[показать]

МОЛИТВА СВЯТИТЕЛЯ ТИХОНА
Патриарха Московского и всея России
о спасении Державы Российский
и утолении в ней раздоров и нестроений.

Господи Боже, Спасителю наш! к Тебе припадаем сокрушенным сердцем и исповедуем грехи и беззакония наша, имиже раздражихом Твое благоутробие и затворихом щедроты Твоя. Отступихом бо от Тебе Владыко, и заповедей Твоих не соблюдохом, ниже сотворихом, якоже заповедал еси нам. Сего ради разгневался еси яростию Твоею на нас, и посетил еси жезлом железным беззакония наша и ранами неправды наша. Простерл еси руку Твою, и восплачется земля, и болезни смертныя объяша нас. Гладом же и скудостию и нестроением поразил еси нас, и дал еси нас на попрание врагом нашым, и умалихомся паче всех язык, и быхом в притчу и поношение соседом нашым. Боже великий и дивный, каяйся о злобах человеческих, возводяй низверженныя и утверждаяй низпадающыя! небесную Твою силу с небесе низпосли, уврачуй язвы душ нашых и воздвигни нас от одра болезни, яко наполнишася разслабления чресла наша, яко болим неправдою и рождаем беззаконие. Утоли шатания и раздоры в земли нашей, отжени от нас зависти и рвения, убийства и пьянства, разжжения и соблазны, попали в сердцах нашых всяку нечистоту, вражду и злобу, да паки вси возлюбим друг друга и едино пребудем в Тебе, Господе и Владыце нашем, якоже повелел еси и заповедал еси нам. Помилуй нас, Господи, помилуй нас, яко исполнихомся уничижения и несмы достойни возвести очеса наша на небо. Помяни милости, яже показал еси отцем нашым, преложи гнев Твой на милосердие и даждь нам помощь от скорби. Молит Тя Твоя Церковь, представляющи Тебе ходатйство другов Твоих: преподобнаго отца нашего Сергия Радонежского, Петра, Алексия, Ионы и Филиппа, святителей Московских, священномученика Ермогена, и всех святых, в земле нашей просиявших, изряднее же Пресвятые Богородицы и Приснодевы Марии, от лет древних покрывавшия и заступавшия страну нашу. Вразуми и укрепи всех, иже во власти суть, и возглаголи в них благая о Церкви Твоей и о всех людех Твоих. Силою Креста Твоего укрепи христолюбивое воинство наше и избави их от всякаго навета вражия. Воздвигни нам мужей силы и разума, и даждь всем нам духа премудрости и страха Божия, духа крепости и благочестия.

Призри и на Собор наш церковный, от всех концов Росскйския Земли собравшийся, умудри и просвети его благодатию Пресвятаго Твоего Духа, и даждь ему слово во отверзение уст его, во утверждение святые православныя веры нашея, в примирение и соединение отпадших и заблудших, в обновление мiра и любве в сердцах нашых.

Господи, к Тебе прибегаем, научи нас творити волю Твою, яко Ты еси Бог наш, яко у Тебе источник живота, во Свете Твоем узрим свет. Пробави милость Твою ведущим Тя во веки веков. Аминь.