Тропарь пророка Иезекииля
глас 2
Пророче Божий Иезекииле,/ предзревый затворенная Духом врата/ и Плотоносца, во исходе сих, Единаго сказавый Бога,/ Того моли, молимся,/ да отверзет дверь милости Своей/ и спасет души благочестно поющих память твою.

Ин тропарь пророка Иезекииля
глас 2
Пророка Твоего Иезекииля память, Господи, празднующе,/ тем Тя молим:/ спаси души наша.

Кондак пророка Иезекииля
глас 4
Божий явился еси пророк,/ Иезекииле чудне,/ воплощение Господне всем провозвестил еси,/ Сего Агнца и Зиждителя,// Сына Божия, явльшася во веки.

Тропарь преподобных Симеона и Иоанна
глас 4
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.
Кондак преподобных Симеона и Иоанна
глас 2
Во плоти явльшася безплотнаго и добродетельми премирно просиявшаго,/ Симеона равноангельнаго и богоноснаго восхвалим,/ с нимже Иоанна приснопамятнаго, верою и любовию,// яко молящияся Господу непрестанно о всех нас.

Тропарь преподобных Онуфрия молчаливого и Онисима затворника, Печерских, в Ближних пещерах
глас 3
Преблаженнии и Богоноснии отцы наши Онуфрие и Онисиме,/ яко стяжавшии дерзновение ко Господу/ равноангельным своим житием,/ егоже ради обогати Христос нетлением и чудесы мощи ваша,/ молим вас прилежно:/ испросите душам нашим очищение/ и велию и богатую милость.

Кондак преподобных Онуфрия молчаливого и Онисима затворника, Печерских, в Ближних пещерах
глас 4
Богатство благодати и сыноположения/ стяжавше многими подвиги и добродетельми,/ ихже ради Христос всели души ваша в Небесная селения Своя,/ даровав благодать нетления и чудес мощем вашим,/ к нимже притекающе, вопием:/ радуйтеся, Онуфрие и Онисиме, отцы наши,/ ликов иночествующих похвало и удобрение.

Тропарь великой княгини Анны Кашинской
глас 3
Днесь восхваляем тя, преподобная мати,/ великая княгине инокине Анно:/ яко бо лоза плодовита посреде терния,/ процвела еси во граде Кашине твоими добродетельми,/ всех удивила еси чудным твоим житием,/ темже Христу Богу угодила еси,/ и ныне, радующися и веселящися,/ пребывавши с лики преподобных жен,/ наслаждающися райския красоты и веселия./ Молим убо тя:/ моли о нас Человеколюбца, Христа Бога нашего,/ даровати нам мир и велию милость.
Ин тропарь великой княгини Анны Кашинской
глас 4
Просветившися Божественною благодатию, преподобная,/ и правостию умною душу твою привязавши в любовь Христову,/ тленныя, и красныя, и временный нивочтоже вменила еси./ Крестным знамением на мысленный враги мужески вооружившися,/ постническими подвиги, постом и молитвами/ углие страстей угасила еси, достославная Анно,/ и по смерти источавши благодать притекающим к мощем твоим./ И ныне, в Небеснем чертозе с мудрыми девами предстоящи Христу,/ моли о нас, почитающих святую память твою.

Кондак великой княгини Анны Кашинской
глас 4
Яко пресветлая звезда,/ явилася еси в Российстей земли, во граде Кашине,/ преподобная мати Анно,/ во всех благочестивых и верных женах,/ аки крин, процвела еси чистым и непорочным твоим житием,/ во инокинях же совершенными твоими труды и подвиги,/ и возшла еси к Вышнему граду, радующися и веселящися,/ яко добре совершивши твое течение,/ и ныне честныя твоя мощи,/ аки бисерие драгое, явишася,/ на исцеление всем, приходящим с верою./ Тем и вопием ти:/ радуйся, всекрасная душею,/ и моли Христа Бога/ о спасении душ наших.

Ин тропарь пророка Иезекииля
глас 2
Пророка Твоего Иезекииля память, Господи, празднующе,/ тем Тя молим:/ спаси души наша.