Тропарь священномученика Вениамина
глас 1
Светильник всесветлый во граде святаго Петра явился еси,/ пастырю добрый, священномучениче отче Вениамине./ Любовь и милосердие в сердцах верных насаждая,/ благотворити призывал еси терпящим глад и нищету. Сего ради и мы к тебе прибегаем и с верою вопием ти:/ моли милостиваго Бога/ Отечество наше в Православии и благочестии утвердити,/ мир Церкви даровати// и душам нашим велию милость.

Кондак священномученика Вениамина
глас 6
От юности иго Христово на рамо взем,/ истинный страж Православныя Церкве явился еси,/ священномучениче Вениамине./ Клевету, узы, страдания и суд неправедный/ от беззаконных мужественне претерпевая,/ святыню церковную на поругание не предал еси./ Темже и Христос даром терпения и любве тя исполни,/ во еже пред мученическою кончиною/ со благодарением взывати:// за вся, Господи, слава Тебе.

Тропарь праведного Евдокима
глас 4
От земли воззвавый тя к Небесным селением/ соблюдает и по смерти невредимо тело твое, святе Евдокиме:/ ты бо в целомудрии и чистом жительстве, блаженне,/ жительствовал еси, не осквернив плоти.// Темже со дерзновением моли Христа Бога спастися нам.
Кондак праведного Евдокима
глас 2
Вышних желая, с вышними совокупляяся,/ и колесницу огненную, Божественными восхожденьми добродетелей, совершил еси душу,/ преблаженне Евдокиме,/ на земли пожив, яко безплотен,// Зиждителю всех благоугодил еси.

Тропарь Креста Господня
глас 1
Спаси, Господи, люди Твоя/ и благослови достояние Твое,/ победы на сопротивныя даруя// и Твое сохраняя Крестом Твоим жительство.