и покаянию знамение смерть даровал еси, Господи. При грозном блистании ея суета земная обнажается, страсти плотския и страдания утихают, непокоривый разум смиряется. Правда вечная отверзается, отягченныя же грехми и безбожницы на смертном одре бытие Твое вечное исповедуют и к милосердию Твоему взывают: Аллилуиа.

Икос 5
Отче утешения всяческаго, солнцем озаряеши, плодами услаждаеши, лепотою мира друзи и врази Твоя веселиши. Веруем бо, яко и за гробом милосердие Твое, даже всеми отверженныя грешницы милующее, не истощаевается. Скорбим об ожесточенных и беззаконных хулителях Святыни Твоея:

Буди, Господи, над ними спасающая благая воля Твоя.

Остави, Господи, без покаяния скончавшимся, спаси в омрачении ума сами себе погубившия, да угаснет пламень греховности их в море благодати Твоея.

Господи, Любы Неизреченная, помяни усопшия рабы Твоя.

Кондак 6
Страшен есть мрак души, от Бога удаленной: совести терзания, скрежет зубный, огнь неугасимый и червь неумирающий. Трепещу таковыя участи и, якоже о самем себе, молюся о во аде страждущих. Да снидет на ня росою прохлажления наша песнь: Аллилуиа.

Икос 6
Возсиял свет Твой, Христе Боже наш, на сидящия во тьме и сени смертной и во аде сущия, Тебе взывати не могущия.

В преисподняя земли снизшед, изведи, Господи, во отраду грехми с Тобою разлученныя, но не отрекшияся от Тебе чада Твоя, страждут бо люте, помилуй я.

Согрешиша, Господи, на Небо и пред Тобою, безмерно тяжки грехи их, милость же Твоя безмерна есть.

Посети горькую нищету душ от Тебе отдаленных, помилуй, Господи, истину по неведению гнавшия, буди им любовь Твоя не огнем палящим, но райскою прохладою.

Господи, Любы Неизреченная, помяни усопшия рабы Твоя.

Кондак 7
Помощь подати десницею Своею тщашеся усопшим рабом Своим, явися нам, Господи, в видениих таинственных, ясновидно, на молитву нас вдохновляя, да поминая отшедшия, благая дела и подвизи за ня творим, взывая: Аллилуиа.

Икос 7
Церковь Христова Вселенская непрестанно ежечасно молитвы за почившия по всей земли возносит и от смерти к животу и от земли к Небеси души усопших силою молитв за ня пред олтари Божии приводит, грехи бо мира Пречистою Кровию Божественнаго Агнца смываются,.

Буди, Господи, ходатайство Церкви умершим лествицею к Небеси.

Помилуй я, Господи, предстательством Пресвятыя Богородицы и всех святых.

Остави им, Господи, согрешения их, раб верных Твоих ради, день и ночь к Тебе вопиющих.

Незлобивых ради младенцев помилуй, Господи, родителей их, и матерей слезами искупи согрешения чад их.

За молитвы безвинных страдалец, за кровь мученик пощади, Господи, и помилуй грешницы.

Приими, Господи, молитвы наша и милостыни, яко воспоминание добродетелей их.

Господи, Любы Неизреченная, помяни усопшия рабы Твоя.

Кондак 8
Мир весь общая могила священная есть, на всяком бо месте прах отец и братий наших. Единый неизменно возлюбивый ны, Христе Боже наш, прости вся, еже от начала и до ныне умершия, да воспоют любовию безмерною: Аллилуиа.

Икос 8
Грядет быти день, яко пещь горящая, день велий и страшный Суда последняго, тайны человеческия открыются, книги совестныя разгнутся... «Примиритеся с Богом! — вопиет апостол Павел, — Примиритеся прежде того страшнаго дне».

Помози нам, Господи, слезами живых недостающее умерших восполнити, да будет им, Господи, звук трубы Ангельской спасения благовестием, и в час Суда Твоего радостнаго помилования их сподоби.

Увенчай, Господи, славою за Тя пострадавшия и покрый благостию Твоею прегрешения немощных.

Господи, вся по имени ведый, помяни во иночестем чине спасавшияся, помяни благословенныя пастыри со чада их.

Господи, Любы Неизреченная, помяни усопшия рабы Твоя.

Кондак 9
Благословите скоротекущее время. Каждый бо час, мгновение каждое к вечности приближает. Новая скорбь, седина новая суть вестницы мира грядущаго, свидетелие тленности земныя, яко вся мимотечет возвещают, яко Царство Вечное приближися, идеже несть ни слез, ни воздыхания, но отрадная пения: Аллилуиа.

Икос 9
Яко древо по времени листвий своих лишается, тако и дние наши по коликих летех оскудевают. Увядает и юности празднество, светильник радования угасает, близится старости отчуждение. Друзи и сродницы умирают. Где вы, юныя лукующия? Безмолвны гробы их, но души их в деснице Твоей. Мыслим взоры их из мира невещественнаго.

Господи, Ты еси Солнце пресветлое, озари и согрей усопших селения, да прейдет навеки горькаго разлучения время, и сподоби ны радостнаго свидания на Небесех.

Сотвори, Господи, да вси едино будем с Тобою.

Возврати, Господи, отшедшим детства чистоту и юности благодушие, и праздником Пасхи да будет им Живот Вечный.

Господи, Любы Неизреченная, помяни усопшия рабы Твоя.

Кондак 10
Проливая тихия слезы на могилах сродников наших, молимся с надеждою и с упованием взываем: скажи нам, Господи, яко оставил еси грехи их! Даждь о сем откровение таинственное духу нашему, да воспеваем: Аллилуиа.

