Кондак 1
Избра́нный от лет древних бы́ти Предте́чею и Крести́телем Спаси́теля мира Христа Бога, Иоа́нне богохва́льне, прославля́юще просла́вльшаго тя Господа, похвальная воспису́ем ти, я́ко бо́льшему всех рожде́нных жена́ми, во плоти Ангелу, покая́ния проповеднику. Ты же, я́ко име́яй ве́лие дерзнове́ние ко Господу, от всяких бед свобожда́й и к покаянию воздвиза́й нас, любо́вию тебе зову́щих: Ра́дуйся, вели́кий Иоанне, Проро́че, Предте́че и Крести́телю Госпо́день.

Икос 1
Архангел Гаврии́л, предстоя́й пред Богом послан бысть ко иере́ю Заха́рии, егда́ той служа́ по чину чреды́ своея́, вни́де покади́ти в церковь Госпо́дню, и, предста́в одесну́ю алтаря кади́льнаго, благовествова́ше о твоем рождестве́, великий Иоанне, возвеща́я Захарии радость и веселие и я́ко мно́зи о рождестве́ твоем возрадуются. Сего́ ра́ди и мы, дивному о тебе Божию благоволе́нию чудя́щеся и ра́дующеся, со благогове́нием в похвалу тебе вопие́м:
Радуйся, Совета Божия неизрече́нного таи́нниче.
Радуйся, дивнаго смотре́ния Его исполне́ние.
Радуйся, прежде лет многих проро́чеством Исайи проявле́нный.
Радуйся, ве́стниче пред лицем Господним, древне прорече́нный.
Радуйся, предназначенный бы́ти великим пророком Вы́шняго.
Радуйся, по обетова́нию Ангела рожде́нный.
Радуйся, еще во чреве матере твоея́ Духа Свята́го испо́лненный.
Радуйся, прежде рождества твоего на великое служение извеще́нный.
Радуйся, непло́дства родителей разреше́ние.
Радуйся, иере́я Божия радость и веселие.
Радуйся, дще́ре Аароно́вы прозябе́ние.
Радуйся, плод молитвы Богодарованный.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 2
Видя Захария я́вльшагося ему Ангела, смути́ся, и страх нападе́ нань, и не верова словесе́м благове́стия его о рождестве твоем: егда́ же за неверие немото́ю связан бысть, удивля́шеся пресла́вному чудеси́, всем сердцем вопия́ Богу: Аллилу́иа.

Икос 2
Разум неуразумева́емый разуме́ти и́щуще лю́дие, жду́ще Захарию, чудя́хуся, уме́длившу ему в церкви; изше́дшу же ему и не могу́щу глаго́лати к ним, но то́кмо помава́ющу, разумеша вси, я́ко виде́ние ви́де в церкви. Мы же, прославля́юще дивнаго Творца чудес, Бога, вопие́м тебе такова́я:
Радуйся, благи́й виновниче безгла́сия о́тча.
Радуйся, слез ма́тере твоея́ премене́ние на радость.
Радуйся, тоя́ поношения в людех отъя́тие.
Радуйся, великое рождшим тя утеше́ние.
Радуйся, я́ко в шесты́й месяц о зача́тии твоем Пресвятая Дева Мария в Назаре́те от Ангела извести́ся.
Радуйся, я́ко о рождестве́ твоем мно́зи возвесели́шася.
Радуйся, я́ко имя благодатное от Ангела нарече́нное, получи́вый.
Радуйся, я́ко именем твоим немотствование отца твоего Заха́рии разреши́ся.
Радуйся, я́ко Имя Божие о тебе отцем твоим благослови́ся.
Радуйся, я́ко о чу́днем рождестве́ твоем страх и удивление в о́крест живущих яви́ся.
Радуйся, я́ко по всей стране Иуде́йстей о ди́внем рождестве́ твоем возвести́ся.
Радуйся, я́ко тобо́ю спасение многим в мире сем яви́ся.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 3
Сила Вы́шняго разреши́ непло́дство заматоре́вшия во днех своих пра́ведныя Елисаве́ты: зача́т бо тя, славный Предте́че Госпо́день, и тая́шеся месяц пять, глаго́лющи: «я́ко та́ко мне сотвори́ Господь во дни, в ня́же призре́ отъя́ти поноше́ние мое в челове́цех». Егда́ же прия́ Иму́щую во чре́ве Христа́, испо́лнися Духа Свя́та и возопи́ гласом ве́лиим: «Отку́ду мне сие́, я́ко прии́де Ма́ти Го́спода моего ко мне!» С Не́юже ра́дующися, взыва́ше Богу: Аллилу́иа.

Икос 3
Име́яй предъити́ пред Го́сподем духом и си́лою Илиино́ю, еще из чрева ма́тере твоея́ испо́лнился еси́ Ду́ха Свята́го, отоню́дуже и Пророк дивный показа́лся еси́, егда́ во утробе ма́тере твоея́ сый, взыгра́лся еси́ ра́дощами прише́ствию Ма́тере Госпо́дни. Бога бо познал еси́ носи́ма в ложесна́х Благода́тныя и Того ма́терниим гласом проповедал еси́: подоба́ше бо Боже́ственных вещей преславным быти началом. Сему у́бо благогове́йно удивля́ющеся, с ра́достию тебе вопие́м:
Радуйся, еще во утробе ма́терней предпосла́вшаго тя Господа чу́дным веселием предъяви́вый.
Радуйся, я́ко тебе ра́ди и матери твоей Елисаве́те воплоще́ние Христо́во откры́ся.
Радуйся, я́ко и та испо́лнися Ду́ха Свя́та.
Радуйся, я́ко и она преди́вная проро́чица яви́ся.
Радуйся, я́ко от нея́ Пресвята́я Дева Мария Блаже́нною в жена́х нарече́ся.
Радуйся, я́ко то́ю Она и Ма́терию Господа наименова́ся.
Радуйся, я́ко и безсе́менный плод Тоя́ Благослове́нным пронарече́ся.
Радуйся, Прему́дросте Боже́ственныя предъявле́ние.
Радуйся, святаго супру́жества благослове́ние.
Радуйся, непло́дных ложе́сн дивное прозябе́ние.
Радуйся, рождением твоим удиви́вый люди.
Радуйся, светлый Слова гла́се.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 4
Бу́рею сомнения смуще́нный, иере́й Заха́рия не можа́ше, по словеси́ ангельскому, проглаго́лати. Егда́ же по рождестве́ твоем, Предте́че Госпо́день, написа́ благода́тное имя твое, а́бие отверзо́шася уста́ и язык его, и глаго́лаше, благословя́ Бога, и проро́чествова, глаго́ля: «Благослове́н Господь Бог Изра́илев, я́ко посети́ и сотвори́ избавле́ние лю́дем Своим, и ты, отроча́, Пророк Вы́шняго нарече́шися, поя́ Тому: Аллилу́иа».

Икос 4
Слы́шаша о́крест живу́щий лю́дие о преславном и чу́дном рождестве́ твоем, со удивлением глаго́лаху в себе: «Что у́бо отроча́ сие́ будет?» Мы же тя, пресла́вный Предте́че Госпо́день, я́ко бо́льша всех рожденных жена́ми, достойно чту́ще, ублажаем си́це:
Радуйся, от зача́тия твоего благода́тных явле́ний испо́лненный.
Радуйся, в рождестве твоем Богом просла́вленный.
Радуйся, во младе́нчестве твоем от отца твоего Проро́ком Вы́шняго нарече́нный.
Радуйся, во о́трочестве твоем Духом Святым просвеще́нный и укрепле́нный.
Радуйся, Бога воплоти́вшегося сро́дник по плоти бы́вый.
Радуйся, от Бога высокое звание Предте́чи и Крести́теля прие́мый.
Радуйся, заре́, свет новый миру возвести́вшая.
Радуйся, звездо́, путь, веду́щий ко Христу, освети́вшая.
Радуйся, денни́це Солнца незаходи́маго.
Радуйся, свети́льниче Света неугасаемаго.
Радуйся, путь гряду́щему Христу уготовля́яй.
Радуйся, Ангела и человека в себе явля́яй.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 5
Богопроти́вное веле́ние беззако́ннаго детоубийцы Ирода изгна́ тя из до́му о́тча в непрохо́дную пустыню, носи́ма ма́терию, Предте́че Госпо́день, иде́же и пребыва́л еси́ до дне явления твоего ко Изра́илю, яды́й акри́ды и мед ди́вий и Богу вопия́: Аллилу́иа.

