``````````````````````````````````````````````
Кондак 1
Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти:
Радуйся, Невесто Неневестная!

Икос 1
Ангелов лики и человеков соборы с любовию взирают на чудотворный Твой образ, иже святый евангелист Лука написа, Пречистая, с Предвечным Младенцем в объятиях Твоих, величием украшенная, смиренномудрием превознесенная, престол Вседержителя, Юже воспоим:
Радуйся, святым художником изображенная;
Радуйся, лик Свой солнцезрачный нам на земли оставившая.
Радуйся, лица Своего светозарную сень нам в иконе Твоей даровавшая;
Радуйся, лучезарная Царице, взирающих на образ, Твой радости исполняющая.
Радуйся, чудо чудес, Одигитрие, от иконы Твоея чудесами озаряющая вселенную;
Радуйся, всеблаженная, пренепорочная Мати Божия.
Радуйся, в ризах златотканных одесную Вышняго предстоящая на Небеси;
Радуйся, благодатию Своею пребывающая с нами на земли.
Радуйся, Крине, чистотою паче снега убеленный;
Радуйся, Цвете благовоннейший Небеснаго вертограда.
Радуйся, сладчайшее желание душ непорочных;
Радуйся, надеждо на спасение грешников кающихся.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 2
Видящи Святая Дева иконы Своя, святым евангелистом написанныя, возгласи: отныне ублажат Мя вси роди, и благослови я и рече: благодать Рождшагося от Мене и Моя да пребудет с ними. Темже ужасаяся величию славы Твоея, Владычице, и пророчества Твоего исполнению, небеса и земля немолчными гласы вопиют Богу: Аллилуиа.

Икос 2
Разумом Божественныя истины просвещенный державный Феофил, емуже дарова святый евангелист пречестную икону Богоматере, постави ю в церкви Антиохийстей, да притекающий к ней исцеления приемлют. По сих же принесена бысть святая икона во Иерусалим, идеже вернии, покланяющеся пред нею, Тебе, Владычице, зваша усердно:
Радуйся, Царице, шествием Твоим страны освящающая;
Радуйся, Благодатная, недуги наша исцеляющая.
Радуйся, Купино Божественная, неугасимым огнем веры сердца наша воспламеняющая;
Радуйся, чистая струя Иорданская, огнь страстей угашающая.
Радуйся, Дево Мати, красото церкви Небесной и земной;
Радуйся, упование наше и радование.
Радуйся, Одигитрие, величание наше и похвало;
Радуйся, веселия духовнаго цевнице.
Радуйся, радости верных непорочное взыграние;
Радуйся, неизглаголанное добродетелей сокровище.
Радуйся, праведных славное величание;
Радуйся, падших дивное восстание.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 3
Сила чудес прослави икону Твою, Богомати, егда от благочестивый царицы Пульхерии во храме Влахернстем поставлена бывши верных исцеляла еси. Егда же привела еси, Владычице, двух слепых и абие прозреста ту, нарекоша Тя Одигитрия и Бога чуднаго прославиша, вопиюще Ему: Аллилуиа.

Икос 3
Имуще язык и глас неблагоглаголив и не могий славити Тя, целомудренный и благочестивый Роман, от клириков поношаем, притече ко иконе Твоей, Одигитрие, со слезами моляся. Ты же во сне явльшися, вручила еси ему дар разумения и слова, и премудрости в песнопении, и воста сладкопевец, и возопи Ти сице:
Радуйся, Дево, Пресущественнаго рождшая;
Радуйся, желания благаго исполнение.
Радуйся, отъемлющая неправедное поношение;
Радуйся, плачущаго просветившая светозарною радостию.
Радуйся, разрешившая узы молчания;
Радуйся, отверзшая уста сладкогласная.
Радуйся, дивным венцем песнопений престол Свой Небесный украсившая;
Радуйся, Мати вечнаго благоухания, благовонное кадило от раб Твоих приемлющая.
Радуйся, Небесных и земных похвало;
Радуйся, всея вселенныя Славо.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 4
Буря гонения возшуме яростию на святыя иконы, но силою Божественною преста, и сокрытая в стене Пантократоровой обители святая икона Твоя, Одигитрие Владычице, с горящею лампадою обретеся неврежденна. Ужасающеся же сему преславному чуду, вернии возопиша: Аллилуиа.

Икос 4
Слышаша людие Цареграда, яко грядет нань воевода неверных со множеством ратей неустрашимых и не имуще надежды и заступления, разве Тебе, Владычице, устремишася в храм Твой со слезами молящеся Ти о избавлении. Егда же святую икону и ризу Твою погрузиша в воды морския, возшуме море бурею и небо грозою и потопиша корабли вражеския. Сего ради избавленнии людие Цареградстии возопиша Ти с радостию сице:
Радуйся, взбранная Воеводо, рати неверных побеждающая;
Радуйся, Избавительнице от злых.
Радуйся, скорая помощница в бедах сущих;
Радуйся, повелевающая морю и волнам.
Радуйся, Владычице грома и молнии;
Радуйся, верных крепосте и победо.
Радуйся, нечестивых прещение и вразумление;
Радуйся, немолчное хваление.
Радуйся, яко Тобою преста рыдание;
Радуйся, яко Тобою отбеже печаль, беды и стенание.
Радуйся, непреложное наше упование;
Радуйся, во всяких обстояниих неустанное воззвание.
Радуйся, яко никтоже от Тебе посрамлен отыде;
Радуйся, яко благосердия бездна и щедрот еси.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 5
Боготечною звездою иконою Твоею, Одигитрие, благослови князь Константин дщерь свою Анну, брачующуюся с князем Всеволодом, и отпусти ю в Русскую землю. Вручая же ей святыню сию, рече сице: да будет ти, дщи моя, Покровительница дивная Одигитрия! Рече же она, приемля святую икону: Аллилуиа.

Икос 5
Егда прииде сын благоверныя княгини Анны Владимир Мономах на княжение во град Смоленск, созда в нем великую соборную церковь во имя дивнаго Успения Твоего, Пресвятая Дево, и принесе ту, Царице Небесная, Одигитрию - чудотворную икону Твою - возрадовася о сем земля Смоленская и начаше хвалити Тя сице:
Радуйся, Одигитрие, путеводящая ко спасению;
Радуйся, Госпоже, под кров Твой державный наш град приемшая.
Радуйся, Звездо Божественная, возсиявшая во мраце язычества седящим;
Радуйся, Солнце, возшедшее над покрытыми тьмою неведения.
Радуйся, Облаче, прохлаждающий опаленных зноем страстей;
Радуйся, благая Наставнице новообращенных в веру святую.
Радуйся, Славо державная града Смоленска;
Радуйся, Царице, град наш в дом Себе избравшая.
Радуйся, необоримая наша стена и забрало;
Радуйся, непобедимая и страшная наша Воеводо.
Радуйся, стрелы вражия обращающая вспять;
Радуйся, мечи изощренных гордых притупляющая.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 6
Проповеда о Тебе, Владычице Одигитрие, возвеличенная Богом сила Твоя, радость избавленных от скорби, прославление исцеленных от болезней, еже во граде Твоем Смоленске бывших. В нем же века влодычествия Твоего Господеви о Тебе приносят песнь: Аллилуиа.

Икос 6
Возсиявшей звезде Одигитрии во граде Смоленске наидоша нань облацы, хотящий во мрак древний погрузити люди Твоя, Царице Небесная, прииде бо лютый Христоборец Батый с воинством великим. Ты же, Взбранная Воеводо Одигитрие, воздвигла еси избраннаго Твоего воина Меркурия, иже Тобою победи крепкаго, и разори совет сильнаго, и скончашася славно, Тебе Избавительнице вопия:
Радуйся, град Твой страшно победою чудною удивившая;
Радуйся, омраченный чертог Твой дивным сиянием паки озарившая.
Радуйся, освятившая меч неудержимой победы;
Радуйся, благословившая венец мученической славы.
Радуйся, ниспославшая полки светлых ангел на темныя неверных силы;
Радуйся, Царице, Сама явльшаяся душу победителя, раба Твоего Меркурия, прияти.
Радуйся, яко рукою Твоею царственною двери райския отверзаются;
Радуйся, яко Тобою из бездны глубокой падшии возводятся.
Радуйся, огнезрачная лествице, возводящая горе от рова погибели;
Радуйся, кадило, ароматов хвалений исполненное.
Радуйся, смирно и стакси и кассий праведных;
Радуйся, крине, огню и венче девственных.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 7
Хотяй испросити помощи от великаго князя Московскаго противу силы литовскаго воинства, остави князь Юрий Смоленск, и принесе святую икону Одигитрию в Москву, да поклонятся людие московстии священному и прославленному образу Богоматери, Господеви зовуще: Аллилуиа.

Икос 7
Дивную святыню зряще Твою, Владычице Одигитрие, чудотворную икону, изыдоша людие московстии во сретение ея и поставиша ю в соборе Благовещенском, в песнех и воскликновении радостно вопиюще Ти:
Радуйся, благодатным пришествием сердце святыя Руси возвеселившая;
Радуйся, люди Московстии радости исполнившая.
Радуйся, Владычице, грядущая со славою;
Радуйся, яко пред Тобою, Царице, с веселием отверзошася врата священнаго кремля.
Радуйся, яко новый чертог Твой исполнила еси хвалений;
Радуйся, Воеводо полков нетленных.
Радуйся, Ей же достойно служат святии ангели;
Радуйся, Ей же с трепетом покланяются пламенныя сердца.
Радуйся, златоструйный безсмертия источниче;
Радуйся, облаче легкий, Дево Марие, Еюже прииде на землю Иисус Пребожественный.
Радуйся, неисчерпаемое чудес море;
Радуйся, утишие утружденных житейскими бурями.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 8
Страну смоленскую остави Госпожа и Владычица Одигитрия, зайде звезда пречистая и наста тьма: междуусобия, болезни, глад, таже пламень разжеся во граде славнем, и пониче, яко не бе избавляющей, и чертог Царицы истощися, и слезы верных лияхуся туне, но моляху: да возвратит великий князь Московский святую икону, на ней же почи благодать Господня, да возопиют благодаряще Бога: Аллилуиа.

Икос 8
Всем сердцем исполняя желание граждан смоленских, епископ Мисаил с наместником и первыми от граждан прииде к великому князю Московскому, моляше, да возвратит Смоленску пречистую икону Богоматере. Рече же великий князь: како держу в плену икону неудержимыя Владычицы всего мира, и отпусти ю лобызающе со слезами. Приемши же святую икону, несоша сию в Смоленск, радостно зовуще:
Радуйся, сердца чад Твоих возвеселившая;
Радуйся, заключенная врата избавления паки отверзшая.
Радуйся, предыдущая князем и тысячем верных;
Радуйся, сопутствуемая святыми иконами, также в Смоленск несомыми.
Радуйся, Звездо, на полунощном небе паки возсиявшая;
Радуйся, грядущее в ликах верных радование.
Радуйся, плачущих и скорбящих утешение;
Радуйся, Благая Мати, тщащаяся отверсти объятия оставленным чадам града Своего.
Радуйся, мудрая Наставнице и примирительнице враждующих;
Радуйся, одождившая бесплодную землю Смоленскую.