Икос 10
Весь путь прешедшия жизни нашея вижу озираяся, колико множество людей, от перваго дне и до ныне отшедшия, и мнози их благая ми содеявшия. Любовию своею должная сим воздавая, вопию Ти.

Сподоби, Господи, славы Небесныя родители моя и ближняя моя, над ложем моим младенческим бодрствовавшия, возрастившия и воспитавшия мя.

Прослави, Господи, пред Ангелы святыми всех, благовествовавших ми слово спасения, добру, правде, святым примером жизни своея учившия мя.

Услади, Господи, тех, иже во дни скорби моея манною сокровенною послужиша ми.

Вознагради, Господи. вся благодетели наша и спаси я.

Господи, Любы Неизреченная, помяни усопшия рабы Твоя.

Кондак 11
Где ты, смерти жало, где же и мрак и страх твой прежде бывающий? Отныне ты желанная, неразлучно с Богом сочетаеши. Покою великий субботства таинственнаго. Желание имам умрети и со Христом быти, взывает Апостол. Темже и мы, взирая на смерть, яко на стезю в Вечней Жизни, воззовем: Аллилуиа.

Икос 11
Воскреснут мертвии, и востанут сущии во гробех, и возвеселятся живущии на земли, яко востанут телеса духовныя, светло прославленныя, нетленныя. Кости сухия, слышите слово Господне: «Се Аз введу в вас дух живота и дам на вас жилы, и возведу на вас плоть, и простру по вам кожу». Возстаньте издревле прошедшаго времене, искуплении кровию Сына Божия, оживлени смертию Его, возсия бо на ны свет Воскресения.

Отверзи им, Господи, ныне всю бездну совершенств Твоих.

Ты сиял еси им, Господи, светом солнца и луны, да узрят они и славу лучезарных ликов Ангельских.

Ты услаждал еси я, Господи. великолепием востока и запада светил небесных, да узрят же они и свет невечерний Божества Твоего.

Господи, Любы Неизреченная. помяни усопшия рабы Твоя.

Кондак 12
Плоть и кровь Царствия Божия не наследят, доколе во плоти живем отлученнии от Христа. Аще и умрем, но оживем для Вечности. Подобает бо тленному телу нашему в нетление облещись и мертвенному сему бессмертием просияти, дабы во свете невечерняго дне воспети: Аллилуиа.

Икос 12
Чаем сретения со Господем, чаем ясной зари воскресения, чаем пробуждения из гробов сродников наших и знаемых и оживления в благоговейнейшей лепоте жизни умерших. Грядущее преображение всея твари торжествуем и Возсоздателю нашему вопием:

Господи, к торжеству радости и доброте мир создавый и нас к святости из глубины греховныя возставивый, даждь умершим царствовати посреде бытия новаго, да возсияют яко светила на Небеси в день славы их и, да будет им Агнец Божественный светом невечерним.

Даждь, Господи, и нам с ними Пасху нетления праздновати.

Соедини, Господи, умершия и живыя в нескончаемей радости.

Господи, Любы Неизреченная, помяни усопшия рабы Твоя.

Кондак 13
О, Премилосердный Отче Безначальный, всем хотяй спастися, Сына к погибшим низпославый и Духа Животворящаго изливый! Помилуй, прости и спаси родныя и близкия нам усопшия и всех от века скончавшихся, и предстательством их посети нас, да вместе с ними вопием Тебе, Спасителю Богу, победную песнь: Аллилуиа.

Этот кондак читается трижды, затем 1-й икос и 1-й кондак


Икос 1
Адама падшаго и весь род человеческий от вечныя погибели спасаяй, послал еси, Блаже, в мир Сына Твоего, Крестом бо и Воскресением Его возсия и нам Живот Вечнующий. На безмерное Твое милосердие уповающе, чаем нетленнаго Царствия Славы Твоея, усопшим даровати того просим и молим Ти ся:

Возвесели, Господи, души житейскими бури истомленныя, да скорби и воздыхания земныя забвению предадят.

Услыши я, Господи, на лоне Твоем, яко же мать чада своя, и реки им: прощаются вам греси ваша.

Приими я, Господи, в блаженное и тихое пристанище Твое, да возрадуются о Божественней славе Твоей.

Господи, Любы Неизреченная, помяни усопшия рабы Твоя.

Кондак 1
Непостижимым промыслом ко благу вечному мир уготовляяй, человеком времена и образ кончины определивый, остави, Господи, от века умершим вся согрешения их, приими я во обители света и радования, объятия Отчи отверсти им потщися и услыши ны, память их совершающия и поющия:

Господи, Любы Неизреченная, помяни усопшия рабы Твоя.

Молитва о усопших
Боже духов и всякия плоти, смерть поправый и диавола упразднивый, и живот миру Твоему даровавый! Сам, Господи, упокой души усопших раб Твоих: святейших патриархов, преосвященных митрополитов, архиепископов и епископов, во священническом, церковном и монашеском чине Тебе послуживших; создателей святаго храма сего, православных праотец, отец, братий и сестер, зде и повсюду лежащих; вождей и воинов за веру и отечество живот свой положивших, верных убиенных в междуусобной брани, утонувших, сгоревших, на мразе замерзших, растерзанных зверьми, без покаяния внезапно скончавшихся и не успевших примиритися с Церковью и со своими врагами; в изступлении ума самоубиенных, тех, о ком заповедали и просили ны молитися, о коих несть кому молитися, и верных, погребения лишенных (имя рек) в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное ими словом или делом или помышлением, яко благий Человеколюбец Бог прости, несть бо человека, иже поживет и не согрешит. Ты бо еси Един кроме всякаго греха, правда Твоя – правда вовеки, и слово Твое – истина.