Икос 5
Ви́дяще дивное Божие о тебе промышле́ние, Иоа́нне богохва́льне, я́ко от младе́нческих пеле́н по́стническаго жития́ любитель показался еси́, отоню́дуже волею Вы́шняго послан был еси́ пропове́дати людем гряду́щее во Христе спасение. Сего́ ра́ди со удивлением и любо́вию тебе́ взыва́ем:
Радуйся, я́ко, еще младенец сы́й, царя И́рода устраши́л еси́.
Радуйся, от напра́снаго убие́ния тем десни́цею Вы́шняго сохране́нный.
Радуйся, пусты́ни шипо́к благово́нный.
Радуйся, высотою подвигов твоих всех удиви́вый.
Радуйся, пра́ваго пути верный указа́телю.
Радуйся, чистоты и целомудрия преди́вный хранителю.
Радуйся, ева́нгельскаго самоотвержения о́бразе соверше́нный.
Радуйся, мона́шествующих покро́ве и утвержде́ние.
Радуйся, богосло́вствующих умо́в просвещение.
Радуйся, гре́шным милосердия Бо́жия двери отверза́яй.
Радуйся, ка́ющимся грешником от Господа прощение подава́яй.
Радуйся, плоды́ достои́ны покая́ния твори́ти помога́яй.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 6
Пропове́дник славный ты, божественный Предте́че, показался еси́ в пусты́ни Иорда́нстей во дни явле́ния Христа Бога миру. Сего́ бо, Гряду́щаго к тебе, показал еси́ лю́дем, глаго́ля: «Се, А́гнец Божий, взе́мляй грехи́ мира»; Его́же мы верою позна́вше, пое́м Ему: Аллилу́иа.

Икос 6
Возсия́л еси́ свет истины, Иоа́нне богопросвеще́нне, всем явля́яй Сла́вы О́тчия Сияние, я́вльшееся пло́тски нас ради. Вопия́л бо еси́ в пусты́ни лю́дем: «Покаи́теся, прибли́жи бо ся Ца́рствие Небе́сное: сотвори́те плоды досто́йны покая́ния. Се бо гряде́т по мне, Иже крести́т вы водою и ду́хом». Сего́ ра́ди похва́льная тебе вопие́м:
Радуйся, пришествия Месси́и возвести́телю.
Радуйся, путей Госпо́дних угото́вателю.
Радуйся, ве́тхия и новыя благодати хода́таю.
Радуйся, пророков преде́ле и нача́ло апо́столов.
Радуйся, гла́се Слова благознамени́тый.
Радуйся, покаяния пропове́дниче велегла́сный.
Радуйся, многих сынов Изра́илевых ко Господу обрати́вый.
Радуйся, люди соверше́нны Го́сподеви уготовавый.
Радуйся, фарисе́ев и саддуке́ев дерзновенно обличи́вый.
Радуйся, плоды достойны покаяния твори́ти научи́вый.
Радуйся, просвещения духо́внаго указа́телю.
Радуйся, и́щущим предста́тельства твоего неусы́пный засту́пниче.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 7
Хотя́щу от тебе крести́тися Господу Иисусу, Иоанне богоблаже́нне, глаго́лал еси́: «Аз требую Тобою крести́тися», оба́че повину́яся, ре́кшу Тому: «Оста́ви ны́не», воздви́гл еси́ десницу твою на главу Его и, крестив не тре́бующаго очищения, вопия́л еси́: Аллилу́иа.

Икос 7
Новую подая́ благодать крести́тися изво́ливый от тебе Господь, сподо́би тя Духа прише́ствие ви́дети и глас О́тческий с Небесе́, свиде́тельствующий Его Сыновство́, слышати. Отню́дуже в Трие́х Ли́цех Единому Богу покланя́тися нас научил еси́, Его́же бре́нными прославля́юще устна́ми, в похвалу сия́ тебе приносим:
Радуйся, Тро́ическаго Богоявле́ния первый пропове́дниче.
Радуйся, в Трие́х Ли́цех Единаго Бога истинный покло́нниче.
Радуйся, Ду́ха Свята́го в виде голуби́не яснозри́телю.
Радуйся, снисхожде́ния Его от Отца на Сына свиде́телю.
Радуйся, гла́са с Небесе́ от Бога Отца слы́шателю.
Радуйся, явле́ние любве́ О́тчи к Сыну созерца́телю.
Радуйся, Сына Божия избра́нный Крести́телю.
Радуйся, воли Его святы́я исполнителю.
Радуйся, славнаго служения спасению рода человеческаго ревностный рачи́телю.
Радуйся, великаго Та́инства Креще́ния первый соверши́телю.
Радуйся, Божественныя ра́досте ве́стниче.
Радуйся, Новаго Завета первый учи́телю.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 8
Странное и неизрече́нное смирение воплоти́вшагося Бога Слова ви́дев, богоблаже́нне Крести́телю, Божественную Свою главу́ приклони́вша и рабское крещение прие́мша, ты и сам весь исполнился еси́ великаго смире́ния. Испроси́ у́бо боголюбе́зную добродетель сию́ и нам, одержимым го́рдостию, я́ко да от сердца смиренна вопие́м ему: Аллилу́иа.

Икос 8
Весь благода́тных дарова́ний испо́лненный, тече́ние вре́менныя жизни скончава́я, Иоанне богознамени́те, всех поучал еси́ исполнением Закона и покаянием благоугожда́ти Го́сподеви. Сего́ ра́ди благода́рственное хваление тебе, великому учителю истины, воспева́ем:
Радуйся, Закона и оправданий Господних насади́телю.
Радуйся, И́родова беззакония обличи́телю.
Радуйся, о исправлении того́ рачи́телю.
Радуйся, пра́вды ра́ди темничное заключение и у́зы претерпе́вый.
Радуйся, за истину во главу́ усеченный.
Радуйся, я́ко тело твое от учеников твоих че́стне погребе́ся.
Радуйся, я́ко Божиим смотре́нием глава твоя нетленна соблюде́ся.
Радуйся, я́ко та на утешение, освящение и цельбы́ христианом даде́ся.
Радуйся, я́ко и десни́це твоей, крестившей Господа, вернии благоче́стие покланяются.
Радуйся, я́ко от тебе мно́гая чудеса те́ми доны́не совершаются.
Радуйся, я́ко тобою ве́рнии от страстей безче́стия избавляются.
Радуйся, я́ко тобою гре́шнии к покаянию воздвиза́ются.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 9
Все естество ангельское удиви́ся высоте служения твоего, и Церковь благоговейно прославляет тя, я́ко друга Христа́ Бога, предше́дшаго пред Ним духом и си́лою Илиино́ю. Ревну́я бо по истине, дерзновенно обличал еси́ фарисе́ев и беззаконнаго И́рода, от него же и мученическую кончину прия́л еси́. Покланя́ющеся у́бо честне́й главе́ твоей, молимся ти: избави нас от страстей безче́стия, да чистым сердцем и усты́ поем: Аллилу́иа.

