А што посылаете православных до скаржиных книг, а правилца руские уничижаете и поруговаете, мовячи, иж в них ничого антихристова вымыслу не знайдет, а в скаржиных и презобилно, то правду есте рекли, иж так ест. Але то чуднЪйшая, иж тые маленкие правилца руские до великого вас пекла угнали, ато еще чуднЪйшая, иж для тых маленких правилец руских вы утечи от Христа до антихриста мусЪли, и то теж чуднЪйшая, иж тые маленкие правилца руские соромоту вЪчную и нынЪ и в будущом вЪцЪ вам зеднали. Ато чему? Для того, иж не по их повелению, але злодЪйски и волчеобразно в церков Христову есте влЪзли и, чим нЪсте были, зватися есте смЪли - пастыри, священики, епископы, которые правилца, не терпячи тое крывды и того голоса вашого имени, дотоля ж вас кликали, крычали и волали, аж вас с того мЪсца, с тое чести и достоинства изогнали. И для того ли их зовете маленкими, што лживое священство показали, обявили, обличили, осудили и до конца обелжили? Видите ли, яко потвар на них, маленкими быти розумЪючи, змышляете. Видите ли, яко болших, от всея вселенныя наполненых зобравши писм, над тые маленкие (которые великую лож до грунту потлумляют и на свЪт фалш оное выставуют и всЪм, яко да ся стерегут неправды, знати дают) показати не можете. Видите ли, як их от зависти, гнЪва и вражды, яко маленки сут, потваряете, а они сут высоки, а они сут толсти, а они сут велики, а они красни. Ато чему? Для того, иж истина в них сЪдит, для того, иж бранты: золото, срЪбро, камЪня дорогое, то ест щирост, суд и правда, в них царствует. Але вы, пред ся оных зацност и достоинство занедбавши, православных до Скарги заганяете. Позволю вам и того, нехай пойдут! СкажЪте ж ми тое, знайдут ли там у Скарги правду, знайдут ли там суд и справедливост. Или утаило ся вам тое, яко православные многокрот и без личбы прибЪжище до Скарги творят, а послухаючого их правды знайти не могут? Или не вЪдаете того, яко православные всЪгды наслЪдуют, а справедливости своему утиску, бЪдЪ и крывдЪ никако же отнести не могут? Или не слыхали есте того, яко православные Скаргу всЪгды пилнуют, а от Скарги о правдЪ николи слыхати не могут? Ато чему? Для того, иж тые великие книги сумнЪня своего перед ними затворил, оглох, онЪмЪл, суду праведного в них показати не хочет, своеи вЪрЪ прелести догажаючи. Чого ж далЪй православных до Скарги бЪгати нудите, которые всЪгды СкарзЪ служат и вЪк свой, служачи, изгубили сут, а справедливост выслужити никако же не могут? Чого ж далЪй у православных хочете? Уже и вашу волю исполняют, во слЪд Скарги всЪгды трудятся, а вытрудити, выпросити, выжебрати и выплакати собЪ у Скарги справедливости никако же не могут. Оставте же теды православным дорогу до великих книг скаржиных показовати, коли в них и найменшои правды нЪмаш. Нехай православные у маленких правилец при правдЪ дома сЪдят, нехай дома у маленких правилец истины пилнуют, нехай дома маленкими правилцами ся спасают, которыми без вонтпеня всякого спастися чают и запевне спасут. А вы юж там з великими скаржиными, яко хочете, так себЪ поступайте, а вы юж там як хочете, так мудрствуйте, а вы юж там як хочете, так ся дмЪте, напинайте, кокошЪте, вгрру возносЪте и вылЪтайте. Будите собЪ кромЪ нас, мы же со Христом богом нашим и нынЪ и в будущем вЪцЪ, даст бог, запевне быти ся сподобимо, которому чест и хвалу, и благодарение, и поклонение возсылаем со отцем и святым духом, нынЪ, и присно, и во вЪки вЪков. Аминь.
