Тропарь мучеников Флора и Лавра
глас 4
Преудобренную и богомудрую двоицу пресветлую/ восхвалим, вернии, по достоянию,/ Флора преблаженнаго и Лавра всечестнаго./ Иже усердно Троицу несозданную ясно проповедасте всем,/ темже пострадавше до крове,/ и венцы пресветлыми увязостеся,// молитеся Христу Богу, да спасет души наша.

Кондак мучеников Флора и Лавра
глас 8
Яко благочестия мученики и страдальцы Христовы богомудрены,/ вселенная преславно почитает Флора и Лавра днесь,/ яко да улучим благодать и милость молитвами их// и избавимся бед и напастей, гнева же и скорби в День Судный.

Тропарь преподобного Иоанна Рыльского
глас 1
Покаяния основание, прописание умиления,/ образ утешения, духовнаго совершения/ равноангельное житие твое бысть, преподобне./ В молитвах убо и в пощениих и в слезах пребывавый,/ отче Иоанне,/ моли Христа Бога о душах наших.
Ин тропарь преподобного Иоанна Рыльского
глас 4
Тело смирив лощением,/ душу же возвысив пением,/ сосуд явися избран Святому Духу,/ Иоанне, отче наш,/ в чистоте сердца твоего, преподобне, пожив./ Тем, дерзновение имея ко Господу,/ моли спастися душам нашим.
Кондак преподобного Иоанна Рыльского
глас 2
Твердым умом и непрестанными молитвами/ борителя врага силу всегубительную до конца поборив,/ достойно от Христа прославился еси,/ Иоанне всеблаженне./ Тем твоих днесь мощей возвращения/ светлый совершающе праздник в веселии,/ согласно вопием ти:/ стаду и людем твоим ты еси с Богом, отче преподобне,/ похвала и утверждение.
Кондак преподобного Иоанна Рыльского
глас 2
В молитвах бодренно не усыпая/ и в пениих непрестанных Ангелом подобяся,/ в гроб вшел еси, тленную жизнь оставив,/ и к Небеси прешел еси/ на нетление, Иоанне отче,/ от смерти бо к животу вечному/ тя пресели Христос Бог, яко Своего угодника.
Ин кондак преподобного Иоанна Рыльского
глас 6
Благодатию Божиею нас обогатил еси/ и делы благими известил еси,/ званием явися, Иоанне, угодник Христа Бога./ В молитвах и постех дарований Божия Духа исполнися/ и бысть недугом прогонитель/ и заступник душам нашим.
Ин кондак преподобного Иоанна Рыльского
глас 2
Молящим тя теплейший заступниче/ и просящим скорейший послушателю,/ преподобне отче Иоанне,/ приими моление наше/ и Христа умоли помиловати нас,/ Единаго Преблагаго и Многомилостиваго.