Яко Ты еси Воскресение, и Живот, и Покой усопших раб Твоих (имя рек), Христе Боже наш, и Тебе славу возсылаем со безначальным Твоим Отцем и Пресвятым, и Благим, и Животворящим Твоим Духом ныне и присно, и во веки веков. Аминь.

__________________________


Ака­фист за еди­но­умер­ше­го

Пред­на­зна­чен для ке­лей­но­го чте­ния

Кондак 1

Избран­ный Хо­да­таю и Пер­во­свя­щен­ни­че, о спа­се­нии мира греш­на­го душу Свою по­ло­жи­вый, давый нам власть ча­да­ми Бо­жи­и­ми быти и оби­та­ти в неве­чер­нем дни Цар­ствия Тво­е­го! Даруй про­ще­ние и веч­ную ра­дость усоп­ше­му, о немже с моль­бою взы­ва­ем Ти:

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Икос 1

Госпо­дом дан­ный Ан­ге­ле-хра­ни­те­лю свя­тый, при­и­ди по­мо­ли­ти­ся о рабе твоем, егоже на всех путех жизни со­про­вож­дал, хра­нил и на­став­лял еси, воз­зо­ви с нами ко Спасу Все­щед­ро­му:

Иисусе, ис­тре­би ру­ко­пи­са­ние гре­хов раба Тво­е­го [И́мярек]. Иису­се, увра­чуй его язвы ду­шев­ныя. Иису­се, да не будет на земли горь­ких вос­по­ми­на­ний о нем. Иису­се, сего ради по­ми­луй огор­чав­ших его и оби­жен­ных им. Иису­се, по­крый его несо­вер­шен­ства све­то­нос­ною ризою Тво­е­го ис­куп­ле­ния. Иису­се, воз­ве­се­ли его ми­ло­сер­ди­ем Твоим. Иису­се Неиз­ре­чен­ный, Ве­ли­кий и Чуд­ный, явися ему Сам.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 2

Яко без­утеш­ная гор­ли­ца, но­сит­ся душа над юдо­лию зем­ною, со­зер­цая с вы­со­ты Бо­же­ствен­на­го ра­зу­ме­ния греси и со­блаз­ны ми­нув­ша­го пути, горь­ко скор­бя о каж­дом невоз­врат­ном дни, ушед­шем без поль­зы, но по­ми­луй раба Тво­е­го, Вла­ды­ко, да вни­дет он в покой Твой, взы­вая: Алли­лу­иа.

Икос 2

Аще и Ты стра­дал о всем мире, аще и Ты про­ли­вал еси слезы и кро­ва­вый пот о живых и мерт­вых, кто нас удер­жит от мо­лит­вы за усоп­ша­го? Под­ра­жая Тебе, со­шед­ше­му даже до ада, мо­лим­ти­ся о спа­се­нии раба Тво­е­го:

Иисусе, жизни По­да­те­лю, озари его све­том Твоим. Иису­се, да будет он едино с Тобою и Отцем [и Духом]. Иису­се, всех при­зы­ва­яй в ви­но­град­ник Твой, не за­бу­ди оза­ри­ти его све­том Твоим. Иису­се, щед­рый Раз­да­я­те­лю веч­ных на­град, яви его сыном чер­то­га Тво­е­го. Иису­се, верни душе его бла­го­дат­ныя силы пер­во­здан­ныя чи­сто­ты. Иису­се, да умно­жат­ся во имя его доб­рая дела. Иису­се, со­грей оси­ро­тев­шия Твоею та­ин­ствен­ною от­ра­дою.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 3

Свя­зан­ный узами плоти раб Твой па­да­ше гре­хов­но, обаче дух его то­мил­ся есть по Твоей веч­ной прав­де и свя­то­сти, ныне же, егда немощь плот­ская ско­ва­на есть мо­гиль­ным тле­ни­ем, да воз­не­сет­ся душа его пре­вы­ше солн­ца к Тебе, Все­свя­то­му, и вос­по­ет песнь из­бав­ле­ния: Алли­лу­иа.

Икос 3

Вер­хов­ный апо­стол Твой в хлад­ную нощь у огня три­жды от­ре­кл­ся есть от Тебе, и Ты спасл еси его. Еди­ный ведый че­ло­ве­че­ска­го есте­ства немощь, про­сти и рабу Тво­е­му [И́мярек] мно­го­вид­ная от­па­де­ния от воли Твоея:

Иисусе, всели его тамо, идеже несть за­блуж­де­ний. Иису­се, из­ба­ви его от тя­гост­ных тер­за­ний со­ве­сти. Иису­се, да сги­нет на­ве­ки па­мять гре­хов его. Иису­се, со­блаз­нов юно­сти его не по­мя­ни. Иису­се, от тай­ных без­за­ко­ний очи­сти его. Иису­се, осени его тихим све­том спа­се­ния.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 4

Бури жизни ми­но­ва­ли, стра­да­ния зем­ная окон­че­на, без­силь­ны врази с их зло­бою, но силь­на есть лю­бовь, из­бав­ля­ю­щая от веч­на­го мрака и спа­са­ю­щая всех, о ком воз­но­сит­ся Тебе дерз­но­вен­ная песнь: Алли­лу­иа.