Икос 9
Вети́йство всякое земноро́дных не довле́ет достойно восхвали́ти тя, Иоанне богохва́льне: тебе бо уста́ Христова похвали́ша, вы́сша пророков и бо́льша всех рожде́нных жена́ми тя наименова́ша. Отню́дуже достойную похвалу принести тебе недоумева́юще, вопие́м ти сицева́я:
Радуйся, Церкве Христо́вы великая сла́во.
Радуйся, Ангелов предивное чудо.
Радуйся, пра́отцев радость и прославление.
Радуйся, пророков высокая похвало́.
Радуйся, апостолов богосве́тлый ве́нче.
Радуйся, святителей велеле́пая красото́.
Радуйся, мучеников в новой благодати нача́ло.
Радуйся, преподобных соверше́ние.
Радуйся, праведных удобре́ние.
Радуйся, девственников и по́стников основание.
Радуйся, всех христиан великое утешение.
Радуйся, я́ко от всех христианских родо́в имя твое прославляется.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 10
Спасти́ мир Прише́дшаго во плоти Христа Бога благовестил еси́ и су́щим во аде, я́коже бо денни́ца, предходящая солнцу, осветил еси́ во тьме и се́ни сме́ртней седя́щих. Отню́дуже вскоре Го́сподем изведе́н был еси́ со всеми от века праведными, поя́ Ему, я́ко Изба́вителю и Победителю смерти: Аллилу́иа.

Икос 10
Стена еси́ и прибе́жище спасительное всем, моли́твенно к тебе притека́ющим, божественный Иоанне. Сего́ ра́ди песньми похвальными ублажа́ем тя си́це:
Радуйся, мощный заступниче наш и верный от бед храни́телю.
Радуйся, злостра́ждущих от ду́хов злобы скорый помощниче и изба́вителю.
Радуйся, непло́дствующим благословение от Бога низпосыла́яй.
Радуйся, притекающих к тебе с верою от треволне́ния страстей избавля́яй.
Радуйся, во вражде су́щих скоро умиротворя́яй.
Радуйся, во всякой ну́жде и печали усердно притека́ющим к тебе скорую помощь подава́яй.
Радуйся, благотеку́щих от самообольще́ния и пре́лести изъима́яй.
Радуйся, вручающим себе твоему хода́тайству в час смертный помога́яй.
Радуйся, лю́бящих тя от воздушных мыта́рств предстательством твоим свобожда́яй.
Радуйся, почитающих славную память твою ве́чныя жизни молитвами твоими сподобля́яй.
Радуйся, нищих и вдовиц и сирот заступле́ние.
Радуйся, по Бо́зе и Богородице Христиа́ном прибежище и упова́ние.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 11
Пение всякое не довле́ет по достоя́нию до́блестей твоих восхвали́ти тя, Крестителю Господень. Но мы, любовию понужде́ни, дерза́ем воспевати вели́чия твоя, е́же ми́лостивно приими́ от нас, первостоя́телю у Престола Пресвятыя Троицы, и моли свободи́тися нам от вся́кия скве́рны греховныя, да чистым сердцем и устна́ми поем Богу: Аллилу́иа.

Икос 11
Светильника Света непристу́пнаго и всесветлых благода́тных дарова́ний всего исполнена тя, Иоанне богопросвеще́нне, ве́дуще, радостно приносим ти такова́я:
Радуйся, самови́дче озарившаго тя свыше Божественнаго Света.
Радуйся, светом доброде́телей твоих просла́вивый Бога.
Радуйся, Пресвятыя Троицы велеле́пую славу яви́вый.
Радуйся, правый и дивный путь к Небеси́ показа́вый.
Радуйся, и су́щим во аде Бога, я́вльшагося во пло́ти, благовести́телю.
Радуйся, душ пра́ведных, от века в преисподней держи́мых, возвесели́телю.
Радуйся, Владыки Христа Бога дру́же искренний.
Радуйся, яви́вый миру Свет истинный.
Радуйся, светоза́рное света ева́нгельского сия́ние.
Радуйся, рода христианскаго прославле́ние.
Радуйся, Совета Божия исполне́ние.
Радуйся, я́ко от восто́к солнца даже до запад хва́льно имя твое.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 12
Благодати тезоимени́тый Крести́телю Госпо́день и тою обогати́вся, победоно́сец преславный показался еси́: победил бо еси́ враги́ и всякую зло́бу и великое служение твое му́ченическим по́двигом запечатле́л еси́. Ны́не же, предстоя́ Престолу Царя ца́рствующих, моли́ Его дарова́ти верным победы на враги́ и во всем благопоспеше́ние, в доброде́телех же благодатное укрепление, поющим Ему: Аллилу́иа.

Икос 12
Поюще Бога, дивно в тебе просла́вльшагося, хва́лим тя, богоблаже́нне Крести́телю, я́ко и́скренняго друга Христова, прославляем вели́кия по́двиги твоя, ублажаем мученическую кончину твою и сицева́я радостно вопие́м ти:
Радуйся, вселенский апо́столе и Новаго Завета первому́чениче.
Радуйся, явлением Христа на земли́ откры́вшагося Царствия Небеснаго первый пропове́дниче.
Радуйся, язы́ков Божественное призвание предвозвести́вый.
Радуйся, безве́стная и та́йная премудрости Божия миру яви́вый.
Радуйся, божественными дея́нии плодоно́сен паче иных яви́выйся.
Радуйся, я́ко светом дел твоих просла́вися Отец Небесный.
Радуйся, я́ко о памяти твоей Церковь Христо́ву весели́ши неизрече́нно.
Радуйся, я́ко ныне вечнаго наслажда́ешися веселия изоби́льно.
Радуйся, божественными лучами Трисо́лнечнаго Света осиява́емый.
Радуйся, я́ко со безпло́тными Трисвяту́ю песнь Богу немо́лчно вопие́ши.
Радуйся, я́ко ныне, зерца́лом разре́шшимся, несре́дственне зри́ши Святую Троицу.
Ра́дуйся, вели́кий Иоанне, Проро́че, Предте́че и Крести́телю Госпо́день.

Кондак 13
О великий и преславный Предте́че и Крести́телю Господень Иоа́нне, приими́ от нас ныне приноси́мое тебе моле́ние и твоими богоприя́тными к Богу молитвами изба́ви нас от всякаго зла, и ве́чныя изми́ му́ки, и наследниками Царствия Небеснаго соде́лай, да вовеки поем Богу: Аллилу́иа.
(Этот кондак читается трижды, затем икос 1 и кондак 1)

Икос 1 Ангел Господень явися отцу твоему стоя одесную олтаря кадилнаго, благовести пречудное твое, крестителю Господень Иоанне зачатие, глаголя: не бойся Захарие: зане услышана бысть молитва твоя, и жена твоя Елисавет родит сына тебе, и наречеши имя ему Иоанн: и будет тебе радость и веселие, и мнозии о рождестве его возрадуются, сего ради и мы радующеся приносим ти радостная сице:
Радуйся,радости многим подателю. Радуйся, печалій злых отгонителю.

Радуйся, человече от Бога посланный к верным.
Радуйся,свидетельствовавый о свете истинном.
Радуйся, Иереа по чину великаго сыне. Радуйся, родителей праведных плоде. Радуйс я, гласе вопиющаго в пустыни.
Радуйся, исполненный всякия благостыни.
Радуйся,яко зачатие твое Ангел благовествова.
Радуйся, яко рождество твое многих возрадова.
Радуйся, пред лицем Господним путь уготовавый.
Радуйся, Иоанне великий пророче Предтече и Крестителю Господень.