Радуйся, милостивно с Небеси взирающая на торжество Тебе на земли совершаемое;
Радуйся, во граде Твоем Смоленске слезами радости сретаемая.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 9
Все естество ангельское возрадовася о спасении града Богоматери возвращением святыя иконы, граждане же поставиша ю в Церкви соборней и тако возвратися Царица Небесная паки на престол Свой и исполнися чертог Ея гласа ликующих, Богу поющих: Аллилуиа.

Икос 9
Витии многовещании не возмогут изрещи всех бед и напастей, яже посетиша многострадальный град Твой, Владычице, наидоша бо нань воинство Польши, яко грозное и мрачное море, в скорбь погрузившее землю Смоленскую и плениша ю, и веру православную гонению предаша. Егда же Смоленск, град Твой, Владычице, силою Божиею споспешествующею, возврати паки Руси царь Алексий, созда Ти, Госпоже, новый чертог во утверждение Православия, и, яко Иову многострадальному, возврати Господь Смоленску древнюю славу, и паки вступила еси, Владычице, в светозарный дом Свой, вернии же радостно возопиша:
Радуйся, Победительнице, утверждающая рог верных;
Радуйся, благочестиваго царя Алексия построением собора Твоего увенчавшая.
Радуйся, Сионскою главою град Твой осенившая;
Радуйся, Горо Божественная, на горе Смоленской вселившаяся.
Радуйся, оскорбляемых и уничиженных дивная Заступнице;
Радуйся, попранных и поношаемых чудный Покров и возвышение.
Радуйся, гонимых за веру православную милостивно укрепляющая;
Радуйся, защитников града Твоего возвеличившая.
Радуйся, кровь за Тебя пролиявшим порфиры нетления исткавшая;
Радуйся, в храме Твоем обещавшимся за град Твой умрети, вечную память даровавшая.
Радуйся, о благочестии плачущих украсившая яко перлами слезами их;
Радуйся, чрез горнило земных страданий прешедшим прохождения воздушных мытарств облегчающая.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 10
Спасающи град Твой, царстуеши, Одигитрие, Владычице. Прославися бо в нем не токмо Твоя первописанная икона, но и подобие ея, — второй чудотворный образ, чрез негоже многия исцеления верным даровала еси, и в неверие впадших прещением и вразумлением в лоно церкве Православныя возвратила еси. Не остави убо и нас, Владычице, Богу о Тебе немолчно вопиющих: Аллилуиа.

Икос 10
Стена необоримая явилася, Владычице Одигитрие, Твоя икона, егда пришед, аки тигр лют, повелитель дванадесяти язык, град Твой попали огнем и мечем порази его. Тогда убо явилася еси, Царице и Воеводо, посреди воинства Христолюбиваго носима, и побеже непобедимый, и бысть падение его с шумом. И возвратися по триех месяцех Мариам в дом Свой и воззваша с веселием люди Ея вопияше:
Радуйся, Вратарнице, град наш верно охраняющая;
Радуйся, из него яко Военачальница с воинством на брань исшедшая.
Радуйся, жезле Моисеев, не море, но стихии воздвигшая;
Радуйся, понтом снега новое фараонитское воинство покрывшая.
Радуйся, гордаго студом поразившая;
Радуйся, смиренных паче разума чудесно воздвигшая.
Радуйся, скорби и тяготы воинства вернаго утоляющая;
Радуйся, взиранием на лик Твой раны страдальцев исцеляющая.
Радуйся, победоносным шествием Твоим ужасающая и радующая землю Русскую;
Радуйся, благосердым и милостивым оком град Твой, вступая, озарившая.
Радуйся, Небесная Мариам, в дом Свой паки возвратившаяся;
Радуйся, прославляемая радостными слезами верных смолян.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 11
Пение радости, пение благодарственное приносим Ти, Одигитрие, Избавительнице и Заступнице града Смоленска: дивной, царствующей, превознесенной, державной Госпоже смиренных и недостойных рабов Твоих, немолчно о Тебе зовущих: Аллилуиа.

Икос 11
Светозарную Одигитрию, чудный светильник Божественнаго огня, непорочным рождеством озаренную, Духом Святым просвещенную, благодатию Своею просвещающую мира концы и град наш озарившую благословением Своим, воспоим Пречистую Богородицу сице:
Радуйся, светлая деннице Одигитрие;
Радуйся, возсиявшая Заре Незаходимаго Солнца.
Радуйся, чрез скорби вводящая верных в радость;
Радуйся, прещением наставляющая верных.
Радуйся, окамененныя сердца светом и теплотою паче воска умягчающая;
Радуйся, поникшия на земный мрак очи к свету вышнему подъемлющая.
Радуйся, духовною слепотою пораженныя просвещающая;
Радуйся, из пучины злых страстей изымающая.
Радуйся, сокрушенных сердцем благая Предстательнице пред Богом;
Радуйся, уязвленных грехами чудотворящий бальзаме.
Радуйся, превозносящихся громоподобное поражение;
Радуйся, кротких благоуветливая тихая Мати.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 12
Благо есть воспевати Тя, Госпоже наша Одигитрие, но не имамы дарования, ниже гласа Романа, сладкопевшаго Тя! Обаче молим Тя, недостойнии раби Твои: уста наша отверзи и разум наш, омраченный страстьми, просвети, да славим Тя, Владычице, и Богу поим: Аллилуиа.

Икос 12
Поюще Твою благодать и величество славы Твоея, Пречистая Одигитрие, прославляем Тя, облаче всесветлый, яко покров града нашего и защищение, Царице Небесная и всего мира Владычице! Не токмо чтущих Тя приемлющая, но и отметающихся Тебе, Заступнице, призывающая, отверзая им благая объятия; сего ради зовем Ти верно:
Радуйся, иконою Твоею нас благословившая;
Радуйся, чудесами преславными нас озарившая.
Радуйся, Романа Сладкопевца вдохновенное хваление;
Радуйся, мученика Меркурия небесное желание.
Радуйся, Твоего града неодолимая крепосте;
Радуйся, чертога Твоего Смоленскаго светлая Звездо.
Радуйся, отъемлющая тяжкое бремя грехов;
Радуйся, любящей рукой крест спасительныя печали возлагающая.
Радуйся, изнемогающих в скорбех крепосте;
Радуйся, Молние, попаляющая мрак страстей и уныния.
Радуйся, яко во храме Твоем стояще мним зрети высоту Рая Небеснаго;
Радуйся, исполняющая благоговейнаго трепета преданныя сердца.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак 13
О, Всепетая Мати, Богородительнице, Пречистая Одигитрие! Ныне наше недостойное приемши хваление, во храме Твоем Ти приносимое, град Твой Смоленск и Богохранимую страну нашу Российскую светлым Твоим омофором осеняй присно, наставляя нас на стезю спасения и просвещая души наша, путеводи я ко спасению о Тебе, Благословенная, присно Богу вопиющих: Аллилуиа.
Этот кондак читается трижды, затем икос 1-й и кондак 1-й

Икос 1
Ангелов лики и человеков соборы с любовию взирают на чудотворный Твой образ, иже святый евангелист Лука написа, Пречистая, с Предвечным Младенцем в объятиях Твоих, величием украшенная, смиренномудрием превознесенная, престол Вседержителя, Юже воспоим:
Радуйся, святым художником изображенная;
Радуйся, лик Свой солнцезрачный нам на земли оставившая.
Радуйся, лица Своего светозарную сень нам в иконе Твоей даровавшая;
Радуйся, лучезарная Царице, взирающих на образ, Твой радости исполняющая.
Радуйся, чудо чудес, Одигитрие, от иконы Твоея чудесами озаряющая вселенную;
Радуйся, всеблаженная, пренепорочная Мати Божия.
Радуйся, в ризах златотканных одесную Вышняго предстоящая на Небеси;
Радуйся, благодатию Своею пребывающая с нами на земли.
Радуйся, Крине, чистотою паче снега убеленный;
Радуйся, Цвете благовоннейший Небеснаго вертограда.
Радуйся, сладчайшее желание душ непорочных;
Радуйся, надеждо на спасение грешников кающихся.
Радуйся, Владычице, верным людем Всеблагая Одигитрие;
Радуйся, Смоленская похвало и всея земли Российския утверждение.
Радуйся, Невесто Неневестная!

Кондак1
Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти:
Радуйся, Невесто Неневестная!


МОЛИТВА
Царице моя Преблагая, надеждо моя Богородице, Приятелище сирых и странных Предстательнице, скорбящих Радосте, обидимых Покровительнице! Зриши мою беду, зриши мою скорбь. Помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи разве Тебе, ни иныя Предстательницы, ни Благия Утешительницы, токмо Тебе, о Богомати, яко да сохраниши мя и покрыеши во веки веков. Аминь.


О пречудная и превышшая всех тварей Царице Богородице, небеснаго Царя Христа Бога нашего Мати, пресвятая Одигитрие Марие! Услыши ны, грешныя и недостойныя, в час сей пред пречистым образом Твоим припадающия, и сице умильно глаголющия: изведи нас от рова страстей, Одигитрие благая, избави нас от всякия скорби и печали, огради от всякия напасти и злых клевет и от неправеднаго навета вражия: можеши бо, о благодатная Мати наша, не точию от всякаго зла сохранити люди Твоя, но и всяким благодеянием снабдити и спасти: разве бо Тебе иныя предстательницы в бедах и обстояниих и теплыя ходатаицы о нас грешных к Сыну Твоему, Христу Богу нашему, не имамы: Егоже умоли, Владычице, спасти нас и Царствия Небеснаго сподобити, да спасеннии Тобою славим Тя и в будущем веце, якоже спасения нашего виновницу, и превозносим всесвятое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Празднование 28 июля/10 августа




Тропарь Собору Смоленских святых

Соборе святых земли Смоленския, / водами священнаго Днепра омовенныя, /святителие, преподобнии, страстотерпцы и благовернии, /апостольскую веру соблюдшии, /се ныне, Святей Троице с Богородицею и лики Безплотных предстояще, / водами благочестия землю Русскую напаяете, / дарующе православным помощь Небесную / во утверждение веры / и спасение душ наших.

Кондак, глас 3

Небесныя Царицы путеводительством / подвигоположницы земли Смоленския, / земный путь в Православной вере прошедшии / и святых отец предания сохраншии, / молите путь веры и нам соблюсти, / смирения смирившагося до смерти крестныя Сына Божия подражающе, / молитвами Богородицы, // и спастися душам нашим.

Все святии, в земле Смоленской просиявшие, молите Бога о нас

(память в воскресенье перед 10 августа по новому стстилю





КАНОН ПРЕСВЯТЕЙ БОГОРОДИЦЕ ОДИГИТРИЮ

Творение священномонаха Игнатиа.

Глас 4. Песнь 1.


Ирмос: Отверзу уста моя, и наполнятся духа, и слово отрыгну царице матери, и явлюся светло торжествуя, и воспою радуяся тоя чудеса.

Радостно, чистая, ныне наставшее хваление приношаю радуяся, и тихим гласом, Одигитрие, вопию ти: радуйся, и исполни мя разума пети начинающа.