Икос 4

Ты еси без числа ми­ло­серд к нам. Ты еди­ный Из­ба­ви­тель, что мы при­ба­вим к по­дви­гу спа­са­ю­щия любве Твоея? обаче якоже Симон Ки­ри­ней­ский по­мо­га­ше нести Крест Тебе, Все­силь­но­му, тако и ныне бла­го­сти Твоей угод­но есть спа­се­ние близ­ких со­вер­ша­ти с уча­сти­ем нашим:

Иисусе, Ты за­по­ве­дал еси друг друга тя­го­ты но­си­ти. Иису­се, Ты еси и по смер­ти ми­лу­ю­щий нас. Иису­се, союз любве по­ло­жи­вый между мерт­вы­ми и жи­вы­ми. Иису­се, да по­слу­жат под­ви­зи лю­бя­щих во спа­се­ние рабу Тво­е­му [И́мярек]. Иису­се, услы­ши его вопль сер­деч­ный, воз­но­си­мый на­ши­ми уста­ми. Иису­се, в наших сле­зах при­и­ми его по­ка­я­ние.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 5

Боже, да будет при­нят Тобою его пред­смерт­ный вздох со­кру­ше­ния, якоже моль­ба бла­го­ра­зум­на­го раз­бой­ни­ка. Он угас на жиз­нен­ном кре­сте, даждь на­сле­до­вать ему Твоя обе­то­ва­ния, якоже тому: "Аминь, гла­го­лю тебе, ныне же со Мною бу­де­ши в раи", где сонмы рас­ка­яв­ших­ся греш­ни­ков ра­дост­но поют: Алли­лу­иа.

Икос 5

За нас Рас­пя­тый, за нас из­му­чен­ный, про­стри руку с Тво­е­го Кре­ста, кап­ля­ми крови Твоея без­след­но омый из­ли­тыя со­гре­ше­ния его, бла­го­об­раз­ною Твоею на­го­тою со­грей об­на­жен­ную оси­ро­тев­шую душу:

Иисусе, Ты ведал еси его жизнь до рож­де­ния и воз­лю­бил его. Иису­се, Ты видел еси его из­да­ле­че с вы­со­ты Кре­ста Тво­е­го. Иису­се, Ты про­сти­рал еси ему, вдаль гря­ду­ще­му, изъ­язв­лен­ная объ­я­тия Твоя. Иису­се, Ты взы­вал еси о про­ще­нии его на кро­ва­вой Гол­го­фе. Иису­се, Ты крот­ко уми­рал еси за него в тяж­ких муках. Иису­се, пре­тер­пе­вый во гробе по­ло­же­ние, освя­ти его мо­гиль­ный покой. Иису­се вос­крес­ший, воз­не­си ко Отцу озлоб­лен­ную миром и спа­сен­ную Тобою душу.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 6

Спит он веч­ным сном мо­ги­лы, обаче душа его не дрем­лет, чает Тебе, Гос­по­ди, жаж­дет Тебе, веч­на­го Же­ни­ха. Да ис­пол­нят­ся на умер­шем слова Твоя: "Ядый Мою Плоть и пияй Мою Кровь, имать живот веч­ный". Даждь ему ясти от манны со­кро­вен­ныя и пети у Пре­сто­ла Тво­е­го: Алли­лу­иа.

Икос 6

Смерть раз­лу­чи­ла есть со всеми ближ­ни­ми: от­да­ли­ся душа, зна­е­мии со­кру­ша­ют­ся, и токмо Ты един остал­ся еси бли­зок. Раз­ру­ши­лись пре­гра­ды плоти, и Ты от­крыл­ся еси в непри­ступ­ном ве­ли­чии Бо­же­ства с ожи­да­ни­ем от­ве­та:

Иисусе, Лю­бовь пре­вы­ше вся­ка­го ра­зу­ме­ния, по­ми­луй раба Тво­е­го. Иису­се, уда­ля­ясь от Тебе, он тяжко страж­да­ше. Иису­се, про­сти невер­ность его серд­ца. Иису­се, об­ма­ну­тыя на­деж­ды рож­да­ли тоску по Тебе. Иису­се, вспом­ни те часы, егда душа его тре­пе­та­ше вос­тор­гом Твоим. Иису­се, даждь скон­чав­ше­му­ся незем­ную ра­дость и покой. Иису­се, еди­ный вер­ный, неиз­мен­ный, при­и­ми его.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 7

Веруем, яко недол­га будет раз­лу­ка наша. Мы хо­ро­ним тебя, яко на ниве зерно, ты имаши про­из­рас­ти в иной стране. Да по­гиб­нут в мо­ги­ле пле­ве­лы гре­хов твоих, а дела доб­рая там про­си­я­ют, идеже се­ме­на добра при­но­сят нетлен­ныя плоды, идеже души свя­тии поют: Алли­лу­иа.

Икос 7

Егда уде­лом умер­ша­го ста­нет за­бве­ние, егда образ его по­блек­нет в серд­цах и время из­гла­дит вме­сте с мо­ги­лою и рев­ность мо­лит­вы о нем, и тогда Ты не оста­ви его, даждь от­ра­ду оди­но­кой душе:

Иисусе, Твоя лю­бовь не охла­де­ва­ет. Иису­се, неис­то­щи­мо есть Твое бла­го­во­ле­ние. Иису­се, в неумол­ка­е­мых моль­бах Церкве да омы­ют­ся греси его при­но­ше­ни­ем Жерт­вы Без­кров­ныя. Иису­се, пред­ста­тель­ством всех свя­тых даруй ему бла­го­дать мо­лит­вы о живых. Иису­се, во дни ис­пы­та­ний наших при­и­ми его хо­да­тай­ство о нас.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 8

Имамы мо­ли­ти­ся со сле­за­ми, егда па­мять об усоп­шем му­чи­тель­но свежа есть, имамы по­ми­на­ти имя его в нощи и во дни, раз­да­вая ми­ло­сты­ню, питая глад­ных, из глу­би­ны души взы­вая: Алли­лу­иа.