Кондак 1 Возбранный свидетелю Христов Иоанне, о тебе Евангелист глаголет: бысть человек послан от Бога, имя ему Иоанн, сей прииде во свидетельство, да свидетельствует о свете, да вси веру имут ему. Темже и мы верующе во Хрииста по твоему свидетельству: вопием: Радуйся,Иоанне великий пророче Предтече и Крестителю Господень

Молитва

Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и Небе́сными, моли́ся ко Влады́це за мене́ недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́; аз бо есмь верте́п злых дел, отню́дь не име́яй конца́ грехо́вному обы́чаю; пригвожде́н бо есть ум мой земны́м ве́щем, что сотворю́, не вем, и к кому́ прибе́гну, да спасе́на бу́дет душа́ моя́? То́кмо к тебе́, святы́й Иоа́нне, благода́ти тезоимени́те, я́ко тя пред Го́сподем по Богоро́дице вем бо́льша бы́ти рожде́нных всех, и́бо ты сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ от ны́не, в пе́рвыйна́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чи́стоты учи́телю и бли́жний дру́же Христо́в, тя молю́, к тебе́ прибега́ю: не отри́ни мене́ от твоего́ заступле́ния, но возста́ви мя па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́, креще́нием омыва́яй прароди́тельный грех, покая́нием же очища́яй коего́ждо де́ло скве́рно. Очи́сти мя, греха́ми оскверне́ннаго и пону́ди вни́ти, а́може ничто́же скве́рно вхо́дит, во Ца́рствие Небе́сное. Ами́нь.





КАНОН СВЯТОМУ ИОАННУ ПРЕДТЕЧЕ

Песнь 1
Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь, славно бо прославися.

Припев: Святый великий Иоанне Предтече Господень, моли Бога о нас.

Крестителю и Предтече Христов, погружаемый всегда сластьми телесными ум мой управи и волны страстей укроти, яко да в тишине Божественней быв, песнословлю тя.

Припев: Святый великий Иоанне Предтече Господень, моли Бога о нас.

Недоуменным просветився просвещением, яко многосветлая звезда, мысленному Востоку предтекл еси, Имже озаритися сердцу моему, Крестителю, моли, омраченному всеми бесовскими приложении.

Слава:

В реце бездну иногда, Всемудре, погрузил еси, потоп содевающую благодатию всего преступления. Но молюся, потоки, блаженне, моих прегрешений изсуши, Божественным ходатайством твоим.

И ныне:

Чистыя Девы, Бога воплотившия, сродник был еси, блаженне Предтече, с Нею же тя чтим и молим, иже в Божественнем храме твоем ныне живуще, храмы и нас сотвори Духа Святаго.


Песнь 3

На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Припев: Святый великий Иоанне Предтече Господень, моли Бога о нас.

Исцели струпы души моея и ум мой, омраченный небрежением, озари Божественным твоим ходатайством, Господень Предтече, и всякаго избави мя сопротивнаго обстояния, молюся.

Припев: Святый великий Иоанне Предтече Господень, моли Бога о нас.

Неплодствие разрешил еси рождшия, родився Божиим промышлением, премудре пророче; неплодное убо сердце мое плодоносно ныне соделай, Господень Предтече, ходатайством твоим, добродетелей приносити прозябения.

Слава:

Любовию твоею созидающаго Божественный дом, вышняго жития улучити моли: и иже верою храму твоему служащия, храмы Духа Божественнаго сотвори, Крестителю и Предтече, ходатайствы твоими.

И ныне:

Веселяшеся Предтеча, в ложеснах носим матерних, и покланяшеся Господу, носиму в ложеснах Твоих, Благодатная, Егоже моли от всякия скорби избавити мя.


Седален, глас 2-й

Благоутробия ради милости, Блаже, спасти Твое создание, Христе, пришел еси, преклонь небеса схождением Твоим. Темже страшное смотрение Твое, поюще, вопием Ти: мольбами Предтечи Твоего очищение грехов подаждь нам, яко Един благоутробен.

Слава Отцу и Сыну и Святому Духу, и ныне и присно и во веки веков. Аминь: Богородичен

Предстательнице теплая христианом, Сыну Твоему молися присно, Богородице, всякаго злодейства и огорчения избавити нас борца и дати нам прощение, в нихже согрешихом, за милосердие щедрот, Твоими молитвами, Мати Дево.


Песнь 4

Пришел еси от Девы, не ходатай, ни ангел, но Сам, Господи, воплощся и спасл еси всего мя человека. Тем зову Ти: слава силе Твоей, Господи.

Припев: Святый великий Иоанне Предтече Господень, моли Бога о нас.

Преклоншему небеса и человеком беседовавшу, главу преклонил еси десницею твоею, пребогате; еюже мя соблюди, во смирении сохраняя сердце мое.

Припев: Святый великий Иоанне Предтече Господень, моли Бога о нас.

Пустыня тебе гражданина непроходная имяше, блаженне Предтече, темже вопию ти: пусту всякаго Божественнаго деяния бывшу душу мою, плодоносну сотвори.

Припев: Святый великий Иоанне Предтече Господень, моли Бога о нас.

Закон Божественный управляя, беззаконно заклан был еси. Темже молюся тебе: беззаконнующа мя всегда и прельщаема бесовскими прельщенми исправи.

Слава:

Создав себе храм Владыце Царю, к Божественным селением ныне пришел еси, Предтече: яже получити моли, тебе пресвятый дом Воздвигшаго.

И ныне::

Призри на мя недугующаго, Всенепорочная, и разреши страсти моя лютыя и неудобоисцельныя, яко да величаю Тя, возвеличившую все человечество.


Песнь 5

Просвещение во тьме лежащих, спасение отчаянных, Христе Спасе мой, к Тебе утренюю, Царю мира, просвети мя сиянием Твоим: иного бо разве Тебе Бога не знаю.

Припев: Святый великий Иоанне Предтече Господень, моли Бога о нас.

В течениих Иорданских струю нетления, Предтече, крестив Христа, моли, истекания страстей моих изсушити, и потоки сладостныя наследовати, и праведных красная радования.

Припев: Святый великий Иоанне Предтече Господень, моли Бога о нас.

Уже рыдаю, и содрогаюся страхом, и недоумением всегда содержимь есмь, помышляя моя соделанная и будущий суд ужасный: Благоутробне Господи, пощади мя Твоего Крестителя мольбами.

Припев: Святый великий Иоанне Предтече Господень, моли Бога о нас.

Законополагаяй людем спасение, Предтече, в раскаянии прегрешений бывшее, посреде закона и благодати стал еси. Сего ради молим тя, образми покаяния нас просвети.

Слава:

Даждь ми время покаяния, унынно прешедшее все иждившему, Благодетелю, имея на сие молящаго Тя, Слове, Иоанна великаго, Предтечу и покаяния всемирнаго проповедника.

И ныне:

Наветы и ловлении льстиваго умертвихся, Владычице Всенепорочная, оживи мя, яже рождшая Живот всех, Богородице, ипостасный, да Тя пою благочестно Всенепорочную.


Песнь 6

В бездне греховней валяяся, неизследную милосердия Твоего призываю бездну: от тли, Боже, мя возведи.

Припев: Святый великий Иоанне Предтече Господень, моли Бога о нас.

Глас Слова проповедавый, всех гласы восприем, проси грехов прощение даровати верою поющим тя.

Припев: Святый великий Иоанне Предтече Господень, моли Бога о нас.

Сокрушение души моея исцели, и грехов бремя разреши, и паче надежды спаси мя молитвами твоими, блаженне Предтече.

Слава:

Иисуса, Егоже рукою твоею крестил еси, Предтече, моли, руки греха избавити мя, взимающа к Нему руце присно, всеславне.

И ныне:

Дреманием леностным одержимь есмь, сон греховный тяготит сердце мое: Твоим, Пречистая, бденным ходатайством, воздвигни и спаси мя.


Кондак, глас 3-й

Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча.