Христа родившая, радость нам вечную, о радуйся, всепетая, православных надеждо, Одигитрие всепетая девице: радости исполни мя мирови желанныя.

Слава: Ликуют вси человецы, и ангели всегда согласно вопиюще на небеси и на земли, Одигитрие: радуйся, девице, радости бо рождеством твоим всяческая исполнила еси.

И ныне: Радость Одигитрие, со страхом ти вопиющих радости сподоби, Мати сущия радости, избавляющи скорбей всяческих, и всех помилуй к тебе прибегающих.

Песнь 3.

Ирмос: Твоя песнословцы, Богородице, живый и независтный источниче, лик себе совокупльшыя духовно утверди, в божественней твоей славе венцев славы сподоби.

Христа вышняго царя, о радуйся, непоколебимая чистая, и одушевленная палато. Радуйся, Одигитрие, радуйся, тобою нерушимь град наш сохраняется.
Вместити егоже не возможе тварь, во утробу неискусобрачную, Одигитрие девице, телесно вместила еси: темже ти радуйся поем, по долгу величающе.

Слава: Радость многопетая мирови, радостно ти поюще присно, вечнующия чистая радости сподобляемся, твоими матерними молитвами, к рождшемуся из тебе, Одигитрие.

И ныне: Златую тя стамну, и свещник, и жезл, и трапезу, чистая, призываем, Одигитрие, и глас еже радуйся, тебе присно привношаем, с сими же имены.

Седален, глас 2:

Моление теплое, и стена необоримая, милости источниче, мирови прибежище, прилежно вопием ти: Богородице Владычице, предвари, и от бед избави нас, едина вскоре предстательствующая.

Песнь 4.

Ирмос: Седяй в славе на престоле божества, во облаце легце, прииде Иисус пребожественный, нетленною дланию, и спасе зовущыя: слава, Христе, силе Твоей.

Радуйся, чудо чудес, Одигитрие Владычице, радуйся, всех радосте, гродов и весей непобедимое христианское в бедах хранилище, и преградие, и на враги побеждение.
Радуйся, радуйся, царей православных похвао, и христолюбивых воинств покров пребываеши всех царице. Радуйся, Одигитрие, прибежище всех нас и утверждение.

Слава: Радуйся, всех скорое в бедах избавление. Радуйся, готовое всех скорбящих утешение. Радуйся, всепетая. Радуйся, Одигитрие всеблагословенная, всех немощных исцелительнице.

И ныне: Радуйся, еяже величия вся тварь славити убо спешит по достоянию, но не возмогает, Одигитрие, и сего ради зовет ти: Радуйся, Владычице, боговместимое жилище.

Песнь 5.

Ирмос: Ужасошася всяческая о божественней славе твоей: ты бо, неискусобрачная дево, имела еси во утробе над всеми Бога, и родила еси безлетнаго Сына, всем воспевающым тя, мир подавающая.

Благостыни бездно и щедрот еси, радуйся, Одигитрие девице. Радуйся, всем радость творящи верным. О радуйся сущих в бедах, и скорбящих пребыстрая заступнице.
Радости от исполнения, величия чудес твоих зряще, исполняемся вси не зрящи, слышаще же вернии. Темже радуйся тебе присно всюду, и вси, Одигитрие, поем.

Слава: Христа Бога нашего, о радуйся, Одигитрие, жилище и дом, неизреченныя и пребожественныя дево, славы его. О радуйся, палато преукрашенная. Радуйся, граде одушевленный присно царствующий.

И ныне: Радость неоскудную тя разсмотряюще, яко море, отроковице, Одигитрие девице, радующеся вси, радуйся вопием ти, и поюще божественных даров невидимо присно от тебе ожидающе.

Песнь 6.

Ирмос: Божественное сие и всечестное совершающе праздненство богомудрии, Богоматере, приидте, руками восплещим, от нея рождшагося Бога славим.
Христа чистая приемлющи, глас еже радуйся, Одигитрие девице, слышала еси, егоже неизреченно рождши, радуйся, от всех слышиши всегда.
Радости всея исполнила еси, вышния и нижния ты совокупила еси, Одигитрие. Темже радостно и согласно ныне, небо и вся земля зовет ти.

Слава: Вдов, о радуйся, всепетая, и всех сирых, Одигитрие, утешение. Радуйся всем источающий нищым богатство неистощимое.

И ныне: Злата всякаго блистаема, и утра солнечнаго светлейши, жилище христово. Радуйся, Одигитрие, радуйся, девице, радуйся, невесто неневестная.

Кондак, глас 6:

Не имамы иныя помощи, не имамы иныя надежды, разве тебе, Владычице: ты нам помози, на тебе надеемся, и тобою хвалимся? твои бо есмы раби, да не постыдимся.

Другий кондак, глас тойже:

Предстательство христиан непостыдное, ходатайство ко творцу непреложное, не презри грешных молений гласы, но предвари, яко благая, на помощь нас, верно зовущих ти: ускори на молитву, и потщися на умоление, предстательствующи присно, Богородице, чтущих тя.

Икос:

Простри длани твоя, имиже всех Владыку яко младенца прияла еси, за множество благости. Не остави нас всегда надеющихся на тя, бодренною Твоею молитвою и неисчетною простынею ущедри нас и подаждь душам нашым милосердие твое, во веки источающи: тебе бо имамы грешнии заступницу, от находящих на ны бед и зол, но яко имущи милосердия щедроты, ускори на молиту, и потщися на умоление, предстательствующи присно, Богородице, чтущих тя.

По евангелии, стихира, глас 6:

Не ввери мя человеческому предстательству, пресвятая Владычцие, но приими моление раба твоего: скоррбь бо обдержит мя, терпети не могу демонскаго стреляния, покрова не имам, ниже где прибегну окаянный, всегда побеждаемь, и утешения не имам, разве тебе, Владычице мира, упование и предстательство верных, не презри моление мое, полезно сотвори.

Песнь 7.

Ирмос: Не послужиша твари богомудрии паче создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Радуйся, радуйся, Богородице Одигитрие, всех и всегда наставляющи верных, шествовати ко всякому пути спасительному. Радуйся, Владычице, тобою бо присно избавляемся настоящия варварския беды.
Радуйся, радуйся, Одигитрие, бдящи и молящися о нас к Богу, и всякия злобы ходатайтсвом твоим, всяческих скорбей Богородительнице, всех людей избавляющи.

Слава: Радуйся, радуйся, пресвятая Одигитрие, яже прошения наша к пользе нам исполняющи, и хотящи всем присно всегда любодружное благое единство, спешное же во изящных.

И ныне: Радуйся, радуйся, кораблем, Одигитрие, нужно плавающым, избавляющи верных, и всем избавление от всякия скорби, и недуги пестротныя и медленыя разрешающи вскоре.

Песнь 8.

Ирмос: Отроки благочестивыя в пещи, рождетсво богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите его во вся веки.

Радуйся, всеблагословенная Марие, из тебе бо всеблагословенный Бог одеяся во всего мя человека: и одеявся соедини своему божеству, неизреченным соединением дево Одигитрие, радуйся, благодатная, радосте всего мира.
Радуйся, лукавых духов прогонительнице. Радуйся, Богородице Одигитрие. Радуйся, яко тебе небесная невидиая воинства славословят всегда, и величают яко Матерь божию бывшую. Радуйся, яже нижняя сочетавши с вышними.

Слава: Радуйся, вся небесныя силы без разсуждения превосходящая. Радуйся, Одигитрие. Радуйся всякия твари Бога рождшая господьстующи, ей, Владычице всепетая. Радуйся, яко пребываеши девою чистая и по рождестве.

И ныне: Радуйся, жен всех славо, храме преосвященный Бога нашего. Радуйся, Одигитрие. Радуйся, душеспасительная всей вселенней. Радуйся, покрывающий облаче небес ширшая. Радуйся, мироположнице божественнаго мира полна.

Песнь 9.

Ирмос: Всяк земнородный да взыграется духом просвещаемь, да торжествует же безплатных умов естество, почитающее священное торжество Богоматере, и да вопиет: радуйся, всеблаженная Богородиц, чистая приснодево.

Радуйся, свеще, свет невечерний понесшая, и в рождестве твоем многобожия тьму разрушившая, и адовы пропасти избавльшая люди. Радуйся, Одигитрие Богородице, доброт всех предходатаице.

Радуйся, земле, из неяже клас прозябший небесный верным, и мир весь душегубительнаго глада избави, разумная и одушевленная. О радуйся винограде, яже грозд животный рождшая, Богородице чистая Одигитрие.

Слава: Радуйся, тайных цветов прекрасный сущий раю. Радуйся, Мати дево, невидимых разум, чистотою страннолепно побеждши Богородитеьнице. Радуйся, отроковице. Радуйся, Одигитрие, всемирное чудо и слышание.

И ныне: Лето живота нашего, прочее сохрани невреждено поможением твоим, дево отроковице, и сопдоби конец благий получити нам, воспевающым тя и взывающым: радуйся, всеблаженная Богородице чистая, Одигитрие.

Посем молитва пресвятей госпоже Богородице:


Пресвятая Владычице моя Богородице, святыми твоими и всесильными мольбами отжени от мене смиреннаго и окаяннаго раба твоего уныние, забвение, неразумие, нерадение, и вся скрвеная, лукавая и хульныя помышления от окаяннаго моего сердца, и от помраченнаго ума моего, и погаси памень страстей моих, яко нищ есмь и окаянен: и избави мя от многих и лютых воспоминаний и предприятий, и от всех действ злых свободи мя. Яко благословенна еси от всех родов, и славится пречестное имя твое во веки веков, аминь.


Мо­лит­ва вто­рая

К кому возо­пию, Вла­ды­чи­це? К кому при­бег­ну в го­ре­сти моей, аще не к Тебе, Гос­по­же Вла­ды­чи­це Бо­го­ро­ди­це, Ца­ри­це Небес­ная? Кто плач мой и воз­ды­ха­ние мое при­и­мет, аще не Ты, о Пре­не­по­роч­ная, на­деж­до хри­сти­ан и при­бе­жи­ще греш­ным? При­к­ло­ни, о Пре­чи­стая Вла­ды­чи­це, ушеса Твоя к мо­ле­нию моему. Мати Бога моего, не пре­зри мя, тре­бу­ю­ща Твоея по­мо­щи, услы­ши сте­на­ние мое и вопль серд­ца моего внуши, о Гос­по­же Бо­го­ро­ди­це Ца­ри­це. И по­даждь ми ра­дость ду­шев­ную, под­кре­пи мя нетер­пе­ли­ва­го, уныла­го и нера­ди­ва­го к Тво­е­му хва­ле­нию. Вра­зу­ми и научи мя, како Тебе мо­ли­ти­ся по­до­ба­ет, и не от­сту­пи от мене, Мати Бога моего, за роп­та­ние и нетер­пе­ние мое, но буди ми по­кров и за­ступ­ле­ние в жизни моей и при­ве­ди мя к ти­хо­му при­ста­ни­щу бла­жен­на­го онаго покоя, и со­при­чти мя к лику из­бран­на­го Тво­е­го стада и тамо удо­стой мя вос­пе­ва­ти и сла­ви­ти Тя во веки. Аминь.