Икос 8

Тай­но­зри­тель Иоанн Бо­го­слов со­зер­ца­ше у Пре­сто­ла Агнца Божия ве­ли­кое мно­же­ство людей, об­ле­чен­ных в белыя ризы: се тии, иже при­и­до­ша от скор­би ве­ли­кия. Они ра­дост­но слу­жат Богу день и нощь, и Бог оби­та­ет с ними, и не кос­нет­ся их мука:

Иисусе, при­чти к ним и раба Тво­е­го [И́мярек]. Иису­се, он много стра­да­ше и том­ля­ше­ся. Иису­се, из­вест­ны Тебе все горь­ции часы и тя­гост­ныя ми­ну­ты его. Иису­се, на земли он имаше пе­ча­ли и скор­би, даждь ему на небе от­ра­ду. Иису­се, усла­ди его от ис­точ­ни­ков живыя воды. Иису­се, отыми всяку слезу от очей его. Иису­се, всели его, идеже не опа­ля­ет, но живит солн­це прав­ды Твоея.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 9

Кон­че­но стран­ство­ва­ние зем­ное, кий бла­го­дат­ный пе­ре­ход в мир Духа, кое со­зер­ца­ние новых неве­до­мых миру зем­но­му вещей и небес­ных кра­сот, душа воз­вра­ща­ет­ся в Оте­че­ство свое, идеже свет­лое солн­це, прав­да Божия про­све­ща­ет по­ю­щих: Алли­лу­иа.

Икос 9

Аще от­блеск и след Твой по­ла­га­ет си­я­ние на лице смерт­ных, каков же Сам еси?! Аще плоды Твоих рук столь пре­крас­ны, и земля, от­ра­жа­ю­щая токмо тень Твою, полна невы­ра­зи­ма­го ве­ли­чия, каков же неви­ди­мый Лик Твой?! От­крой славу Твою усоп­ше­му рабу Тво­е­му [И́мярек]:

Иисусе, обостри его слух к вос­при­я­тию Тво­е­го Бо­же­ства. Иису­се, обостри его ум к ра­зу­ме­нию небес­ных. Иису­се, да будет его ра­дость пре­ис­пол­нен­ная. Иису­се, под­кре­пи его на­деж­дою встре­чи в оби­те­лех бла­жен­ных. Иису­се, даждь нам по­чув­ство­вать бла­го­дат­ную силу за­упо­кой­ныя мо­лит­вы.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 10

Отче наш, скон­чав­ша­го­ся в Цар­ствие Твое при­и­ми, идеже несть греха и зла, идеже неру­ши­ма Свя­тая воля, идеже в сон­мах чи­стей­ших душ и непо­роч­ных Ан­ге­лов свя­тит­ся Твое бла­го­дат­ное имя и бла­го­уха­ет хвала: Алли­лу­иа.

Икос 10

В той день Ан­ге­ли по­ста­вят Пре­стол Твой, Судие, и Ты воз­си­я­е­ши во славе Отца Тво­е­го, неся воз­да­я­ние вся­ко­му че­ло­ве­ку. О, воз­зри тогда ми­ло­сти­во на сми­рен­на­го раба Тво­е­го [И́мярек], рцы ему: "При­и­ди одес­ную Мене":

Иисусе, яко Бог власть имаши остав­ля­ти грехи. Иису­се, про­сти его со­гре­ше­ния за­бы­тая или сты­дом ута­ен­ная. Иису­се, от­пу­сти без­за­ко­ния немо­щи и неве­де­ния. Иису­се, из­ба­ви его от несвя­ти­мых глу­бин ад­ска­го от­ча­я­ния. Иису­се, да уна­сле­ду­ет он Твоя жи­во­тво­ря­щая обе­то­ва­ния. Иису­се, со­при­чти его бла­го­сло­вен­ным Отца Тво­е­го. Иису­се, даждь ему во веки нескон­ча­е­мое бла­жен­ство.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 11

Вла­ды­ко Все­б­ла­гий, да от­вер­зят­ся усоп­ше­му солн­це­вид­ныя врата рай­ския, да встре­тят его с ли­ко­ва­ни­ем со­бо­ры пра­вед­ных и свя­тых, сонмы близ­ких и лю­бив­ших его, да воз­ра­ду­ют­ся о нем све­то­нос­нии Ан­ге­ли Твои, да узрит он и Прис­нобла­жен­ную Ма­терь Твою тамо, идеже по­бед­но зву­чит: Алли­лу­иа.