Икос

Восхвалим ныне Господня Предтечу, егоже священнику Елисавет роди из ложесн неплодных, но не без семене: Христос бо един вместилище пройде непроходимо без семене. Иоанна неплоды роди, без мужа же сего не роди: Иисуса же, осенением Отца и Духа Божия, Дева роди Чистая. Но безсеменному явися от неплодове пророк, проповедник, вкупе и Предтеча.


Песнь 7

Богопротивное веление беззаконнующаго мучителя высок пламень вознесло есть; Христос же простре богочестивым отроком росу духовную, сый благословен и препрославлен.

Припев: Святый великий Иоанне Предтече Господень, моли Бога о нас.

Из корене секирою твоего покаяния исторг язвы страстнаго сердца моего, всади, Предтече, Божественное безстрастие и страх чистейший Божий, всякия злобы отчуждающий мя.

Припев: Святый великий Иоанне Предтече Господень, моли Бога о нас.

Во струях Иорданских яко крестил еси покрывающаго водами превыспренняя Господа, Того моли воду даровати Божественнаго умиления присно очима моима, славный Предтече.

Слава:

Иже миру вземлющаго грех, Агнца Божия, Предтече, проповедав, Того моли от козлищ части явити мя чужда, и десным Его овцам и мене сочетати, славне.

И ныне:

Неплодная утроба носяше Тя, Дево, во чреве носившую Слово воплощенно: Егоже Божественными взыгрании великий Предтеча, неплодныя всесвятый плод, позна радуяся и поклонися.


Песнь 8

Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Припев: Святый великий Иоанне Предтече Господень, моли Бога о нас.

Даждь десницу мне, на земли лежащему, Предтече, иже десницу простер, омыл еси водами Несквернаго: и избави мя скверны телесныя, всего мя очищая покаянием, и спаси мя.

Припев: Святый великий Иоанне Предтече Господень, моли Бога о нас.

Имущи, душе, время покаятися, лености тяжчайжий сон оттряси и спешно побди, вопиющи Владыце твоему: Милосерде, ущедри мя, Крестителя Твоего мольбами.

Припев: Святый великий Иоанне Предтече Господень, моли Бога о нас.

Потоцы страстей и воды злобы до души моея внидоша: блаженне Предтече, потщися скоро изъяти мя, иже речными струями измыл еси безстрастия тишайшую пучину.

Слава:

Увы, мне многа зла сотворшему! увы мне, единому прогневавшему Бога Преблагаго! Крестителю Христов, помози ми, и подаждь прегрешений моих разрешение, и долгов моих отсечение ходатайствы твоими.

И ныне:

Вышняго Бога плотию рождшая, от гноя мя возстави страстей, оскорбляющих мя: и люте всего обнищавша, Божественными обогати, Пречистая, добродетельми, яко да воспою Тя спасаемь.


Песнь 9

Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная, тем Всепетую Богородицу величаем.

Припев: Святый великий Иоанне Предтече Господень, моли Бога о нас.

Кала мя избави греховнаго, Господи, Безгрешне Едине и Многомилостиве, Крестителя мольбами, иже Тебе проповеда всему миру Агнца Божия, вземлющаго человеков грехи.

Припев: Святый великий Иоанне Предтече Господень, моли Бога о нас.

Яко шипок благовонен, яко благоуханный кипарис, яко неувядаемый крин, яко миро честно имеяй тя, Господень Предтече, моих дел злосмрадия избавляюся молитвами твоими, притекая к покрову твоему.

Припев: Святый великий Иоанне Предтече Господень, моли Бога о нас.

Неплодствовати мя неплодными делы, всеблаженне, сотвори, добродетелей благоплодие присно приносяща, чадо мя Господне творя, и причастника Божественному Царствию, и святых собору купножителя.

Слава:

Нам любящим тя, любовию почитающим, и в Божественнем храме твоем ликующим, даждь с небесе разрешение лютых, Предтече Господень, и жития исправление, и прегрешений избавление.

И ныне:

Носиму во утробе Богоматерни, вся носящему манием, поклонился еси, пророче: с Неюже моли смиренней спастися души моей, во многая впадающей по вся дни согрешения.


Молитва ко святому Иоанну Предтече

Крестителю Христов, проповедниче покаяния, кающагося не презри мене, но совокупляяся с вои небесными, молися ко Владыце за мене недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего: аз бо есмь вертеп злых дел, отнюдь не имеяй конца греховному обычаю: пригвожден бо есть ум мой земным вещем: что сотворю, не вем. И к кому прибегну, да спасена будет душа моя? токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ибо ты сподобился еси коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне от ныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний пророче, первый (во благодати) мучениче, постников и пустынников наставниче, чистоты учителю и ближний друже Христов, тя молю, к тебе прибегаю: не отрини мене от твоего заступления, но возстави мя падшагося многими грехи; обнови душу мою покаянием, яко вторым крещением, понеже обоего начальник еси: крещением омываяй прародительный грех, покаянием же очищаяй коегождо дело скверно; очисти мя грехами оскверненнаго и понуди внити, аможе ничтоже скверно входит, во Царствие Небесное. Аминь.


Во вторник

Молитва святому Архангелу Гавриилу
О святый великий Архангеле Гаврииле, Божию престолу предстояй и озарением от Божественнаго света осиянный, ведением же непостижимых тайн о превечне премудрости Его просвещенный! Всеусердно молю тя, настави мя к покаянию от злых дел и ко утверждению в вере моей, укрепи и огради душу мою от искушений прельстительных и умоли Создателя нашего о отпущении грехов моих. О святый великий Гаврииле Архангеле! Не презри мене, грешнаго, молящагося тебе о помощи и заступлении твоем в веце сем и в будущем, но присно помощник, мне явися, да непрестанно славлю Отца и Сына и Святаго Духа Державу, и твое предстательство, во веки веков. Аминь.

Из книг наместника Т.-С. Лавры Архимандрита Антония

Кондак 1 Возбранный свидетелю Христов Иоанне, о тебе Евангелист глаголет: бысть человек послан от Бога, имя ему Иоанн, сей прииде во свидетельство, да свидетельствует о свете, да вси веру имут ему. Темже и мы верующе во Хрииста по твоему свидетельству: вопием: Радуйся,Иоанне великий пророче Предтече и Крестителю Господень.

Икос 1 Ангел Господень явися отцу твоему стоя одесную олтаря кадилнаго, благовести пречудное твое, крестителю Господень Иоанне зачатие, глаголя: не бойся Захарие: зане услышана бысть молитва твоя, и жена твоя Елисавет родит сына тебе, и наречеши имя ему Иоанн: и будет тебе радость и веселие, и мнозии о рождестве его возрадуются, сего ради и мы радующеся приносим ти радостная сице:
Радуйся,радости многим подателю. Радуйся, печалій злых отгонителю.

Радуйся, человече от Бога посланный к верным.
Радуйся,свидетельствовавый о свете истинном.
Радуйся, Иереа по чину великаго сыне. Радуйся, родителей праведных плоде. Радуйс я, гласе вопиющаго в пустыни.
Радуйся, исполненный всякия благостыни.
Радуйся,яко зачатие твое Ангел благовествова.
Радуйся, яко рождество твое многих возрадова.
Радуйся, пред лицем Господним путь уготовавый.
Радуйся, Иоанне великий пророче Предтече и Крестителю Господень.

Кондак 2 Видим яко вси концы земли празднуют честное твое, Иоанне святый, зачатие, во чреве бо матернем освящен еси, бысть слово Господне якоже ко Иеремии и к тебе, прежде неже создах тя во чреве познах тя, и прежде неже изыити тебе от матере своея освятих тя: сего ради и мы празднующе торжество твое, и хваляще тя, поем Богу: Аллилуиа.

