«Новости» на телеканале «Моя Удмуртия» с понедельника по субботу в 19:00
Шаерысьтымы удмурт кылын вещанилы юрттэт кулэ. Берло дыре "Удмуртия" кун телерадиокомпаниын анай кылын чузъяськись передачаос кулэсмизы. Нош "Мынам Удмуртие" телеканалын йоскалык программаос вазь чукна яке уин пото. Маин со герзаськемын но тупатскоз-а югдур? - сыче юанъесын "Удмурт кенеше" вазиськизы учкисьес но радио кылзисьес. Мер огазеяськон та но телерадиопередачаослэн фондэнызы герзаськем ужпумъесты жутиз элькунысьтымы Общественной палаталэн кенешоназ.
"Удмуртия" кун телерадиокомпаниын анай кылын чузъяськись передачаослэсь кулэсмемзэс кивалтисьес ВГТРК-лэн политикаеныз герзало. Со - коньдон поттонлы трос саклык висъя. Нош удмурт передачаос уксе уг вае. Соосты эфире поттонлэн мугез но мукет - анай кылэз утен. Соин ик "Удмурт кенешлэн" чакламезъя "Мынам Удмуртие" радио но телеканалэз азинтоно но азьланяз солэсь нимаз удмурт компания кылдытоно. Та чектосэн общественной палаталэн езчиосыз кун кенеше но кивалтэтэ вазиськозы.
ВАЛЕНТИН ТУБЫЛОВ, "УДМУРТ КЕНЕШ" ОГАЗЕЯСЬКОНЛЭН ТОРОЕЗ: «Верало, что коньдон овол, значит коньдон утчано. И мон малпасько любой асьсэ гажась правительство солы должен коньдон висъяны, шедьтыны».
Удмурт передачаослы коньдон шедьтизы ке но, егит телерадиокомпания азьын мукет югдур кылдэ. Паськытатэм вещаниез тырмытон понна азьло аръесы гожтэм фондъес кулэ луозы. Нош ваньмыз соос али ГТРК-лэн ки улаз. Та фондъес уже кутэм понна телекомпани мукетъеслэсь бадзым уксе куре. Нош мер огазеяськонлэн чакламезъя со ГТРК-лэн гинэ овол.
ВАЛЕНТИН ТУБЫЛОВ, "УДМУРТ КЕНЕШ" ОГАЗЕЯСЬКОНЛЭН ТОРОЕЗ: «Ми "Удмурт кенеш" потимы сыче куронэн правительствое, чтобы мед со фондъес келямын луозы архиве, кун архиве, чтобы со фондъесты мед быгатозы вань телерадиокомпаниос ас ужазы кутыны».
Пычалозы-а улонэ общественной палаталэн но "Удмурт кенешлэн" чектонъессы, возьматоз дыр но кивалтэтлэн ужамез. Нош "Мынам Удмуртие" телеканал укисьессэ жоген шумпоттоз. Эфир одиг часлы йылтэмын луоз.
Екатерина Сунцова, "Мынам Удмуртие" телеканал.
http://tuganbaev.livejournal.com