Акафист Пресвятой Богородице пред иконой Одигитрия Смоленская


Пред­на­зна­чен для ке­лей­но­го чте­ния

Кондак 1

Избран­ней от всех родов, небе­си и земли Ца­ри­це, Пре­свя­тей Бо­го­ро­ди­це Оди­гит­рии, яко из­бав­ль­ше­ся от веч­ныя смер­ти бла­го­да­тию от Тебе рожд­ша­го­ся Хри­ста Бога на­ше­го и Твоим Ма­тер­ним пред Ним хо­да­тай­ством, бла­го­дар­ствен­ное пение при­но­сим Ти, раби Твои. Ты же, Все­ми­ло­сти­вая наша За­ступ­ни­це, от вся­ких нас бед и скорб­ных об­сто­я­ний сво­бож­дай и к цар­ствию гор­не­му пу­те­вод­ствуй, да зовем Ти:

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Икос 1

Архан­гель­ский глас во­пи­ем Ти, Чи­стая: ра­дуй­ся, Бла­го­дат­ная Оди­гит­рие Марие, и ра­до­сти ду­хов­ныя ис­пол­ни нас, да бла­го­го­вей­ною душею и чи­стым серд­цем при­не­сем Ти, рожд­шей миру Спа­си­те­ля Хри­ста Бога на­ше­го, гла­го­лы сия:

Радуй­ся, Бога Отца бла­го­во­ле­ни­ем осе­нен­ная; ра­дуй­ся, Бога Сына Мати неис­ку­со­брач­ная. Ра­дуй­ся, Бога Духа Свя­та­го оби­тель свя­щен­ная; ра­дуй­ся, Тро­и­че­ския тайны про­яв­ле­ние. Ра­дуй­ся, ан­гель­ских умов удив­ле­ние; ра­дуй­ся, че­ло­ве­че­ска­го рода укра­ше­ние. Ра­дуй­ся, гор­няя с доль­ни­ми со­во­ку­пив­шая; ра­дуй­ся, врата рай­ския земно­род­ным от­верз­шая. Ра­дуй­ся, ле­стви­це небес­ная; ра­дуй­ся, стам­но Бо­го­при­им­ная. Ра­дуй­ся, ку­пи­но неопа­ли­мая; ра­дуй­ся, тра­пе­зо пре­свя­тая.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 2

Видев икону Пре­свя­та­го Тво­е­го лика, Бо­го­ро­ди­це Дево, юже все­х­валь­ный еван­ге­лист Лука на­пи­са, рекла еси о ней пре­чи­сты­ми усты Тво­и­ми: "С сею ико­ною бла­го­дать Моя и сила". Та­ко­вое обе­то­ва­ние Твое уве­дев­ше, бла­го­го­вей­но по­чи­та­ем пре­свя­тый образ Твой, Вла­ды­чи­це, и вос­пе­ва­ем Сыну Тво­е­му и Богу: Алли­лу­иа.

Икос 2

Ура­зу­мев бла­го­во­ле­ние Твое, Бо­го­ро­ди­це, к сей иконе Твоей, слав­ный апо­стол Лука да­ро­ва ю в бла­го­сло­ве­ние и освя­ще­ние Хри­сто­вой Церк­ви Ан­тио­хий­стей, в ней же Пу­те­во­ди­тель­ни­цей она на­име­но­ва­ся и чу­де­сы бо­же­ствен­ны­ми про­сла­ви­ся. О сем бла­го­да­ря­ще Тя, Гос­по­же Все­б­ла­гая, яко по­до­бие пре­чи­с­та­го лика Тво­е­го во уте­ше­ние нам оста­ви­ла еси, усерд­но Тебе во­пи­ем:

Радуй­ся, Ца­ри­це гор­них и доль­них; ра­дуй­ся, Вла­ды­чи­це ан­ге­лов и че­ло­ве­ков. Ра­дуй­ся, мира уми­ре­ние; ра­дуй­ся, древ­ния враж­ды раз­ру­ше­ние. Ра­дуй­ся, дев­ства стол­пе; ра­дуй­ся, сми­ре­ния глу­би­но. Ра­дуй­ся, об­ла­чен­ная в солн­це; ра­дуй­ся, си­я­ю­щая Бо­же­ствен­ною сла­вою. Ра­дуй­ся, Мати Света Неве­чер­ня­го; ра­дуй­ся, раю сла­до­сти небес­ныя. Ра­дуй­ся, вер­то­гра­де Хри­стов бла­го­ухан­ный; ра­дуй­ся, одре Царя Ве­ли­ка­го.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 3

Силою Бо­жи­ею чу­де­са пре­див­ныя со­вер­ша­ху­ся от иконы Твоея, Бо­го­ма­ти Вла­ды­чи­це, егда при­не­се­на бысть в Ца­рь­град и в пре­слав­нем Вла­херн­стем храме по­став­ле­на; сле­пыя про­све­ща­ше, всяк недуг в людех вра­че­ва­ше бла­го­да­тию Твоею, Бо­го­ро­ди­це, да вси зовем про­слав­ль­ше­му Тя Богу: Алли­лу­иа.

Икос 3

Имеяше Тя Ца­рь­град За­ступ­ни­цу дер­жав­ную, Бо­го­ро­ди­це Дево, и во дни на­па­де­ния на него вра­гов силь­ных и бра­не­ис­кус­ных, по­мощь Твою мно­го­чуд­ную от свя­тыя иконы Твоея Оди­гит­рии по­лу­ча­ше. Темже мо­лим­ся Тебе, Все­б­ла­гая, якоже древ­ле град оный мно­гаж­ды от по­ги­бе­ли спас­ла еси, тако и нас сми­рен­ных спаси от по­ги­бе­ли веч­ныя Ма­тер­ним пред­ста­тель­ством Твоим ко Хри­сту Богу, да бла­го­дар­но зовем Ти:

Радуй­ся, Ца­рь­гра­да креп­кое ограж­де­ние; ра­дуй­ся, Вла­херн­ска­го храма бла­го­дат­ное со­кро­ви­ще. Ра­дуй­ся, нече­сти­вых ратей одо­ле­ние; ра­дуй­ся, вра­гов Пра­во­сла­вия по­срам­ле­ние. Ра­дуй­ся, чад Хри­сто­вых Пред­во­ди­тель­ни­це к по­бе­дам; ра­дуй­ся, По­мощ­ни­це ско­рая в бедах к Тебе при­те­ка­ю­щих. Ра­дуй­ся, За­ступ­ни­це усерд­ная мо­лит­вен­но Тя при­зы­ва­ю­щих; ра­дуй­ся, бо­го­муд­рых свя­ти­те­лей спо­спеш­ни­це во бла­го­ве­стии Хри­сто­вом. Ра­дуй­ся, по­хва­ло жен и дев славо; ра­дуй­ся, стол­пе ог­нен­ный, зной стра­стей уме­ря­ю­щий. Ра­дуй­ся, стол­пе об­лач­ный, мрак гре­хов раз­го­ня­ю­щий; ра­дуй­ся, Марие, Мати Хри­ста Бога на­ше­го.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 4

Бурею мор­скою ко­раб­ли пре­гор­да­го Ка­га­на, град Твой пле­ни­ти вос­хо­тев­ша­го, со­кру­ши­ла еси, Вла­ды­чи­це, и по­бе­ду над ним людем хри­сто­име­ни­тым да­ро­ва­ла еси от свя­тыя иконы Твоея Оди­гит­рии, лучи света небес­на­го ис­пус­кая и вои пра­во­слав­ныя ими про­све­щая, да вси уве­дят, яко Ты еси во­ис­ти­ну Во­е­во­да дер­жав­ная Ца­рь­гра­да и про­сла­вят ми­ло­сти Твоя и чу­де­са, вос­пе­вая Спа­си­те­лю Богу: Алли­лу­иа.

Икос 4

Слы­шав­ше о чу­де­сех Твоих пре­слав­ных, Бо­го­ро­ди­це Дево, яже от иконы Твоея явила еси в Ца­рь­гра­де, недо­уме­ем, како икона та, но­си­мая по стог­нам града, силою Бо­же­ствен­ною но­сив­ши­ми ю управ­ля­ше и стопы их по воле Твоей на­прав­ля­ше; на­пра­ви убо, Вла­ды­чи­це, и наша стопы на путь ис­пол­не­ния за­по­ве­дей Хри­сто­вых, и научи нас верно ис­пол­ня­ти свя­тую волю Сына Тво­е­го и Бога, да Тебе во­пи­ем сице:

Радуй­ся, свеще неуга­си­мая; ра­дуй­ся, звез­до неза­хо­ди­мая. Ра­дуй­ся, си­я­ю­щая све­том Бо­же­ствен­ным; ра­дуй­ся, про­све­ща­ю­щая бла­го­да­тию души вер­ных. Ра­дуй­ся, мира Хри­сто­ва бла­го­уха­ние; ра­дуй­ся, земли освя­ще­ние. Ра­дуй­ся, чаше, черплю­щая ра­дость всему миру; ра­дуй­ся, ис­точ­ни­че, из­ли­ва­ю­щий веч­ную сла­дость. Ра­дуй­ся, чер­то­же бла­го­укра­шен­ный Царя Царей; ра­дуй­ся, рая крас­ней­шая. Ра­дуй­ся, утра свет­лей­шая; ра­дуй­ся, ручко все­зла­тая.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 5

Яко Бо­го­теч­ная звез­да, икона Твоя, Бо­го­ма­ти Вла­ды­чи­це, бла­го­во­ле­ни­ем Твоим от Ца­рь­гра­да в стра­ну Рос­сий­скую при­не­се­ся, и граду Смо­лен­ску в на­сле­дие бла­го­дат­ное да­ро­ва­ся, темже бла­го­да­рим Тя, о Гос­по­же Все­ми­ло­сти­вая, яко та­ко­вый дар свя­тый Оте­че­ству на­ше­му да­ро­ва­ла еси, и поем в Тро­и­це сла­ви­мо­му Богу: Алли­лу­иа.