Икос 11

Под ды­ха­ни­ем Твоим ожи­ва­ют цветы, вос­кре­са­ет при­ро­да, про­буж­да­ют­ся сонмы мель­чай­ших тва­рей, Твой взор свет­лее ве­сен­них небес, Твоя лю­бовь, Иису­се, теп­лее лучей сол­неч­ных. Ты из праха зем­на­го вос­кре­сил еси брен­ную плоть че­ло­ве­че­скую к рас­цве­ту веч­ныя нетлен­ныя жизни весны, тогда озари и раба Тво­е­го [И́мярек] све­том ми­ло­стей Твоих:

Иисусе, в Твоей дес­ни­це бла­го­во­ле­ние и жизнь. Иису­се, во взоре Твоем свет и лю­бовь. Иису­се, из­ба­ви усоп­ша­го от веч­ныя смер­ти ду­хов­ныя. Иису­се, сей усну с на­деж­дою, по­доб­но Нилу-реце пред хо­лод­ной зимой. Иису­се, про­бу­ди его, егда тер­ния земли об­ле­кут­ся цве­том веч­но­сти. Иису­се, да не омра­чит ничто зем­ное его по­след­ня­го сна. Иису­се, Сча­стье Неиз­мен­ное и цель на­ше­го бытия.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 12

Христе! Ты - Цар­ство Небес­ное, Ты - земля крот­ких, Ты - оби­тель мно­гих, Ты - питие со­вер­шен­ное новое, Ты - оде­я­ние и венец пре­по­доб­ных, Ты - ложе упо­ко­е­ния свя­тых, Ты - Слад­чай­ший Иису­се! Тебе по­до­ба­ет хвала: Алли­лу­иа.

Икос 12

Под об­ра­зом тихих садов незем­ныя кра­со­ты и свет­лых, яко солн­це, оби­те­лей и в ве­ли­ко­ле­пии небес­ных пес­но­пе­ний Ты от­крыл еси нам бла­жен­ство лю­бя­щих Тя:

Иисусе, да вни­дет раб Твой в ра­дость Твою. Иису­се, об­ле­цы его си­я­ни­ем славы Отца. Иису­се, освя­ти его оза­ре­ни­ем Духа Свя­та­го. Иису­се, да услы­шит он неиз­ре­чен­ную песнь Хе­ру­ви­мов. Иису­се, да будет он вос­хо­дить от славы в славу. Иису­се, да узрит он Тебя лицем к лицу.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 13

О Же­ни­ше Без­смерт­ный, в пол­ночь греха и неве­рия гря­дый с небес со Ан­ге­ла­ми су­ди­ти миру всему! От­вер­зи двери слав­на­го чер­то­га Тво­е­го рабу Тво­е­му [И́мярек], да в без­чис­лен­ных сон­мах свя­тых во веки поет: Алли­лу­иа. (Три­жды)

Се́й конда́къ глаго́лется три́жды. Та́же Икосъ 1-й и Конда́къ 1-й

Икос 1

Госпо­дом дан­ный Ан­ге­ле-хра­ни­те­лю свя­тый, при­и­ди по­мо­ли­ти­ся о рабе твоем, егоже на всех путех жизни со­про­вож­дал, хра­нил и на­став­лял еси, воз­зо­ви с нами ко Спасу Все­щед­ро­му:

Иисусе, ис­тре­би ру­ко­пи­са­ние гре­хов раба Тво­е­го [И́мярек]. Иису­се, увра­чуй его язвы ду­шев­ныя. Иису­се, да не будет на земли горь­ких вос­по­ми­на­ний о нем. Иису­се, сего ради по­ми­луй огор­чав­ших его и оби­жен­ных им. Иису­се, по­крый его несо­вер­шен­ства све­то­нос­ною ризою Тво­е­го ис­куп­ле­ния. Иису­се, воз­ве­се­ли его ми­ло­сер­ди­ем Твоим. Иису­се Неиз­ре­чен­ный, Ве­ли­кий и Чуд­ный, явися ему Сам.

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Кондак 1

Избран­ный Хо­да­таю и Пер­во­свя­щен­ни­че, о спа­се­нии мира греш­на­го душу Свою по­ло­жи­вый, давый нам власть ча­да­ми Бо­жи­и­ми быти и оби­та­ти в неве­чер­нем дни Цар­ствия Тво­е­го! Даруй про­ще­ние и веч­ную ра­дость усоп­ше­му, о немже с моль­бою взы­ва­ем Ти:

Иисусе, Судие Все­ми­ло­сти­вый, рая сла­до­сти спо­до­би раба Тво­е­го.

Канон преподобному Паисию Великому, глас 6.
(за умерших без покаяния)
Песнь 1
Ирмос: Помощник и Покровитель бысть мне во спасение, Сей мой Бог, и прославлю Его, Бог отца моего и вознесу Его, славно бо прославися.

Припев (при келейном чтении): Преподобне отче Паисие, моли Бога о нас.

Иже вся умудряющему Богу молися, преподобне отче, о рабе своем, да отверзет ми устне недостойнии и двигнет ми язык недоуменный, тесноту же и худогласие, отче, разверзи благодатию, иже в тебе Святаго Духа к пению чудес твоих.

Начну убо достохвальное и душеполезное житие твое от младенства, иже древле Египет великаго во пророцех произнесе Моисея, иже к Богу присвоением и великими чудесы прославися, тако и ныне вторицею прославлен показася Египет тебе ради, отче Паисие, честным именем твоим и многими добродетельми обогатися, еже дарова тебе Господь, Егоже моли, да спасет души наша.

В Царство Небесное вшед узким путем и прискорбным по заповеди Владыки своего Христа, преподобне отче Паисие, широкий и пространный путь возненавидев, распространьшийся мрак ума моего отжени, да возмогу малое мое моление принести в пречестную память твою.

Богородичен: Дух сокрушен подаждь ми, Благая, смиренно сердце, уму же чистоту и житию исправление, и прегрешением оставление.

Песнь 3
Ирмос: Утверди, Господи, на камени заповедей Твоих подвигшееся сердце мое, яко Един Свят еси и Господь.