Икос 2 Разумевши Богородица Мариа от Архангела благовествующа Зачатие твое Иоанне святый иде со тщанием во град Иудов, и вниде в дом Захариин и целова Елисавет, и бысть яко услыша Елисавет целование Мариино возрадовался еси младенец во чреве ея. Темже и мы радостно поем тебе:

Радуйся, во чреве матернем освященный.

Радуйся,прежде рождества Духа Святаго исполненный.

Радуйся,тем же именем от родителей названный.

Радуйся, познавый в ложеснах матерних Создателя своего.

Радуйся, поклонивыйся с радостию пришествию Его.

Радуйся, деннице праведнаго Солнца. Радуйся, сродниче Господа нашего Иисуса Христа.

Радуйся, яко Духа Свята Елисавет, мати твоя, исполнена.

Радуйся, яко от нея Благословенною в женах Богородица наречена.

Радуйся, яко тобе ради родители твои возвеселишася.

Радуйся, яко мнози Зачатию твоему в старости их чудишася.

Радуйся,Иоанне великий пророче Предтече и Крестителю Господень.

Кондак 3 Силою свыше посланный ангел благовести о зачатии твоем, Иоанне достохвальне, услышав же о сем Захарий отец твой рече: по чесому разумею се, аз бо есмь стар и жена моя заматаревши во днех своих. Отвеща ему Ангел и рече: аз есмь Гавриил Архангел, предстояй пред Богом и послан есть благовестити тебе сия: совершившей же ся истинне, усердно Захария возопи Богу: Аллилуиа.

Икос 3 Имуще помышление людие о тайне отца Твоего, Иоанне, Захарии, исходяща от олтаря кадильнаго нема, разумеша яко видение виде в церкви. Уведавше же по сих радостное твое рожество, мнози радовахуся и радостная тебе приношаху глаголюще:

Радуйся, 4отроча добродушное и добронасажденное.

Радуйся, детище всякия благодати Божия исполненное.

Радуйся, пречудное рождество свое нам являяй.

Радуйся,темже многих увеселяяй. Радуйся, яко с тобою рука Господня. Радуйся,яко при твоем рождестве великая быша пророчествия.

Радуйся,отцу своему благоглаголание возвративый.

Радуйся, матери поношение отвративый. Радуйся, при твоем рождестве Пречистая Дева бяше.

Радуйся, и носящая всех Создателя тебе благословляше.

Радуйся, яко отец твой Захария исполнися Духа Свята.

Радуйся, яко он же и пророчествуя пояше, величая Христа.

Радуйся,Иоанне великий пророче Предтече и Крестителю Господень.

Кондак 4 Бурю внутрь радостную Елисавет имея от играния твоего, Иоанне, святе во чреве своем, исполнися Духа Свята и возопи гласом велиим к Богородице и рече: благословенна Ты в женах, и благословен плод чрева Твоего, и откуду мне сие да прииде Мати Господа моего ко мне, себо яко бысть глас целования Твоего во ушию моею взыграся младенец радощами во чреве моем, темже и мы радующеся вопием к Богу: Аллилуиа.

Икос 4 Слышаша окрест живущии, яко отверзошася уста и язык отца твоего по рождестве твоем, Иоанне всеблаженне, и исполнися Духа Свята и пророчествова глаголя: Благословен Господь Бог Израилев, яко посети и сотвори избавление людем своим, тем же и мы благословяще Господа пославшаго тя, вопием ти глаголюще:

Радуйся, от юности своея в пустыни Господеви послуживый.

Радуйся, вся плотския похоти Бога ради умертвивый.

Радуйся, вина и пития упоявающаго не вкусивый.

Радуйся, ризу от влас вельблюжиих на себе носивый.

Радуйся, многия люди ко Господу Богу обративый.

Радуйся, многия языки житием своим просветивый.

Радуйся, снедь имевый пружие и мед дивій.

Радуйся, во Иордане людей приходящих крестивый.

Радуйся, фарисеов и саддукеов дерзновенно обличивый.

Радуйся, покаяние о гресех творити повелевый.

Радуйся, исповедание грехов уставивый.
Радуйся, кающимся Царствие Небесное известивый.

Радуйся,Иоанне великий пророче, Предтече и Крестителю Господень.

Кондак 5 Боготечную денницу узревше тя посланни от Иерусалима, вопрошаху: ты кто еси? И исповедал еси им, Иоанне премудре, яко несть аз Христос: но глас вопиющаго в пустыни, исправите путь Господень, аз крещаю вы водою, стоит же посреде вас, Его же вы не весте, Той есть грядый по мне, Иже предо мною бысть: мы же познавше свидетельством твоим Христа, поем: Аллилуиа.

Икос 5 Видяще отроча пророком вышняго нареченное, тебе предизбранный Иоанне, о нем же Господь Иисус рече: яко не веста в рожденных женами болій. Како недостойный возможет достойно тебе, Богом похваленнаго похвалити, но радостію влекоми, тебе радостная приглашаем поюще:

Радуйся,праведнаго Авраама верна словесем Господним вернейший.

Радуйся, Исаака ведена к жертве послушнейшій.

Радуйся, Иакова в чадех духовных множайшій.

Радуйся, Леввия в племени своем достойнейшій.

Радуйся, Иосифа в чистоте краснейшій. Радуйся, Иова в страдании своем терпеливейшій.

Радуйся, Моисея в законе Божием искуснейшій.

Радуйся, Аарона в Божественном чине святейшій.

Радуйся, Елиазара в Божіей помощи дерзновеннейшій.

Радуйся, Иисуса Навина во бранех духовных крепчайшій.

Радуйся, Халева в згляданіи земли обетованныя величайшій.

Радуйся, Иоанне великий пророче, Предтече и Крестителю Господень.

Кондак 6 Проповедника суща покаянию посланни от фарисей вопрошаху тя, что крещаеши, аще ты неси Христос, ни Илия, ни пророк, ты же Иоанне святе, отвещал еси им, глаголя: аз крещаю вас водою в покаяние, грядый же по мне креплій мене есть: Его несть достоин сапоги понести, Той вы крестит Духом Святым, темже и мы крещшеся от Него поем с тобою яко Богу: Аллилуиа.

Икос 6 Возсиявшее неизреченно, воздержание жития твоего ведяще, удивляемся Иоанне, достойно Ангела бо тя по плоти с человеки на земли живуща разумеваем. Темже и славяще память твою, тебе радостная воспеваем глаголюще: Радуйся,наставниче великий спасению. Радуйся,приводяй грешных ко исправлению. Радуйся,чудес Христовых известное похваление.

Радуйся,душ немощных исцеление. Радуйся,во Иорданской реце грехи омываяй.

Радуйся,благодати Божія сподобляяй. Радуйся,ангца Божія перстом показавый. Радуйся,вземлющаго грехи миру благовествовавый.

Радуйся,крещением весь мир обновляяй. Радуйся,тем же и разум наш просвещаяй. Радуйся,всю силу бесовскую сокрушаяй. Радуйся,силою Христовою верных укрепивый. Р

адуйся,Иоанне великий пророче, Предтече и Крестителю Господень.

Кондак 7 Хотя от века не слышанное явити Сын Божий, на Иордан прииде к тебе Иоанне креститися, ты же возбраняше Ему глаголя: аз требую от Тебе креститися, и ты ли грядеши ко мне; отвещав же ти Иисус рече: остави ныне, такобо подобно есть нам исполнити всяку правду: мы же, хваляще Бога, тобою крещшагося поем:Аллилуиа.

Икос 7 Новую подая благодать, человек и Бог явился еси Христос на Иордане Иоанну, рукама бо Он пречистую плоть Твою осязаше; и глас с небесе от Бога Отца свидетельствующ слышаше: сей есть Сын Мой возлюбленный, о Нем же благоволих; сего ради и мы срадующеся тебе вопием:

Радуйся, тройческаго поклонения исповедниче.

Радуйся, единому в тріех лицех Богу истинный поклонниче.