Икос 5

Видев­ше пре­слав­ное за­ступ­ле­ние Твое града Смо­лен­ска, Пре­чи­стая Вла­ды­чи­це, про­слав­ля­ем ве­ли­кую Твою ми­лость, ею же град сей от ра­зо­ре­ния Ба­ты­ева чу­дес­но спас­ла еси, гла­сом Бо­же­ствен­ным от иконы Твоея ис­шед­шим, угод­ни­ка Хри­сто­ва Мер­ку­рия на еди­но­бор­ство с пред­во­ди­те­лем рати Ба­ты­евой по­слав; его же он мечем своим по­ра­зи и град Твой от за­па­ле­ния ог­нен­на­го из­ба­ви. Са­мо­го же его вен­цем му­че­ни­че­ским увен­ча­ла еси, того мо­лит­ва­ми небес­ны­ми спо­до­би нас на земли неосуж­ден­но взы­ва­ти к Тебе:

Радуй­ся, му­че­ни­ка Хри­сто­ва Мер­ку­рия на по­двиг рат­ный укре­пив­шая; ра­дуй­ся, гла­сом от иконы Твоея свя­тыя его во­оду­ше­вив­шая. Ра­дуй­ся, яко Да­ви­да на Го­лиа­фа по­бе­дою его увен­чав­шая; ра­дуй­ся, града Смо­лен­ска креп­кое за­щи­ще­ние. Ра­дуй­ся, град Твой от ра­зо­ре­ния из­ба­вив­шая; ра­дуй­ся, Из­ба­ви­тель­ни­це от плена и по­ра­же­ния. Ра­дуй­ся, стра­ны Рос­сий­ския бла­го­дат­ное уте­ше­ние; ра­дуй­ся, Церк­ви Хри­сто­вой Бо­го­леп­ное укра­ше­ние. Ра­дуй­ся, лю­бя­щих Тя прис­ное ра­до­ва­ние; ра­дуй­ся, Уто­ли­тель­ни­це пе­ча­лей. Ра­дуй­ся, бо­ля­щих ис­це­ле­ние; ра­дуй­ся, уны­ва­ю­щих в скор­бех обод­ре­ние.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 6

Про­по­ве­ду­ет стра­на Рос­сий­ская ми­ло­сти и чу­де­са Твоя, Пре­чи­стая Дево Бо­го­ро­ди­це, и град Смо­ленск свет­ло кра­су­ет­ся, имея чу­до­твор­ную икону Твою, вся­кия бо­лез­ни ис­це­ля­ю­щую и недуж­ным здра­вие по­да­ю­щую. Сего ради со бла­го­го­ве­ни­ем по­чи­та­ем мно­го­це­леб­ный образ Твой, Гос­по­же Все­б­ла­гая, и по­кло­ня­ю­ще­ся ему, яко за­ло­гу Тво­е­го к нам бла­го­во­ле­ния, во­пи­ем Богу: Алли­лу­иа.

Икос 6

Вос­си­я­ла еси в стране Рос­сий­стей лу­ча­ми Бо­же­ствен­ных чудес от свя­тыя иконы Твоея ис­хо­дя­щи­ми, Пре­чи­стая Вла­ды­чи­це, к ней же от лет древ­них отцы наши при­хож­да­ше в скор­бех и бо­лез­нех и нет­щет­ны от­хож­да­ше. Им же вслед и мы к Тебе при­хо­дя­ще и с лю­бо­вию бла­го­го­вей­но ло­бы­зая образ Твой чу­до­твор­ный, мо­лим­ся Тебе: утоли пе­ча­ли наша, увра­чуй неду­ги наша, да зовем Ти:

Радуй­ся, жезле ста­ро­сти; ра­дуй­ся, вдо­виц за­ступ­ле­ние. Ра­дуй­ся, сирот при­зре­ние; ра­дуй­ся, мла­ден­цев вос­пи­та­ние. Ра­дуй­ся, нищих снаб­де­ние; ра­дуй­ся, плен­ных сво­бож­де­ние. Ра­дуй­ся, скор­бя­щих уте­ше­ние; ра­дуй­ся, стол­пе и утвер­жде­ние дев­ства. Ра­дуй­ся, ино­ков По­кро­ви­тель­ни­це; ра­дуй­ся, ино­кинь На­став­ни­це. Ра­дуй­ся, пост­ни­ков укреп­ле­ние; ра­дуй­ся, в по­дви­ге дев­ства под­ви­за­ю­щих­ся вспо­мо­же­ние.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 7

Хотя да­ро­ва­ти граду Москве при­ча­стие бла­го­да­ти от свя­тыя иконы Твоея, Вла­ды­чи­це Все­ми­ло­сти­вая, бла­го­во­ли­ла еси при­не­сти икону Твою от Смо­лен­ска в Моск­ву, да тамо пре­бы­вая, чу­де­сы мно­ги­ми про­сла­вит­ся. Егда же по умо­ле­нию жи­те­лей Смо­лен­ска, воз­вра­ща­ше­ся образ Твой свя­тый в град их, на месте про­хож­де­ния иконы Твоея Оди­гит­рии оби­тель дев во имя Твое со­ору­же­на бысть; в ней же под осе­не­ни­ем чу­до­твор­ныя иконы Твоея с верою и лю­бо­вию вос­пе­ва­ем немолч­ную песнь Богу: Алли­лу­иа.

Икос 7

Ново­со­здан­ная оби­тель ино­кинь во граде Москве бла­го­го­вей­но че­ству­ет свя­тое по­до­бие чу­до­твор­ныя иконы Твоея Оди­гит­рии, ми­ло­сти неиз­ре­чен­ныя ис­то­ча­ю­щей вер­ным, еяже осе­не­ни­ем люди пра­во­слав­ныя бла­го­дат­но уте­ша­е­ши и в по­дви­гах поста и мо­лит­вы утвер­жда­е­ши, под­ви­зая их немолч­но вос­пе­ва­ти Ма­тер­ния Твоя щед­ро­ты и бла­го­дар­но взы­ва­ти Тебе:

Радуй­ся, Богом воз­люб­лен­ная Ца­ри­це; ра­дуй­ся, Бога воз­лю­бив­шая паче всего Вла­ды­чи­це. Ра­дуй­ся, едина бла­го­сло­вен­ная в женах; ра­дуй­ся, небес­ных ра­до­ва­ние. Ра­дуй­ся, зем­ных за­ступ­ле­ние; ра­дуй­ся, де­мо­нов по­срам­ле­ние. Ра­дуй­ся, ада по­пра­ние; ра­дуй­ся, укреп­лен­ная силою Гос­по­да Сил. Ра­дуй­ся, об­ле­чен­ная вла­стию Ца­ри­цы неба и земли; ра­дуй­ся, во­ин­ству­ю­щих на плоть це­ло­муд­ри­ем бла­гая По­мощ­ни­це. Ра­дуй­ся, под­ви­за­ю­щих­ся в посте и без­мол­вии ми­ло­сти­вая Уте­ши­тель­ни­це; ра­дуй­ся, из­бав­ля­ю­щая скор­бей вся­че­ских.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 8

Стран­ствие зем­ное мно­госкорб­ное и мно­го­мя­теж­ное услаж­да­е­ши нам Ма­тер­ним Твоим о нас по­пе­че­ни­ем, Бо­го­ро­ди­це, и во дни скорб­ных об­сто­я­ний по­мощь свя­тую яв­ля­е­ши нам во спа­се­ние. Па­мя­ту­ем и ис­по­ве­ду­ем, Вла­ды­чи­це, Твое за­ступ­ле­ние, егда галлы стра­ну Рос­сий­скую ра­зо­ри­ша и град Моск­ву пле­ни­ша, Ты икону Свою свя­тую Оди­гит­рию от Смо­лен­ска в полцы во­ин­ства Рос­сий­ска­го бла­го­во­ли­ла еси при­не­сти и тем вои пра­во­слав­ныя во­оду­ше­ви­ла еси, слав­ную по­бе­ду им да­ро­ва­ла еси, пред­ста­тель­ством Твоим к Сыну Тво­е­му и Богу. Ему же поем: Алли­лу­иа.

Икос 8

Вся ми­ло­сти и щед­рот пре­ис­пол­нен­ная, Все­б­ла­гая Мати Божия, во­ин­ству пра­во­слав­но­му по­мощь и одо­ле­ние на враги пре­слав­но да­ро­ва­ла еси. И егда не бе нам уже спа­се­ния на­деж­ды, яко и наш град пле­нен и ра­зо­рен бысть, галлы с бес­че­сти­ем от Оте­че­ства на­ше­го от­г­на­ла еси и по­бе­дою див­ною нас увен­ча­ла еси. Все­гда па­мя­туя та­ко­вое Твое за­ступ­ле­ние, хва­леб­но Тебе во­пи­ем:

Радуй­ся, стра­ну нашу Рос­сий­скую от на­ше­ствия ино­пле­мен­ных пре­див­но из­ба­вив­шая; ра­дуй­ся, гор­дых силою Своею со сты­дом вспять воз­вра­тив­шая. Ра­дуй­ся, ино­вер­ных ратей Все­силь­ная По­бе­ди­тель­ни­це; ра­дуй­ся, пра­во­слав­на­го во­ин­ства дер­жав­ная по­соб­ни­це. Ра­дуй­ся, ико­ною Твоею свя­тою с во­и­на­ми Рос­сий­ски­ми ми­ло­стив­но пре­бы­ва­ю­щая; ра­дуй­ся, чу­до­твор­ным об­ра­зом Твоим полки их освя­ща­ю­шая. Ра­дуй­ся, из­не­мо­га­ю­щих силою свыше укреп­ля­ю­щая; ра­дуй­ся, бес­по­мощ­ным по­мощь Твою свя­тую по­да­ю­щая. Ра­дуй­ся, оби­ди­мых пра­во­суд­ная За­ступ­ни­це; ра­дуй­ся, нена­деж­ных на­деж­до. Ра­дуй­ся, пе­чаль­ных от­ра­до.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 9

Вси вер­нии с ра­до­стию и уте­ше­ни­ем видят образ Твой свя­тый, на немже уми­лен­но взи­ра­е­ши на Бо­гом­ла­ден­ца Хри­ста, сего ради молим Тя, Все­б­ла­гая, яко Ма­терь вся со­дер­жа­ща­го в дес­ни­це Своей Вла­ды­ки: воз­зри и на нас ми­ло­стив­но, и умоли Гос­по­да, да по­ми­лу­ет нас недо­стой­ных. Научи нас, Вла­ды­чи­це, мо­ли­ти­ся Ему бла­го­при­ят­но, и неосуж­ден­но пети Ему несквер­ны­ми усты и чи­стым серд­цем ан­гель­скую песнь: Алли­лу­иа.

Икос 9

Витий­ство наше пес­нен­ное не до­вле­ет к про­слав­ле­нию мно­гих Твоих чудес, Бо­го­ро­ди­це Оди­гит­рие, их же от свя­тыя иконы Твоея явила еси и прис­но яв­ля­е­ши вер­ным: обаче Ты, яко во­ис­ти­ну Бла­гая Мати, веру и усер­дие наше при­и­ми; веси бо и лю­бовь к Тебе нашу, еюже серд­ца наша пла­ме­не­ют, и ми­ло­стив­но услы­ши сии в про­сто­те со­став­лен­ныя по­хва­лы:

Радуй­ся, об­ра­до­ван­ная Прис­но­де­во; ра­дуй­ся, Неве­сто Нене­вест­ная. Ра­дуй­ся, се­ле­ние Бога Слова; ра­дуй­ся, оби­тель Свя­тей­ша­го свя­тых. Ра­дуй­ся, с Сыном Царем небес вечно цар­ству­ю­щая; ра­дуй­ся, Ма­тер­нее дерз­но­ве­ние к Нему иму­щая. Ра­дуй­ся, мо­лит­вам вер­ных ми­ло­стив­но внем­лю­щая; ра­дуй­ся, лю­бя­щим Тя лю­бо­вию Твоею Бо­же­ствен­ною воз­да­ю­щая. Ра­дуй­ся, Сиона гор­ня­го укра­ше­ние; ра­дуй­ся, мира доль­ня­го за­щи­ще­ние. Ра­дуй­ся, граде спа­се­ния на­ше­го; ра­дуй­ся, горо свя­тая, со­ше­стви­ем Бо­жи­им про­слав­лен­ная.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 10

Спаси нас, Вла­ды­чи­це, от по­ги­бе­ли веч­ныя Ма­тер­ним пред­ста­тель­ством Твоим ко Хри­сту Богу, и спо­до­би нас узре­ти Тя в час кон­чи­ны нашея, от руки лю­та­го ми­ро­дер­жи­те­ля душу нашу со­блю­да­ю­щую; да по­мо­щию Твоею свя­тою из­бег­нем его сетей и спо­до­бим­ся Цар­ствие Небес­ное по­лу­чи­ти и в ра­до­сти веч­ней вос­пе­ва­ти Че­ло­ве­ко­люб­цу Богу: Алли­лу­иа.