А если бы зас хто, не вмЪстивши духа святого разума, котрый лож без всякого гласкания и лицемЪрства обличати звыкл, и на мене от зависти потвар вложити хотЪл, мовячи, яко доразливе и ущипливе в том писаню мовит, - на тое вам так отповЪм. Научилемся от Христа истины без похлЪбства, лож лжею, волка волком, злодЪя злодЪем, разбойника разбойником, диявола дияволом звати. Сам бо преблагий бог, егда сопротивно истинЪ боручих рода еврейского видЪл, рекл им: Вы отца вашего диявола есте и похоти отца вашего творите -. Ато як? Для того, иж во истинЪ не стоите и убийства прагнете, которому кореню диявол отец, яко во истинЪ не стоит и человЪкоубийца ест. Научилемся зас от Иоанна Богослова сопротивно науце евангелской мудруючого - антихристом и его предидучим - лжепророками звати. Научилемся прелщенными от внЪ благочестивой веры мудруючих от Петра, Иуды и Павла апостолов звати. Научилемся и псом безстидным наскакаючого на благочестие хулою безрозмыслне от Павла звати; он бо тот глас изнесе, мовячи: БлюдЪтеся от псов и злых дЪлателей, то ест от лжеименных пастырей, которые у виноградЪ ХристовЪ робитися подняли, а оного сами ж запустошили и тернием беззаконного жития заростили -. Нехай же теды дух святый тые уста затворит и онЪмЪти даст, которые бы тое писаня мое завистию хулити хотЪли, которие от источника истинного начерпавши тот поточок малый от мене в ваши предЪла пущен ест; але хоч же ся видит малый, однак чаю на бога, яко алчущих и жаждущих правду видЪти достаточне напоит, насытит и удовлит. О сем до здЪ.
Будет зас и тая похвалка у противных: Волно ти, мовячи там заочне и в далеком КутЪ, хоч же и правдою, о нас так беспечне ширмовати, але коли бы еси тут был и тобЪ бы есмо тот язык, яко и Никифору, затворили и прописнути не дали -.
На тое вам так одповЪм. Не для далекости от вас будучи, я правду смЪле мовлю и правдою вас постигаю, але за правду и умрЪти изволяю, аще бог дарует, да знаете, и помолЪтеся богу, да вас сподобит иж зраковиднЪ от мене реченное слышати. Аз бо желаю, но еще волЪ божей на се нЪст, а о себЪ наскаковати, безстуднЪ, песски, яко же вы на поповство, без волЪ божей не хощу; научих бо ся благоговЪти ко благоговЪнному и от оного повеления ожидати. Аще и братская любов православных християн с предЪлов естественных мя вытягает, яко и анафема, молюся за них быти, по Павлу, аще бы в чесом на православии пострадати мЪли, желая с ними всЪгды ся знаходити, и если бо аще и не плотию, но вЪрою, любовию и духом всегда есм с ними. Обаче и телесным совокуплением желаю усердно, но не у воля божия быти сему приспЪ, будет же и скоро, даст бог, точию да очистят и изметут церков Христову по реченному им от мене. Але то чуднЪйшая, иж ся вы послуханям правды не хвалите, але крывдою и звитязством правду хелпите; хвалитеся затворами темничными, битьем и забитям хвалитеся, обелженям мирским, яко июдеи, мнимаючи обелжити Христа, але Христос Христом и богом ся зовет пред ся, и ест, и июдеи погибелными сынами ся зовут, сут и будут. Так же и вы, слЪда их держачися, рабом божим творите. Добре, творЪте и жидом послЪдуйте, и мы нехай Христа подражаемо и от вашего мучителства страждемо. Таковый бо вам и ключ ко отверзению царства небесного Христос оставил, яко да от погибелных сынов в вЪцЪ сем страждемо, мовячи: Аще мене изгнаша и вас изженут, аще мене обесчестиша и вас обесчестят, аще мене убиша и вас убиют, яко нЪст ученик над учителя, ниже раб над владыку, довлЪет бо вам тое ж страдати, што и я страдал, - рече. ПрисмотрЪте ж ся, не тое ж ли апостоли, мученици и вси благочесно живущии страдали сут, страждут и страдати хочут, а волхвы, чародЪе и мудреци свЪта сего превознесени сут, по Павлу, успЪвающе на горшее.