Радуйся, гласа с небесе от Бога Отца слышателю.

Радуйся, явления любве Отчи к Сыну познателю.

Радуйся, Сына Божія во Иордане крестивый.

Радуйся, верху главы Владычнія руку возложивый.

Радуйся, Духа Святаго, яко голубя зрителю.

Радуйся, исхождения Его от Отца на Сына свидетелю.

Радуйся,всяку правду исполняти послушавый.

Радуйся, правы стези Господни содеявый.

Радуйся, Крещение во оставление грехов проповедаяй.

Радуйся,крестящимся небеса отверста являяй.

Радуйся, Иоанне великий пророче, Предтече и Крестителю Господень.

Кондак 8 Странное видение фарисеев и саддукеев зря, блаженне Иоанне, грядущих ко крещению, рекл еси: рождения ехидново! Кто сказа вам бежати от будущаго гнева; сотворите убо плоды достойные покаяния, тем же и мы кающеся о гресех, поем: Аллилуиа.

Икос 8 Весь еси, разумом ангельским, не токмо человеческим, хваления достоин, Иоанне святе, ты бо болій пророка: о тебе бо писано есть: се Аз посылаю Ангела Моего пред лицем Твоим, иже уготовит путь Твой пред Тобою, темже и мы поем тебе таковая:

Радуйся, дерзостнейшій умом Гедеоначуднаго.

Радуйся, сильнейшій духом Самсона сильнаго.

Радуйся, смирнейшій сердцем Самуилачестнаго

Радуйся, умиленнейшій псалмопеніем Давида кроткаго.

Радуйся, превосходящій разумом Соломона премудраго.

Радуйся, совершеннейшій ревностію Иліи славнаго

Радуйся, сладчайшій друголюбіем Елисея щедраго.

Радуйся, известнейшій пророчеством Исаіи Богогласнаго

Радуйся, большій терпеніем Іереміи плачевнаго.

Радуйся, вящшій виденіем Іезекіиля Богозрящаго.

Радуйся, прозорливейшій умом Даниіла желательнаго.

Радуйся, благонравнейшій Варуха послушливаго.

Радуйся, Иоанне великий пророче, Предтече и Крестителю Господень.

Кондак 9 Всякому естеству Ангельскому равное житие твое видяще Иоанне удивляемся, каковы похвалы и молитвы ти принесем, от дній бо твоих до сих Царствие Небесное нудится, свидетельствующу Господу, Ему же вернии поем: Аллилуиа.

Икос 9 Вития любомудрыя недоумеют достойно славити тя, достойный всякія славы, предтече Христов и крестителю Иоанне, мы же любовию понуждаеми дерзаем пети тебе таковая:

Радуйся,Ангельское житие являяй нам. Радуйся, страсти греховныя уставляяй. Радуйся, образе смирения.
Радуйся, зерцало терпения.
Радуйся, светильниче горяй и светяй. Радуйся,Солнцу Праведному предходяй. Радуйся, учителю Божиих заповедей. Радуйся, исправителю многих людей. Радуйся, истиннаго наказателю разума. Радуйся, таинственнаго вразумителю ума.

Радуйся, мирскую славу оставивый. Радуйся, небесное житие на земли поживый.

Радуйся,Иоанне великий пророче, Предтече и Крестителю Господень.

Кондак 10 Спасти хотя царя Ирода четверовластника, дерзновенно обличил еси, Иоанне святе, жены ради Филиппа, брата его, еяже не подобаше ему имети: он же спасения не хотя, повеле тя в темницу затворити. Но ты стражда в ней любезно пел еси Богу: Аллилуиа.

Икос 10 Стена и утверждение Иоанне был еси всем иже прихождаху к тебе креститися и вопрошаху ти глаголюще, что сотворим? Им же душеполезное подавал еси учение, еже приемшіи вопияху к тебе глагол обще:

Радуйся, премудрый проповедателю.
Радуйся, пресладкий обличителю. Радуйся, сказавый бежати от грядущаго гнева Божія.

Радуйся, наказавый сотворити плоды достойны покаянія.
Радуйся, милостыню творити поучаяй.
Радуйся, ризы не имущим подавати повелеваяй.

Радуйся, мытарей покаянию научивый.
Радуйся, повеленная им творити наставивый.

Радуйся, воином Богоугодное устроеніе давый.

Радуйся, довольным быти им своими оброки увещавый.

Радуйся, повелевый им ни кого обижати.
Радуйся, заповедавый друг друга не оклеветати.

Радуйся,Иоанне великий пророче, Предтече и Крестителю Господень.

Кондак 11 Пение благодарственное, гласе Господень Иоанне крестителю, страждущій в темнице, принося, слышал еси о делех слова Божия Иисуса, и послал еси два от ученик своих вопросити от него: Ты ли еси грядый, или инаго чаем? Отвещав же Иисус рече има: шедша вовестиста Иоанови, яже слышаста и видеста, темже и мы уведевше о сем приносим тому же Господу пение: Аллилуиа.

Икос 11 Светозарна тя светильника, являя всем свет миру, Иисус, егда отыдоша ученицы твои, начат народом глаголати о тебе Иоанне прехвалне, что изыдосте в пустыню видети, пророка ли? Ей глаголю вам и лишше пророка, темже и мы недостойные хвалим тя поюще:

Радуйся, Иосии пророка спасающаго святейшій.

Радуйся, Иоиля Боголюбезнаго любезнейшій.

Радуйся, Аммоса пастыря долготерпеливейшій.

Радуйся, Авдия, раба Господня, достойнейшій.

Радуйся, Ионы, голубю тезоименита, кротчайшій.

Радуйся, Наума утешительнаго умиленнейшій.

Радуйся, Аввакума, воина крепка, сильнейшій.

Радуйся, Софронія стража, добрейшій.
Радуйся, Аггея радостнаго благоприятнейший.

Радуйся, Захарии посланника, вернейшій
.
Радуйся, Иоанне великий пророче, Предтече и Крестителю Господень.

Кондак 12 Благодать покаяния проповедавшую главу твою, благодати тезоименитій Иоанне, усекнувши спекулатор, по повелению злочестиваго Ирода, принесе на блюде, и даде ю девице, девица же матери своей. Слышаша же ученицы твои о сем приидоша и взявше тело твое, положиша е во гробе и возопиша рыдающе к Богу: Аллилуиа.

Икос 12 Поюще вси люди Ангельское на земли, Иоанне, житие твое, Бога Единаго в Троице прославляют; и тебе, сущему на небесех радостная приносят глаголюще:

Радуйся, поучителю небеснаго жития.
Радуйся, свидетелю Христова пришествия.

Радуйся, пророче честнейшій всех пророков.

Радуйся,посланниче Божій славнейшій Апостолов.

Радуйся, пустынниче, мирскую честь и богатство возненавидевый.

Радуйся, постниче от юности Богу послуживый.

Радуйся, девственниче душею и телом.
Радуйся, мучениче пресильный мужеством.

Радуйся, исповедниче Господень претихий.

Радуйся, иноком началниче предивный. Радуйся, душ наших радование.

Радуйся,Иоанне великий пророче, Предтече и Крестителю Господень.

Кондак 13 О всехвалне пророче, предтече и крестителю Господень Иоанне, довлеет ти к похвалению свидетельство самаго Господа, яко болий еси всех пророков. Они бо словесы проповеда вси. Ты же и перстом показал еси Его глаголя: се Агнец Божий, вземляй грехи мира. Приемши от нас похвальныя сия песни умоли Его, да вземлет от нас прегрешения наша, и сподобит Царствия Своего, верно вопиющих Ему: Аллилуиа. Трижды, затем ик.1, к.1.