Икос 10

Стена еси девам, Бо­го­ро­ди­це Дево, и всем рев­ни­те­лем дев­ства и чи­сто­ты усерд­ная По­мощ­ни­це. Молим Тя, Пре­чи­стая, очи­сти наша серд­ца от вся­кия сквер­ны гре­хов­ныя, и укра­си души наша це­ло­муд­ри­ем и чи­сто­тою, да невре­ди­мы пре­бу­дем от всех ис­ку­ше­ний мира, плоти и диа­во­ла на­хо­дя­щих, и спо­до­бим­ся до­стой­но воз­гла­ша­ти Тебе песни та­ко­вая:

Радуй­ся, доб­рая Мла­до­пи­та­тель­ни­це девам; ра­дуй­ся, бла­го­сер­дая По­пе­чи­тель­ни­це сирот. Ра­дуй­ся, тихое при­бе­жи­ще обу­ре­ва­е­мых стра­стя­ми; ра­дуй­ся, на­деж­ное при­ста­ни­ще сму­ща­е­мых ис­ку­ше­ни­я­ми. Ра­дуй­ся, Мздо­воз­да­я­тель­ни­це по­движ­ни­ков це­ло­муд­рия; ра­дуй­ся, Спо­бор­ни­це бо­рю­щих­ся со враги неви­ди­мы­ми. Ра­дуй­ся, ми­ло­сти­вая По­се­ти­тель­ни­це непо­вин­но осуж­ден­ных; ра­дуй­ся, бла­гая Уте­ши­тель­ни­це на­прас­но окле­ве­тан­ных. Ра­дуй­ся, Бо­же­ствен­ная Сво­бо­ди­тель­ни­це сущих в плену и из­гна­нии; ра­дуй­ся, все­мощ­ная По­кро­ви­тель­ни­це труж­да­ю­щих­ся и обре­ме­нен­ных. Ра­дуй­ся, Судии Пра­вед­на­го умо­ле­ние; ра­дуй­ся, греш­ных с Богом при­ми­ре­ние.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 11

Пение все­уми­лен­ное слы­ша­ще от вер­ных рабов Твоих воз­но­си­мое Ты, Пре­чи­стая Мати Дево, яко иму­щая ми­ло­сер­дие неиз­ре­чен­ное, на­сы­ти нас пищею нетлен­ною Слова Божия и научи нас все­гда ис­пол­ня­ти жи­во­твор­ныя за­по­ве­ди Гос­по­да на­ше­го; Его же умоли, Пред­ста­тель­ни­це наша Все­б­ла­гая, да нис­по­слет ми­лость Свою нам недо­стой­ным и спо­до­бит нас уна­сле­до­ва­ти Его все­свет­лое и все­б­ла­жен­ное Цар­ствие, идеже от всех свя­тых по­ет­ся Ему хва­леб­ная песнь: Алли­лу­иа.

Икос 11

Свет­лы­ми лу­ча­ми чудес Твоих, Бо­го­ро­ди­це Дево, про­све­ща­е­ши нас бла­го­дат­но, и от свя­тыя иконы Твоея Оди­гит­рии уте­ше­ние ду­хов­ное нис­по­сы­ла­е­ши угод­ни­кам Бо­жи­им. Нам же, греш­ным, дары це­леб­ныя по­да­е­ши от Нея неоскуд­но, да зовем Ти бла­го­дар­ствен­но и хва­леб­но:

Радуй­ся, Агнца и Пас­ты­ря Нетлен­на­го рожд­шая; ра­дуй­ся, дев­ство и рож­де­ство в Себе со­че­тав­шая. Ра­дуй­ся, крине дев­ства, к чи­сто­му и дев­ствен­но­му житию при­во­дя­щая; ра­дуй­ся, из­бран­ни­кам Бо­жи­им лю­бовь Твою свя­тую яв­ля­ю­щая. Ра­дуй­ся, угод­ни­кам Гос­под­ним ве­ле­ния небес­ныя от­кры­ва­ю­щая; ра­дуй­ся, пре­по­доб­на­го Сер­гия Ра­до­неж­ска­го по­се­ще­ни­ем Твоим спо­до­бив­шая. Ра­дуй­ся, пре­по­доб­на­го Ки­рил­ла Бе­ло­е­зер­ска­го гла­сом от иконы Твоея на Бе­ло­е­зе­ро на­пра­вив­шая; ра­дуй­ся, пре­по­доб­на­го Сав­ва­тия Со­ло­вец­ка­го в по­дви­гах пу­стын­ных укре­пив­шая. Ра­дуй­ся, свя­ти­те­ля Мит­ро­фа­на Во­ро­неж­ска­го ико­ною Твоею обла­го­дат­ство­вав­шая. Ра­дуй­ся, оби­те­лей Хри­сто­вых по­кров и снаб­де­ние; ра­дуй­ся, рабов Бо­жи­их среди мира тай­ное вра­зум­ле­ние.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 12

Бла­го­дать Божия дей­ству­ет в чу­де­сех, пре­слав­но яв­ля­е­мых от свя­та­го об­ра­за Тво­е­го, Пре­бла­го­сло­вен­ная Бо­го­ро­ди­це Дево, ею же и наши души про­све­ти, мрак гре­хов­ный раз­го­няя си­я­ни­ем Солн­ца Прав­ды Хри­ста, да во свете по­ве­ле­ний Его бо­го­угод­но житие сие вре­мен­ное по­жи­вем во вся­ком бла­го­че­стии и чи­сто­те и спо­до­бим­ся бла­жен­ство веч­ное по­лу­чи­ти и со из­бран­ны­ми пети Богу: Алли­лу­иа.

Икос 12

Поюще Твоя чу­де­са, Бо­го­ро­ди­це, про­по­ве­ду­ем ми­ло­сти Твоя, про­слав­ля­ем щед­ро­ты Твоя неис­чет­ныя и, при­па­дая к чу­до­твор­ней иконе Твоей, мо­лим­ти­ся с верою и лю­бо­вию: буди нам Пу­те­во­ди­тель­ни­ца Бла­гая к свет­ло­му граду Иеру­са­ли­му Небес­но­му, да узрим Тя с вы­со­ты славы Твоея Бо­же­ствен­ныя на нас ми­ло­стив­но взи­ра­ю­щую и вкупе со свя­ты­ми вос­по­ем Ти сице:

Радуй­ся, ра­до­сте наша пре­свя­тая; ра­дуй­ся, Ца­ри­це наша пре­б­ла­гая. Ра­дуй­ся, усы­но­вив­шая нас при кре­сте Сына Тво­е­го и Бога; ра­дуй­ся, Ма­тер­нюю лю­бовь к нам яв­ля­ю­щая. Ра­дуй­ся, во бла­гих же­ла­ния наша дивно ис­пол­ня­ю­щая; ра­дуй­ся, ско­ро­по­слуш­ли­вая к сми­рен­ным мо­лит­вам. Ра­дуй­ся, по­кро­вом Твоим свя­тым нас по­кры­ва­ю­щая; ра­дуй­ся, ризою Твоею чест­ною бла­го­на­деж­но нас за­щи­ща­ю­щая. Ра­дуй­ся, в час кон­чи­ны нашея все­силь­ная нам По­мощ­ни­це; ра­дуй­ся, в мы­тар­ствах воз­душ­ных дер­жав­ная нам За­ступ­ни­це. Ра­дуй­ся, телес наших без­воз­мезд­ное вра­че­ва­ние; ра­дуй­ся, душ наших спа­се­ние.

Радуй­ся, Бо­го­ро­ди­це Оди­гит­рие, хри­сти­ан упо­ва­ние.

Кондак 13

О, Все­пе­тая Мати, Ца­ри­це Все­ми­ло­сти­вая Дево Бо­го­ро­ди­це Оди­гит­рие! При­и­ми малое сие мо­ле­ние наше и при­не­си е Сыну Тво­е­му и Богу на­ше­му, Ма­терне умо­ляя Его бла­гость, да по­ми­лу­ет нас греш­ных и недо­стой­ных, и Тво­е­го ради все­силь­на­го хо­да­тай­ства из­ба­вит нас му­че­ния веч­на­го, спо­до­бит Цар­ствие Небес­ное по­лу­чи­ти и тамо со ан­ге­лы вос­пе­ва­ти Богу: Алли­лу­иа.

Се́й конда́къ глаго́лется три́жды. Та́же Икосъ 1-й и Конда́къ 1-й

Мо­лит­ва пер­вая

О, Пре­чуд­ная и Пре­вы­ш­шая всех тва­рей Ца­ри­це Бо­го­ро­ди­це, Небес­на­го Царя Хри­ста Бога на­ше­го Мати, Пре­свя­тая Оди­гит­рие Марие! Услы­ши нас греш­ных и недо­стой­ных, в час сей мо­ля­щих­ся и к Тебе со воз­ды­ха­ни­ем и сле­за­ми пред пре­чи­стым Твоим об­ра­зом при­па­да­ю­щих и сице умиль­но гла­го­лю­щих: из­ве­ди нас от рова стра­стей, Оди­гит­рие бла­гая, из­ба­ви нас от вся­кия скор­би и пе­ча­ли, огра­ди от вся­кия на­па­сти и злыя кле­ве­ты, и от непра­вед­на­го на­ве­та вра­жия. Мо­же­ши бо, о Бла­го­дат­ная Мати наша, от вся­ка­го зла со­хра­ни­ти люди Твоя, и вся­ким бла­го­де­я­ни­ем снаб­ди­ти и спа­сти, разве бо Тебе иныя Пред­ста­тель­ни­цы в бедах и об­сто­я­ни­ях и теп­лыя Хо­да­та­и­цы о нас греш­ных к Сыну Тво­е­му, Хри­сту Богу на­ше­му, не имамы. Егоже умоли, Вла­ды­чи­це, спа­сти нас и Цар­ствия Небес­на­го спо­до­би­ти, да спа­сен­нии Тобою сла­вим Тя и в бу­ду­щем веце, яко же спа­се­ния на­ше­го Ви­нов­ни­цу, и пре­воз­но­сим все­свя­тое и ве­ли­ко­ле­пое имя Отца и Сына и Свя­та­го Духа, в Тро­и­це сла­ви­ма­го и по­кло­ня­е­ма­го Бога во веки веков. Аминь.