Не страште ж теды и мене, панове бискупи, антихристом и его мукою, бо ся его з ласки божои не бою и, ради вашего антихристова страха, святое троици, отца и сына и святого духа, отступити не хочу и, даст бог, тою же силою укрЪпляем совышше, не отступлю. Албо мнимаете и Никифоров язык, которого затворили есте и не слышите его, вашу неправду обличающий, яко нынЪ молчит и безгласен ест? Так вЪдайте, иж болшей тепер на вас крычит и обличает, нижли перво, коли в затворЪ не был. Затворили есте его в Малборку, да не видит Кракова, Лвова и Варшавы и прочиих мЪст, але от презацнЪйшого града, горняго Иерусалима, затворити есте его не могли. Тамо ему ходити и палацы небесные оглядовати чистою молитвою всЪгды волно. Затворили есте его от лица королевского, воеводского и вас всЪх, роскошников свЪта сего, яко да вас не видит, але от лица отца и сына и святого духа и тмы тмам предстоящим позору ангелского затворити есте его не могли, тамо ему смотрити свЪтлост славы неприступного божества и премирных сил небесных всЪгды волно. Не затворен ли был и Иоанн в ПатмЪ-островЪ, але в том затворЪ сына в нЪдрЪх отчиих узрЪл и оттоль болшей благословити и обличати лож начал? Тако же и вы мнимали есте затвором утолити язык Никифоров, а того не вЪдаете, иж тым вязеням ваших панов, бЪсов воздушных поднебесных, болшей мучит, сЪчет, уморяет и вас, им служащих, так явно и голосно обличает, иж аж тот крык, аерные воздухи прелетЪвши, всЪ небесные круги приникнувши, у престола святои троицы ся опирает и ваше мучителство и неправду до конца обнажает, - голу, безобразну, безвстыдну, як едину машкару и курву вшетечную, всему свЪту, на земли и на небеси ясну чкнит, обличает вас пред отцем и сыном и духом святым и всЪми небесными силами, яко за благочестие, вЪру, закон, правду и суд на вас, богопротивных, учиненый, и предЪла учтивости своей згвалтивших, в темницу затвора утвержен ест. Обличает вас на земли, яко вы правдЪ сопротивници, гонители и мучители есте ся стали; лжи же антихристовы поборници, вЪрные слуги и таинники, секретар и заступники быти ся показали; оного правды слышати не претерпЪвши, у вязене поганством тиранским есте угнали. А коли ся християны зовете, чом же не терпите и на собЪ всякия досады, которые бы ся случили, с благодареннем не преносите, але сопротивно отмщаете, взаем стосогубнЪ и злым восплачуете, мучите, томите и убиваете, а пред ся християны именоватися смЪете? Не явная ли то лож, прелест и хула на християнское имя! Видите ли, як християны нЪсте. Не холпите ж ся тым, латинници, антихристово племя и наслЪдие, як вы православных мучити, катовати, бЪду творити и безчестити силу, власт и началство, от антихриста вам дарованное, имате, кгдыж вы тым тиранством побЪдити терпения нашего не можете, вЪры нашои православнои от нас выстрашити и нас в свое поганство уволочи всуе и прожне мыслите, - мы бовЪм не прелюбодЪйчищами есмо антихристова ложа, але власные сынове божии, крещенные в имя отца и сына и святого духа правдивым крещением. Запевно вЪдайте!
Нехай вас тсе гордое дмуханг, и пышное фукане, и широкословное блекотаня, грозное розказанье, и толстое отрыгане того вашого выкрыканя (яко мы прелюбодЪйчищами быти бы мЪли от своей вЪры) не упевняет! Нехай вам надЪи и оттухи (яко не дочекате того николи по Руси) не чинит! Хиба кто, по Павлу, смертную мудрость вЪка сего возлюбивши и вшетеченством паче честного ложабока житие вЪка сего приходит изволивши, к вам отбЪжит и согласитися схочет. О таковом не мовимо. Волно ест и самовластие человЪку, кой хощет спастися или погибнути, умрети или живь быти, сыном божиим или сыном дияволским быти - сие на произволении человЪком лежит. А от православных убо и в жизнь вЪчную нареченных, восточнои церкви послушных сынов - не надЪйтеся, папы римские, кардиналы, арцибискупи, бискупи и всякое лживое священство латинского почту! Не надЪйтеся, власт мирская, королЪ, и всякое преложенство, и всяк послушник папы римского, як з вами ни в чом ся соглашати православные не хощут и папЪ поклонитися не изволят. Не надЪйте ж ся нынЪ, не надЪйтеся завтра, не надЪйтеся по завтрию, в приидущее время и в вЪки вЪков. Аминь.