Икос 1 Ангел Господень явися отцу твоему стоя одесную олтаря кадилнаго, благовести пречудное твое, крестителю Господень Иоанне зачатие, глаголя: не бойся Захарие: зане услышана бысть молитва твоя, и жена твоя Елисавет родит сына тебе, и наречеши имя ему Иоанн: и будет тебе радость и веселие, и мнозии о рождестве его возрадуются, сего ради и мы радующеся приносим ти радостная сице:
Радуйся,радости многим подателю. Радуйся, печалій злых отгонителю.

Радуйся, человече от Бога посланный к верным.
Радуйся,свидетельствовавый о свете истинном.
Радуйся, Иереа по чину великаго сыне. Радуйся, родителей праведных плоде. Радуйс я, гласе вопиющаго в пустыни.
Радуйся, исполненный всякия благостыни.
Радуйся,яко зачатие твое Ангел благовествова.
Радуйся, яко рождество твое многих возрадова.
Радуйся, пред лицем Господним путь уготовавый.
Радуйся, Иоанне великий пророче Предтече и Крестителю Господень.

Кондак 1 Возбранный свидетелю Христов Иоанне, о тебе Евангелист глаголет: бысть человек послан от Бога, имя ему Иоанн, сей прииде во свидетельство, да свидетельствует о свете, да вси веру имут ему. Темже и мы верующе во Хрииста по твоему свидетельству: вопием: Радуйся,Иоанне великий пророче Предтече и Крестителю Господень.


Молитва 1-я Крестителю Христов, Проповедниче покаяния, не презри мене кающагося, но совокупляяся с вои Небесными, молися ко Владыце за недостойнаго мене во многия беды впадшаго. Аз бо есмь вертеп злых дел, отнюдь не имеющий конца греховному обычаю, пригвожден бо ум мой земным вещем. Что сотворю? Не вем. К кому прибегну, да спасена будет душа моя? Токмо к тебе, святый Иоанне, благодати тезоимените! Вем бо тя пред Господем по Богородице больша быти всех рожденных: ибо ты сподобился коснутися верху Царя Христа, вземлющаго грехи мира, Агнца Божия. Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними. Ей, Крестителю Христов, честный Предтече, крайний Пророче, первый мучениче, постников и пустынников наставниче, чистоты учителю и ближний друже Христов. Тя молю, к тебе прибегаю: не отрини мене от твоего заступления, но возстави мя, падшагося многими грехи. Обнови душу мою покаянием, яко вторым крещением, понеже обоего еси проповедник, и испроси ми истинное покаяние, и оставление грехов и понуди тамо внити, аможе ничтоже скверно входит - в Царствие Небесное. Аминь.

МОЛИТВА 2-я Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас, недостойных рабов, унылых, немощных, во многия грехи впадших. Смерти убо чаем, о гресех же наших николиже поболехом и о Царствии Небеснем не попекохомся: но не презри нас, Крестителю Христов, честный Предтече, болий рожденных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отрини нас, просящих твоего заступления, обнови души наша покаянием, еже есть второе крещение: твоим ходатайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матери, Владычицы нашея Богородицы, спаси нас, грешных рабов Твоих, кающихся о гресех. Ты бо еси Бог кающихся, и на Тя, Спасителя, возлагаем надежду, славяще Пресвятое Имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

ТРОПАРЬ, ГЛАС 4 Первее нераждающая, неплоды, возвеселися: се бо зачала еси Солнца светильника яве, просвещати имуща всю вселенную, слепотою недугующую. Ликуй, Захарие, вопия со дерзновением: пророк Вышняго есть хотяй родитися. (23 сентября/б октября; Зачатие Предтечи и Крестителя Иоанна)

ИН ТРОПАРЬ, ГЛАС 4 Пророче и Предтече пришествия Христова, достойно восхвалити тя недоумеем мы, любовию чтущия тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется. (24 июня/7 июля; Рождество святого Пророка, Предтечи и Крестителя Иоанна)

ИН ТРОПАРЬ, ГЛАС 4 От земли возсиявши, Предтечева глава лучи испущает нетления верным исцелений: свыше собирает множество ангел, доле же созывает человеческий род, единогласную возсылати славу Христу Богу. (24 февраля/9 марта; Первое (IV) и второе (452) обретение главы Иоанна Предтечи)

ИН ТРОПАРЬ, ГЛАС 4 Яко Божественное сокровище, сокровенное в земли, Христос откры главу твою нам, Пророче и Предтече; вси убо сошедшеся в сея обретение, песньми благоглаголивыми Спаса воспоим, спасающа нас от тления молитвами твоими. (25 мая/ 7 июня; Третье обретение главы Предтечи и Крестителя Господня Иоанна (ок. 850))

ИН ТРОПАРЬ, ГЛАС 2 Память праведного с похвалами, тебе же довлеет свидетельство Господне, Предтече: показал бо ся еси воистинну и Пророков Честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость. (7/20 января; Собор Предтечи и Крестителя Господня Иоанна; 29 августа/11 сентября; Усекновение главы Пророка, Предтечи и Крестителя Господня Иоанна)

Тропарь на перенесение десной руки Иоанна Предтечи, глас 4 От запада возсиявши Предтечева рука,/ лучи испущает нетления верным исцелений,/ свыше собирает множество Ангел,/ доле же созывает человеческий род,/ единогласно возсылати славу Христу Богу.

Кондак, ГЛАС 3 Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча. (24 июня/ 7 июля; Рождество честного славного Пророка, Предтечи и Крестителя Господня Иоанна)

ИН Кондак, ГЛАС 5 Предтечево славное усекновение смотрение бысть некое Божественное, да и сущим во аде Спасово проповесть пришествие; да рыдает убо Иродиа, беззаконное убийство испросивши: не закон бо Божий, ни живый век возлюби, но притворный, привременный. (29 августа/11 сентября; Усекновение главы Пророка, Предтечи и Крестителя Господня Иоанна)

Кондак Предтечи,глас 6 Плотскаго Твоего пришествия убоявся,/ Иордан страхом возвращашеся;/ пророческое же служение исполняя,/ Иоанн трепетом спряташеся;/ Ангельския чини ужасахуся,/ зряще Тя, во струях плотию крещаема;/ и вси, сущии во тьме, озаряхуся,// воспевающе Тя, явльшагося и просветившаго вся.

Кондак на перенесение десной руки Иоанна Предтечи, глас 6 Умнаго Солнца светильник Божественный Предтеча,/ показавый в концех светоносную свою десницу,/ ныне на севере озаряет ею блаженное Отечество наше,/ просвещая и освящая верно покланяющихся, и Христу вопиющих:/ спаси нас молитвами пророка Твоего, Царю Вышний.

Кондак Предтечи, глас 6 Пророче Божий и Предтече благодати,/ главу твою, яко шипок священнейший, от земли обретше,/исцеления всегда приемлем,/ ибо паки, якоже прежде,// в мире проповедуеши покаяние. (24 февраля (Первое и второе обретение главы) )

Кондак Предтечи, глас 6 Светоявленный и Божественный в мире столп,/ солнца светильник,/ Предтеча, главу светоносную и Божественную свою/ показавый в концех,/ освящает той верно покланяющихся/ и взывающих://Христов премудрый Крестителю, спаси всех нас. (25 мая (Третье обретение главы) )

Кондак Предтечи, глас 1 Веселится светло Захария великий/ со всеславною Елисаветию сопружницею,/ достойно зачинающе Иоанна Предтечу,/ егоже Архангел благовести, радуяся,/ и человецы достодолжно почтим,// яко таинника благодати. (23 сентября (Зачатие) )

Величание Величаем тя, Предтече Спасов Иоанне, и чтим еже от неплодове преславное рождество твое.

Припев: Святый великий Иоанне Предтече Господень, моли Бога о нас.

Величание Величаем тя, Крестителю Спасов Иоанне, и почитаем вси честныя твоея главы усекновение.