Каменю веры – Петру апостолу – уподобился еси, распятся мирови во всей жизни своей, преподобне Паисие, и нозе свои невозвратно к Небесному шествию управил еси, и Горняго Иерусалима достигл еси, со святыми предстоя Святей Троице, моли о мне единаго Благаго Человеколюбца.

Благочестиваго корене пресветлая отрасль, тебе избра Господь, Ангел рече матери твоей: сей Богу угоден. Ты же от младенства крест свой взем, невозвратным путем Тому последова и возрасташе леты и разумом, купно и благодатию Божиею. Моли дати ми отпущение грехов.

О, Владыко Господи Иисусе Христе, кто не удивится Твоему человеколюбию, егда прииде желание преподобному иноческое житие получити к деланию заповедий Твоих, Твоею благодатию, яко агнец непорочен, изведеся в пустыню, и достиже словесных овец, и введеся к пастырю, блаженному Памве, и облечеся в иноческий образ, в немже утверди и мене, Господи, молитвами преподобнаго Паисия, к деланию заповедий Твоих.

Богородичен: Лютых мя мук, и тьмы кромешныя и геенны Твоими молитвами свободи, Дево, имаши бо волю и силу, Господа рождшая, Единаго Преблагаго.

Седален
Душу связав любовию Христовою и земная возненавидев вся, мудре, водворился еси, отче преподобне, в пустынях и горах, разумнаго древа вкусив еси, славне, ангельски просиял еси. Темже и мрак прошед плоти своея, тьму отгнал еси бесов, Паисие, инокующим первый, моли Христа Бога грехов оставление подати чтущым любовию святую память твою.

Песнь 4
Ирмос: Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.

Законострадальческое житие от мягких ногтей восприем, Богомудре Паисие, даже до конца пребыл еси Божественен доблественник, венец приял еси победы от всех Царствующаго молитвами своими избавляти от муки грешники, от них же первый есмь аз, не забуди мене.

Имуще тя молитвенника крепка, блаженне Паисие, и обещника печальным, предстателя и поборника, и ходатая благочестна, от всяких спасаемся бед, напастей и обстояний.

Велию судеб бездну имеяй, Той тебе рече: се бо даю ти дар, да вся, еже просиши от Отца Моего во имя Мое, дастся тебе, о коем-либо грешнице помолишися, оставятся греси того; сего ради припадаю ти, отче Паисие, имея бездну согрешений, да отпустит твоими молитвами иже тебе обетова, яко Благ и Человеколюбец.

Богородичен: Глагол провещай, егда право имам судитися, Богородительнице, к Сыну Твоему, Пренепорочная, да обрящу Тя тогда прибежище и заступление, мук всех избавляющи.

Песнь 5
Ирмос: Из нощи утреннююща, Человеколюбче, просвети, молюся, и настави мя на повеления Твоя, и научи мя, Спасе, творити волю Твою.

Постом удручая тело свое отче Паисие, иногда по причащении Тела и Крови Христовы, яко Ангел седмьдесят дней без пищи телесныя пребыл еси, Божественную державу неизреченную имея, и возмог в себе животную содержати силу благодатию, паче пищнаго укрепления, слава державе Твоей, Господи.

Яко Иоанн Креститель узким и прискорбным путем ходити произволил еси, но той на Иордане, узрев Зиждителя своего, устрашися и вопияше: не смею приступити, сено, Огню; ты же, отче Паисие, в пустыне иногда явльшагося Господа не могий пречистаго лица Его зрети, паде, трепетом одержим. Он же ти рече: не устрашайся, сию пустыню наполню спостники тебе. С нимиже молим тя, отче: не забуди нас, молитвенник твоих, помилованным быти.

Аз бо в начале моя пред Тобою зрю согрешения и о моих беззакониих молю Твое милосердие, да простиши и покрыеши благоутробием Твоим множество грехов моих и даждь ми прочее жизни сея время безгрешно проводити, да, удобь на спасения стезю потек, безпреткновенно к доброму концу достигну Твоею помощию, кроме бо Твоея помощи и наставления ничтоже благо совершити, и милость у Тебе получити кто может.

Богородичен: Рабское приношу Ти моление, неразумный аз, и к Твоему прибегаю благоутробному милосердию, не отврати мене, Чистая, посрамлена.

Песнь 6
Ирмос: Возопих всем сердцем моим к щедрому Богу, и услыша мя от ада преисподняго и возведе от тли живот мой.

Бездушная тварь, Иордан, своего Творца устыдеся, вопияше: не могу Безгрешнаго омыти. Святый же виде Господа, прием воду, прикоснуся Неприкосновенному, умы нозе Его, и, пив воду, прия дар целити недуги и прогоняти от человек бесы; сего ради и мы припадаем ти, отче: молитвами твоими помилуй нас от всяких бесовских наведений.

По слову Господа нашего Иисуса Христа, обретохом тя, отче Паисие, великое прибежище, и заступника, и тепла молитвенника о гресех наших, якоже первее не отверже инока преставльшася и христианства отчуждишася, и во глубину адову пагубным безверием низведся, и, егда ощутився. притекша к тебе, да умолиши Всемилостиваго. Щедрый же Господь явися тебе и глагола: угодниче Мой, добро есть Моей любви подобяся, печешися о грешных, изволяяй муки прияти за их избавление.

Принесеся молитва твоя и слезы к Богу, яко благовонный фимиам и жертва непорочна и благоприятна, и мене не забуди ходатайством твоим ко Пресвятей Богородице, слезы умиления дати ми, омый грехов моих бездну, избави мя от смертныя глубины, и не надеющимся подаждь велию милость, и прости им согрешения.