Мо­лит­ва вто­рая

К кому возо­пию, Вла­ды­чи­це? К кому при­бег­ну в го­ре­сти моей, аще не к Тебе, Гос­по­же Вла­ды­чи­це Бо­го­ро­ди­це, Ца­ри­це Небес­ная? Кто плач мой и воз­ды­ха­ние мое при­и­мет, аще не Ты, о Пре­не­по­роч­ная, на­деж­до хри­сти­ан и при­бе­жи­ще греш­ным? При­к­ло­ни, о Пре­чи­стая Вла­ды­чи­це, ушеса Твоя к мо­ле­нию моему. Мати Бога моего, не пре­зри мя, тре­бу­ю­ща Твоея по­мо­щи, услы­ши сте­на­ние мое и вопль серд­ца моего внуши, о Гос­по­же Бо­го­ро­ди­це Ца­ри­це. И по­даждь ми ра­дость ду­шев­ную, под­кре­пи мя нетер­пе­ли­ва­го, уныла­го и нера­ди­ва­го к Тво­е­му хва­ле­нию. Вра­зу­ми и научи мя, како Тебе мо­ли­ти­ся по­до­ба­ет, и не от­сту­пи от мене, Мати Бога моего, за роп­та­ние и нетер­пе­ние мое, но буди ми по­кров и за­ступ­ле­ние в жизни моей и при­ве­ди мя к ти­хо­му при­ста­ни­щу бла­жен­на­го онаго покоя, и со­при­чти мя к лику из­бран­на­го Тво­е­го стада и тамо удо­стой мя вос­пе­ва­ти и сла­ви­ти Тя во веки. Аминь.

Тро­парь, глас 4

К Бо­го­ро­ди­це при­леж­но ныне при­те­цем, греш­нии и сми­рен­нии, и при­па­дем, в по­ка­я­нии зо­ву­ще из глу­би­ны души: Вла­ды­чи­це, по­мо­зи на ны ми­ло­сер­до­вав­ши, пот­щи­ся, по­ги­ба­ем от мно­же­ства пре­гре­ше­ний, не от­вра­ти Твоя рабы тщи, Тя бо и едину на­деж­ду имамы.

Кондак, глас 6

Пред­ста­тель­ство хри­сти­ан непо­стыд­ное, хо­да­тай­ство ко Твор­цу непре­лож­ное, не пре­зри греш­ных мо­ле­ний гласы, но пред­ва­ри, яко Бла­гая на по­мощь нас, верно зо­ву­щих Ти: уско­ри на мо­лит­ву и пот­щи­ся на умо­ле­ние, пред­ста­тель­ству­ю­щи прис­но, Бо­го­ро­ди­це, чту­щих Тя.

Ин кондак, глас 6

Не имамы иныя по­мо­щи, не имамы иныя на­деж­ды, разве Тебе, Вла­ды­чи­це, Ты нам по­мо­зи, на Тебя на­де­ем­ся и Тобою хва­лим­ся, Твои бо есмы раби, да не по­сты­дим­ся.




<

Тропарь Божией Матери пред иконой Ее Смоленской, именуемой Умиление

Богорадованная Владычице,/ Препрославленная Мати щедрот и человеколюбия,/ Всемилостивая о всем мире Ходатаице!/ Прилежно, рабы Твои, к Божественному предстательству прибегающе/ и пречудному образу Твоему со умилением припадающе, молимся:/ молитву теплую к Сыну Твоему и Богу нашему сотвори,/ о Всепетая Царице Богородице,/ да всяких болезней и печалей нас Тебе ради избавит/ и от грехов всяких свободит,/ Царствия Своего Небеснаго наследники ны покажет,/ велие бо неизреченное, яко Мати, имаши дерзновение к Нему/ и вся можеши,/ Едина во веки Преблагословенная.

Ин тропарь Божией Матери пред иконой Ее Смоленской, именуемой Умиление

К Богородице со умилением припадем/ вси, грехами обремененнии,/ чудотворную икону умиления облобызающе/ и вопиюще со слезами:/ Владычице, приими моление недостойных раб Твоих/ и подаждь нам, просящим,/ велию Твою милость.




Кондак 1

Избранней от всех родов Божией Матери и Царице, умиленно молящейся за ны ко Господу и образ Умиления нам даровавшей милостиво, похвальное пение и моление приносим Ти, Богородице, Ты же, яко Всемилостивая наша Заступница и Всеблагая Помошница, от всяких бед нас избави, да зовем Ти:

•Радуйся, Благодатная Богородице, подаждь и нам, недостойным, слезы умиления и яви милосердие Твое.


Икос 1

Ангел множество и вся Небесная воинство славят Тя, Владычицу всех Богородицу и мы, грешнии, Тебе умиленное моление приносим милосердному Твоему к нам заступлению со страхом зовуще таковая:

•Радуйся, обрадовавшая падшее человечество всесвятым Твоим Рождеством.

•Радуйся, Спасителя миру благодатно родшая и девство предивно сохранившая.

•Радуйся, Мати и Дево Всеблагословенная.

•Радуйся, Богородице Препрославленная.

•Радуйся, Палато Бога Слова прекрасная.

•Радуйся, пророческих глаголов сбытие принесшая.

•Радкйся, апостольских проповедей основание непоколебимое.

•Радуйся, преподобных похвало и дев величание.

•Радуйся, утешение скорбящих.

•Радуйся, исцеление болящих.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 2

Видят Тебя, Избранная Отроковице, вся Небесныя Силы предстоящу всегда Престолу славы Творца и Владыки за все христианы к Сыну Твоему и Богу нашему молящуюся; мы же, грешнии, на земли, зряще Твою святую икону и к ней припадающе Тебе радостно поклоняемся, зовуще: Аллилуия.


Икос 2

Разум подаждь нам, Всеусердная Предстательнице наша, из уст до нас, скверных, како мощно пети Твоему имени, яко благих еси нам Ходатаице, Тебе со умилением поем сице:

•Радуйся, молитвы о нас к Сыну и Богу во утешение.

•Радуйся, молитвами Твоими очи наша от вечного приносящая рыдания избавляющая.

•Радуйся, Твоими матерними молитвами Сына Твоего и Бога нашего на милость к нам преклоняющая.

•Радуйся, Твоими молитвами праведный на нас гнев Божий утоляющая.

•Радуйся, Твоим ходатайством грехи наша прощаются.

•Радуйся, Твоим предстательством временныя наши скорби разрушающая.

•Радуйся, Ты во всяких бедах и нуждах нам помогающая.

•Радуйся, радостию Твоею печали наши утоляющая.

•Радуйся, чтущих Тя непрестанное радование подающая.

•Радуйся, Ты нам райские двери отверзающая.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 3

Сила Вышняго осени Тя к скорому и теплому заступлению верно притекающих к Тебе и честному Твоему образу поклоняющихся Единей бо токмо Тебе, Нетленней и Пречистей Богоматери, дадеся дар всякое благое наше прошение исполняти и Едина Ты можеши нам помощи, едино хощеши, тем всяк возраст славословит Сына Твоего и Бога нашего, зовый: Аллилуия.


Икос 3

Имея богатство милосердия неоскудное всем концем земли простираеши руку помощи и подаеши всем вся по своей их потребе исполняти: мы же Тебе, благодарне суще, сице поем:

•Радуйся, денница Солнца Правды.

•Радуйся, Заре невечерняя безсмертныя жизни.

•Радуйся, падшаго человеческаго естества обновление.

•Радуйся, древния вражды разрушение.

•Радуйся, радостное созерцание святых.

•Радуйся, Радосте, усладившая горечь греховную.

•Радуйся, Облаче, росу благодати спасительной источившая.

•Радуйся, окамененных сердец Умягчение.

•Радуйся, всех падших скоро во благодати восставляющая.

•Радуйся, всем во всякой требуемой от Тебя помощи помогающая.

•Радуйся, болящих исцеление, страждующм ослабу, слепым прозрение подавающая.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 4

Бури греховныя избежати,и в тихое пристанище покаяния приити помози нам, Пресвятая Дево,Искупителя и Спасителя душ наших рождшая и материнское дерзновение к Сыну Своему имущая, простри к Нему богоносныя Твои руцы и умоли Его вся ны помиловати и спасти, да благодарне поем Ему: Аллилуия.


Икос 4

Слышит Господь на Небеси о нас ходатайства, избранная Палато Духа Святаго и исполняет Твоя прошения, мы же, грешнии на земли, зряще святую Твою икону, яко светозарное Солнце, нам светящуюся, дерзаем глаголати:

•Радуйся, Солнце мысленное нам являющая.

•Радуйся, Светом немерцающим нас просвещающая.

•Радуйся, умерщвленных нас грехами оживляющая.

•Радуйся, нечаянно находящих на нас злых врагов скоро прогоняющая.

•Радуйся, желанных благ всегда нас наслаждающая.

•Радуйся, скоро в бедах и печалях утешающая.

•Радуйся, верою имя Твое призывающих от нечаянной смерти спасающая.

•Радуйся, на Тя уповающим бесконечную жизнь дарующая.

•Радуйся, веру и любовь к Тебе имущим к Небеси возводящая.

•Радуйся, предстательство наше пред Богом прекрепкое.

•Радуйся, во всяких обстояниях нас защищающая.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 5

Боготочная святая икона Твоя, Богородице Дево, лучи Божией благодати невидимо испускает и души верных оза-ряет. К ней мы зряще и с верою и любовию сердечно молящеся, Тебе, Владычице, глаголем: Ты еси щит непобедимый и Стена Необоримая вопиющим Ти: Аллилуия.


Икос 5

Видеша Силы Небесныя на руку Твоею создавшаго Своими руками человека и владыку разумевающе, мы же, грешнии на земли, зряще изображенную Тебе, Пречистую Матерь Его, любезно Свои руце, к нам простирающие, умильно зовем:

•Радуйся,на руку Твоею Огнь божественный неопально держащая, им же грехи наши попаляются.

•Радуйся,на руку Твоею Света неприкосновеннаго носившая, имже души наша освящающая.

•Радуйся, врагов наших видимых и нивидимых побеждающая.

•Радуйся, любовь и милосердие к нам являющая.

•Радуйся, руце Твои в поручение о нас к Богу носящая.

Радуйся, вход в Царствие Небесное нам отверзающая.

•Радуйся, Твоею помощию нас защищающая.

•Радуйся, Твоим ходатайством грехи наша прощаются.

•Радуйся, Твоим молением печали наша утоляющая.

•Радуйся, Твоим
предстательством всяких благ наслаждаемся.

•Радуйся, яко Тобою вся во благих желания исполняются.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 6

Хотя долготерпеливый Всевидец Господь явити себе в Матерь милости Неисчерпаемый Источниче, аще кто праведным Судом Божиим осуждения достоин явися, Твоим всемощным ходатайством сохранен будет и Сыну Твоему и Богу нашему велегласно зовем: Аллилуиа.


