Молитва Вонифатию Тарсийскому
О, святый угодниче Христов, страстотерпче и мучиниче Вонифатие, душею на Небеси предстояй Престолу Божию и триипостасней славы Божией наслаждаяся, иконою святою на земли в Божественный храмех пребываяй и данною ти свыше благодатию различныя источаяй чудеса. Призри милостивым оком на предстоящия люди и честней твоей иконе умильно молящиеся и просящия от тебе целебныя помощи и заступления, и испроси душам нашим оставление согрешений, сердцем сокрушеным и духом смиренным, тебе, ходатая милости ко Владыце и молитвенника за ны грешныя, призываем, яко приялеси от Него недуги отгоняти и страсти исцеляти, тебе убо просим: не презри нас, недостойных, молящихся и твоея помощи требующих, будучи нам в печалех утешитель, страждующих от пианства врач и исцелитель, во славу Божию трезвящих скорый покровитель и готовейший предстатель, исходатайствуй всем вся, яже ко спасению полезная, яко да твоим ко Господу Богу молитвами получивше благодать и милость, прославим Всех Благих Источника, Бога Единаго в Троице Святей славимаго Отца и Сына и Святого Духа, ныне и присно и во веки веков. Аминь.