Весь недоумением одержим есмь, егда прииму во уме той час страшный испытания Судии и Бога, и плачуся, и сетую, и рыдаю, поминая бездну зол моих. Темже спаси, Человеколюбче, молитвами Твоего угодника преподобнаго Паисия и избави мя муки, яко Благоутробен.

Богородичен: От сердца стенания приношаю Ти, Пренепорочная, Твое прося благопребытное заступление. Помилуй всестрастную мою душу, умилосердися, Мати Многомилостиваго Бога, избавити мя Суда и езера огненнаго.

Кондак, глас 2
Житейских молв оставль, безмолвное житие возлюбил еси, Крестителю подобяся всеми образы, с нимже тя почитаем, отче отцев Паисие.

Икос
Христов глас услышав, шествовал еси во след Того заповедей, наг жития быв, отверг попечения, и вся стяжания, и имения, и братий своих, и любве матере, Богоносне Паисие, един в пустынях Богови беседуя разумом, дарования приял еси, еже ми посли в песнех поющему, отцев начальниче, Паисие.

Песнь 7
Ирмос: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам, но не предаждь нас до конца, отцев Боже.

Многих грехов исполнен аз, и твоя молитва, яко кадило благовонно исправися, отче, бездну грехов моих потреби, и буяющее море злаго жития изсуши, и напоение гневное отжени, и целомудренный ум молитвами твоими утверди, отче Паисие.

Наставника тя и молитвенника тепла имуще, и скораго помощника, яко стену тверду и забрало недвижимо, и воеводу крепка и непобедима, молим тя: не забуди молитвенник твоих, избавляя от всякия печали и навет вражиих.

О, чудо велие, во един от дней седящу ти, отче Паисие, в пещере, бысть ти глас глаголяй: мир тебе, возлюбленному Моему угоднику.Ты же, возстав со страхом и трепетом одержим, паде, поклонися и рече: се раб Твой, Господи. Сего ради молим тя: моли Человеколюбца, да спасет души наша.

Даждь ми, Христе, разум и терпение, еже не осуждати согрешающих с кичением фарисейским, но, яко мытарево покаяние, приими, и яко блуднаго сына, Боже, вечери Твоея достойна мя яви, молитвами преподобнаго Паисия, и грехов прощение ми даруй.

Богородичен: Возникни, о, страстная душе, возстани окаянная, бий из глубины в перси и испусти слез источники, да тя помилует, окаянную, Милосердая Мати Христа Бога.

Песнь 8
Ирмос: Егоже воинства небесная славят и трепещут Херувими и Серафими, всяко дыхание и тварь, пойте, благословите и превозносите во вся веки.

Благодарно приносимое тебе пение сие не презри, отче Паисие, но паче приими и радости духовныя исполни, да без закоснения поклонюся твоему образу, идеже есть написан, исцеления всем подавающ.

Всепреподобному житию поревновав Богоугодных отец, иже от века поживших, отче Паисие, во смирении и постничестве Христа ради всю жизнь свою мученически скончал еси, и от бесов нападения много претерпел еси, и сих победив. Сего ради молю тя, отче: буйство, ярость и небрежение молитвами твоими отрини от мене.

Владыко Христе Боже Всещедрый, имиже веси судьбами, даждь ми ненавидети деяния лукаваго, Ты бо еси Бог наш, рекий: просите и приимете. Даждь любовь от всея души моея, молитвами преподобнаго отца Паисия, творити волю Твою спасительную.

Молютися: на мне, грешнем, долготерпи, Владыко, и не посецы мене, яко неплодное древо, посечением смертным, во огнь отсылая, но плодоносна мя сотвори, молитвами преподобнаго умолен бывая, время покаяния ми даждь, яко Человеколюбец.

Богородичен: Струи низпосли слез и стенания от души сотвори ми, Чистая, внегда припадати Твоему покрову, яко да обрящу разрешение грехов моих Твоею милостию.

Песнь 9
Ирмос: Еже радуйся от Ангела приимшая, и рождшая Создателя Своего, Дево, спасай, Тя величающия.

Скорый помощник был еси, преподобне, еще в жизни сей, иногда у преподобнаго старца ученику в преслушании умершу и ведену во ад, он же припадаше, прося, да умолиши Всещедраго о ученице его. Ты же, яко скорый послушник и любве хранитель, надежду возложи ко Всещедрому Богу простреся на молитву, и Той Многомилостив и во обетех неложный, волю к боящимся Его сотвори и, молитву твою услышав, изведе душу от ада. Того ради и аз, недостойный, припадая, молю тя: отче преподобне, молитвами твоими избави мя муки и огня негасимаго.

Бывша мя бесом смех, человеком уничижение, праведным рыдание, Ангелом плач, осквернение воздуху, и земли, и водам, тело окалях и ум оскверних паче слова деяньми, аз враг Богу бых. Увы мне, согреших! Молитвами преподобнаго Паисия прости мя.

Яко впадый в разбойники и уязвен, так и аз впадох от многих грехов, и уязвена ми есть душа, к кому прибегну повинный аз, токмо к Тебе, Милосердному душам Врачу, приими молебника тепла преподобнаго Паисия и молитвами его излей на мя великую Твою милость.

Богородичен: Прегрешения моя умножишася, прещению и Суду достоин, Чистая, припадая зову Ти: прежде конца подаждь ми очищение, и умиление, и нравом исправление.