Икос 6

Воссияла еси премудростию от истиннаго Солнца Правды Богоизбранная Отроковице и лучи истинного благоразумия испущающи, теми освещающи всех исповедующих Тя, истинную Матерь Божию быти вопиющих сице:

•Радуйся, всех на Небеси и на земли славою просвещающая.

•Радуйся, начало человеческаго спасения устрояющая.

•Радуйся, Ковчеже, жизни нашея от потопа сохраняющая.

•Радуйся, в райских селениях жизнь нам дарующая.

•Радуйся, Предстательнице наша к Богу, мир спасающая.

•Радуйся, в бедах сущих скоро заступающая.

•Радуйся, всякие болезни человеческие душевные и телесные исцеляющая.

•Радуйся, всякаго блага у Тебе просящим Подательнице.

•Радуйся, учение благодати всем источающая.

•Радуйся, всякий чин и возраст довольно услаждающая

•Радуйся, Благодатная Богородице Дево, подаждь и нам недостойным, слезы умиления и яви милосердие Твое.


Кондак 7

Хотящим нам, Владычице, лобызати святую и всечестную икону Твою, не возбрани сие грехов ради наших, но яко Благоутробная Мати милостивого Бога, не возгнушайся наших нечистых устен, но приими нас милостиво, припадающих к Тебе с любовию, дары благодати щедро нам подавай от многочудесного Твоего образа, да зовем со умилением триединому Богу: Аллилуия.


Икос 7

Дивно показал еси дела Твоя в Пречистей Твоей Матери, Господи, и дивно даровал еси нам Ее икону, паче лучей солнечных просвещающу людей, яко самую зряще Богородицу и верою сердечною от души с любовию вопиющих таковая:

•Радуйся, иконою Твоею паче надеяния милосерднаго к нам заступления являющая.

•Радуйся, яко на икону Твою взирающе, самой Тебе, истенной Богородице, поклоняемся.

•Радуйся, иконою Твоею, яко столпом огненным, мрак греха отгоняющая.

Радуйся, Тою печали наша утоляющая.

•Радуйся, яко мы, грешнии, сохраняемся Твоим заступлением.

•Радуйся, отирающая слезы от очес плачущих и печальных.

•Радуйся, вливающая отраду и утешение в сердца огорченных.

•Радуйся, безматерних сирот призрение и Покрове.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 8

Дивна и преславна святую Твою икону Ангели воспеша, апостолы прославиша, лик святителей поклоняшеся, мы же, грешнии, припадающе, ожидаем от Тебе великия и богатыя милости, с веселием вопиюще: Аллилуия.


Икос 8

Вся добрая и полезная даруеши нам, Богородице, от честнаго и многочудесного Твоего образа, умиляеши души наша и врачуеши болезни наша, яко воистинну многобгоутробная Мати чад Твоих, тем же по долгу блажим еси от нас благохвалении таковыми:

•Радуйся, от востока и до запада хвалимая и превозносимая.

•Радуйся, от всех христианских родов певаемая и блажимая.

•Радуйся, душевных и телесных недугов Целительнице благодатная.

•Радуйся, безнадежных Надеждо.

•Радуйся, огорченных отрадо.

•Радуйся, гонимых прибежище.

•Радуйся, верных крепкое заступление.

•Радуйся, чудесами Твоими всех удивляющая.

•Радуйся, милостию Твоею всех посещающая.

•Радуйся, примирения спастися всем хотящая.

•Радуйся, Благодатная Богородице Дево, подаждь и нам, недосойным, слезы умиления и яви милосердие Твое.


Кондак 9

Вси роди христианстии имеют Тя, Владычице, Помошницу изрядную, якоже обещала еси при всечестном Твоем Успении не оставити нас, сирых и беспомощных. Тако и до днесь сие обетование благое исполняеши Церкви Христовой на земли, Богородице Дево, ущедряя и спасая люди, верно Тя славящия, и преславно поющии Богу: Аллилуия.


Икос 9

Витийство человеческое изнемогает изрещи обилие щедрот и милостей Твоих, Мати Божия, славити же Тя по достоянию изумевают самые умы безплотные, обаче Благая сущи, не возгнушайся и наших недовлеющих похвал, ими же, любовию к Тебе подвизаемии, дерзаем воспевати Тя сице:

•Радуйся, Луно, полная нощь грехов наших просвящающая.


•Радуйся, кротким сиянием Твоим мглу страстей наших разгоняющая.

•Радуйся, Путеводительнице заблудших.

•Радуйся, юных Наставнице целомудрия.

•Радуйся, уповающим на Тя благий конец дарующая.

•Радуйся, любящих и чтущих Тя не посрамляющая.

•Радуйся, добрая и Благословенная в женах.

•Радуйся, едина чистая и непорочная в женах Приснодево.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 10

Спасителю Богу плоть взаимодавшая Нетленная Пречистая Мати Божия, очисти нас, оскверненных грехами многими, иссопом молитв Твоих своих в чистоте утверди и сподоби благоугодно и праведно препроводить житие сие земное, да благоугодивши Христу Богу, унаследуем Царствие Небесное и со святыми воспоем Богу: Аллилуия.


Икос 10
Стена еси девам, Богородице Дево, и всем христианским уневестившимся Христу Богу иже треволнении страстей, обретают всегда крепкую Твою, молим Тя, Всеблагая, не попусти и нам, грешным, погибнути в море страстей,, но простри державную десницу Твою, настави нас на покаяние и целомдренное житие, да благодарне зовем:

•Радуйся, Прибежище благотишное утомленным бурей страстей.


•Радуйся, Пристанище тихое пловцов житейскаго моря.

•Радуйся, Споручнице в покаянии грешных.

•Радуйся, кающихся с Богом примирение

•Радуйся, всежелательное и всесладкое святых утешение.

•Радуйся, Судии Праведного известное умоление.

•Радуйся, горних Ангельских воинст удивление.

•Радуйся, мученических светлых полков непрестанное величание.

•Радуйся, праведных жен всевеселящее радование.

•Радуйся, дев святых венче.

•Радуйся, преподобных многопетая славо

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 11

Пение хвалебное приносим Ти, Богородице. Приими от нас, Небесная Царице, и молитву, приносимую Тебе, Пресвятая Дево, к Тебе бо в напастех, скорбех и печалех прибегаем, и пред Тобою в бедах наших слезы проливаем и молим: утоли наша печали и приими сию жертву Твоих рабов, зовущих: Аллилуия.


Икос 11

Светлыми лучами чудес Твоих, Богомати Владычице, озаряемыми наши души среди суеверия наших дней и вся ны приводит исповедати Твое всемогущество и силу, зрим икону Твою, Всеблагая, источающию нам милости Твоя и щедроты и, припадая к Ней, сице вопием:

•Радуцся, Православия утверждение.

•Радуйся, веры Христовой распространение.

•Радуйся, ересей и расколов посрамление.

•Радуйся, чудесы Твоими верных утешающая.

•Радуйся, милосердием Твоим и грешники не оставляющая.

•Радуйся, в час кончины уповающим на Тя помогающая.

•Радуйся, в скорбех и бедах на помощь ускоряющая.

•Радуйся, болезни неисцелимыя врачующая.

•Радуйся, скоро послушливая к молитвам смиренных.

•Радуйся, прошения наша предворяющая исполнением.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 12

Благодати Божией сокровище, духовную икону Твою, Богородице Дево, яко залог благоволения Твоего, Дево, стяжавше, славим и величаем Тя, Владычице Премилостивая и рабски вопием Творцу: Аллилуия.


Икос12

Поюще милосердие Твое неисчетное и многия Твоя чудесы, Дево всепетая, радуемся мы, грешнии, зряще на иконе лик Твой святый, умиления преисполненный, иже в наши души умиление вливает, да сице Тебе взываем:

•Радуйся, Ниво Неоранная, класс спасительный человеком израстившая.

•Радуйся, Лествице Небесная, Еюже снииде Бог.

•Радуйся, Горо Несекомая, усыренная Духом Святым.

•Радуйся, Скиние селения Всевышняго.
•Радуйся, святая святых Большая.

•Радуйся, Клете таинственная, угль Божественный неопально приемшая.

•Радуйся, хладныя сердца наша любовию
ко Господу воспламеняющая.

•Радуйся, нечистоту душ наших благодатию очищающая.

•Радуйся, на подвиги духовныя невидимо нас укрепляющая.

•Радуйся, леность и уныние от нас прогоняющая.

•Радуйся, исполняти веления Христовы нам помогающая.

•Радуйся, душевредныя навыки в нас искореняющая.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.


Кондак 13
О Всепетая Мати! О Царице Всемилостивая, Богорородице Преблагая, умоли Сына Твоего - Христа Бога нашего избавити нас от геенны огненныя и сподоби спасаемых части, да со избанными воспоем Ему во веки: Аллилуия.

(Сей кондак читается трижды, затем икос 1 и кондак 1).

Икос 1

Ангел множество и вся Небесная воинство славят Тя, Владычицу всех Богородицу и мы, грешнии, Тебе умиленное моление приносим милосердному Твоему к нам заступлению со страхом зовуще таковая:

•Радуйся, обрадовавшая падшее человечество всесвятым Твоим Рождеством.

•Радуйся, Спасителя миру благодатно родшая и девство предивно сохранившая.

•Радуйся, Мати и Дево Всеблагословенная.

•Радуйся, Богородице Препрославленная.

•Радуйся, Палато Бога Слова прекрасная.

•Радуйся, пророческих глаголов сбытие принесшая.

•Радкйся, апостольских проповедей основание непоколебимое.

•Радуйся, преподобных похвало и дев величание.

•Радуйся, утешение скорбящих.

•Радуйся, исцеление болящих.

•Радуйся, Благодатная Богородице Дево, подаждь и нам, недостойным, слезы умиления и яви милосердие Твое.

Кондак 1

Избранней от всех родов Божией Матери и Царице, умиленно молящейся за ны ко Господу и образ Умиления нам даровавшей милостиво, похвальное пение и моление приносим Ти, Богородице, Ты же, яко Всемилостивая наша Заступница и Всеблагая Помошница, от всяких бед нас избави, да зовем Ти:

•Радуйся, Благодатная Богородице, подаждь и нам, недостойным, слезы умиления и яви милосердие Твое.

Молитва

О Пресвятая Госпоже Владычице, Богородице Дево! Приими недостойныя молитвы наша, сохрани нас от наветов злых человек и от напрасныя смерти, подаждь нам прежде конца покаяние, на моления наша умилосердися и радость в печали место даруй. И избави нас, о Госпоже Владычице Богородице, от всякия беды, напасти, скорби, болезни и всякаго зла, и сподоби нас, грешных рабов Твоих, одесную стати во втором пришествии Сына Твоего, Христа Бога нашего, и наследники нас быти сподоби Царствия Небеснаго и жизни вечныя со всеми святыми в безконечныя веки. Аминь.
: